ລະວັງໄພສັງຄົມ

2.958 29 ມ.ກ. 2020 ນານາສາລະ

   ສຽງ​ຈົ່ມ​ຜ່ານ​ມາ ເລື່ອງ​ການ​ຈູດ​ໝາກ​ກະ­ໂພກ​ໜວກ​ຫູ ຈົນ​ຫຼາຍ​ຄົນ​ຕື່ນ​ຕົກ­ໃຈ ຕອນ​ປີ​ໃໝ່​ສາ­ກົນ​ນັ້ນ​ຫວັງ​ວ່າ​ຫຼາຍ​ຄົນ​ຍັງ​ຈື່​ໄດ້​ດີ ເຊິ່ງ​ທາງ​ນະ­ຄອນ­ຫຼວງ​ໄດ້​ອອກ​ແຈ້ງ​ການ​ເຕືອນ​ລ່ວງ​ໜ້າ​ແຕ່​ກໍ​ຍັງ​ປາ­ກົດ​ຫຼາຍ​ຫຼັງ­ຄາ​ເຮືອນ​ມີ​ກຳ­ລັງ​ຊັບ​ຊື້​ມາ​ຈູດ​ສະ ຫຼອງ​ກັນ​ເຮັດ​ໃຫ້​ບາງ​ຄົນ​ຕົກ­ໃຈ​ນອນ​ບໍ່​ຫຼັບ​ໄດ້​ແຕ່​ຈົ່ມ ຄວາມ​ຈິງ​ການ­ຈັດ­ຕັ້ງ​ຂັ້ນ​ບ້ານ ກອງ​ຫຼອນ ຄວນ​ປ່າວ­ເຕືອນ​ປະ­ຊາ­ຊົນ​ນຳ​ຕື່ມ ເພື່ອ​ຄວາມ​ສະ­ຫງົບ​ຂອງ​ສັງ­ຄົມ.

   ທຸກ​ມື້­ນີ້ ໄພ​ສັງ­ຄົມ ປາ­ກົດ​ອອກ​ມາ​ຫຼາຍ​ແບບ​ເຊັ່ນ ຄົນ​ບໍ່​ດີ ບາງ​ກຸ່ມ​ກໍ​ເອົາ​ສະ​ເປ​ພິກ​ໄທ...ເປັນ​ເຄື່ອງ­ມື​ສີດ​ໃສ່​ໜ້າ​ຕາ​ເຫຍື່ອ​ເວ­ລາ​ອອກ​ປຸ່ນ​ຈີ້ ຫຼື ພວກ​ເສບ​ຢາ​ເວ­ລາ​ຫິວ​ຢາ​ມາ​ກໍ​ອອກ​ລັກ​ງັກ​ແງະ​ຕາມ​ເຮືອນ ຫຼື ວ່າ​ຫ້ອງ​ແຖວ​ເວ­ລາ​ເຈົ້າ​ຂອງ​ບໍ່​ຢູ່ ປາ­ກົດ ການ​ແບບ​ນີ້​ຮຽກ­ຮ້ອງ​ໃຫ້​ການ­ຈັດ­ຕັ້ງ​ຂັ້ນ​ລຸ່ມ​ເອົາ­ໃຈ­ໃສ່ ເລາະ​ກວດ­ກາ​ຢ່າງ​ເຂັ້ມ​ງວດ​ເພື່ອ​ຄວາມ​ປອດ​ໄພ​ຂອງ​ສັງ­ຄົມ ບາງ​ເຮືອນ​ເຫຼືອ​ແຕ່​ຄົນ​ເຖົ້າ​ເຝົ້າ​ເຮືອນ​ພວກ​ໂຈນ​ຂີ້­ລັກ​ກໍ​ສວຍ­ໂອ­ກາດ​ປຸ້ນ​ຈີ້​ລັກ​ງ່າຍ ເຊິ່ງ​ຄວາມ​ຈິງ​ເຮົາ​ກໍ​ຮູ້​ຢູ່​ແກ່​ໃຈ​ວ່າ ໄພ​ສັງ­ຄົມ​ປາ­ກົດ​ມີ​ຫຼາຍ​ຂຶ້ນ​ເຮັດ​ໃຫ້​ຝ່າຍ​ກ່ຽວ ຂ້ອງ​ຕ້ອງ​ໄດ້​ຫາ​ວິ­ທີ​ປ້ອງ​ກັນ ຫຼື ມາດ​ຕະ­ການ​ເຂັ້ມ​ງວດ ບໍ່​ໃຫ້​ສູນ​ເສຍ​ຊັບ​ສິນ​ຂອງ​ປະ­ຊາ­ຊົນ.

   ໄລ­ຍະ​ນີ້ ລະ­ດູ­ແລ້ງ​ຍັງ​ບໍ່​ມົ້ມ​ບັນ­ຫາ​ໄຟ​ໄໝ້ ທັງ​ຕັ້ງ­ໃຈ ແລະ ບໍ່​ຕັ້ງ­ໃຈ ເຊິ່ງ​ເກີດ​ຈາກ​ຄວາມ​ປະ­ໝາດ​ຂອງ​ບາງ​ຄົນ​ເຊັ່ນ: ເມື່ອ​ຕົນ​ເອງ​ເຫັນ​ວ່າ​ຂີ້​ເຫຍື້ອ​ຢູ່​ໃກ້​ເຮືອນ​ຕົນ​ເອງ ກໍ​ພາ­ກັນ​ຈູດ ແລ້ວ​ບໍ່​ເອົາ­ໃຈ­ໃສ່​ດັບ​ມອດ​ໄຟ​ຈູດ​ແລ້ວ​ກໍ​ຍ່າງ​ປັດ​ກົ້ນ​ໜີ ນີ້​ຄື​ປາ­ກົດ­ການ​ໜຶ່ງ​ທີ່​ໃຈ​ຄົນ​ໃນ​ສັງ­ຄົມ​ມັນ​ແຫ້ງ­ແລ້ງ​ເປັນ​ຫ່ວງ​ແຕ່​ຕົນ​ເອງ ບໍ່​ຄຳ­ນຶງ​ເຖິງ​ຊີ­ວິດ​ຊັບ​ສິນ​ຄົນ​ອື່ນ ຖ້າ­ວ່າ​ເຮົາ​ມີ​ໜ່ວຍ​ງານ​ປະ­ກາດ ຕັກ­ເຕືອນ​ໂຄ­ສະ­ນາ​ປູກ​ຈິດ​ສຳ­ນຶກ​ຄົງ​ຈະ​ດີ​ຫຼາຍ​ຂຶ້ນ ເພື່ອ​ຕ້ານ​ຢັນ​ກັບ​ໂລກ​ບໍ­ລິ­ໂພກ​ນິ­ຍົມ​ທີ່​ຄົນ​ເຫັນ­ແກ່​ໂຕ​ຂຶ້ນ​ທຸກ​ມື້.

   ລະ­ວັງ​ໄພ​ສັງ­ຄົມ ຈຶ່ງ​ເປັນ​ເລື່ອງ​ຂອງ​ທຸກ​ຄົນ ແລະ ອົງ​ການ­ຈັດ­ຕັ້ງ​ກ່ຽວ­ຂ້ອງ​ຄວນ​ເອົາ­ໃຈ­ໃສ່​ລົງ​ກວດ­ກາ​ໃກ້­ຊິດ​ປະ­ຊາ­ຊົນ ໂຄ­ສະ­ນາ ປະ­ກາດ ປູກ​ຈິດ​ສຳ­ນຶກ ຄົງ​ເປັນ​ທາງ​ອອກ​ທີ່​ດີ ສຳ­ຄັນ​ກໍ​ແມ່ນ​ພໍ່​ແມ່​ຜູ້​ປົກ­ຄອງ​ບໍ່​ເຂົ້າ​ຂ້າງ​ລ້ຽງ​ລູກ​ຫຼານ​ຈົນ​ມືດ​ບອດ ​ມີ​ແຕ່​ປົກ​ປ້ອງ​ຄົນ​ໃນ​ທາງ​ບໍ່​ຖືກ­ຕ້ອງ!.

ໂດຍ: ດັ້ນກີບເມກ

ຂ່າວທີ່ກ່ຽວຂ້ອງ