ເບິ່ງບ້ານເຂົາເອົາບົດຮຽນ 29-01-2020

2.088 29 ມ.ກ. 2020 ຫົວຂໍ້ຂ່າວອື່ນໆ

   ພົບ​ກັນ​ໃນ​ວັນ​ນີ້ ມີ​ຂ່າວ​ກ່ຽວ​ກັບ​ມາດ​ຕະ­ການ​ຂອງ​ມາ​ເລ​ເຊຍ ເພື່ອ​ຄວບ​ຄຸມ​ແຮງ​ງານ​ຕ່າງ­ປະ­ເທດ​ທີ່​ຜິດ​ກົດ­ໝາຍ ບາດ­ກ້າວ​ການ​ສົ່ງ­ເສີມ​ສິດ­ທິ​ເພດ​ຍິງ​ໃນ ອາ​ຣາ​ບີ ຊາ​ອຸ​ດິດ ແລະ ເຕັກ​ໂນ​ໂລ​ຊີ ຈົດ​ຈຳ​ໃບ​ໜ້າ​ຂອງ​ອິນ​ເດຍ ເພື່ອ​ປ້ອງ​ກັນ​ອາ​ຊະ​ຍາ​ກຳ.

   ທີ່ ມາ​ເລ​ເຊຍ: ກ່ອນ​ໜ້າ​ນີ້​ເກືອບ 4 ປີ ມີ​ຂ່າວ​ຈາກ​ມາ​ເລ​ເຊຍ ທີ່​ໃຫ້​ຮູ້​ກ່ຽວ​ກັບ​ມາດ​ຕະ­ການ​ເດັດ­ຂາດ​ຂອງ​ທາງ​ການ ເພື່ອ​ລົງ­ໂທດ​ບັນ­ດາ​ບໍ­ລິ­ສັດ​ທີ່​ລັກ­ລອບ​ຈ້າງ​ແຮງ​ງານ​ຕ່າງ­ປະ­ເທດ​ທີ່​ຜິດ​ກົດ­ໝາຍ (ໜັງ­ສື­ພິມ KPL 15 ກັນ­ຍາ 2016) ດ້ວຍ​ຮູບ​ການ​ຮິບ​ຊັບ​ສິນ​ຂອງ​ບໍ­ລິ­ສັດ​ທີ່​ມີ​ຄວາມ​ຜິດ ມາດ​ຕະ­ການ​ທີ່​ວ່າ​ນີ້​ໄດ້​ຖືກ​ເຜີຍ­ແຜ່​ໃນ​ວັນ​ທີ 13 ກັນ­ຍາ 2016 ໂດຍ​ທ່ານ ມຸດ​ສະ​ຕາ ຟາ​ອາ­ລີ ຫົວ­ໜ້າ​ກົມ​ຄຸ້ມ​ຄອງ​ຄົນ​ເຂົ້າ​ເມືອງ​ໃນ​ເວ­ລາ​ນັ້ນ ທ່ານ​ຫົວ­ໜ້າ​ກົມ​ໄດ້​ບອກ​ວ່າ: ມາດ​ຕະ­ການ​ນີ້​ບໍ່​ແມ່ນ​ເລື່ອງ​ໃໝ່ ເພາະ​ກົດ­ໝາຍ​ທີ່​ກ່ຽວ­ຂ້ອງ​ຂອງ​ມາ​ເລ​ເຊຍ​ໄດ້​ມີ​ຂໍ້​ກຳ­ນົດ​ທີ່​ໃຫ້​ສິດ​ກົມ​ຄຸ້ມ​ຄອງ​ຄົນ​ເຂົ້າ​ເມືອງ​ໃນ​ການ​ປະ­ຕິ­ບັດ​ງານ​ກັບ​ຜູ້​ລະ­ເມີດ​ກົດ­ໝາຍ ພຽງ​ແຕ່​ວ່າ​ໃນ​ໄລ­ຍະ​ຜ່ານ​ມາ​ນັ້ນ​ຍັງ​ບໍ່​ທັນ​ໄດ້​ປະ­ຕິ­ບັດ​ຢ່າງ​ຄົບ​ຖ້ວນ​ເທື່ອ.

   ທ່ານ​ຫົວ­ໜ້າ​ກົມ​ໄດ້​ສະ­ແດງ​ຄວາມ​ຫວັງ​ວ່າ ສື່​ມວນ​ຊົນ​ຈະ​ອອກ­ແຮງ​ເຜີຍ­ແຜ່​ມາດ​ຕະ­ການ​ນີ້​ໃຫ້​ທົ່ວ​ສັງ­ຄົມ​ຊາບ ໂດຍ​ສະ­ເພາະ ແມ່ນ​ກ່ຽວ​ກັບ​ຜົນ​ທີ່​ຈະ​ຕາມ​ມາ​ສຳ­ລັບ​ບັນ­ດາ​ບໍ­ລິ­ສັດ​ທີ່​ວ່າ​ຈ້າງ ຫຼື ປົກ​ປ້ອງ-ຊຸກ­ເຊື່ອງ​ແຮງ​ງານ​ຕ່າງ­ປະ­ເທດ​ທີ່​ຜິດ​ກົດ­ໝາຍ ມາ​ເລ​ເຊຍ ເປັນ​ໜຶ່ງ​ໃນ​ບັນ­ດາ​ປະ­ເທດ​ທີ່​ມີ​ມາດ​ຕະ­ການ​ເຄັ່ງ​ຄັດ​ທາງ​ກົດ­ໝາຍ​ຕໍ່​ແຮງ​ງານ​ຕ່າງ­ປະ­ເທດ​ທີ່​ຜິດ​ກົດ­ໝາຍ ແນ­ໃສ່​ປົກ​ປ້ອງ ແລະ ພັດ­ທະ­ນາ​ແຮງ​ງານ​ພາຍ​ໃນ​ເອົາ​ເອງ ທັງ​ເປັນ​ການ​ປ້ອງ​ກັນ​ການ​ຮົ່ວ​ໄຫຼ​ເງິນ­ຕາ​ອອກ​ຕ່າງ­ປະ­ເທດ ມາ​ເລ​ເຊຍ​ມີ​ແຜນ​ສ້າງ​ປະ­ເທດ​ໃຫ້​ກາຍ­ເປັນ​ປະ­ເທດ​ອຸດ­ສາ­ຫະ­ກຳ​ຂະ­ຫຍາຍ­ຕົວ​ໃນ​ອະ­ນາ­ຄົດ​ອັນ​ໃກ້ໆ​ນີ້ ໂດຍ​ອາ­ໄສ​ແຮງ​ງານ​ພາຍ​ໃນ​ທີ່​ມີ​ຄວາມ​ຊຳ­ນິ​ຊຳ­ນານ ຫຼຸດ­ຜ່ອນ​ການ​ນຳ​ເຂົ້າ​ແຮງ​ງານ​ຕ່າງ­ປະ­ເທດ.

   ທີ່ ອາ​ຣາ​ບີ ຊາ​ອຸ​ດິດ: ໂດຍ​ສືບ­ຕໍ່​ນະ­ໂຍ­ບາຍ​ເປີດ​ກວ້າງ ແລະ ສົ່ງ­ເສີມ​ເສລີ­ພາບ-ຄວາມ​ສະ­ເໝີ­ພາບ​ທີ່​ບໍ່​ເຄີຍ​ມີ​ມາ​ກ່ອນ​ສຳ­ລັບ​ແມ່­ຍິງ​ອາ​ຣາ​ບີ ຊາ​ອຸ​ດິດ ນັ້ນ ທາງ​ການ​ຂອງ​ປະ­ເທດ​ນີ້​ໄດ້​ເຜີຍ​ໃຫ້​ຮູ້​ກ່ຽວ​ກັບ​ແຜນ​ອະ­ນຸ­ຍາດ​ໃຫ້​ແມ່­ຍິງ​ເຂົ້າ​ຮ່ວມ​ໃນ​ກອງ​ກຳ­ລັງ​ປະ­ກອບ​ອາ­ວຸດ​ແຫ່ງ​ຊາດ ກະ­ຊວງ​ການ​ຕ່າງ­ປະ­ເທດ​ຂອງ ອາ​ຣາ​ບີ ຊາ​ອຸ​ດິດ ໄດ້​ເອີ້ນ​ແຜນ​ອະ­ນຸ­ຍາດ​ດັ່ງ­ກ່າວ​ວ່າ ເປັນ​ອີກ​ບາດ­ກ້າວ​ໜຶ່ງ​ທີ່​ເລັ່ງ​ເປົ້າ​ໝາຍ​ສູ່​ການ​ໃຫ້​ສິດ­ທິ​ຮອບ­ດ້ານ​ຫຼາຍ​ຂຶ້ນ​ສຳ­ລັບ​ແມ່­ຍິງ ໃນ​ປີ 2018 ທາງ​ການ​ຂອງ​ປະ­ເທດ​ນີ້​ກໍ​ໄດ້​ອະ­ນຸ­ຍາດ​ໃຫ້​ແມ່­ຍິງ​ເຂົ້າ​ຮ່ວມ​ໃນ​ກອງ​ກຳ­ລັງ​ຮັກ­ສາ​ຄວາມ​ສະ­ຫງົບ (ຕຳ­ຫຼວດ) ມາ​ແລ້ວ ວ່າ​ກັນ​ວ່າ ນະ­ໂຍ­ບາຍ​ເປີດ​ກວ້າງ ແລະ ສົ່ງ­ເສີມ​ສິດ­ທິ​ຂອງ​ແມ່­ຍິງ​ແບບ​ບໍ່​ເຄີຍ​ມີ​ມາ​ກ່ອນ​ນີ້ ແມ່ນ​ມາ​ຈາກ​ການ​ເບິ່ງ​ກວ້າງ​ເຫັນ​ໄກ​ຂອງ​ອົງ​ມຸງ­ກຸດ ລາ­ຊະ​ກຸ​ມານ​ໂມ​ຮາມ​ເມັດ ບິນ ຊານ​ມານ ຂອງ​ອາ​ຣາ​ບີ ຊາ​ອຸ​ດິດ ນັ້ນ​ເອງ.

   ທີ່ ອິນ​ເດຍ: ຫວ່າງ​ບໍ່​ດົນ​ມາ​ນີ້ ທາງ​ການ​ອິນ​ເດຍ​ໄດ້​ປະ­ກາດ​ໃຫ້​ອົງ­ການ​ສື່​ຂ່າວ​ສາ­ກົນ​ຊາບ​ເຖິງ​ຄວາມ​ພະ­ຍາ­ຍາມ​ຂອງ​ອິນ​ເດຍ​ໃນ​ການ​ສ້າງ​ລະ­ບົບ​ຈົດ​ຈຳ​ໃບ​ໜ້າ​ແບບ​ອັດ­ຕະ­ໂນ­ມັດ ເພື່ອ​ເປົ້າ​ໝາຍ​ເກັບ​ກຳ​ຂໍ້​ມູນ​ກ່ຽວ​ກັບ​ອາ​ຊະ​ຍາ​ກຳ​ໃນ​ຂອບ​ເຂດ​ທົ່ວ​ປະ­ເທດ ອິນ​ເດຍ​ໄດ້​ຮຽກ­ຮ້ອງ​ໄປ​ຫາ​ບັນ­ດາ​ບໍ­ລິ­ສັດ​ເຕັກ​ໂນ​ໂລ​ຊີ ຂໍ້​ມູນ​ຂ່າວ­ສານ​ໃນ​ທົ່ວ​ໂລກ​ໃຫ້​ສົ່ງ​ຄຳ​ຄິດ​ເຫັນ ແລະ ຂໍ້​ສະ­ເໜີ​ຕ່າງໆ​ໄປ​ຫາ​ໜ່ວຍ​ງານ​ເກັບ​ກຳ​ຂໍ້​ມູນ​ອາ​ຊະ​ຍາ​ກຳ​ແຫ່ງ​ຊາດ​ອິນ​ເດຍ ທີ່​ນະ­ຄອນ­ຫຼວງ​ນິວ​ເດລີ ທາງ​ການ​ອິນ​ເດຍ​ຕັ້ງ​ຄວາມ​ຫວັງ​ເອົາ​ໄວ້​ວ່າ ລະ­ບົບ​ຈົດ​ຈຳ​ໃບ​ໜ້າ​ແບບ​ອັດ­ຕະ­ໂນ­ມັດ​ນີ້​ຈະ​ສາ­ມາດ​ຊ່ວຍ​ໃຫ້​ບັນ­ດາ​ໜ່ວຍ​ງານ​ປະ­ຕິ­ບັດ​ກົດ­ໝາຍ​ໃນ 29 ລັດ ແລະ 9 ແຄວ້ນ​ຂອງ​ອິນ​ເດຍ​ເຂົ້າ​ເຖິງ​ຖານ​ຂໍ້​ມູນ​ທີ່​ເປັນ​ເອ­ກະ​ພາບ ແລະ ລວມ​ສູນ.

ຂ່າວທີ່ກ່ຽວຂ້ອງ