ຈຳນວນ​ຜູ້​ເສຍ​ຊີວິດ​ຈາກ​ພະຍາດ​ປອດ​ອັກເສບ​ທີ່​ເກີດ​ຈາກ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ ສືບຕໍ່​ເພີ່ມ​ຂຶ້ນ

2.572 30 ມ.ກ. 2020 ຂ່າວຕ່າງປະເທດ
ຈຳນວນ​ຜູ້​ເສຍ​ຊີວິດ​ຈາກ​ພະຍາດ​ປອດ​ອັກເສບ​ທີ່​ເກີດ​ຈາກ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ ສືບຕໍ່​ເພີ່ມ​ຂຶ້ນ

   ຂ່າວສານ​ຣອຍ​ເຕີ ລາຍ​ງານ​ວ່າ ຈຳນວນ​ຜູ້​ເສຍ​ຊີວິດ​ຈາກ​ພະຍາດ​ປອດ​ອັກເສບ ຍ້ອນ​ການ​ລະບາດ​ຂອງ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່​ຢູ່​ໃນ​ຈີນ ໄດ້​ເພີ່ມ​ຂຶ້ນ​ເປັນ 131 ຄົນ ທ່າມກາງ​ທີ່​ເຈົ້າ​ໜ້າທີ່​ສາທາລະນະ​ສຸກ​ໃນ​ແຂວງ​ຫູ​ເບ (ພາກ​ກາງຂອງ​ຈີນ) ທີ່​ເປັນ​ຈຸດ​ໃຈ​ກາງຂອງ​ການລະບາດພະຍາດ​ດັ່ງກ່າວ ໄດ້​ຢັ້ງຢືນ​ຜູ້​ຕິດພະຍາດ​ລາຍ​ໃໝ່​ຕື່ມ​ອີກ 840 ລາຍ.

    ໃນ​ແຈ້ງ​ການ​ທີ່​ມີ​ອອກ​ມາ​ໃນ​ວັນ​ທີ 29 ມັງກອນ​ນີ້ ເຈົ້າ​ໜ້າທີ່​ສາທາລະນະ​ສຸກ​ໃນ​ແຂວງ​ຫູ​ເບ ໃຫ້​ຮູ້​ວ່າ ໄລ່​ມາ​ຮອດ​ທ້າຍ​ວັນ​ທີ 28 ມັງກອນ ໄດ້​ມີ​ຜູ້​ເສຍ​ຊີວິດ​ຕື່ມ​ອີກ 25 ຄົນ ຍ້ອນ​ພະຍາດ​ດັ່ງກ່າວ. ຈາກ​ຕົວ​ເລກ​ໃໝ່​ຫຼ້າ​ສຸດ​ຂອງ​ແຂວງ ຫູ​ເບ ນັ້ນ ລວມ​ແລ້ວ​ມີ​ຜູ້​ໄດ້​ຮັບ​ການ​ຢັ້ງຢືນ​ຢ່າງ​ໜ້ອຍ 5.355 ຄົນ ວ່າ​ຕິດ ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ ຢູ່​ໃນ​ຈີນ. ກ່ອນ​ໜ້າ​ນັ້ນ ຄະນະ​ກຳມະການ​ສາທາລະນະ​ສຸກ​ແຫ່ງ​ຊາດ​ຈີນ ໄດ້​ຢັ້ງຢືນ​ວ່າ ໄລ່​ມາ​ຮອດ​ທ້າຍ​ວັນ​ທີ 27 ມັງກອນ ມີ​ຜູ້​ຕິດ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່​ລວມ​ແລ້ວ 4.515 ຄົນ.

     ໃນ​ຂະນະ​ດຽວ​ກັນ ແຫຼ່ງ​ຂ່າວ​ຂອງ​ຈີນ ລາຍ​ງານ​ວ່າ ໃນ​ວັນ​ທີ 27 ມັງກອນ ທ່ານ​ຫຼີ​ເຄີ້​ສຽງ ນາຍົກລັດຖະມົນຕີ​ຈີນ ຫົວໜ້າ​ໜ່ວຍ​ງານ​ສູນ​ກາງຂອງ​ຈີນ ໃນ​ການ​ນຳພາ​ວຽກ​ງານ​ຮັບ​ມື​ກັບ​ການ​ແຜ່​ລະບາດ​ຂອງ​ພະຍາດ​ປອດ​ອັກເສບ​ຈາກ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ ໄດ້​ເດີນທາງ​ເຖິງ​ນະຄອນ​ອູ​ຫັ້ນ ທີ່​ຂຶ້ນ​ກັບ​ແຂວງ ຫູ​ເບ ເພື່ອ​ກວດກາ ແລະ ຊີ້​ນຳ​ວຽກ​ງານ​ປ້ອງ​ກັນ ແລະ ຄວບ​ຄຸມ​ການ​ແຜ່​ລະບາດ​ຂອງ​ພະຍາດ ພ້ອມ​ທັງ​ຢື້​ຢາມ​ຖາມ​ຂ່າວ​ຜູ້​ເປັນ​ພະຍາດ ແລະ  ພະນັກງານ​ການ​ແພດ​ທີ່​ປະຕິບັດ​ໜ້າທີ່​ຢູ່​ແນວ​ໜ້າ.

ຂ່າວທີ່ກ່ຽວຂ້ອງ