ເບິ່ງບ້ານເຂົາເອົາບົດຮຽນ 30-01-2020

2.304 30 ມ.ກ. 2020 ຫົວຂໍ້ຂ່າວອື່ນໆ

   ມື້­ນີ້ ຂໍ​ພາ​ທ່ານ​ຜູ້​ອ່ານ​ໄປ​ຮູ້​ກັບ​ມາດ​ຕະ­ການ​ຂອງ ສປ ຈີນ ໃນ​ການ​ຄຸ້ມ​ຄອງ​ຄວາມ​ປອດ​ໄພ​ຂອງ​ອາ­ຫານ​ຢູ່​ຕາມ​ໂຮງ­ຮຽນ ກົດ­ໝາຍ​ອິນ​ເຕີ​ເນັດ​ຂອງ​ຣັດ​ເຊຍ ແລະ ເລື່ອງ​ຄາ​ຕະ​ກອນ​ໃຈ​ໂຫດ​ຢູ່​ຍີ່­ປຸ່ນ.

   ທີ່ ສປ ຈີນ: ເພື່ອ​ຮັບ­ປະ­ກັນ​ຄວາມ​ປອດ​ໄພ​ດ້ານ​ອາ­ຫານ​ຕາມ​ຮ້ານ​ອາ­ຫານ​ໃນ​ໂຮງ­ຮຽນ​ທຸກ​ແຫ່ງ​ໃນ​ທົ່ວ​ປະ­ເທດ ໄດ້​ມີ​ຂ່າວ​ວ່າ: ນັບ​ແຕ່​ເດືອນ​ກັນ­ຍາ ປີ 2019 ເປັນ­ຕົ້ນ​ມາ ທາງ​ການ ສປ ຈີນ ໄດ້​ເລັ່ງ​ກວດ​ສອບ​ຄວາມ​ປອດ​ໄພ​ດ້ານ​ສະ­ບຽງ​ອາ­ຫານ​ຢ່າງ​ເຂັ້ມ​ງວດ ຫຼັງ​ຈາກ​ໄດ້​ສັ່ງ​ປິດ​ທຸ­ລະ​ກິດ​ດ້ານ​ອາ­ຫານ​ທີ່​ບໍ່​ມີ​ໃບ​ອະ­ນຸ­ຍາດ​ແລ້ວ ຈຳ­ນວນ 496 ກໍ­ລະ­ນີ ແລະ ໄດ້​ປ່ຽນ​ຜູ້​ຈັດ​ຫາ​ວັດ­ຖຸ​ດິບ 2.352 ກໍ­ລະ­ນີ.

   ມາ​ຮອດ​ທ້າຍ​ເດືອນ​ຕຸ­ລາ ປີ 2019 ລັດ­ຖະ­ບານ​ຈີນ​ໄດ້​ກວດ​ສອບ​ຜູ້​ໃຫ້​ບໍ­ລິ­ການ​ດ້ານ​ອາ­ຫານ ຈຳ­ນວນ 631.000 ກໍ­ລະ­ນີ ພາຍ​ໃນ​ສະ­ຖານ­ທີ່​ການ​ສຶກ​ສາ ແລະ ບໍ­ລິ­ເວນ​ອ້ອມ​ຮອບ ພ້ອມ​ທັງ​ໄດ້​ແຈ້ງ​ເຕືອນ​ຜູ້​ບໍ­ລິ­ຫານ 11.400 ກໍ­ລະ­ນີ ມີ​ຜູ້​ທີ່​ຍົກ­ຍ້າຍ​ບໍ­ລິ­ການ​ດ້ານ​ອາ­ຫານ ຈຳ­ນວນ 536 ກໍ­ລະ­ນີ ການ​ກວດ​ສອບ​ຄວາມ​ປອດ​ໄພ​ດ້ານ​ອາ ຫານ​ຕາມ​ໂຮງ­ຮຽນ​ມີ​ຂຶ້ນ​ໃນ​ທ່າມ­ກາງ​ກໍ­ລະ­ນີ​ບໍ ລິ​ການ​ອາ­ຫານ​ທີ່​ຂາດ​ຫຼັກ​ອະ­ນາ­ໄມ ດ້ອຍ​ຄຸນ​ນະ​ພາບ ເຊິ່ງ​ກໍ່­ໃຫ້­ເກີດ​ບັນ­ຫາ​ດ້ານ​ສຸ­ຂະ­ພາບ​ຂອງ​ຜູ້​ບໍ­ລິ­ໂພກ ບັ້ນ​ກວດ​ສອບ​ມີ​ເປົ້າ​ໝາຍ​ທັບ​ມ້າງ​ປາ­ກົດ­ການ​ສໍ້​ລາດ​ບັງ​ຫຼວງ​ໃນ​ຂະ​ບວນ​ສະ­ໜອງ​ອາ­ຫານ​ໃຫ້​ແກ່​ໂຮງ­ຮຽນ​ໃຫ້​ໝົດ​ສິ້ນ​ໄປ.

   ທີ່ ຣັດ​ເຊຍ: ກົດ­ໝາຍ​ສະ­ບັບ​ໃໝ່ ວ່າ​ດ້ວຍ​ອິນ​ເຕີ​ເນັດ​ຂອງ​ຣັດ​ເຊຍ ທີ່​ມີ​ຜົນ​ບັງ­ຄັບ​ໃຊ້​ແຕ່​ວັນ​ທີ 1 ເດືອນ​ພະ­ຈິກ ປີ 2019 ເປັນ­ຕົ້ນ​ມາ​ນັ້ນ​ມີ​ການ​ກຳ­ນົດ​ສິດ​ຮອບ­ດ້ານ​ໃຫ້​ອົງ­ການ​ຕິດ­ຕາມ​ກວດ­ກາ​ເຄືອ​ຄ່າຍ​ໂທລະ​ຄົມ­ມະ­ນາ­ຄົມ ເຕັກ​ໂນ​ໂລ​ຊີ ຂໍ້​ມູນ​ຂ່າວ­ສານ​ແຫ່ງ​ຊາດ ໃນ​ການ​ຮັບ­ຜິດ­ຊອບ​ການ​ເຕົ້າ­ໂຮມ​ທົ່ວ​ຕາ​ໜ່າງ​ຄົມ­ມະ­ນາ­ຄົມ ແລະ ມີ​ຂໍ້​ກຳ­ນົດ​ລະ­ອຽດ​ວ່າ: ຖ້າ​ການ​ເຄື່ອນ ໄຫວ​ຂອງ​ເຄືອ​ຄ່າຍ​ອິນ​ເຕີ​ເນັດ​ຣັດ​ເຊຍ​ປະ​ເຊີນ​ກັບ​ຄວາມ​ສ່ຽງ ກໍ​ຕ້ອງ​ໄດ້​ສ້າງ­ຕັ້ງ​ລະ­ບົບ​ກຳ­ນົດ​ສາຍ​ທາງ​ອິນ​ເຕີ​ເນັດ​ທົ່ວ​ປະ­ເທດ ໂດຍ​ຜ່ານ​ບັນ ດາ​ເຊີ​ເວີ (ຈັກ​ແມ່) ພາຍ​ໃນ​ປະ­ເທດ ແຕ່​ຕ້ອງ​ໃຊ້​ມາດ​ຕະ­ການ​ສະ­ກັດ​ກັ້ນ​ຄວາມ​ສ່ຽງ​ຖືກ​ຕັດ​ການ​ເຊື່ອມ​ຈອດ​ຂອງ​ລະ­ບົບ​ຣັດ​ເຊຍ​ກັບ​ເຄືອ​ຄ່າຍ​ອິນ​ເຕີ​ເນັດ​ທົ່ວ​ໂລກ.

   ຂ່າວ​ໃຫ້​ຮູ້​ຕື່ມ​ວ່າ: ໃນ​ເດືອນ​ມີ­ນາ ປີ 2019 ທ່ານ​ປະ­ທາ­ນາ­ທິ­ບໍ­ດີ ປູ​ຕິນ ຂອງ​ຣັດ​ເຊຍ ໄດ້​ລົງ​ນາມ​ປະ­ກາດ​ໃຊ້​ກົດ­ໝາຍ​ທີ່​ກຳ­ນົດ ວ່າ​ດ້ວຍ​ການ​ປັບ­ໄໝ ແລະ ຈັບ​ກຸມ​ຄຸມ​ຂັງ​ຜູ້​ທີ່​ໃຊ້​ເຄືອ​ຄ່າຍ​ສື່​ສັງ­ຄົມ ເພື່ອ​ເຜີຍ­ແຜ່​ຂ່າວ​ປອມ ແລະ ເພື່ອ​ເປົ້າ ໝາຍ​ໝິ່ນ­ປະ­ໝາດ ທຳ­ລາຍ​ກຽດ​ຊື່​ສຽງ​ຂອງ​ບັນ­ດາ​ເຈົ້າ​ໜ້າ­ທີ່.

   ທີ່ ຍີ່­ປຸ່ນ: ຂ່າວ​ຈາກ​ຍີ່­ປຸ່ນ ໃນ​ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 8 ມັງ­ກອນ​ປີ​ນີ້ ໃຫ້​ຮູ້​ວ່າ: ສານ​ເມືອງ​ໂຢ​ໂກ​ຮາ​ມະ ຍີ່­ປຸ່ນ ໄດ້​ຕັດ­ສິນ​ຈຳ​ຄຸກ​ຕະ­ຫຼອດ​ຊີ­ວິດ​ຄາ​ຕະ​ກອນ​ໃຈ​ໂຫດ​ທີ່​ໃຊ້​ມີດ​ແທງ​ຄົນ​ໂດຍ­ສານ 1 ຄົນ​ເສຍ​ຊີ­ວິດ ໃນ​ຂະ­ນະ​ເດີນ­ທາງ​ດ້ວຍ​ລົດ­ໄຟ​ຄວາມ​ໄວ​ສູງ ຈາກ​ນະ­ຄອນ­ຫຼວງ​ໂຕ​ກຽວ ສູ່​ເມືອງ​ຊິນ ໂອ­ຊາ​ກະ ໃນ​ວັນ​ທີ 9 ມິ­ຖຸ­ນາ ປີ 2018 ຄາ​ຕະ​ກອນ​ຄົນ​ນີ້​ຊື່­ວ່າ ອິ​ຈິ​ໂຣະ ໂກ​ຈິ​ມະ ອາ­ຍຸ 24 ປີ ສ່ວນ​ຜູ້­ໂດຍ­ສານ​ທີ່​ຖືກ​ຄາ­ຕະ­ກຳ​ນັ້ນ​ຊື່ ທ້າວ ໂກ​ຕາ​ໂຣະ ອູ​ເມ​ດະ ອາ­ຍຸ 38 ປີ ນອກ­ຈາກ​ຜູ້​ເສຍ​ຊີ­ວິດ​ແລ້ວ ຄົນ​ໂດຍ­ສານ​ເພດ​ຍິງ​ອີກ​ສອງ​ຄົນ​ກໍ​ໄດ້​ຮັບ​ບາດ­ເຈັບ​ສາ­ຫັດ​ຈາກ​ການ​ໄລ່​ແທງ​ຄັ້ງ​ນັ້ນ.

   ຂ່າວ​ບອກ​ວ່າ: ເວ­ລາ​ສຳ­ລັບ​ໃຫ້​ທ້າວ ອິ​ຈິ​ໂຣະ ໂກ​ຈິ​ມະ ຍື່ນ​ອຸ­ທອນ​ນັ້ນ​ໄດ້​ສິ້ນ​ສຸດ​ລົງ​ໃນ​ວັນ​ທີ 6 ເດືອນ​ມັງ­ກອນ​ນີ້​ເອງ ແຕ່​ເຂົາ​ບໍ່​ອຸ­ທອນ ດັ່ງ­ນັ້ນ ການ​ຕັດ­ສິນ​ຂອງ​ສານ​ຈຶ່ງ​ຖືກ​ປະ­ຕິ­ບັດ​ໂດຍ​ອັດ ຕະ​ໂນ​ມັດ ໃນ​ການ​ໃຫ້­ການ​ຕໍ່​ສານ​ນັ້ນ ຄາ​ຕະ​ກອນ​ໃຈ​ໂຫດ​ບອກ​ວ່າ: ເຂົາ​ໄດ້​ກໍ່​ເຫດ​ດ້ວຍ​ເຈດ​ຕະ​ນາ ເພາະ​ຕ້ອງ­ການ​ໃຊ້​ຊີ­ວິດ​ທັງ​ໝົດ​ທີ່​ຍັງ​ເຫຼືອ​ຢູ່​ໃນ​ຄຸກ ເຂົາ​ຮູ້​ດີ​ວ່າ ຖ້າ​ຂ້າ​ຄົນ​ຕາຍ​ຮອດ 3 ຄົນ ເຂົາ​ຈະ​ຖືກ​ປະ­ຫານ​ຊີ­ວິດ ດັ່ງ­ນັ້ນ ເຂົາ​ຈຶ່ງ​ຈຳ­ກັດ​ຈຳ­ນວນ​ເຫຍື່ອ​ຂອງ​ເຂົາ​ເພື່ອ​ໃຫ້​ໄດ້​ຮັບ​ໂທດ​ຕິດ​ຄຸກ​ຕະ­ຫຼອດ​ຊີ­ວິດ ແນວ​ນີ້​ຊ່າງ​ມີ​ຈັ່ງ​ແມ່ນ​ຊາດ !.

ຂ່າວທີ່ກ່ຽວຂ້ອງ