ຜົນການກວດກາ

2.798 31 ມ.ກ. 2020 ນານາສາລະ

   ສະ­ບັບ​ກ່ອນ​ໄດ້​ຂຽນ​ເຖິງ​ສິ່ງ​ທີ່​ອັນ­ຕະ­ລາຍ​ກວ່າ​ການ​ສໍ້​ລາດ​ບັງ​ຫຼວງ​ນັ້ນ​ຄື: ການ​ທີ່​ບໍ່​ຖື​ພຶດ­ຕິ​ກຳ​ສໍ້​ລາດ​ບັງ​ຫຼວງ​ເປັນ​ການ​ສໍ້​ລາດ​ບັງ​ຫຼວງ.

   ສະ­ບັບ​ນີ້ ຢາກ​ນຳ​ເອົາ​ຜົນ­ງານ​ຂອງ​ຄະ­ນະ​ກວດ­ກາ​ພັກ-ອົງ­ການ​ກວດ­ກາ​ລັດ­ຖະ­ບານ ໂດຍ​ໃນ​ໜຶ່ງ​ປີ­ຜ່ານ­ມາ ສາ­ມາດ​ກວດ​ພົບ​ເຫັນ​ຜົນ​ເສຍ​ຫາຍ​ເກືອບ 1.500 ຕື້​ກີບ ສຳ­ລັບ​ເງິນ​ໂດ​ລາ​ແມ່ນ 24,68 ລ້ານ​ໂດ​ລາ 10,08 ລ້ານ​ບາດ ລົດ​ໃຫຍ່ 5 ຄັນ ໃນ​ນັ້ນ ສາ­ມາດ​ເກັບ​ກູ້​ຄືນ​ໄດ້ 35,95 ຕື້​ກີບ 10 ລ້ານ​ບາດ 200.000 ໂດ​ລາ ແລະ ລົດ​ໃຫຍ່ 4 ຄັນ.

   ກອງ​ປະ­ຊຸມ​ວຽກ​ງານ​ກວດ­ກາ​ທົ່ວ​ປະ­ເທດ​ປະ­ຈຳ​ປີ 2019 ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ​ໃນ​ວັນ​ທີ 8 ມັງ­ກອນ ຜ່ານ​ມາ ແລະ ປິດ​ລົງ​ດ້ວຍ​ຜົນ­ສຳ­ເລັດ​ຢ່າງ​ສະ­ຫງ່າ​ງາມ ໃນ​ວັນ​ທີ 10 ມັງ­ກອນ​ນີ້ ທີ່​ສະ­ໂມ­ສອນ​ຄະ­ນະ​ກວດ­ກາ​ສູນ​ກາງ​ພັກ (ຫຼັກ 6) ພາຍ​ໃຕ້​ການ​ເປັນ​ປະ­ທານ​ຂອງ​ສະ­ຫາຍ ບຸນ​ທອງ ຈິດ​ມະ­ນີ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ­ທິ­ການ​ສູນ​ກາງ​ພັກ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກວດ­ກາ​ສູນ​ກາງ​ພັກ ປະ­ທານ​ອົງ­ການ​ກວດ­ກາ​ລັດ­ຖະ­ບານ ຫົວ­ໜ້າ​ອົງ­ການ​ດ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ມີ​ບັນ­ດາ​ສະ­ຫາຍ​ຮອງ​ປະ­ທານ ຄະ­ນະ​ພັກ ຄະ­ນະ​ກວດ­ກາ​ສູນ​ກາງ​ພັກ ຄະ­ນະ​ພັກ ຄະ­ນະ​ປະ­ຈຳ ບັນ­ດາ​ປະ­ທານ ຮອງ​ປະ­ທານ ຄະ­ນະ​ກວດ­ກາ​ບັນ­ດາ​ກະ­ຊວງ ອົງ­ການ ແຂວງ-ນະ­ຄອນ­ຫຼວງ ຫົວ­ໜ້າ ຮອງ​ຫົວ­ໜ້າ​ກົມ ພ້ອມ​ດ້ວຍ​ສະ­ມາ­ຊິກ​ພັກ-ພະ­ນັກ­ງານ​ທົ່ວ​ຄະ­ນະ​ກວດ­ກາ​ສູນ​ກາງ​ພັກ ແລະ ອົງ­ການ​ກວດ­ກາ​ລັດ­ຖະ­ບານ​ເຂົ້າ​ຮ່ວມ​ທັງ​ໝົດ 300 ກວ່າ​ສະ­ຫາຍ.

   ກອງ​ປະ­ຊຸມ​ຄັ້ງ​ນີ້ ສະ­ຫາຍ ສີ​ໃນ ມຽງ​ລາ​ວັນ ຮອງ​ເລ­ຂາ​ຄະ­ນະ​ພັກ ຮອງ​ປະ­ທານ​ຄະ­ນະ​ກວດ­ກາ​ສູນ​ກາງ​ພັກ ອົງ­ການ​ກວດ­ກາ​ລັດ­ຖະ­ບານ ໄດ້​ຂຶ້ນ​ຜ່ານ​ຮ່າງ​ບົດ​ສະ­ຫຼຸບ​ຕີ​ລາ­ຄາ ການ­ເຄື່ອນ­ໄຫວ​ວຽກ​ງານ​ຕິດ­ຕາມ-ກວດ­ກາ ແລະ ສະ­ກັດ​ກັ້ນ​ຕ້ານ​ການ​ສໍ້​ລາດ​ບັງ​ຫຼວງ​ໃນ​ປີ 2019 ທິດ​ທາງ​ແຜນ­ການ​ວຽກ​ງານ​ກວດ­ກາ​ປີ 2020 ຊຶ່ງ​ໄລ­ຍະ 1 ປີ ຜ່ານ​ມາ ຄະ­ນະ​ພັກ ອົງ­ການ​ປົກ­ຄອງ​ຄະ­ນະ​ກວດ­ກາ​ພັກ-ອົງ­ການ​ກວດ­ກາ​ລັດ​ແຕ່​ລະ​ຂັ້ນ ໄດ້​ສຸມ​ໃສ່​ຈັດ​ຕັ້ງ​ປະ­ຕິ­ບັດ​ວຽກ​ງານ​ກວດ­ກາ​ຕາມ​ພາ­ລະ​ບົດ­ບາດ ໜ້າ­ທີ່ ຂອບ​ເຂດ​ສິດ​ຂອງ​ຕົນ ເປັນ­ຕົ້ນ ແມ່ນ​ການ​ຄົ້ນ­ຄວ້າ​ສ້າງ ແລະ ເຜີຍ­ແຜ່-ໂຄ­ສະ­ນາ​ນິ­ຕິ​ກຳ​ຕ່າງໆ​ທີ່​ກ່ຽວ­ຂ້ອງ ການ­ເຄື່ອນ­ໄຫວ​ວຽກ​ງານ​ຕິດ­ຕາມ-ກວດ­ກາ​ພັກ ການ​ຕິດ­ຕາມ-ກວດ­ກາ​ການ​ບໍ­ລິ­ຫານ​ລັດ ໂດຍ​ອົງ­ການ​ກວດ­ກາ​ລັດ​ແຕ່​ລະ​ຂັ້ນ​ໄດ້​ຕິດ­ຕາມ ກວດ­ກາ​ພາ­ລະ​ບົດ­ບາດ​ຂອງ​ຕົນ ແລະ ຕາມ​ການ​ລາຍ​ງານ​ຈາກ 21 ກະ­ຊວງ-ອົງ­ການ 17 ແຂວງ-ນະ­ຄອນ­ຫຼວງ ໄດ້​ກວດ­ກາ​ທັງ​ໝົດ 945 ເປົ້າ​ໝາຍ ໃນ​ນີ້ ຕິດ­ຕາມ​ກວດ­ກາ​ປົກ­ກະ­ຕິ 333 ເປົ້າ​ໝາຍ ສຶບ​ຕໍ່​ຕິດ­ຕາມ​ກວດ­ກາ​ໂຄງ­ການ​ລົງ­ທຶນ​ຂອງ​ລັດ​ເລີ່ມ​ແຕ່​ຫົວ­ທີ 140 ໂຄງ­ການ ກວດ­ກາ​ຕາມ​ຜົນ​ການ​ກວດ​ສອບ 307 ເປົ້າ​ໝາຍ ຜ່ານ​ການ​ຕິດ­ຕາມ​ກວດ­ກາ ພົບ​ເຫັນ​ຜົນ​ເສຍ​ຫາຍ​ທັງ​ໝົດ 1.477,64 ຕື້​ກີບ 10,08 ລ້ານ​ບາດ 24,68 ລ້ານ​ໂດ​ລາ ລົດ​ໃຫຍ່ 5 ຄັນ ເກັບ​ກູ້​ຄືນ 35,95 ຕື້​ກີບ 10 ລ້ານ​ບາດ 200.000 ໂດ​ລາ ແລະ ລົດ​ໃຫຍ່ 4 ຄັນ.

   ກອງ​ປະ­ຊຸມ​ໄດ້​ຮັບ​ຟັງ ການ​ເຜີຍ­ແຜ່​ເອ­ກະ­ສານ​ສຳ­ຄັນ​ຕ່າງໆ​ກ່ຽວ​ກັບ​ວຽກ​ງານ​ກວດ­ກາ ເປັນ­ຕົ້ນ​ແມ່ນ​ບົດ​ລາຍ​ງານ​ກ່ຽວ​ກັບ​ການ​ສະ­ກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ ບົດ​ລາຍ​ງານ​ກ່ຽວ​ກັບ​ການ​ກວດ­ກາ​ຕາມ​ຜົນ​ການ​ກວດ​ສອບ ແລະ ຕິດ­ຕາມ​ກວດ­ກາ​ການ​ລົງ­ທຶນ​ຂອງ​ລັດ​ເລີ່ມ​ແຕ່​ຫົວ­ທີ ບົດ​ລາຍ​ງານ​ກ່ຽວ​ກັບ​ການ​ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ເລກ​ທີ 15/ນຍ ແລະ ແກ້​ໄຂ​ຜົນ​ຂອງ​ການ​ກວດ­ກາ ບົດ​ລາຍ​ງານ​ກ່ຽວ​ກັບ​ການ​ປັບ­ປຸງ​ກົງ­ຈັກ​ການ­ຈັດ­ຕັ້ງ-ພະ­ນັກ­ງານ ບົດ​ລາຍ​ງານ​ວຽກ​ງານ​ຕິດ­ຕາມ ກວດ­ກາ​ພັກ ແລະ ລະ­ບຽບ​ການ ວ່າ​ດ້ວຍ​ການ​ຄົ້ນ­ຄວ້າ ແກ້​ໄຂ​ຄຳ​ຮ້ອງ​ຟ້ອງ-ຮ້ອງ­ທຸກ ແລະ ຄຳ​ສະ­ເໜີ ນອກ​ນີ້ ຜູ້​ແທນ​ກອງ​ປະ­ຊຸມ​ແຕ່​ລະ​ພາກ­ສ່ວນ ໄດ້​ຜັດ­ປ່ຽນ​ກັນ​ຂຶ້ນ​ປະ­ກອບ​ຄຳ​ຄິດ​ຄຳ​ເຫັນ​ຕາມ​ການ​ເຈາະ​ຈີ້ມ​ຂອງ​ປະ­ທານ​ກອງ​ປະ­ຊຸມ​ຢ່າງ​ກົງ​ໄປ​ກົງ​ມາ ຊອກ​ໃຫ້​ເຫັນ​ດ້ານ​ດີ​ທີ່​ຕັ້ງ­ໜ້າ ເພື່ອ​ເສີມ​ຂະ­ຫຍາຍ ແລະ ຊອກ​ວິ­ທີ​ແກ້​ໄຂ​ດ້ານ​ອ່ອນ ຂໍ້­ຄົງ­ຄ້າງ​ຢ່າງ​ເຂັ້ມ​ງວດ.

   ໃນ​ໂອ­ກາດ​ອັນ​ສະ­ຫງ່າ​ລາ­ສີ​ນີ້ ສະ­ຫາຍ ບຸນ​ທອງ ຈິດ​ມະ­ນີ ໄດ້​ໃຫ້​ກຽດ​ໂອ້​ລົມ​ຕໍ່​ກອງ​ປະ­ຊຸມ​ດັ່ງ­ກ່າວ ຊຶ່ງ​ສະ­ຫາຍ ໄດ້​ເນັ້ນ​ໜັກ​ຫຼາຍ​ບັນ­ຫາ ໂດຍ​ສະ­ເພາະ​ແມ່ນ​ການ​ຕິດ­ຕາມ-ກວດ­ກາ ການ​ຄຸ້ມ​ຄອງ​ບໍ­ລິ­ຫານ​ລັດ ແຕ່​ລະ​ຂັ້ນ​ແມ່ນ​ໃຫ້​ສຸມ​ໃສ່​ບາງ​ວຽກ​ງານ​ດັ່ງ­ນີ້: (1) ຕິດ­ຕາມ-ກວດ­ກາ​ການ​ປະ­ຕິ­ບັດ​ພາ­ລະ​ບົດ­ບາດ​ໜ້າ­ທີ່ ການ​ໃຊ້​ສິດ​ອຳ­ນາດ​ຂອງ​ແຕ່​ລະ​ຂະ­ແໜງ­ການ ແລະ ທ້ອງ­ຖິ່ນ ການ​ປະ­ຕິ­ບັດ​ມະ­ຕິ ຄຳ​ສັ່ງ ກົດ­ໝາຍ ດຳ­ລັດ ແລະ ລະ­ບຽບ​ການ​ຕ່າງໆ​ຂອງ​ລັດ (2) ຕິດ­ຕາມ-ກວດ­ກາ​ການ​ເກັບ​ລາຍ​ຮັບ​ເຂົ້າ​ງົບ­ປະ­ມານ ການ​ປະ­ຕິ­ບັດ​ກົດ­ໝາຍ​ພາ­ສີ-ອາ­ກອນ ກົດ­ໝາຍ​ງົບ­ປະ­ມານ ແລະ ອື່ນໆ ການ​ຄຸ້ມ​ຄອງ​ລາຍ​ຈ່າຍ​ຂອງ​ກະ­ຊວງ-ອົງ­ການ ແລະ ທ້ອງ­ຖິ່ນ ໃຫ້​ຖືກ​ຕາມ​ເປົ້າ​ໝາຍ ແລະ ຮັບ­ປະ­ກັນ​ການ​ປະ­ຕິ­ບັດ​ນະ​ໂຍ ບາຍ​ປະ­ຢັດ​ແຫ່ງ​ຊາດ (3) ສືບ­ຕໍ່​ຕິດ­ຕາມ-ກວດ­ກາ​ລົງ​ເລິກ ແລະ ສືບ­ສວນ-ສອບ​ສວນ​ກ່ຽວ​ກັບ​ຄວາມ​ຮັບ­ຜິດ­ຊອບ​ຂອງ​ການ­ຈັດ­ຕັ້ງ ແລະ ບຸກ­ຄົນ​ທີ່​ພົວ­ພັນ​ເຖິງ​ໂຄງ­ການ​ລົງ­ທຶນ​ຂອງ​ລັດ ແລະ ການ​ຊຳ­ລະ​ໜີ້​ສິນ​ແບບ​ມີ​ສ່ວນ​ຫຼຸດ ການ​ຊຳ­ລະ​ເກີນ ແລະ ຊ້ຳ​ຊ້ອນ​ຢູ່​ບັນ­ດາ​ແຂວງ​ທີ່​ຍັງ​ຄ້າງ​ປະ­ຕິ­ບັດ (4) ສືບ­ຕໍ່​ປະ­ຕິ­ບັດ​ມາດ​ຕະ­ການ​ກວດ­ກາ ເລີ່ມ​ແຕ່​ຫົວ­ທີ​ຕໍ່​ການ​ປະ­ຕິ­ບັດ​ໂຄງ­ການ​ລົງ­ທຶນ​ຂອງ​ລັດ​ເຊັ່ນ: ໂຄງ­ການ​ກໍ່­ສ້າງ​ທາງ​ລົດ­ໄຟ​ລາວ-ຈີນ ແລະ ອື່ນໆ ເລີ່ມ​ແຕ່​ການ​ປະ­ມູນ​ການ​ຈັດ​ຊື້-ຈັດ​ຈ້າງ ແລະ ຕະ­ຫຼອດ​ໄລ­ຍະ​ເວ­ລາ​ຂອງ​ການ​ປະ­ຕິ­ບັດ​ໂຄງ­ການ​ໃຫ້​ດຳ­ເນີນ​ໄປ​ຖືກ­ຕ້ອງ​ຕາມ​ສັນ­ຍາ ແລະ ລະ­ບຽບ-ກົດ­ໝາຍ (5) ສືບ­ຕໍ່​ຕິດ­ຕາມ-ກວດ­ກາ ແລະ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ເລກ​ທີ 15/ນຍ ເປັນ­ຕົ້ນ ການ​ຄຸ້ມ​ຄອງ​ປ່າ­ໄມ້ ແລະ ທຸ­ລະ​ກິດ​ໄມ້ ການ​ປະ­ຕິ­ບັດ​ພັນ­ທະ​ໄມ້ ແລະ ບັນ­ຫາ​ອື່ນໆ ເປັນ­ຕົ້ນ ຢູ່​ດ່ານ​ຕ່າງໆ ແລະ ຢູ່​ຕາມ​ລຽບ​ຊາຍ​ແດນ ເມື່ອ​ພົບ​ເຫັນ​ຜູ້​ລະ­ເມີດ​ຕ້ອງ​ແກ້​ໄຂ​ຢ່າງ​ເຂັ້ມ​ງວດ​ຕາມ​ລະ­ບຽບ​ກົດ­ໝາຍ.

   ສະ­ເໜີ​ຜົນ­ງານ​ນີ້ ເພື່ອ​ໃຫ້​ຜູ້​ອ່ານ​ກຳ​ໄດ້​ເຖິງ​ການ­ເຄື່ອນ­ໄຫວ​ວຽກ​ງານ​ກວດ­ກາ​ຢູ່​ບ້ານ​ເຮົາ ໂດຍ​ເຫັນ​ວ່າ​ມີ​ດ້ານ​ຕັ້ງ­ໜ້າ ແລະ ເຂັ້ມ​ງວດ​ຄື​ດັ່ງ​ເນື້ອ​ໃນ​ຂ້າງ​ເທິງ​ນັ້ນ.

   ສະ­ເໜີ​ແລກ­ປ່ຽນ.

ໂດຍ: ແນວ​ລາວ

ຂ່າວທີ່ກ່ຽວຂ້ອງ