ຮູ້ໜ້າ ບໍ່ຮູ້ໃຈ

2.489 03 ກ.ພ. 2020 ນານາສາລະ

   ສັງ­ຄົມ​ໃດ​ກໍ​ຕາມ ຖ້າ​ຫາກ​ມີ​ຄົນ​ຫຼາຍ​ປະ­ເພດ​ອາ­ໄສ​ຢູ່​ຮ່ວມ​ກັນ​ທັງ​ພາຍ​ໃນ ແລະ ຕ່າງ​ປະ ເທດ ຍ່ອມ​ເກີດ​ມີ​ພວກ​ມິດ­ສາ­ຊີບ​ເກີດ​ຂຶ້ນ​ເພື່ອ​ຫາ​ກິນ ໂດຍ​ອາ­ໄສ​ຕີ​ສີ­ປາກ ແລະ ສ້າງ​ພາບ​ພົດ​ຄວາມ​ໜ້າ​ເຊື່ອ​ຖື ໃຊ້​ວັດ­ຖຸ​ມີ­ຄ່າ​ປະ­ດັບ​ຮ່າງ­ກາຍ​ລາ­ຄາ​ແພງ ແລະ ຂີ່​ລົດ​ໃຫຍ່​ມີ​ຍີ່­ຫໍ້ ມີ​ຄົນ​ສະ­ໝອງ​ຕື້ນ ແລະ ຫູ​ເບົາ​ກໍ​ເຊື່ອ​ງ່າຍ ໂດຍ​ຮູ້​ບໍ່​ທັນ​ກົນ​ໂກງ​ກົນ​ລວງ​ຂອງ​ພວກ​ມື​ຖື​ສາກ​ປາກ​ຖື​ສິນ ສະ­ແດງ​ໃຫ້​ເຫັນ​ວ່າ​ວິ­ທີ​ຫາ​ກິນ​ຂອງ​ຄົນ​ບາງ​ກຸ່ມ​ບາງ​ພວກ​ຢູ່​ໄດ້​ດ້ວຍ​ການ​ຕົວະ​ຕົ້ມ​ຫຼອກ​ລວງ.

   ສັງ­ຄົມ​ບ້ານ​ເຮົາ​ທຸກ​ມື້­ນີ້ ຖືກ​ດຶງ​ເຂົ້າ​ໃນ​ກະ­ແສ​ໂລ­ກາ​ພິ​ວັດ​ເຮັດ​ໃຫ້​ຫຼາຍ​ຄົນ​ໃນ​ສັງ­ຄົມ​ໃຈ­ງ່າຍ ຢາກ​ລວຍ​ໄວ​ທາງ​ລັດ ການ​ມີ​ເຄື່ອງ­ມື​ທັນ​ສະ­ໄໝ​ຫຼາຍ​ຄົນ​ກໍ​ຂີ້­ຄ້ານ​ໄຝ່​ຝັນ​ຫາ​ຄວາມ​ລວຍ​ແຕ່​ບໍ່​ຢາກ​ລົງ­ມື​ເຮັດ ຖ້າ​ຈະ​ເວົ້າ​ອີກ​ແບບ​ໜຶ່ງ​ຂອງ​ໂລກ​ທຸກ​ມື້­ນີ້​ແມ່ນ​ຈະ­ເລີນ​ທາງ​ວັດ­ຖຸ ແຕ່​ໃຈ​ຄົນ​ເສື່ອມ​ລົງ​ໄວ ເພາະ​ການ​ຈະ­ເລີນ​ແບບ​ວິ­ບັດ​ເຊັ່ນ: ປະ­ລິນ­ຍາ​ບອກ​ໄດ້ ພຽງ​ວ່າ​ຄົນ​ຮຽນ​ສູງ​ຂັ້ນ​ໃດ​ແຕ່​ປະ­ລິນ­ຍາ​ບໍ່​ແມ່ນ​ໃບ​ຄ້ຳ­ປະ­ກັນ​ຄວາມ​ດີ-ຊົ່ວ​ຂອງ​ຜູ້­ກ່ຽວ​ໄດ້ ເຊັ່ນ​ດຽວ​ກັບ​ຄົນ​ໜ້າ​ຕາ​ດີ ກໍ​ບໍ່​ໄດ້​ໝາຍ​ຄວາມ​ວ່າ​ຜູ້­ກ່ຽວ​ຈະ​ເປັນ​ຄົນ​ດີ​ສະ­ເໝີ​ໄປ ເພາະ​ຢ່າ​ລືມ​ວ່າ ຕົ້ນ­ຕໍ​ຂອງ​ບັນ­ຫາ​ສັງ­ຄົມ​ມັນ ເກີດ​ຈາກ​ໃຈ​ຄົນ​ທີ່​ເຫັນ­ແກ່​ໂຕ.

        ຄົນ​ເຫັນ­ແກ່​ໂຕ​ມັກ​ຈະ​ໃຫ້​ຄວາມ​ສຳ­ຄັນ​ແກ່​ຄວາມ­ສຸກ​ມ່ວນ­ຊື່ນ​ໃນ​ຊີ­ວິດ ເຫັນ​ແຕ່​ຜົນ​ປະ­ໂຫຍດ​ສະ­ເພາະ​ໜ້າ​ບາງ​ຄົນ​ຍອມ​ແລກ​ກັບ​ກຽດ​ສັກ​ສີ ຄວາມ​ເປັນ​ມະ­ນຸດ​ຂອງ​ຕົນ ເພື່ອ​ໃຫ້​ໄດ້­ຜົນ​ປະ­ໂຫຍດ​ຕ້ອງ­ການ ດັ່ງ­ນັ້ນ ຄົນ​ເຮົາ​ຈະ​ມີ­ຄ່າ​ຄຸນ​ຄວາມ​ດີ​ນັ້ນ ບໍ່​ແມ່ນ​ໜ້າ​ຕາ​ດີ ແລະ ຕຳ­ແໜ່ງ​ເປັນ​ສິ່ງ​ບົ່ງ​ບອກ ແຕ່​ມັນ​ແມ່ນ​ການ​ກະ­ທຳ​ຕ່າງ­ຫາກ ບາງ​ຄັ້ງ​ໄປ​ຫຼົງ​ຍ້ອງ​ຄົນ​ຫາ​ກໍ​ຮູ້­ຈັກ​ວ່າ​ລາວ​ເປັນ​ຄົນ​ສ້າງ​ຖາ­ນະ​ເງິນ​ຄຳ​ໄດ້​ໄວ ແຕ່​ສອງ​ເດືອນ​ຕໍ່​ມາ​ໄປ​ກິນ​ເຂົ້າ​ລີງ​ຢູ່​ຄຸກ​ກໍ​ມີ​ຫຼາຍ ເພາະ​ລວຍ​ທາງ​ລັດ ນີ້​ແຫຼະ​ຢ່າ​ລືມ​ຄຳ​ວ່າ ຮູ້​ໜ້າ​ບໍ່​ຮູ້​ໃຈ.

   ຮູ້​ໜ້າ​ບໍ່​ຮູ້​ໃຈ ມັນ​ຄື​ບົດ­ຮຽນ​ສອນ​ບໍ່​ໃຫ້​ມັກ­ງ່າຍ ບໍ່​ໃຫ້​ເປັນ​ທາດ​ຂອງ​ອາ­ລົມ​ຈົນ​ໂງ​ຫົວ​ບໍ່​ຂຶ້ນ ຢ່າ​ເປັນ​ຄົນ​ຍອມ​ສ້າງ​ກຳ​ຊົ່ວ ທຳ­ລາຍ​ຄວາມ​ເປັນ​ຄົນ​ຂອງ​ຕົວ​ເອງ​ພຽງ​ເພື່ອ​ເຫັນ­ແກ່​ປະ­ໂຫຍດ​ຕົນ​ສະ­ເພາະ​ໜ້າ ຫຼື ເຫັນ­ແກ່​ໂຕ​ຈົນ​ພາ­ໃຫ້​ຄອບ­ຄົວ​ແຕກ​ແຍກ ມິດ­ສາ­ຊີບ​ມາ​ຫຼາຍ​ຮູບ​ແບບ ຄິດ​ໃຫ້​ດີ​ກ່ອນ​ຫຼົງ​ຍ້ອງ​ຄົນ​ທີ່​ວັດ­ຖຸ.

ໂດຍ: ດັ້ນກີບເມກ

ຂ່າວທີ່ກ່ຽວຂ້ອງ