ມູນ​ຄ່າ​ການ​ສົ່ງ​ອອກ​ໂມງ​ຂອງ​ສະ​ວິດ ເພີ່ມ​ຂຶ້ນ​ເປັນ​ປີ​ທີ​ສາມ​ຕິດຕໍ່​ກັນ

1.978 03 ກ.ພ. 2020 ຂ່າວຕ່າງປະເທດ
ມູນ​ຄ່າ​ການ​ສົ່ງ​ອອກ​ໂມງ​ຂອງ​ສະ​ວິດ ເພີ່ມ​ຂຶ້ນ​ເປັນ​ປີ​ທີ​ສາມ​ຕິດຕໍ່​ກັນ

    ສະຫະພັນ​ອຸດສາຫະກຳ​ຜະລິດ​ໂມງ​ຂອງ​ສະ​ວິດ ໃຫ້​ຮູ້​ວ່າ ມູນ​ຄ່າ​ການ​ສົ່ງ​ອອກ​ໂມງ​ຂອງ​ສະ​ວິດ​ໃນ​ປີ 2019 ໄດ້​ເພີ່ມ​ຂຶ້ນ​ເປັນ​ປີ​ທີ​ສາມ​ຕິດຕໍ່​ກັນ ຂຶ້ນ​ເປັນ 21 ຕື້ CHF (ເທົ່າ​ກັບ 21,7 ຕື້ ໂດ​ລາ​ສະຫະລັດ) ໃກ້​ກັບ​ລະດັບ​ສະຖິຕິ​ທີ່​ສ້າງ​ໄວ້​ໃນ​ປີ 2014.

     ເຖິງ​ວ່າ ການເຄື່ອນໄຫວ​ທຸລະ​ກິດ​ໂມງ ໃນ​ປີ 2019 ມີ​ຄວາມ​ສັບສົນ​ຫຼາຍ​ພໍ​ສົມຄວນ ເຮັດ​ໃຫ້​ຕົວ​ເລກ​ທຸລະ​ກິດ​ການ​ຂາຍ​ສິນຄ້າ ຫຼຸດ​ລົງ​ຢ່າງ​ແຮງ​ຢູ່​ໃນ​ຮົງ​ກົງ (ຈີນ) ຊຶ່ງ​ເປັນ​ປາຍທາງ​ຕົ້ນຕໍ​ຂອງ​ໂມງ​ທີ່​ຜະລິດ​ຢູ່​ໃນ​ສະ​ວິດ ນັ້ນ​ກໍ​ຕາມ ແຕ່​ບັນດາ​ບໍລິສັດ​ຜູ້​ຜະລິດ​ໂມງ ກໍ​ໄດ້​ສິ້ນ​ສຸດ​ປີ  2019 ດ້ວຍ​ຄວາມ​ຕັ້ງໜ້າ​ທີ່​ສຸດ.

ການ​ຜະລິດ​ໂມງ ເປັນ​ຂົງເຂດ​ການ​ສົ່ງ​ອອກ​ສິນຄ້າ​ລາຍ​ໃຫຍ່​ອັນ​ດັບ​ສາມ​ຂອງ​ສະ​ວິດ ໂດຍ​ເປັນ​ຮອງ​ຈາກ​ຜະລິດ​ຕະ​ພັນ​ການ​ຢາ ແລະ ຈັກ​ໃຊ້​ເປັນ​ເຄື່ອງມື ໂດຍ​ເກືອບ 95% ຂອງ​ປະລິມານ​ການ​ຜະລິດ ແມ່ນ​ສົ່ງ​ອອກ​ໄປ​ຍັງ​ຕ່າງປະເທດ ຊຶ່ງ​ສ່ວນ​ໃຫຍ່​ແມ່ນ​ໄປ​ຍັງ​ຕະຫຼາດ​ອາຊີ.

     ຕົວ​ເລກ​ທີ່​ສະຫະພັນ​ກຳມະບານ​ອຸດສາຫະກຳ​ໂມງ​ຂອງ​ສະ​ວິດ ນຳ​ອອກ​ມາ​ປະກາດ​ເມື່ອ​ວັນ​ທີ 28 ມັງກອນ​ທີ່​ຜ່ານ​ມາ ຊີ້​ໃຫ້​ເຫັນ​ວ່າ ຕະຫຼາດ​ລາຍ​ໃຫຍ່​ສຸດ ສຳລັບ​ການ​ຮອງ​ຮັບ​ໂມງ​ຂອງ​ສະ​ວິດ ໃນ​ປີ 2019 ກໍ​ແມ່ນ​ທີ່​ຮົງ​ກົງ ດ້ວຍ​ມູນ​ຄ່າ​ການ​ສົ່ງ​ອອກ​ໄປ​ຍັງ​ຕະຫຼາດ​ດັ່ງກ່າວ ຫຼຸດ​ລົງ  11,4% ລົງ​ເປັນ​ມູນ​ຄ່າ 2,7 ຕື້ CHF (ຟຣັງ​ສະ​ວິດ) ໃນ​ຂະນະ​ທີ່​ໄປ​ຍັງ​ຕະຫຼາດ ສ ອາ​ເມ​ຣິ​ກາ ເພີ່ມ​ຂຶ້ນ 8,6% ເປັນ​ມູນ​ຄ່າ 2,4 ຕື້ CHF ແລະ ໄປ​ຍັງ​ຕະຫຼາດ​ຈີນ ເພີ່ມ​ຂຶ້ນ 16% ເປັນ​ມູນ​ຄ່າ 2 ຕື້ CHF ໄປ​ຍັງ​ຍີ່ປຸ່ນ​ເພີ່ມ​ຂຶ້ນ 19,9% ເປັນ​ມູນ​ຄ່າ 1,6 ຕື້ CHF ແລະ ໄປ​ຍັງ​ອັງກິດ​ເພີ່ມ​ຂຶ້ນ 10,8% ເປັນ​ມູນ​ຄ່າ 1,3 ຕື້ CHF.

    ເຖິງ​ຢ່າງໃດ​ກໍ​ຕາມ ບັນດາ​ຜູ້​ຜະລິດ​ໂມງ​ຂອງ​ສະ​ວິດ ຂາຍ​ໂມງ​ຢູ່​ຕ່າງປະເທດ​ໄດ້​ພຽງ 20 ລ້ານ​ໜ່ວຍ ໃນ​ປີ 2019 ເປັນ​ຕົວ​ເລກ​ທີ່​ໜ້ອຍ​ກວ່າ 3 ລ້ານ​ໜ່ວຍ ເມື່ອ​ທຽບໃສ່​ປີ 2018. ນີ້​ເປັນ​ລະດັບ​ຕ່ຳ​ໃນ​ປະຫວັດສາດ ຍິ່ງ​ໄປ​ກວ່າ​ນັ້ນ ຍັງ​ຕ່ຳ​ກວ່າ​ລະດັບ​ຂອງ​ປີ 2009 ແລະ ສາມາດ​ປຽບທຽບ​ກັບ​ປະລິມານ​ການ​ສົ່ງ​ອອກ​ໂມງ ໃນ​ສະໄໝ​ທີ່​ຕ່ຳ​ຂອງ​ຊຸມ​ປີ 1980.

ຂ່າວທີ່ກ່ຽວຂ້ອງ