ບໍລິສັດ Boeing ເຮັດ​ທຸລະ​ກິດ​ຫຼຸບ​ທຶນ​ເປັນ​ເທື່ອ​ທຳ​ອິດ​ໃນ​ຮອບ 20 ກວ່າ​ປີ

2.109 03 ກ.ພ. 2020 ຂ່າວຕ່າງປະເທດ
ບໍລິສັດ Boeing ເຮັດ​ທຸລະ​ກິດ​ຫຼຸບ​ທຶນ​ເປັນ​ເທື່ອ​ທຳ​ອິດ​ໃນ​ຮອບ 20 ກວ່າ​ປີ

   ເມື່ອ​ວັນ​ທີ 29 ມັງກອນ​ທີ່​ຜ່ານ​ມາ ມີ​ຫຼາຍ​ບໍລິສັດ​ຂະໜາດ​ໃຫຍ່​ຂອງ ສ ອາ​ເມ​ຣິ​ກາ ໄດ້​ປະກາດ​ບົດ​ລາຍ​ງານ​ການ​ເງິນ​ປະຈຳ​ໄຕ​ມາດ ໃນ​ນັ້ນ​ບໍລິສັດ​ຜູ້​ຜະລິດ​ເຮືອບິນ​ໂບ​ອິງ (Boeing) ທີ່​ມີ​ຂະໜາດ​ໃຫຍ່​ອັນ​ດັບ​ຕົ້ນ​ຂອງ​ໂລກ​ນັ້ນ ໄດ້​ປະກາດ​ໃຫ້​ຮູ້​ເຖິງ​ການ​ຫຼຸບ​ທຶນ​ເປັນ​ເທື່ອ​ທຳ​ອິດ ໃນ​ຮອບ 20 ກວ່າ​ປີ​ທີ່​ຜ່ານ​ມາ.

    ບົດ​ລາຍ​ງານ​ການ​ເງິນ​ຂອງ Boeing ໃຫ້​ຮູ້​ວ່າ ໃນ​ໄຕ​ມາດ 4/2019 ບໍລິສັດ​ນີ້​ໄດ້​ຫຼຸບ​ທຶນ 1 ຕື້​ໂດ​ລາ​ສະຫະລັດ ແລະ ຍອດ​ລະດັບ​ການ​ຫຼຸບ​ທຶນ​ຂອງ Boeing  ຕະຫຼອດ​ທັງ​ປີ 2019 ຢູ່​ທີ່ 636 ລ້ານ​ໂດ​ລາ​ສະຫະລັດ.

     ປີ 2019 ເປັນ​ປີ​ທຳ​ອິດ ນັບ​ແຕ່​ປີ 1997 ເປັນຕົ້ນ​ມາ ທີ່​ການເຄື່ອນໄຫວ​ຂອງ​ບໍລິສັດ Boeing ແບກ​ຫາບ​ການ​ຫຼຸບ​ທຶນ ຊຶ່ງ​ສາເຫດ​ກໍ​ເປັນ​ຍ້ອນ​ວ່າ​ລາຍ​ຮັບ​ຫຼຸດ​ລົງ ຫຼັງ​ຈາກ​ທີ່​ເຮືອບິນ​ລຸ້ນ 737-MAX ຖືກ​ງົດ​ນຳ​ໃຊ້​ທົ່ວ​ໂລກ ທີ່​ພົວພັນ​ເຖິງ​ໄພພິບັດ​ທາງ​ການບິນ ລວມ​ເຖິງ​ຄ່າ​ໃຊ້​ຈ່າຍ​ເກີດ​ເພີ່ມ​ຂຶ້ນ ຍ້ອນ​ການ​ແກ້​ໄຂ​ຄວາມ​ຜິດພາດ​ຂອງ​ເຮືອບິນ​ລຸ້ນ​ນີ້ ໂດຍ Boeing ເປີດເຜີຍ​ວ່າ​ຄ່າ​ໃຊ້​ຈ່າຍ​ໃນ​ພູດ​ນີ້​ມີ​ເຖິງ 9,2 ຕື້​ໂດ​ລາ​ສະຫະລັດ.

     ໃນ​ຂະນະ​ດຽວ​ກັນ ກຸ່ມ​ບໍລິສັດ​ຂະໜາດ​ໃຫຍ່​ອີກ 2 ແຫ່ງ ຂອງ ສ ອາ​ເມ​ຣິ​ກາ ໄດ້ແກ່ ໄມ​ໂຄຣ​ຊອບ (Microsoft) ແລະ  ເຟ​​ສ​ບຸກ (Facebook) ຕ່າງ​ກໍ​ໄດ້​ປະສົບ​ຄວາມ​ສຳເລັດ​ໃນ​ໄຕ​ມາດ 4/2019. ຜົນ​ກຳໄລ​ຂອງ ໄມ​ໂຄຣ​ຊອບ ໃນ​ໄຕ​ມາດ 4/2019 (ໄລ່​ຮອດ​ວັນ​ທີ 31 ທັນວາ 2019) ເພີ່ມ​ຂຶ້ນ 38% ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ 2018 ບັນລຸ​ທີ່ 11,6 ຕື້​ໂດ​ລາ​ສະຫະລັດ ໃນ​ຂະນະ​ທີ່​ລາຍ​ຮັບ​ຂອງ ໄມ​ໂຄຣ​ຊອບ ເພີ່ມ​ຂຶ້ນ 14% ບັນລຸ​ທີ່ 36,9 ຕື້​ໂດ​ລາ​ສະຫະລັດ.

    ສະພາບ​ການ​ເຮັດ​ທຸລະ​ກິດ​ຂອງ ເຟ​​ສ​ບຸກ ກໍ​ມີ​ຄວາມ​ໝັ້ນ​ໃຈ ດ້ວຍ​ລາຍ​ຮັບ​ສຸດທິ​ໃນ​ໄຕ​ມາດ 4/2019 ເພີ່ມ​ຂຶ້ນ 7% ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ 2018 ຂຶ້ນ​ໄປ​ບັນລຸ​ທີ່ 7,3 ຕື້​ໂດ​ລາ​ສະຫະລັດ ໃນ​ນັ້ນ​ລາຍ​ຮັບ​ຂອງ ເຟ​​ສ​ບຸກ ໃນ 3 ເດືອນ​ທ້າຍ​ປີ 2019 ເພີ່ມ​ຂຶ້ນ 25%, ຂຶ້ນ​ເປັນ 21 ຕື້​ໂດ​ລາ​ສະຫະລັດ.

ຂ່າວທີ່ກ່ຽວຂ້ອງ