ສະພາ​ຕ່ຳ ສ ອາ​ເມ​ຣິ​ກາ ຮັບຮອງ​ຮ່າງ​ກົດໝາຍ​ກ່ຽວ​ກັບ​ອີ​ຣານ

2.133 03 ກ.ພ. 2020 ຂ່າວຕ່າງປະເທດ
ສະພາ​ຕ່ຳ ສ ອາ​ເມ​ຣິ​ກາ ຮັບຮອງ​ຮ່າງ​ກົດໝາຍ​ກ່ຽວ​ກັບ​ອີ​ຣານ

    ເມື່ອ​ວັນ​ທີ 30 ມັງກອນ​ທີ່​ຜ່ານ​ມາ ສະພາ​ຕ່ຳ ສ ອາ​ເມ​ຣິ​ກາ ໄດ້​ຮັບຮອງ​ຮ່າງ​ກົດໝາຍ ສອງ​ສະບັບ ເພື່ອ​ສະກັດ​ກັ້ນ​ປະທານາທິບໍດີ ໂດ​ນາ​​ລ ທຣຳ ໃນ​ກາ​ນຳ​ເອົາ​ການ​ກະທຳ​ທາງ​ດ້ານ​ການ​ທະຫານ​ອອກ​ມາ​ເພື່ອ​ຕ້ານ​ອີ​ຣານ.

     ຂ່າວ​ແຈ້ງວ່າ ຮ່າງ​ກົດໝາຍ​ສະບັບ​ທຳ​ອິດ ຊຶ່ງ​ນຳ​ສະເໜີ​ໂດຍ​ທ່ານ ຣໍ ຄານ​ນາ ສະມາຊິກ ສະພາ​ຕ່ຳ ສ ອາ​ເມ​ຣິ​ກາ ສັງກັດ​ພັກ ເດ​ໂມ​ແກຣດ ຈາກ​ລັດ​ຄາ​ລີ​ຟໍ​ເນຍ ໄດ້​ຮັບ​ການ​ຮັບຮອງ​ດ້ວຍ 228 ສຽງ​ເຫັນ​ດີ ແລະ  175 ສຽງ​ຄັດຄ້ານ. ຮ່າງ​ກົດໝາຍ​ນີ້ ຈະ​ສະກັດ​ກັ້ນ​ການ​ນຳ​ໃຊ້​ງົບປະມານ ໃຫ້​ແກ່​ການ​ໂຈມ​ຕີ​ທາງ​ດ້ານ​ການ​ທະຫານ​ທີ່​ແນໃສ່​ອີ​ຣານ ໂດຍ​ທີ່​ບໍ່​ໄດ້​ຮັບ​ອະນຸຍາດ​ຈາກ​ສະພາ​ແຫ່ງ ຊາດ ສ ອາ​ເມ​ຣິ​ກາ.

     ໃນ​ຂະນະ​ດຽວ​ກັນ ຮ່າງ​ກົດໝາຍ​ສະບັບ​ທີ​ສອງ ນຳ​ສະເໜີ​ໂດຍ​ທ່ານ ບາ​ບາ​ຣາ ລີ ສະມາຊິກ​ສະພາ​ຕ່ຳ ສ ອາ​ເມ​ຣິ​ກາ ສັງກັດ​ພັກ ເດ​ໂມ​ແກຣດ ຈາກ​ລັດ​ຄາ​ລີ​ຟໍ​ເນຍ ໄດ້​ຮັບ​ການ​ຮັບ ຮອງ​ດ້ວຍ 236 ສຽງ​ເຫັນ​ດີ ແລະ  166 ສຽງ​ຄັດຄ້ານ. ຮ່າງ​ກົດໝາຍ​ນີ້ ເປັນ​ການ​ຍົກເລີກ​ຂໍ້​ກຳນົດ ການ​ມອບ​ສິດ ສະບັບ​ປີ 2002 ກ່ຽວ​ກັບ​ການ​ນຳ​ໃຊ້​ກອງ​ກຳລັງ​ທະຫານ​ຢູ່​ໃນ​ອີ​ຣັກ.

    ກ່ອນ​ທີ່​ຈະ​ສົ່ງ​ໄປ​ຍັງ​ທຳ​ນຽບ​ຂາວ​ນັ້ນ ຮ່າງ​ກົດໝາຍ​ທັງ​ສອງ​ສະບັບ​ດັ່ງກ່າວ ຕ້ອງ​ໄດ້​ຮັບ​ການ ຮັບຮອງ​ຢູ່​ໃນ​ສະພາ​ສູງ​ເສຍ​ກ່ອນ. ກ່ອນ​ໜ້າ​ນັ້ນ ເມື່ອ​ວັນ​ທີ 9 ມັງກອນ​ທີ່​ຜ່ານ​ມາ ສະພາ​ສູງ ກໍ​ໄດ້​ລົງ​ຄະແນນ​ສຽງ​ຮັບຮອງ​ດ້ວຍ​ສຽງ​ສ່ວນ​ຫຼາຍ ສຳລັບ​ມະຕິ​ສະບັບ​ໜຶ່ງ ກ່ຽວ​ກັບ​ການ​ສະກັດ​ກັ້ນ ການ​ກະທຳ​ທາງ​ດ້ານ​ການ​ທະຫານ​ໃນ​ອະນາຄົດ ຂອງ​ປະທານາທິບໍດີ ທຣຳ ທີ່​ເປັນ​ການ​ແນໃສ່​ອີ​ຣານ.

    ໃນ​ຂ່າວ​ອີກ​ດ້ານ​ໜຶ່ງ ເມື່ອ​ວັນ​ທີ 30 ມັງກອນ​ເຊັ່ນ​ກັນ ເຈົ້າ​ໜ້າທີ່ ສ ອາ​ເມ​ຣິ​ກາ ໄດ້​ປະ​ມີ​ຄຳ​ສັ່ງ​ປິດ​ລ້ອມ​ໃໝ່​ຕໍ່​ອີ​ຣານ ໂດຍ​ກະຊວງ​ການ​ເງິນ ສ ອາ​ເມ​ຣິ​ກາ ໄດ້​ແຈ້ງ​ໃຫ້​ຮູ້​ເຖິງ​ຄຳ ສັ່ງ​ປິດ​ລ້ອມ​ໃໝ່ ທີ່​ແນໃສ່​ອົງການ​ພະລັງງານ​ປາ​ລາມາ​ນູ​ອີ​ຣານ (AEOI) ລວມ​ເຖິງ​ຫົວໜ້າ ຂອງ​ອົງການ​ນີ້ ແຕ່​ກໍ​ຍັງ​ອະນຸຍາດ ໃຫ້​ແກ່​ການເຄື່ອນໄຫວ​ບາງ​ລາຍການ ກ່ຽວ​ກັບ​ຫັນ​ສູ່ ການ​ປອດ​ນີວ​ເຄລຍ ວ່າ​ສາມາດ​ສືບຕໍ່​ດຳເນີນ​ໄປ​ຢູ່​ໃນ​ອີ​ຣານ.

ຂ່າວທີ່ກ່ຽວຂ້ອງ