WHO ປະກາດ​ພາວະ​ສຸກ​ເສີນ​ທົ່ວ​ໂລກ​ກັບ​ພະຍາດ​ປອດ​ອັກເສບ​ທີ່​ເກີດ​ຈາກ 2019nCoV

2.204 03 ກ.ພ. 2020 ຂ່າວຕ່າງປະເທດ
WHO ປະກາດ​ພາວະ​ສຸກ​ເສີນ​ທົ່ວ​ໂລກ​ກັບ​ພະຍາດ​ປອດ​ອັກເສບ​ທີ່​ເກີດ​ຈາກ 2019nCoV

     ໃນ​ການ​ປະຊຸມ​ລັບ ຂອງ​ຄະນະ​ກຳມະການ​ສຸກ​ເສີນ ຂອງ​ອົງການ​ອະນາໄມ​ໂລກ (WHO) ທີ່​ນະຄອນ​ເຊີ​ແນວ (ປະເທດ​ສະ​ວິດ) ໃນ​ວັນ​ທີ 31 ມັງກອນ ​ທີ່​ຜ່ານ​ມາ​ນັ້ນ ທ່ານ ເທດ​​ຣົສ ອາ​ດາ​ນອມ ເກ​ເບຣ​ເຢ​ຊຸ​​ສ ຜູ້​ອຳ​ນວນ​ການ​ໃຫຍ່ WHO ໄດ້​ຕົກລົງ​ປະກາດ​ໃຊ້​ພາວະ​ສຸກ​ເສີນ​ທົ່ວ​ໂລກ (PHEIC) ຍ້ອນ​ພະຍາດ​ທາງ​ເດີນ​ຫາຍໃຈ ທີ່​ເກີດ​ຈາກ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ (2019nCoV).

    ໄວ​​ຣັສ​ດັ່ງກ່າວ ເຮັດ​ໃຫ້​ເກີດ​ພະຍາດ​ປອດ​ອັກເສບ ໂດຍ​ເລີ່ມ​ຂຶ້ນ​ຈາກ​ຈີນ ຊຶ່ງ​ມີ​ລາຍ​ງານ​ຈາກ ທາງ​ການ​ຈີນ ທີ່​ມີ​ອອກ​ມາ​ເມື່ອ​ວັນ​ທີ 31 ມັງກອນ​ທີ່​ຜ່ານ​ມາ ວ່າ​ມີ​ຜູ້​ເສຍ​ຊີວິດ​ຍ້ອນ​ພະຍາດ​ດັ່ງກ່າວ ແລ້ວ 213 ຄົນ ຢູ່​ໃນ​ຈີນ ແລະ ກໍ​ມີ​ລາຍ​ງານ​ຜູ້​ຕິດພະຍາດ ຢູ່​ໃນ​ຢ່າງ​ໜ້ອຍ 18 ປະເທດ​ທົ່ວ​ໂລກ.

    ກ່ອນ​ເກີດ​ການ​ລະບາດ​ຂອງ 2019nCoV ນັ້ນ WHO ໄດ້​ປະກາດ​ພາວະ​ສຸກ​ເສີນ ທາງ​ດ້ານ ສາທາລະນະ​ສຸກ​ທົ່ວ​ໂລກ ມາ​ແລ້ວ 5 ເທື່ອ ໂດຍ​ເທື່ອ​ທຳ​ອິດ​ໄດ້​ຮັບ​ການ​ປະກາດ​ໃນ​ເດືອນ​ເມສາ ປີ 2009 ເມື່ອ​ເກີດ​ມີ​ພະຍາດ​ໄຂ້​ຫວັດ​ໝູ (H1N1); ເທື່ອ​ທີ​ສອງ​ປະກາດ​ໃນ​ເດືອນ​ພຶດສະພາ ປີ  2014 ຍ້ອນ​ພະຍາດ​ໂປ​ລີ​ໂອ; ເທື່ອ​ທີ​ສາມ ແລະ ເທື່ອ​ທີ​ຫ້າ ປະກາດ​ໃນ​ປີ 2014 ແລະ ປີ 2019 ເມື່ອ​ເກີດ ການລະບາດພະຍາດ​ອີ​ໂບ​ລາ ຢູ່​ໃນ​ເຂດ​ອາ​ຟະ​ຣິກ​ກາ​ຕາເວັນຕົກ; ແລະ ເທື່ອ​ທີ​ສີ່ ປະກາດ​ໃນ​ປີ 2016 ເມື່ອ​ເກີດ​ການລະບາດພະຍາດ​ທີ່​ເກີດ​ຈາກ​ໄວ​​ຣັສ ຊີ​ກາ ຢູ່​ໃນ​ທະວີບ​ອາ​ເມ​ຣິ​ກາ.

ຂ່າວທີ່ກ່ຽວຂ້ອງ