ມວຍລາວ ມວຍສາກົນ ວູຊູ ປັນຈັກສີລັດ ນວ ຈະສູ້ຊົນໃຫ້ໄດ້ປະເພດລະ 2 ຫຼຽນຄຳ

438 05 ກ.ພ. 2020 ວົງຈອນກີລາ
ມວຍລາວ ມວຍສາກົນ ວູຊູ ປັນຈັກສີລັດ ນວ ຈະສູ້ຊົນໃຫ້ໄດ້ປະເພດລະ 2 ຫຼຽນຄຳ

   ທ່ານ ຄຳ​ເສັງ ສູນ​ດາ­ລາ ປະ­ທານ​ສະ­ຫະ­ພັນ​ກີ­ລາ​ມວຍ​ລາວ ມວຍ​ສາ­ກົນ​ສະ­ໝັກ​ຫຼິ້ນ ວູ​ຊູ ແລະ ປັນ​ຈັກ​ສີ​ລັດ ໃຫ້​ສຳ­ພາດ​ວັນ​ທີ 2 ກຸມ­ພາ 2020 ວ່າ: ໃນ​ນາມ​ຕົນ​ເປັນ​ຜູ້​ຮັບ­ຜິດ­ຊອບ​ກີ­ລາ 4 ປະ­ເພດ​ດັ່ງ­ກ່າວ ໄລ­ຍະ​ຜ່ານ​ມາ​ກໍ​ໄດ້​ເຝິກ­ຊ້ອມ​ເປັນ​ປະ­ຈຳ​ແຕ່​ເດືອນ​ສິງ­ຫາ 2019 ເປັນ­ຕົ້ນ​ມາ ເຖິງ​ວ່າ​ຈະ​ບໍ່​ໄດ້​ເປັນ​ຂະ​ບວນ​ຟົດ­ຟື້ນ ແຕ່​ກໍ​ໄດ້​ພະ­ຍາ­ຍາມ​ເຝິກ­ຊ້ອມ​ຢູ່​ແຕ່​ລະ​ສະ­ໂມ­ສອນ ເພື່ອ​ໃຫ້​ນັກ­ກີ­ລາ​ມີ​ສະ­ພາບ​ຮ່າງ­ກາຍ​ເຂັ້ມ­ແຂງ​ຕະ­ຫຼອດ​ເວ­ລາ.

   ນັບ​ແຕ່​ວັນ​ທີ 1 ກຸມ­ພາ 2020 ເປັນ­ຕົ້ນ​ມາ ພວກ​ເຮົາ​ໄດ້​ໃຫ້​ນັກ­ກີ­ລາ​ທັງ​ໝົດ​ເຂົ້າ​ນອນ​ສູນ​ເຝິກ ຊ້ອມ​ຢູ່​ສູນ​ກີ­ລາ​ບຶງ​ຂະ​ຫຍອງ ໂດຍ​ແຕ່​ລະ​ປະ­ເພດ​ມີ​ນັກ­ກີ­ລາ​ບໍ່​ຫຼຸດ 10 ຄົນ ຄູ​ເຝິກ 3 ທ່ານ ແຕ່​ຂໍ້​ຫຍຸ້ງ­ຍາກ​ໃນ​ໄລ­ຍະ​ຜ່ານ​ມາ​ແມ່ນ​ຂາດ​ອຸ­ປະ­ກອນ​ການ​ເຝິກ­ຊ້ອມ ເຊິ່ງ​ພວກ​ເຮົາ​ໄດ້​ນຳ​ໃຊ້​ອຸ­ປະ­ກອນ​ຂອງ​ແຕ່​ລະ​ສະ­ຫະ­ພັນ ປັດ­ຈຸ­ບັນ​ຂັ້ນ​ເທິງ​ໄດ້​ນຳ​ອຸ­ປະ­ກອນ​ມາ​ຊ່ວຍ­ເຫຼືອ​ຈຳ­ນວນ​ໜຶ່ງ​ເພື່ອ​ເຝິກ­ຊ້ອມ​ແລ້ວ ແລະ ການ​ເຂົ້າ​ຮ່ວມ ຊຽງ​ຂວາງ ເກມ ສະ­ຫະ­ພັນ​ກີ­ລາ 4 ປະ­ເພດ ຈະ​ສູ້​ຊົນ​ໃຫ້​ໄດ້​ປະ­ເພດ​ລະ 2 ຫຼຽນ​ຄຳ.

   ເພື່ອ​ກຽມ​ຄວາມ​ພ້ອມ​ໃຫ້​ນັກ­ກີ­ລາ​ມວຍ​ເຂົ້າ​ຮ່ວມ​ງານ​ດັ່ງ­ກ່າວ ພວກ​ເຮົາ​ຈະ​ຈັດ​ແຂ່ງ­ຂັນ​ມວຍ​ຮອບ ຮຸ່ນ​ນ້ຳ­ໜັກ 52 ກິ​ໂລ ຊີງ​ສາຍ­ແອວ​ປຸຍ​ກາ​ດາວ​ອາ​ວະ​ກາດ ວັນ​ທີ 7 ກຸມ­ພາ 2020 ເວ­ລາ 20:20 ໂມງ ເປັນ­ຕົ້ນ​ໄປ ຢູ່​ສູນ​ກີ­ລາ​ບຶງ​ຂະ​ຫຍອງ ແລະ ກຽມ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ​ມວຍ​ມິດ­ຕະ­ພາບ ລາວ-ໄທ ໃນ​ງານ​ບຸນ​ນະ­ມັດ­ສະ­ການ​ພະ­ທາດ​ໂພ່ນ ເມືອງ​ໄຊ​ພູ​ທອງ ແຂວງ​ສະ­ຫວັນ​ນະ​ເຂດ ວັນ​ທີ 6-8 ກຸມ­ພາ 2020 ຕື່ມ​ອີກ.

ຂ່າວທີ່ກ່ຽວຂ້ອງ