ເບີ່ງບ້ານເຂົາເອົາບົດຮຽນ 05-02-2020

1.611 05 ກ.ພ. 2020 ຫົວຂໍ້ຂ່າວອື່ນໆ

     ພົບ​ກັນ​ປະຈຳ​ວັນ​ນີ້ ຂໍ​ເລີ່ມ​ຈາກ​ຂ່າວ​ການ​ຜະເດັດ​ເສິກ​ກັບ​ຢາ​ເສບ​ຕິດ​ຢູ່​ກຳປູເຈຍ ຕໍ່​ໃສ່​ການ​ໃຊ້​ລະບົບ​ຕໍ່​ອາຍຸ​ໃບ​ຂັບ​ຂີ່​ແບບ​ອອນ​ລາຍ​ສຳລັບ​ຊາວ​ຕ່າງປະເທດ​ໃນ​ສິງກະໂປ.

    ທີ່ ກຳປູເຈຍ: ໃນ​ປີ 2019 ທາງ​ການ​ກຳປູເຈຍ ສາມາດ​ຜະເດັດ​ເສິກ​ກັບ​ບັນຫາ​ຢາ​ເສບ​ຕິດ​ດ້ວຍ​ຜົນສຳເລັດ​ທີ່​ເປັນ​ກອບ​ເປັນ​ກຳ ອີ​ຫຼີ ໜັງສືພິມ​ພະນົມ​ເປັນ ໂພ​​ສ (phnompenh post) ບອກ​ວ່າ ໃນ  11 ເດຶອນ​ຂອງ​ປີ 2019 (ແຕ່​ວັນ​ທີ 1 ມັງກອນ - ວັນ​ທີ 8 ທັນວາ 2019) ກອງ​ກຳລັງ​ຕຳຫຼວດ​ປາບ​ປາມ​ຢາ​ເສບ​ຕິດ ຂອງ​ກຳປູເຈຍ​ສາມາດ​ຢຶດ​ຢາ​ເສບ​ຕິດ​ປະເພດ​ຕ່າງໆ​ໄດ້​ຈຳນວນ​ທັງ​ໝົດ ຫຼາຍ​ກວ່າ 670 ກິ​ໂລກ​ຣາມ ແລະ ຈັບ​ກຸມ​ຜູ້​ກະທຳ​ຜິດ ໄດ້​ຈຳນວນ 18.000 ຄົນ ໃນ​ນັ້ນ ເປັນ​ຊາວ​ຕ່າງປະເທດ ຈຳນວນ 381 ຄົນ ຈາກ 12 ປະເທດ ຈຳນວນ​ຄະດີ​ຢາ​ເສບ​ຕິດ​ນັ້ນ ມີ​ທັງ​ໝົດ 9.000 ເລື່ອງ ນອກຈາກ​ຈຳນວນ​ຢາ​ເສບ​ຕິດ​ທີ່​ກ່າວ​ມາ​ຂ້າງ​ເທິງ​ແລ້ວ ກໍ​ຍັງ​ສາມາດ​ທຳລາຍ​ຕົ້ນ​ກັນຊາ ຈຳນວນ 86.414 ຕົ້ນ ແລະ ຢຶດ​ກັນຊາ​ແຫ້ງ​ໄດ້ 99 ກິ​ໂລກ​ຣາມ ຕົວ​ເລກ​ລະອຽດ​ກ່ຽວ​ກັບ​ຜູ້​ມີ​ສ່ວນ​ພົວພັນ​ກັບ​ຢາ​ເສບ​ຕິດ ທີ່​ຖືກ​ຈັບ​ກຸມ​ນັ້ນ​ມີ​ດັ່ງນີ້  ສຳລັບ​ຜູ້​ຊື້ ແລະ ຂາຍ​ຢາ​ເສບ​ຕິດ​ນັ້ນ​ມີ 10.287 ຄົນ ໃນ 5.380 ຄະດີ ສຳລັບ​ຜູ້​ເສບ​ຢາ​ເສບ​ຕິດ​ນັ້ນ​ມີ 8.678 ຄົນ ໃນ 3.675ຄະດີ.

   ທີ່ ສິງກະໂປ: ນັບ​ແຕ່​ວັນ​ທີ 9 ເດຶອນ​ທັນວາ 2019 ເປັນຕົ້ນ​ມາ ທາງ​ການ​ຂອງ​ສິງກະໂປ ໄດ້​ນຳ​ໃຊ້​ລະບົບ​ທີ່​ເອື້ອ​ອຳນວຍ​ຄວາມ​ສະດວກ​ສະບາຍ​ສຸດໆ​ໃຫ້​ຊາວ​ຕ່າງປະເທດ​ທີ່​ອາໄສ ແລະ ເຄື່ອນ​ໄຫວ​ຢູ່​ໃນ​ສິງກະໂປ ໃນ​ການ​ຕໍ່​ອາຍຸ​ໃບ​ຂັບ​ຂີ່ ຄື: ສາມາດ​ຂໍ​ຕໍ່​ໂດຍ​ຜ່ານ​ລະບົບ​ອອນ​ລາຍ ໃນ​ເມື່ອ​ກ່ອນ​ລະບົບ​ດັ່ງກ່າວ​ນີ້​ອະນຸຍາດ​ສະເພາະ​ໃຫ້​ຊາວ​ສິງກະໂປ ແລະ ຊາວ​ຕ່າງປະເທດ​ທີ່​ໄດ້​ຮັບ​ອະນຸຍາດ​ຢູ່​ອາໄສ​ແບບ​ຖາວອນ​ໃນ​ສິງກະໂປ ເທົ່າ​ນັ້ນ ໃນ​ການ​ຂໍ​ຕໍ່​ອາຍຸ​ໃບ​ຂັບ​ຂີ່​ນັ້ນ ຊາວ​ຕ່າງປະເທດ ສາມາດ​ຕິດຕໍ່​ຜ່ານ ອີ​ເຊີ​ວິ​​ສ ຂອງ​ຕຳຫຼວດ (police e-services) ໂດຍ​ໃຊ້​ບັນຊີ ຊິງ​ພາດ ( sing pass accounts) ສຳລັບ​ຜູ້​ບໍ່​ມີ​ບັນຊີ​ຊິງ​ພາດ​ນັ້ນ ກໍ​ສາມາດ​ໃຊ້​ບັນຊີ​ຕ່າງປະເທດ​ໄດ້ ພ້ອມ​ທັງ​ແຈ້ງ​ວັນ​ເກີດ​ຂອງ​ເຈົ້າ​ຂອງ​ບັນຊີ ນັບ​ແຕ່​ວັນ​ທີ 9 ທັນວາ​ເປັນຕົ້ນ​ມາ ທາງ​ຫ້ອງການ​ເຈົ້າ​ໜ້າທີ່​ຕຳຫຼວດ​ຈາລະ​ຈອນ​ໃນ​ສິງກະໂປ​ໄດ້​ຢຸດ​ຮັບ​ໃບ​ສະເໜີ​ຂໍ​ຕໍ່​ອາຍຸ​ໃບ​ຂັບ​ຂີ່​ຢູ່​ຫ້ອງການ​ເໝືອນ​ດັ່ງ​ທີ່​ເຄີຍ​ເຮັດ​ຜ່ານ​ມາ​ອີກ​ແລ້ວ ແຕ່​ກໍ​ມີ​ຂໍ້​ຍົກເວັ້ນ​ຢ່າງ​ດຽວ ຄື: ການ​ຂໍ​ປ່ຽນ​ໃບ​ຂັບ​ຂີ່​ຕ່າງປະເທດ ມາ​ເປັນ​ໃບ​ຂັບ​ຂີ່​ຂອງ​ສິງກະໂປ​ນັ້ນ ຕ້ອງ​ໄດ້​ເອົາ​ໄປ​ຍື່ນ​ໃຫ້​ເຈົ້າ​ໜ້າທີ່​ຕຳຫຼວດ​ຢູ່​ຫ້ອງການ​ເໝືອນ​ເດີມ.

ຂ່າວທີ່ກ່ຽວຂ້ອງ