ນວ-ສະຫວັນ ເກັບ 3 ຄະແນນ ເຕະບານ 4 ພາກສ່ວນ

459 06 ກ.ພ. 2020 ວົງຈອນກີລາ
ນວ-ສະຫວັນ ເກັບ 3 ຄະແນນ ເຕະບານ 4 ພາກສ່ວນ

   ສະ­ຫະ­ພັນ​ກີ­ລາ​ບານ­ເຕະ ນະ­ຄອນ­ຫຼວງ​ວຽງ​ຈັນ (ນວ) ເປັນ​ເຈົ້າ­ພາບ​ຈັດ­ການ​ແຂ່ງ­ຂັນ​ເຕະ­ບານ 4 ພາກ­ສ່ວນ ລະ­ຫວ່າງ​ວັນ​ທີ 4-8 ກຸມ­ພາ 2020 ຢູ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ ເພື່ອ​ເປັນ​ການ​ທົດ​ສອບ​ຄວາມ​ສາ­ມາດ​ຂອງ​ນັກ­ກີ­ລາ ໃຫ້​ມີ​ຄວາມ​ພ້ອມ​ຢ່າງ­ຮອບ­ດ້ານ ເປັນ­ຕົ້ນ​ແມ່ນ​ດ້ານ​ພະ­ລະ​ກຳ­ລັງ ເຕັກ­ນິກ ແລະ ຍຸດ­ທະ­ວິ­ທີ ກ່ອນ​ເຂົ້າ​ຮ່ວມ​ຍາດ​ເອົາ​ຫຼຽນ​ຄຳ ໃນ​ການ​ແຂ່ງ­ຂັນ​ເຕະ­ບານ​ຊາຍ ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ຫຼື “ຊຽງ​ຂວາງ ເກມ” ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າ­ພາບ.

   ພິ­ທີ​ເປີດ​ການ​ແຂ່ງ­ຂັນ​ບານ­ເຕະ 4 ພາກ­ສ່ວນ ນະ­ຄອນ­ຫຼວງ​ວຽງ​ຈັນ ສະ­ຫວັນ​ນະ​ເຂດ ຜົ້ງ​ສາ­ລີ ແລະ ແຂວງ​ຊຽງ​ຊວາງ (ເຈົ້າ­ພາບ ກີ­ລາ​ແຫ່ງ​ຊາດ ຄັ້ງ​ທີ XI) ຈັດ​ຂຶ້ນ​ວັນ​ທີ 6 ກຸມ­ພາ 2020 ທີ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ ໃຫ້​ກຽດ​ເຂົ້າ​ຮ່ວມ​ໂດຍ​ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ມີ​ຫົວ­ໜ້າ​ພະ​ແນກ ເຈົ້າ­ເມືອງ ຄະ­ນະ​ນຳ​ກີ­ລາ ຄູ​ເຝິກ ນັກ­ກີ­ລາ ຈາກ 4 ແຂວງ ແລະ ນ້ອງໆ​ນັກ­ຮຽນ​ເຂົ້າ​ຮ່ວມ​ຢ່າງ​ພ້ອມ­ພຽງ.

   ໂອ­ກາດ​ດັ່ງ­ກ່າວ ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ກ່າວ​ກ່ອນ​ເປີດ​ງານ​ຢ່າງ​ເປັນ​ທາງ​ການ​ວ່າ: ການ​ແຂ່ງ­ຂັນ​ຄັ້ງ​ນີ້​ຈັດ​ຂຶ້ນ ເພື່ອ​ເປັນ​ການ​ສ້າງ​ຂະ​ບວນ​ການ​ອັນ​ຟົດ­ຟື້ນ ເພື່ອ​ຄ່ຳ​ນັບ​ຮັບ​ຕ້ອນ​ວັນ​ສຳ­ຄັນ​ຂອງ​ຊາດ​ຂອງ​ພັກ ເວົ້າ​ລວມ ເວົ້າ​ສະ­ເພາະ ເປັນ​ການ​ສ້າງ​ຂະ​ບວນ​ການ​ອັນ​ຟົດ­ຟື້ນ ເພື່ອ​ຄ່ຳ​ນັບ​ຮັບ​ຕ້ອງ​ກອງ​ປະ­ຊຸມ​ໃຫຍ່ 3 ຂັ້ນ​ຂອງ​ພັກ ໃນ​ທົ່ວ​ປະ­ເທດ ກໍ​ຄື​ນະ­ຄອນ­ຫຼວງ​ວຽງ​ຈັນ ອີກ​ດ້ານ​ໜຶ່ງ ເພື່ອ​ເປັນ​ການ​ເຕົ້າ­ໂຮມ​ຄວາມ​ສາ­ມັກ­ຄີ ແລະ ເປັນ​ການ​ແລກ­ປ່ຽນ ຖອດ​ຖອນ​ບົດ­ຮຽນ​ທາງ​ດ້ານ​ການ​ແຂ່ງ­ຂັນ​ລະ­ຫວ່າງ​ແຂວງ​ຕ່າງໆ​ໃນ​ທົ່ວ​ປະ­ເທດ ທັງ​ເປັນ​ການ​ທົດ​ສອບ​ທາງ​ດ້ານ​ເຕັກ­ນິກ ຄວາມ​ສາ­ມາດ​ຂອງ​ນັກ­ກີ­ລາ​ບານ­ເຕະ ເພື່ອ​ກຽມ​ຄວາມ​ພ້ອມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ ໃນ​ລະ­ຫວ່າງ​ວັນ​ທີ 22 ມີ­ນາ-1 ເມ­ສາ 2020.

   ຂະ­ນະ​ທີ່ ໃນ​ວັນ​ທີ 4 ກຸມ­ພາ 2020 ເປັນ​ການ​ແຂ່ງ­ຂັນ​ນັດ​ທຳ​ອິດ ນະ­ຄອນ­ຫຼວງ​ວຽງ​ຈັນ (ເຈົ້າ­ພາບ) ພົບ​ກັບ​ແຂວງ​ຊຽງ​ຂວາງ ຜົນ​ປາ­ກົດ​ວ່າ: ການ​ແຂ່ງ­ຂັນ​ດຳ­ເນີນ​ໄປ​ຢ່າງ​ເບີກ­ບານ​ມ່ວນ­ຊື່ນ​ທ່າມ­ກາງ​ສຽງ​ເຊຍ 2.000 ກວ່າ​ຄົນ ແລະ ເປັນນະ­ຄອນ­ຫຼວງ​ວຽງ​ຈັນ ທີ່​ຄຸມ​ເກມ​ໄດ້​ດີ​ກວ່າ​ເອົາ​ຊະ­ນະ ແຂວງ​ຊຽງ​ຂວາງ ໄປ​ຫວຸດ​ຫວິດ 3-2 ສ່ວນ​ຄູ່​ທີ 2 ແຂວງ​ສະ­ຫວັນ​ນະ​ເຂດ ກໍ​ສາ­ມາດ​ເອົາ​ຊະ­ນະ ແຂວງ​ຜົ້ງ​ສາ­ລີ ໄປ​ຫວຸດ​ຫວິດ 2-1 ເຮັດ​ໃຫ້ ນະ­ຄອນ­ຫຼວງ​ວຽງ​ຈັນ ກັບ ສະ­ຫວັນ​ນະ​ເຂດ ເກັບ 3 ຄະ­ແນນ​ທຳ​ອິດ​ໄປ​ຄອງ.

ຂ່າວທີ່ກ່ຽວຂ້ອງ