ເບີ່ງບ້ານເຂົາເອົາບົດຮຽນ 06-02-2020

1.419 06 ກ.ພ. 2020 ຫົວຂໍ້ຂ່າວອື່ນໆ

   ມື້ນີ້​ຂໍ​ເລົ່າ​ເລື່ອງ​ອັງກິດ​ມີ​ນະໂຍບາຍ​ໃຫ້​ຄົນ​ມີ​ນິໄສ​ຮັກ​ການ​ຂີ່​ລົດຖີບ ແລະ ຍ່າງ​ແທນ​ການ​ໃຊ້​ລົດ​ໃຫຍ່ ແລະ ເລື່ອງ​ລູກ​ສາວ​ຜູ້ນຳ​ອຸ​ສະ​ເບັກ​ກິດ​ສະຖານ ຖືກ​ຈຳ​ຄຸກ​ຍ້ອນ​ກໍ່​ຫຼາຍ​ອາ​ຊະ​ຍາ​ກຳ.

    ທີ່ ອັງກິດ: ໃນ​ຍຸກ​ລົດ​ລົ້ນ​ຖະໜົນ ທີ່​ສ້າງ​ບັນຫາ​ລົດ​ຕິດ ຈະ​ລະ​ຈອນ​ຕິດ​ຂັດ​ຍັດ​ບຽດ ຕໍ່​ໃສ່​ບັນຫາ​ມົນ​ລະ​ພິດ​ທາງ​ອາກາດ ຈາກ​ທໍ່​ອາຍ​ເສຍ​ຂອງ​ລົດ ຫຼາຍ​ປະເທດ​ໄດ້​ຫັນ​ມາ​ໃສ່ໃຈ​ເລື່ອງ​ການ​ໃຊ້​ຕີນ​ຍ່າງ ຫຼື ຂີ່​ລົດຖີບ​ຫຼາຍ​ຂຶ້ນ ສຳລັບ​ໃນ​ອາ​ຊຽນ​ນີ້ ສິງກະໂປ ເປັນ​ປະເທດ​ນຳ​ໜ້າ​ໃນ​ການ​ຊຸກຍູ້​ໃຫ້​ຄົນ​ໃຊ້​ລົດຖີບ​ຂີ່​ໄປ​ວຽກ​ໃນ​ໄລຍະ​ທາງ​ທີ່​ເໝາະ​ສົມ ໄປ​ພ້ອມໆ​ກັບ​ສ້າງ​ທາງ​ສະເພາະ​ໃຫ້​ຜູ້​ໃຊ້​ລົດຖີບ ທາງ​ເບື້ອງ​ເອີ​ຣົບ ນັ້ນ ນອກ​ແວ ແລະ ສະ​ວີ​ເດັນ ໄດ້​ຫັນ​ເອົາ​ລົດຖີບ​ເປັນ​ພາຫະນະ​ສີຂຽວ ທຽວ​ວຽກ​ຢ່າງ​ເປັນ​ລະບົບ ສຳລັບ​ບົດ​ນີ້ ຂໍ​ເວົ້າ​ສະເພາະ​ກ່ຽວ​ກັບ​ບັ້ນ​ສົ່ງເສີມ​ການ​ຂີ່​ລົດຖີບ ແລະ ການ​ຍ່າງ​ໃນ​ອັງກິດ ມີ​ຂ່າວ​ໃນ​ຕົ້ນ​ປີ 2017 ວ່າ: ກະຊວງ​ຄົມມະນາຄົມ​ຂົນສົ່ງ​ຂອງ​ອັງກິດ ມີ​ວິໄສ​ທັດ​ອັນ​ຍາວ​ໄກ ເພື່ອ​ເຮັດ​ໃຫ້​ສາວ​ອັງກິດ​ທຸກໆ​ຄົນ ຕິດ​ນິໄສ ການ​ຍ່າງ ແລະ ຖີບ​ລົດ​ໄປ​ສະຖານທີ່ ທີ່​ບໍ່​ຢູ່​ຫ່າງ​ໄກ​ເກີນ​ໄປ ຫຼື ໄປ​ສະຖານທີ່ ທີ່​ລຶ້ງ​ເຄີຍ ເຊັ່ນ: ໂຮງຮຽນ ສຳນັກງານ ສະຖານີ​ໂດຍສານ ຫຼື ການ​ທ່ຽວ​ຫຼິ້ນ​ເພື່ອ​ເພີດເພີນ ຈະເລີນ​ອາລົມ ແທນ​ທີ່​ຈະ​ນັ່ງ​ລົດ​ຕາມ​ນິໄສ ແຜນ​ສົ່ງເສີມ​ການ​ຍ່າງ ແລະ ຂີ່​ລົດຖີບ​ນີ້​ຍັງ​ມີ​ເປົ້າ​ໝາຍ​ຫຼຸດຜ່ອນ​ອັດຕາ​ສ່ວນ​ຜູ້​ໄດ້​ຮັບ​ບາດເຈັບ ຫຼື ເສຍ​ຊີວິດ​ຈາກ​ອຸບັດເຫດ​ຕາມ​ຖະໜົນ ເປົ້າ​ໝາຍ​ສຳຄັນ​ໜຶ່ງ​ຂອງ​ແຜນການ​ນີ້ ກໍ​ແມ່ນ​ເພື່ອ​ປູກ​ນິໄສ​ໃຫ້​ເດັກ​ນອ້ຍ​ຊິ້ນ​ເຄີຍ​ກັບ​ການ​ຍ່າງ​ໄປ​ໂຮງຮຽນ​ເອງ ເພື່ອ​ເຮັດ​ໃຫ້​ແຜນ​ນີ້​ກາຍເປັນ​ແຜນການ​ແທ້ໆ (ບໍ່​ແມ່ນ​ແຜນ​ລ້າ!) ລັດຖະບານ ອັງກິດ ໄດ້​ຈັດ​ສັນ​ງົບປະມານ 70,7 ລ້ານ​ໂດ​ລາ​ສະຫະລັດ ເພື່ອ​ໃຊ້​ໃນ​ໂຄງການ​ສົ່ງເສີມ​ໃຫ້​ເດັກ​ນອ້ຍ ຈຳນວນ 1,3 ລ້ານ​ໃຊ້​ລົດຖີບ ແລະ ອີກ​ພູດ​ໃຫຍ່ໆ 280 ລ້ານ​ໂດ​ລາ​ສະຫະລັດ ເພື່ອ​ຍົກ​ລະດັບ ແລະ ກໍ່ສ້າງ​ພື້ນຖານ​ໂຄງ​ລ່າງ ເອື້ອ​ອຳນວຍ​ຄວາມ​ສະດວກ​ໃຫ້​ແກ່​ຜູ້ໂດຍສານ ດ້ວຍ​ຕີນ ແລະ ຂີ່​ລົດຖີບ.

     ທີ່ ອຸ​ສະ​ເບັກ​ກິດ​ສະຖານ: ເລື່ອງ​ນີ້​ເປັນ​ອຸທາຫອນ​ສອນ​ໃຈ ກ່ຽວ​ກັບ​ໄພ​ອັນຕະລາຍ​ຈາກ​ການ​ອາໄສ​ບາ​ລະ​ມີ ຫຼື​ອຳນາດ ຂອງ​ຄົນ​ໃນ​ຄອບຄົວ ເພື່ອ​ປະພຶດ​ແບບ​ແຕກ​ປອກ​ນອກ​ກົດໝາຍ ເພາະ​ບໍ່​ໄວ ກໍ່​ຊ້າ ຜູ້​ປະພຶດ​ແບບ​ນີ້​ຈະ​ບໍ່​ມົ້ມ​ກັບ​ມື​ກົດໝາຍ ເລື່ອງ​ນີ້​ຕົກ​ເປັນ​ຂ່າວ​ໃຫຍ່​ໄຟ​ແຮງ​ແຕ່​ກາງ​ປີ 2017 ພຸ້ນ ຄື: ນາງ ກູນາ​ຣາ ກາ​ຣີ​ໂມ​ວາ ລູກ​ສາວ​ກົກ​ຂອງ​ທ່ານ ອິດ​ສະ​ຣາມ ກາລີ​ມອບ (islam Karimou) ອະດີດ​ປະທານາທິບໍດີ ປະເທດ ອຸ​ສະ​ເບັກ​ກິດ​ສະຖານ ເສຍ​ຊີວິດ​ໃນ​ທ້າຍ​ປີ2016 ຖືກ​ສານ​ຕັດສິນ​ຈຳ​ຄຸກ ຍ້ອນ​ມີ​ຄວາມ​ຜິດ​ຕິດ​ໂຕ​ຫຼາຍ​ເລື່ອງ ເຊັ່ນ: ຫຼອກ​ລວງ​ຕົ້ມ​ຕົວະ ປອມ​ແປງ ຟອກ​ເງິນ ແລະ ຊຸກເຊື່ອງ​ເງິນຕາ​ຕ່າງປະເທດ ສາວ​ສັງຄົມ​ສູງ​ທີ່​ຫົ່ມ​ເສື້ອ​ຜູ້​ເປັນ​ພໍ່​ຄົນ​ນີ້​ເຄີຍ​ເປັນ​ດວງ​ດາວ​ເດັ່ນ​ໃນ​ສັງຄົມ ເປັນ​ນັກ​ອອກ​ແບບ​ເຄື່ອງນຸ່ງ​ຍອດ​ນິຍົມ ແລະ ເປັນ​ນັກ​ຮ້ອງ​ສຽງ​ສະເໜ ການ​ສອບ​ສວນ​ຄະດີ​ນາງ ກູນາ​ຣາ ໂດຍ​ໜ່ວຍ​ປາບ​ປາມ​ອາ​ຊະ​ຍາ​ກຳ ທີ່​ມີ​ການຈັດຕັ້ງ​ປະຈຳ​ຫ້ອງການ​ໄອ​ຍະ​ການ​ຊີ້​ອອກ​ວ່າ: ນາງ ກູນາ​ຣາ ເປັນ​ສະມາຊິກ​ຂອງ​ກຸ່ມ​ອາ​ຊະ​ຍາ​ກຳ​ທີ່​ມີ​ການຈັດຕັ້ງ ທີ່​ຄອບ​ຄອງ​ຊັບ​ສິນ​ມູນ​ຄ່າ​ສູງ​ກວ່າ 1,3 ຕື້​ໂດ​ລາ​ສະຫະລັດ ທີ່​ຢັງ​ຢາຍ​ຢູ່ 12 ປະເທດ.

   ແລ້ວ​ກໍ​ມີ​ຂ່າວ​ໃນ​ທ້ອງ​ເດືອນ​ມີນາ​ປີ​ນີ້​ວ່າ ນາງ ກູນາ​ຣາ ໄດ້​ຮັບປະກັນ​ຕົວ​ອອກ​ຈາກ​ຄຸກ ແຕ່​ຖືກ​ລາກ​ຄໍ​ເຂົາ​ຄຸກ​ຄືເກົ່າ ຍ້ອນ​ບໍ່​ປະຕິບັດ​ຕາມ​ເງື່ອນໄຂ​ຂອງ​ຜູ້​ຖືກ​ປ່ອຍ​ຕົວ​ຊົ່ວຄາວ ນີ້​ລະ​ເຂົາ​ວ່າການ​ສວຍ​ໃຊ້​ອຳນາດ ຜົວ​ເມຍ ພໍ່​ແມ່ ການ​ຫົ່ມ​ເສື້ອ​ອຳນາດ​ຂອງ​ຄົນ​ອື່ນ​ນັ້ນ ເດັດຂາດ​ຈະ​ໄປ​ບໍ່​ໄດ້​ເຍືອ​ດອກ ບົດຮຽນ​ຢູ່​ບ້ານ​ເຮົາ​ກໍ​ມີ​ໃຫ້​ເຫັນ​ຢ່າງ​ຈະແຈ້ງ​ຢູ່​ແລ້ວ.

ຂ່າວທີ່ກ່ຽວຂ້ອງ