ການ​ລົງທຶນ 25 ຕື້​ໂດ​ລາ ​ສາມາດ​ຊ່ວຍ​ຊີວິດ​ຜູ້​​ເປັນ​ພະຍາດ​ມະ​ເຮັງ​ໄດ້​ປະມານ 7 ລ້ານ​ຄົນ

1.473 06 ກ.ພ. 2020 ຂ່າວຕ່າງປະເທດ
ການ​ລົງທຶນ 25 ຕື້​ໂດ​ລາ ​ສາມາດ​ຊ່ວຍ​ຊີວິດ​ຜູ້​​ເປັນ​ພະຍາດ​ມະ​ເຮັງ​ໄດ້​ປະມານ 7 ລ້ານ​ຄົນ

     ອົງການ​ອະນາໄມ​ໂລກ (WHO) ແຈ້ງ​ເຕືອນ​ວ່າ ຈຳນວນ​ຜູ້​ເປັນ​ພະຍາດ​ມະ​ເຮັງ ຈະ​ເພີ່ມ​ຂຶ້ນ 81% ຢູ່​ໃນ​ບັນດາ​ປະເທດ​ທີ່​ມີ​ລາຍ​ຮັບ​ຕ່ຳ ແລະ​ປານ​ກາງ ພາຍ​ໃນ​ປີ 2040 ຍ້ອນ​ວ່າ​ຂາດ​ແຫຼ່ງ​ກຳລັງ​ການ​ລົງທຶນ​ໃຫ້​ແກ່​ການ​ປ້ອງ​ກັນ ແລະ​ການ​ປິ່ນປົວ​ພະຍາດ​ທີ່​ອັນຕະລາຍ​ດັ່ງກ່າວ.

    ບົດ​ລາຍ​ງານ​ປະຈຳ​ປີ​ຂອງ WHO ຊຶ່ງ​ນຳ​ອອກ​ມາ​ເປີດເຜີຍ​ໃນ​ວັນ​ສະກັດ​ກັ້ນ ຕ້ານ​ມະ​ເຮັງ​ໂລກ (4 ກຸມພາ) ນັ້ນ​ຊີ້​ແຈງ​ວ່າ ບັນດາ​ປະເທດ​ດັ່ງກ່າວ ໄດ້​ເຕົ້າໂຮມ​ແຫຼ່ງ​ກຳລັງ​ທີ່​ມີ​ຈຳກັດ​ຂອງ​ເຂົາເຈົ້າ ໃຫ້​ແກ່​ວຽກ​ງານ​ສະກັດ​ກັ້ນ ແລະ​ຕ້ານ​ບັນດາ​ພະຍາດ​ຕິດຕໍ່ ກໍ​ຄື​ການ​ແກ້​ໄຂ​ສຸຂະພາບ​ແມ່ ແລະ​ ເດັກນ້ອຍ ແທນ​ທີ່​ຈະ​ໃຊ້​ເພື່ອ​ສະກັດ​ກັ້ນ ແລະ​ຕ້ານ​ພະຍາດ​ມະ​ເຮັງ. ປະເທດ​ເຫຼົ່ານັ້ນ​ກໍ​ຢັ້ງຢືນ​ອັດຕາ​ສ່ວນ​ການ​ເສຍ​ຊີວິດ​ຍ້ອນ​ພະຍາດ​ມະ​ເຮັງ​ຢູ່​ໃນ​ລະດັບ​ສູງ​ເປັນ​ປະຈຳ.

    ທ່ານ ເຣນ ມິງ​ຮຸຍ ຜູ້​ຊ່ວຍ​ວຽກ​ຂອງ​ຜູ້ອຳນວຍການ​ໃຫຍ່ WHO ຊີ້​ແຈງ​ຢູ່​ໃນ​ບົດ​ລາຍ​ງານ​ດັ່ງກ່າວ ໂດຍ​ເຫັນ​ວ່າ​ອັດຕາ​ສ່ວນ 81% ທີ່​ຍົກ​ອອກ​ມາ​ຂ້າງ​ເທິງ​ນັ້ນ ເປັນ​ການ​ແຈ້ງ​ເຕືອນ ໃນ​ທົ່ວ​ໂລກ ກ່ຽວ​ກັບ​ສະພາບ​ຄວາມ​ບໍ່​ສະເໝີພາບ “ທີ່​ບໍ່​ສາມາດ​ຮັບ​ເອົາ​ໄດ້” ລະຫວ່າງ​ບັນດາ​ປະເທດ​ທີ່​ລ້ຳ​ລວຍ ກັບ​ບັນດາ​ປະເທດ​ທີ່​ທຸກ​ຍາກ ໃນ​ການ​ປ້ອງ​ກັນ ການ​ປິ່ນປົວ ແລະ​ການ​ດູ​ແລ​ຄົນ​ເຈັບ​ທີ່​ເປັນ​ພະຍາດ​ມະ​ເຮັງ.

    ບົດ​ລາຍ​ງານ​ຂອງ WHO ເນັ້ນ​ໜັກ​ວ່າ ບ້ວງ​ການ​ລົງທຶນ 25 ຕື້​ໂດ​ລາ​ສະຫະລັດ ພາຍ​ໃນ​ທົດ​ສະ​ວັດ​ຕໍ່ໜ້າ​ນີ້ ສາມາດ​ຊ່ວຍ​ກອບ​ກູ້​ຊີວິດ​ຂອງ​ປະມານ 7 ລ້ານ​ຄົນ​ໃນ​ໂລກ ໃຫ້​ພົ້ນ​ຈາກ​ພະຍາດ​ມະ​ເຮັງ. ບົດ​ລາຍ​ງານ​ກໍ​ຊີ້​ໃຫ້​ເຫັນ​ວ່າ ຍອດ​ຈຳນວນ​ຜູ້​ເປັນ​ພະຍາດ​ມະ​ເຮັງ​ໃນ​ໂລກ ຈະ​ເພີ່ມ​ຂຶ້ນ​ປະມານ 60% ພາຍ​ໃນ​ປີ 2040 ແລະ​ວ່າ​ຢາສູບ ເປັນ​ສາເຫດ​ເຮັດ​ໃຫ້​ເກີດ 25% ຂອງ​ຈຳນວນ​ຜູ້​ເສຍ​ຊີວິດ​ຍ້ອນ​ພະຍາດ​ມະ​ເຮັງ.

    ບັນດາ​ຊ່ຽວຊານ​ດ້ານ​ການ​ແພດ ໃຫ້​ຮູ້​ວ່າ ຄຸນ​ນະ​ພາບ​ການ​ປິ່ນປົວ​ທີ່​ດີ​ກວ່າ ຢູ່​ໃນ​ບັນດາ​ປະເທດ​ທີ່​ມີ​ລາຍ​ຮັບ​ສູງ ເປັນ​ການ​ປະກອບສ່ວນ​ຫຼຸດຜ່ອນ​ຈຳນວນ​ກໍລະນີ​ຜູ້​ເສຍ​ຊີວິດ​ຍ້ອນ​ພະຍາດ​ມະ​ເຮັງ ຢູ່​ໃນ​ປະເທດ​ເຫຼົ່າ​ນີ້​ໄດ້​ເຖິງ 20% ໃນ​ໄລຍະ​ປີ 2000-2015 ໃນ​ຂະນະ​ດຽວ​ກັນ ອັດຕາ​ສ່ວນ​ດັ່ງກ່າວ ຢູ່​ໃນ​ບັນດາ​ປະເທດ​ທີ່​ທຸກ​ຍາກ ມີ​ຢູ່​ພຽງ​ທີ່​ລະດັບ 5%.

    ຕົວ​ເລກ​ຈາກ​ອົງການ​ຄົ້ນຄວ້າ​ມະ​ເຮັງ​ສາກົນ GLOBOCAN 2018 ໃຫ້​ຮູ້​ວ່າ ໃນ​ແຕ່​ລະ​ປີ ທົ່ວ​ໂລກ​ມີ​ຜູ້​ເປັນ​ພະຍາດ​ມະ​ເຮັງ​ໃໝ່​ປະມານ 18,1 ລ້ານ​ກໍລະນີ. ຄາດ​ວ່າ​ໃນ​ປີ 2025 ຜູ້​ເປັນ​ພະຍາດ​ມະ​ເຮັງ​ໃໝ່ ຈະ​ເພີ່ມ​ຂຶ້ນ​ເປັນ 19,3 ລ້ານ​ກໍລະນີ ໃນ​ນັ້ນ​ສ່ວນ​ຫຼາຍ​ແມ່ນ​ຢູ່​ໃນ​ບັນດາ​ປະເທດ​ພວມ​ພັດທະນາ.

ຂ່າວທີ່ກ່ຽວຂ້ອງ