ເລຂາທິການ​ໃຫຍ່ ​ສປຊ ປະກາດ​ບັນດາ​ບຸລິມະສິດ​ການ​ດຳ​ເນີນ​ງານ​ໃນ​ປີ 2020

1.667 06 ກ.ພ. 2020 ຂ່າວຕ່າງປະເທດ
ເລຂາທິການ​ໃຫຍ່ ​ສປຊ ປະກາດ​ບັນດາ​ບຸລິມະສິດ​ການ​ດຳ​ເນີນ​ງານ​ໃນ​ປີ 2020

    ທ່ານ ອັນໂຕ​ນີ​ໂອ ກູ​ເຕີ​ເຣ​​ສ ເລຂາທິການ​ໃຫຍ່ ຂອງ​ອົງການ​ສະຫະ​ປະຊາ​ຊາດ (​ສປຊ) ໄດ້​ຈັດ​ກອງ​ປະຊຸມ​ຖະແຫຼງ​ຂ່າວ​ປະຈຳ​ຕົ້ນ​ປີ ໂດຍ​ຈັດ​ຂຶ້ນ​ໃນ​ວັນ​ທີ 4 ກຸມພາ​ນີ້ ທີ່​ນະຄອນ​ນີວ​ຢອກ (ສ ອາ​ເມ​ຣິ​ກາ) ເພື່ອ​ນຳ​ເອົາ​ຖະແຫຼງການ​ອອກ​ມາ ກ່ຽວ​ກັບ​ບັນດາ​ບັນຫາ​ທີ່​ເປັນ​ບຸລິມະສິດ​ຂອງ ​ສປຊ ໃນ​ປີ 2020.

    ບຸລິມະສິດ​ຕ່າງໆ​ດັ່ງກ່າວ ປະກອບ​ມີ ການ​ສຸມ​ໃສ່​ຊອກ​ຫາ​ວິທີ​ການ​ແກ້​ໄຂ ໃຫ້​ແກ່​ບັນດາ​ຄວາມ​ເຄັ່ງ​ຕຶງ​ທາງ​ດ້ານ​ການເມືອງ ການ​ຊຸກຍູ້​ການ​ຕ້ານ​ກັບ​ສະພາບ​ດິນ​ຟ້າ​ອາກາດ​ປ່ຽນແປງ ການ​ຊຸກຍູ້​ບັນດາ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ (SDGs) ແລະ​ການ​ເພີ່ມ​ທະວີ​ການ​ປະສານ​ງານ ລະຫວ່າງ ​ສປຊ ກັບ​ອົງການ​ແບບ​ຫຼາຍ​ຝ່າຍ​ອື່ນໆ.

    ເມື່ອ​ທົບ​ທວນຄືນ​ເຖິງ​ໝາກຜົນ​ອັນ​ພົ້ນ​ເດັ່ນ​ທີ່​ສຸດ​ຂອງ ​ສປຊ ໃນ​ປີ 2019 ນັ້ນ ທ່ານ ກູ​ເຕີ​ເຣ​​ສ ເຫັນ​ວ່າ ​ສປຊ ໄດ້​ໄປ​ຖືກ​ທິດ​ທາງ ໃນ​ການ​ຊອກ​ຫາ​ວິທີ​ການ​ແກ້​ໄຂ ໃຫ້​ແກ່​ຈຸດ​ຮ້ອນຮົນ​ຈຳນວນ​ໜຶ່ງ. ເຖິງ​ຢ່າງໃດ​ກໍ​ຕາມ ທ່ານ ກູ​ເຕີ​ເຣ​​ສ ກໍ​ຍອມຮັບ​ວ່າ ຄວາມ​ເປັນ​ຈິງ​ອັນ​ໜຶ່ງ​ກໍ​ຄື​ສະພາບ​ຄວາມ​ເຄັ່ງ​ຕຶງ​ຢູ່​ໃນ​ບາງ​ແຫ່ງ ພວມ​ກັບ​ສູ່​ການ​ເພີ່ມ​ຂຶ້ນ ນັບ​ຕັ້ງແຕ່​ລີ​ບີ ໄປ​ຈົນ​ຮອດ ເຢ​ແມນ ຊີ​ຣີ ແລະ​ແຫ່ງ​ອື່ນໆ​ອີກ.

    ທ່ານ ກູ​ເຕີ​ເຣ​​ສ ຊີ້​ໃຫ້​ເຫັນ​ວ່າ ທຸກໆ​ບັນຫາ​ຕ່າງ​ກໍ​ມີ​ການ​ຮ່ວມ​ກຸ່ມ ແລະ​ມີ​ການ​ຜູກ​ມັດ​ດ້ວຍ​ກັນ. ຈາກ​ການ​ທີ່​ເສດຖະກິດ​ຕ່າວ​ຫົວ​ລົງ ແມ່ນ​ຫ້ອຍ​ຕາມ​ມາ​ດ້ວຍ​ຄວາມທຸກ​ຍາດ​ອຶດ​ຢາກ​ແກ່ຍາວ ຄວາມ​ບໍ່​ໝັ້ນຄົງ​ເພີ່ມ​ຂຶ້ນ ເປັນ​ຜົນ​ກະທົບ​ຕໍ່​ການ​ລົງທຶນ ການ​ບໍລິຫານ​ຄຸ້ມ​ຄອງ​ທີ່​ອ່ອນແອ ເປັນ​ການ​ອຳນວຍ​ຄວາມ​ສະດວກ​ໃຫ້​ແກ່​ພວກ​ກໍ່​ການ​ຮ້າຍ ແລະ ອື່ນໆ ດັ່ງນັ້ນ ໃນ​ປີ 2020 ນີ້ ​ສປຊ ຈຶ່ງ​ຈະ​ສຸມ​ໃສ່​ຄວາມ​ພະຍາຍາມ ເພື່ອ​ແກ້​ໄຂ​ບັນຫາ​ຕ່າງໆ​ດັ່ງກ່າວ.

ຂ່າວທີ່ກ່ຽວຂ້ອງ