ອິນ​ໂດ​ເນ​ເຊຍ-ສິງ​ກະ​ໂປ ລົງ​ນາມ​ຂໍ້​ຕົກລົງ​ສຳຄັນ​ຫຼາຍ​ສະບັບ

2.838 06 ກ.ພ. 2020 ຂ່າວຕ່າງປະເທດ
ອິນ​ໂດ​ເນ​ເຊຍ-ສິງ​ກະ​ໂປ ລົງ​ນາມ​ຂໍ້​ຕົກລົງ​ສຳຄັນ​ຫຼາຍ​ສະບັບ

    ໃນ​ຂອບ​ຂອງ​ການ​ຢ້ຽມຢາມ​ອິນ​ໂດ​ເນ​ເຊຍ ຢ່າງ​ເປັນ​ທາງ​ການ​ຂອງ​ທ່ານ​ນາງ ຮາ​ລີ​ມາ ຢາ​ກອບ ປະທານາທິບໍດີ​ສິງກະໂປ ນັ້ນ ອິນ​ໂດ​ເນ​ເຊຍ ແລະ ​ສິງກະໂປ ໄດ້​ຮ່ວມ​ກັນ​ລົງ​ນາມ​ຂໍ້​ຕົກລົງ​ທີ່​ສຳຄັນ​ຫຼາຍ​ສະບັບ ໃນ​ນັ້ນ​ມີ​ຂໍ້​ຕົກລົງ​ກ່ຽວ​ກັບ​ການ​ຫຼີກເວັ້ນ​ການ​ເສຍ​ພາສີ​ຊ້ອນ.

    ໃນ​ຂອບ​ການ​ຢ້ຽມຢາມ​ອິນ​ໂດ​ເນ​ເຊຍ ເປັນ​ເວລາ 4 ວັນ ໂດຍ​ເລີ່ມ ຂຶ້ນ​ເມື່ອ​ວັນ​ທີ 3 ກຸມພາ​ນັ້ນ ທ່ານ​ນາງ ຢາ​ກອບ ໄດ້​ພົບ​ປະ​ຫາລື​ກັບ​ປະທານາທິບໍດີ​ອິນ​ໂດ​ເນ​ເຊຍ ໂຈ​ໂກ ວີ​ໂດ​ໂດ ກ່ຽວ​ກັບ​ການ​ຮ່ວມ​ມື​ໃນ​ຫຼາຍ​ຂົງເຂດ ເຊັ່ນ ການ​ສຶກ​ສາ ການ​ລົງທຶນ ແລະ ​ການ​ພັດທະນາ​ຊັບ​ພະຍາ ກອນ​ມະນຸດ.

    ອິນ​ໂດ​ເນ​ເຊຍ ແລະ​ ສິງກະໂປ ມີ​ການ​ພົວພັນ​ທາງ​ດ້ານ​ການ​ຄ້າ ແລະ​ ການ​ລົງທຶນ​ຢ່າງ​ແໜ້ນ​ແຟ້ນ ໂດຍ​ທີ່​ມູນ​ຄ່າ​ການ​ຄ້າ​ລະຫວ່າງ​ສອງ​ຝ່າຍ​ບັນລຸ 65 ຕື້​ໂດ​ລາ​ສິງກະໂປ (ເທົ່າ​ກັບ 47,73 ຕື້​ໂດ​ລາ​ສະຫະລັດ) ໃນ​ປີ 2018 ເພີ່ມ​ຂຶ້ນ 9,4% ເມື່ອ​ທຽບໃສ່​ປີ 2017. ໃນ​ຂະນະ​ດຽວ​ກັນ ສິງກະໂປ ເປັນ​ປະເທດ​ຜູ້​ລົງທຶນ​ອັນ​ດັບ​ຕົ້ນ​ຢູ່​ໃນ​ອິນ​ໂດ​ເນ​ເຊຍ ໃນ 5 ປີ​ທີ່​ຜ່ານ​ມາ.

ຂ່າວທີ່ກ່ຽວຂ້ອງ