ຈີນ ​ໃຊ້​ງົບປະມານ​ຫຼາຍ​ຕື້​ໂດ​ລາ​ເພື່ອ​ສະກັດ​ກັ້ນ ​ແລະ ​ຄວບ​ຄຸມພະ​ຍາດ

2.919 06 ກ.ພ. 2020 ຂ່າວຕ່າງປະເທດ
ຈີນ ​ໃຊ້​ງົບປະມານ​ຫຼາຍ​ຕື້​ໂດ​ລາ​ເພື່ອ​ສະກັດ​ກັ້ນ ​ແລະ ​ຄວບ​ຄຸມພະ​ຍາດ

     ໄລ່​ມາ​ຮອດ​ວັນ​ທີ 2 ກຸມພາ​ນີ້ ອຳນາດ​ການ​ປົກຄອງ​ຂັ້ນ​ຕ່າງໆ​ຢູ່​ຈີນ ໄດ້​ຈັດ​ສັນ​ເງິນ 47 ຕື້​ຢວນ (ເທົ່າ​ກັບ 6,8 ຕື້​ໂດ​ລາ​ສະຫະລັດ) ໃຫ້​ແກ່​ວຽກ​ງານ​ສະກັດ​ກັ້ນ ແລະ ຄວບ​ຄຸມພະ​ຍາດ​ອັກເສບ​ທາງ​ລະບົບ​ຫາຍໃຈ ຍ້ອນ​ຕິດ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ (2019-nCoV). ກະຊວງ​ການ​ເງິນ​ຂອງ​ຈີນ (MOF) ໃຫ້​ຮູ້​ວ່າ ແຫຼ່ງ​ງົບປະມານ​ນັ້ນ ໄດ້​ຮັບ​ການ​ຈັດ​ສັນ​ຕົ້ນຕໍ​ໃຫ້​ແກ່​ການເຄື່ອນໄຫວ​ປິ່ນປົວ ແລະ​ສະຫວັດດີ​ການ ເປັນ​ການ​ຊົ່ວຄາວ ໃຫ້​ແກ່​ບັນດາ​ພະນັກງານ​ສາທາລະນະ​ສຸກ ແລະ ພະນັກງານ​ທີ່​ເຮັດ​ວຽກ​ສະກັດ​ກັ້ນ​ພະຍາດ ລວມ​ເຖິງ​ໃຫ້​ແກ່​ການ​ຈັດ​ຊື້​ອຸປະກອນ​ການ​ແພດ.

    ອີກ​ດ້ານ​ໜຶ່ງ ຂ່າວສານ​ຣອຍ​ເຕີ ລາຍ​ງານ​ວ່າ ທະນາຄານ​ປະຊາຊົນ​ຈີນ (PBoC) ຫຼື​ທະນາຄານ​ກາງຂອງ​ຈີນ ໄດ້​ແຈ້ງ​ໃຫ້​ຮູ້ເມື່ອ​ວັນ​ທີ 2 ກຸມພາ​ນີ້​ວ່າ​ຈະ “ປ້ອນ” ເງິນ 1.200 ຕື້​ຢວນ (ເທົ່າ​ກັບ 173 ຕື້​ໂດ​ລາ​ສະຫະລັດ) ເຂົ້າ​ໃນ​ພື້ນຖານ​ເສດຖະກິດ ທ່າມກາງ​ທີ່ PBoC ຢາກ​ເພີ່ມ​ທະວີ​ຄວາມ​ຊ່ວຍເຫຼືອ​ຕໍ່​ການ​ສະກັດ​ກັ້ນ  2019-nCoV ໃນ​ທົ່ວ​ປະເທດ​ຈີນ. ຕໍ່​ມາ PboC ກໍ​ໄດ້​ສືບຕໍ່ “ປ້ອນ” ເງິນສົດ 500 ຕື້​ຢວນ (ເທົ່າ​ກັບ​ເກືອບ 71,5 ຕື້​ໂດ​ລາ​ສະຫະລັດ) ເຂົ້າ​ສູ່​ຕະຫຼາດ ໂດຍ​ຜ່ານ​ບັນດາ​ຂໍ້​ຕົກລົງ​ຊື້​ຄືນ ໃນ​ວັນ​ທີ 4 ກຸມພາ​ນີ້

     ໃນ​ຂະນະ​ດຽວ​ກັນ ຕົວ​ເລກ​ສະຖິຕິ​ໃໝ່​ຫຼ້າ​ສຸດ ຊຶ່ງ​ຄະນະ​ກຳມະການ​ສາທາລະນະ​ສຸກ​ແຫ່ງ​ຊາດ​ຈີນ ນຳ​ອອກ​ມາ​ປະກາດ​ໃນ​ຕອນ​ເຊົ້າ​ວັນ​ທີ 5 ກຸມພາ​ນີ້ ໃຫ້​ຮູ້​ວ່າ ຢູ່​ໃນ​ຈີນ ໄດ້​ຢັ້ງຢືນ​ຜູ້​ຕິດ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ (2019-nCoV) ລວມ​ແລ້ວ 24.324 ຄົນ ໃນ​ນັ້ນ​ມີ​ລາຍ​ໃໝ່ 3.887 ຄົນ. ສ່ວນ ຈຳນວນ​ຜູ້​ເສຍ​ຊີວິດ​ຍ້ອນ 2019-nCoV ໄດ້​ເພີ່ມ​ຂຶ້ນ​ຕື່ມ 65 ຄົນ ພາຍ​ໃນ​ວັນ​ທີ 4 ກຸມພາ ເຮັດ​ໃຫ້​ຍອດ​ຜູ້​ເສຍ​ຊີວິດ​ຍ້ອນ​ພະຍາດ​ດັ່ງກ່າວ ຢູ່​ໃນ 31 ເຂດ​ຂັ້ນ​ແຂວງ​ຂອງ​ຈີນ ຢູ່​ທີ່ 490 ຄົນ.

ຂ່າວທີ່ກ່ຽວຂ້ອງ