ແຂ່ງຂັນບານບ້ວງທົດສອບນັກກີລາ ກ່ອນຮ່ວມຊຽງຂວາງ ເກມ

916 07 ກ.ພ. 2020 ວົງຈອນກີລາ
ແຂ່ງຂັນບານບ້ວງທົດສອບນັກກີລາ ກ່ອນຮ່ວມຊຽງຂວາງ ເກມ

   ແຂວງ​ຫຼວງ​ພະ​ບາງ ຈັດ­ການ​ແຂ່ງ­ຂັນ​ກີ­ລາ​ບານ­ບ້ວງ 2 ລາຍ­ການ ຄື: ປະ­ເພດ​ທີມ​ຊາຍ ແລະ ທີມ​ຍິງ ເພື່ອ​ເປັນ​ການ​ທົດ​ສອບ​ຄວາມ​ພ້ອມ​ຂອງ​ນັກ­ກີ­ລາ ກ່ອນ​ຮ່ວມ​ປ້ອງ​ກັນ​ແຊັມ​ຫຼຽນ​ຄຳ ໃນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າ­ພາບ ລະ­ຫວ່າງ​ວັນ​ທີ 22 ມີ­ນາ ຫາ 1 ເມ­ສາ 2020.

   ການ​ແຂ່ງ­ຂັນ​ຄັ້ງ​ນີ້ ມີ​ຂຶ້ນ​ວັນ​ທີ 3 ກຸມ­ພາ 2020 ຢູ່​ສະ­ໜາມ​ບານ­ສົ່ງ​ໃນ​ຮົ່ມ​ນະ­ຄອນ­ຫຼວງ​ພະ​ບາງ ແຂວງ​ຫຼວງ​ພະ​ບາງ ໂດຍ​ມີ​ທ່ານ ຊາຍ​ສະ­ຫວັນ ຈັນ​ມາ­ນິດ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ແຂວງ​ຫຼວງ​ພະ​ບາງ ແລະ ທ່ານ ບຸນ​ທັນ ແກ້ວ​ບຸ​ຜາ ປະ­ທານ​ສະ­ຫະ­ພັນ​ກີ­ລາ​ບານ­ບ້ວງ​ແຂວງ​ຫຼວງ​ພະ​ບາງ ພ້ອມ​ດ້ວຍ​ແຂກ​ທີ່​ຖືກ​ເຊີນ ແລະ ກອງ​ເຊຍ​ຊາວ​ເມືອງ​ມໍ­ລະ­ດົກ​ໂລກ​ເຂົ້າ​ຮ່ວມ​ຊົມ​ຮ່ວມ​ເຊຍ​ຢ່າງ​ຫຼວງ­ຫຼາຍ.

   ການ​ແຂ່ງ­ຂັນ​ປະ­ເພດ​ທີມ​ຍິງ ຮອບ​ຊີງ​ຊະ­ນະ​ເລີດ ເປັນ​ການ​ພົບ​ກັນ​ລະ­ຫວ່າງ ທີມ​ແຂວງ​ຫຼວງ​ພະ​ບາງ A ແລະ ທີມ​ແຂວງ​ຫຼວງ​ພະ​ບາງ B ຜົນ​ປາ­ກົດ​ວ່າ​ໃນ 4 ຄໍ​ເຕີ ເປັນ​ທີມ​ແຂວງ​ຫຼວງ​ພະ​ບາງ A ຫຼິ້ນ​ໄດ້​ດີ​ກວ່າ ເອົາ​ຊະ­ນະ​ໄປ​ໄດ້ 52-43 ຄະ­ແນນ ສ່ວນ​ປະ­ເພດ​ທີມ​ຊາຍ ສະ­ໂມ­ສອນ​ຫຼວງ​ພະ​ບາງ ຊຸດ​ກຽມ​ເຂົ້າ​ຮ່ວມ​ຊີງ​ແຊັມ​ສະ­ໂມ­ສອນ​ອາ​ຊຽນ ພົບ​ກັບ ທີມ​ແຂວງ​ຫຼວງ​ພະ​ບາງ ຊຸດ​ກຽມ​ເຂົ້າ​ຮ່ວມ​ງານ​ກີ­ລາ​ແຫ່ງ​ຊາດ ຄັ້ງ​ທີ XI ຕະ­ຫຼອດ​ການ​ແຂ່ງ­ຂັນ 4 ຄໍ​ເຕີ ຜົນ​ປາ­ກົດ​ວ່າ ສະ­ໂມ­ສອນ ຫຼວງ​ພະ​ບາງ ອາ​ໃສ​ປະ­ສົບ​ການ​ຫຼາຍ​ກວ່າ ເອົາ​ຊະ­ນະ​ໄປ​ໄດ້ 126-52 ຄະ­ແນນ.

   ນອກ­ຈາກ​ການ​ແຂ່ງ­ຂັນ​ໃນ​ຄັ້ງ​ນີ້​ແລ້ວ ເມື່ອ​ວັນ​ທີ 3 ກຸມ­ພາ 2020 ຢູ່​ເດີ່ນ​ຕະ­ຫຼາດ​ຊົນ­ເຜົ່າ ນະ­ຄອນ­ຫຼວງ​ພະ​ບາງ ສະ­ຫະ­ພັນ​ບານ­ບ້ວງ​ແຂວງ​ຫຼວງ​ພະ​ບາງ ຍັງ​ໄດ້​ສຳ­ເລັດ​ການ​ຈັດ​ກິດ­ຈະ­ກຳ ເພື່ອ​ເປັນ​ການ​ປູກ​ຈິດ​ສຳ­ນຶກ​ໃຫ້​ເຍົາ­ວະ​ຊົນ​ໄວ​ໜຸ່ມ​ພາຍ​ໃນ​ແຂວງ​ຫັນ​ມາ​ຫຼິ້ນ​ກີ­ລາ ຫ່າງ​ໄກ​ຈາກ​ສິ່ງ​ເສບ​ຕິດ ແລະ ໃຊ້​ເວ­ລາ​ຫວ່າງ​ໃຫ້​ເປັນ​ປະ­ໂຫຍດ ລວມ​ທັງ​ລະ­ດົມ​ທຶນ​ຊ່ວຍ­ເຫຼືອ​ສັງ­ຄົມ​ອີກ​ດ້ວຍ ເຊິ່ງ​ການ​ແຂ່ງ­ຂັນ​ດັ່ງ­ກ່າວ ມີ​ເກືອບ 20 ທີມ​ເຂົ້າ​ຮ່ວມ ແຂ່ງ­ຂັນ​ໃນ 2 ລາຍ­ການ ຄື: ເຍົາ­ວະ​ຊົນ​ຊາຍ-ຍິງ ແລະ ຮຸ່ນ​ທົ່ວ​ໄປ ຊາຍ-ຍິງ ການ​ແຂ່ງ­ຂັນ​ໃຊ້​ລະ­ບົບ​ແບ່ງ​ກຸ່ມ​ແຂ່ງ­ຂັນ​ພົບ​ກັນ​ໝົດ​ຄັດ​ເລືອກ​ເອົາ​ທີມ​ທີ່​ມີ​ຄະ­ແນນ​ຫຼາຍ ໄດ້​ຮັບ​ຂັນ​ຊະ­ນະ​ເລີດ ຜ່ານ​ການ​ແຂ່ງ­ຂັນ ຜົນ​ປາ­ກົດ​ວ່າ: ປະ­ເພດ​ເຍົາ­ວະ​ຊົນ​ຊາຍ ທີ 1 ມສ ປ່ອງ​ຄຳ ແລະ ທີ 2 ຮຮ ກຽດ​ຕິ​ສັກ ປະ­ເພດ​ເຍົາ­ວະ​ຊົນ​ຍິງ ທີ 1 ມສ ສັນ­ຕິ­ພາບ ແລະ ທີ 2 ມສ ປ່ອງ​ຄຳ ຮຸ່ນ​ທົ່ວ​ໄປ​ຊາຍ ທີ 1 ຢູ​ເອັດ​ເອ ແລະ ທີ 2 ສະ​ກໍ​ປຽນ ຮຸ່ນ​ທົ່ວ​ໄປ​ຍິງ ທີ 1 ເດິ ລີ​ເຈັນ ພີ​ເຄ ແລະ ທີ 2 ທີມ​ຂໍ​ແຕ້ມ​ແລກ​ເບີ​ໂທ.

ຂ່າວທີ່ກ່ຽວຂ້ອງ