ຊຽງຂວາງ ເກມ ກຳນົດເອົານ້ຳຫງຳ ເປັນສະໜາມແຂ່ງຂັນລົດຖີບ

918 07 ກ.ພ. 2020 ວົງຈອນກີລາ
ຊຽງຂວາງ ເກມ ກຳນົດເອົານ້ຳຫງຳ ເປັນສະໜາມແຂ່ງຂັນລົດຖີບ

   ການ​ແຂ່ງ­ຂັນ​ກີ­ລາ​ລົດ­ຖີບ ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ Xl ຫຼື ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າ­ພາບ ລະ­ຫວ່າງ​ວັນ​ທີ 22 ມີ­ນາ ຫາ 1 ເມ­ສາ 2020 ໄດ້​ກຳ­ນົດ​ເອົາ​ຈຸດ​ສວນ​ສາ­ທາ­ລະ­ນະ​ນ້ຳ​ຫງຳ ເປັນ​ຈຸດ​ໜຶ່ງ​ໃນ​ການ​ແຂ່ງ­ຂັນ 11 ລາຍ­ການ ຈາກ​ລົດ­ຖີບ 2 ປະ­ເພດ ນັບ​ມາ​ຮອດ​ປັດ­ຈຸ­ບັນ​ມີ 5 ພາກ­ສ່ວນ​ແຈ້ງ​ເຈດ​ຈຳ­ນົງ​ເຂົ້າ​ຮ່ວມ​ແຂ່ງ­ຂັນ.

   ທ່ານ ກາບ​ຊ້ອນ ສຸ­ວັນ­ນະ​ຣາຊ໌ ເລ­ຂາ­ທິ­ການ​ສະ­ຫະ­ພັນ​ລົດ­ຖີບ​ແຫ່ງ​ຊາດ​ລາວ ເປີດ­ເຜີຍ​ໃຫ້​ຮູ້​ວ່າ: ສະ­ຫະ­ພັນ​ລົດ­ຖີບ​ແຫ່ງ​ຊາດ ເຫັນ​ດີ​ກຳ­ນົດ​ເອົາ​ຈຸດ​ສວນ​ສາ­ທາ­ລະ­ນະ​ນ້ຳ​ຫງຳ ເປັນ​ຈຸດ​ໜຶ່ງ​ໃນ​ການ​ແຂ່ງ­ຂັນ​ກີ­ລາ​ລົດ­ຖີບ “ຊຽງ​ຂວາງ ເກມ 2020” ເຊິ່ງ​ມີ​ການ​ຊີງ​ໄຊ 11 ລາຍ­ການ ໂດຍ​ຈະ​ໃຊ້​ເປັນ​ສະ­ໜາມ​ແຂ່ງ­ຂັນ​ສຳ­ລັບ​ປະ­ເພດ ໄຄ​ທີ​ລ້ຽມ (ລົດ​ກວັກ) ໄລ­ຍະ 30 ກິ­ໂລ­ແມັດ ເນື່ອງ​ຈາກ​ເຫັນ​ວ່າ ເສັ້ນ­ທາງ​ບໍ­ລິ­ເວນ​ລຽບ​ແຄມ​ນ້ຳ​ຫງຳ ເປັນ​ເສັ້ນ­ທາງ​ໄດ້​ມາດ­ຕາ​ຖານ ແລະ ເໝາະ​ສົມ​ກັບ​ການ​ແຂ່ງ­ຂັນ​ຄັ້ງ​ນີ້​ທີ່​ສຸດ ແລະ ເປັນ​ຈຸດ​ໜຶ່ງ​ທີ່​ສວຍ​ງາມ ຄາດ​ວ່າ​ຈະ​ມີ​ຜູ້​ຊົມ ຫຼື ກອງ​ເຊຍ ມາ​ຊົມ​ມາ​ເຊຍ​ຢ່າງ​ຫຼວງ­ຫຼາຍ​ແນ່­ນອນ.

   ສຳ­ລັບ​ການ​ແຂ່ງ­ຂັນ​ກີ­ລາ​ລົດ­ຖີບ ໃນ “ຊຽງ​ຂວາງ ເກມ 2020 ” ມີ​ການ​ຊີງ​ໄຊ​ທັງ​ໝົດ 2 ປະ­ເພດ ຈາກ 11 ລາຍ­ການ ເຊັ່ນ: ປະ­ເພດ 30 ກິ­ໂລ­ແມັດ ທາງ​ວິ­ບາກ​ຊາຍ ປະ­ເພດ 30 ກິ­ໂລ­ແມັດ ໄຄ​ທີ​ລ້ຽມ (ລົດ​ກວັກ) ຊາຍ ປະ­ເພດ 30 ກິ­ໂລ­ແມັດ ລົດ­ຖີບ​ວິ­ບາກ​ຊາຍ ປະ­ເພດ 40 ກິ­ໂລ­ແມັດ ຈັບ​ເວ­ລາ​ບຸກ­ຄົນ​ຊາຍ ປະ­ເພດ 50 ກິ­ໂລ­ແມັດ ຈັບ​ເວ­ລາ​ທີມ​ຊາຍ ປະ­ເພດ 120 ກິ­ໂລ­ແມັດ ບຸກ­ຄົນ​ທົ່ວ​ໄປ ປະ­ເພດ 80 ກິ­ໂລ­ແມັດ ບຸກ­ຄົນ​ລົດ­ຖີບ​ວິ­ບາກ ປະ­ເພດ 4 ກິ­ໂລ­ແມັດ ຈັບ​ເວ­ລາ​ຊາຍ ປະ­ເພດ 1 ກິ­ໂລ­ແມັດ ຈັບ​ເວ­ລາ​ຍິງ ປະ­ເພດ 70 ກິ­ໂລ­ແມັດ ບຸກ­ຄົນ​ຍິງ ແລະ ປະ­ເພດ 60 ກິ­ໂລ­ແມັດ ບຸກ­ຄົນ​ຍິງ ລົດ­ຖີບ​ວິ­ບາກ.

   ສ່ວນ​ການ​ກຳ­ນົດ​ເງື່ອນ­ໄຂ​ນັກ­ກີ­ລາ​ເຂົ້າ​ຮ່ວມ​ການ​ແຂ່ງ­ຂັນ ແຕ່​ລະ​ລາຍ­ການ ແມ່ນ​ພາກ­ສ່ວນ​ໜຶ່ງ​ສາ­ມາດ​ສົ່ງ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ​ໃນ​ລາຍ­ການ​ໜຶ່ງ​ບໍ່​ເກີນ 4 ຄົນ ນັກ­ກີ­ລາ​ຜູ້​ໜຶ່ງ​ມີ​ສິດ​ລົງ​ແຂ່ງ­ຂັນ​ບໍ່​ເກີນ 2 ລາຍ­ການ ສະ­ເພາະ​ລາຍ­ການ​ບຸກ­ຄົນ​ທົ່ວ​ໄປ ລວມ (Massed-Start) ຄະ­ນະ​ໜຶ່ງ​ສາ­ມາດ​ລົງ​ແຂ່ງ­ຂັນ​ໄດ້ 4 ຄົນ ນັກ­ກີ­ລາ​ສຳ­ຮອງ​ຕ້ອງ​ແຈ້ງ​ພ້ອມ​ກັບ​ການ​ສົ່ງ​ລາຍ​ຊື່​ນັກ­ກີ­ລາ ແລະ ໃຫ້​ລະ­ບຸ​ວ່າ​ຜູ້​ໃດ​ສຳ­ຮອງ​ໃຫ້​ລາຍ­ການ​ໃດ ການ​ແຂ່ງ­ຂັນ​ລາຍ­ການ​ໜຶ່ງ​ຕ້ອງ​ມີ 4 ທີມ (4 ແຂວງ/ກະ­ຊວງ) ຖ້າ​ລາຍ­ການ​ໃດ​ໜຶ່ງ​ບໍ່​ມີ​ທີມ​ເຂົ້າ​ຮວ່ມ​ແຂ່ງ­ຂັນ​ເຖີງ 4 ທີມ (4 ແຂວງ/ກະ­ຊວງ) ແມ່ນ​ຍົກ­ເລີກ​ການ​ແຂ່ງ­ຂັນ​ລາຍ­ການ​ນັ້ນ ນັບ​ມາ​ຮອດ​ປະ­ຈຸ​ບັນ ຄາດ​ວ່າ​ມີ 5 ແຂວງ ແລ້ວ​ຈະ​ເຂົ້າ​ຮ່ວມ​ແຂ່ງ­ຂັນ.

ຂ່າວທີ່ກ່ຽວຂ້ອງ