ເຫັນແລ້ວ Block ຖິ້ມໂລດ

1.460 10 ກ.ພ. 2020 ນານາສາລະ

   ສະ­ບັບ​ກ່ອນ​ໄດ້​ຂຽນ​ເຖິງ “ຂ່າວ​ປອມ..” ມີ​ເພື່ອນ​ຜູ້​ອ່ານ​ຕັ້ງ​ບັນ­ຫາ​ວ່າ: ຈະ​ເບິ່ງ​ຂ່າວ​ຈາກ​ແຫຼ່ງ​ໃດ​ຈຶ່ງ​ຈະ​ຮູ້​ວ່າ​ອັນ​ໃດ​ແທ້ ? ແລ້ວ​ທາງ​ກົດ­ໝາຍ​ເດ ?.

   ຄື​ດັ່ງ​ພວກ​ເຮົາ​ຮູ້: ຂ່າວ​ປອມ​ນັ້ນ​ສ່ວນ​ໃຫຍ່​ແມ່ນ​ມາ​ຈາກ​ສື່​ສັງ­ຄົມ​ອອນ​ລາຍ... ສະ­ນັ້ນ ເວ­ລາ​ເບິ່ງ Face Book ກໍ​ຕ້ອງ​ເອົາ​ບັນ­ຫາ​ນັ້ນ​ມາ​ເຍືອງ​ໃສ່​ຂ່າວ​ຈາກ​ສື່​ທາງ​ການ ເຊິ່ງ​ຢູ່​ປະ­ເທດ​ເຮົາ​ຫຼາຍ​ຄົນ​ຄົງ​ຮູ້​ແລ້ວ ສ່ວນ​ສື່​ອອນ​ລາຍ​ທີ່​ໜ້າ​ເຊື່ອ​ຖື​ຢູ່​ບ້ານ​ເຮົາ ກໍ​ແມ່ນ​ໜ້າ​ເຟ​ສ​ທີ່​ໄປ​ຂຶ້ນ​ທະ­ບຽນ​ນຳ​ກົມ​ສື່​ມວນ​ຊົນ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ທໍ່​ນັ້ນ ເຫຼືອ​ນັ້ນ​ຕ້ອງ​ພິ­ຈາ­ລະ­ນາ​ເອົາ​ເອງ.

   ເມື່ອ​ເປັນ​ເຊັ່ນ​ນີ້ ຜູ້​ເສບ​ຂ່າວ​ທັງ­ຫຼາຍ​ຕ້ອງ​ເປັນ​ເຈົ້າ​ການ ແລະ ມີ​ສະ­ຕິ​ລະ­ວັງ​ຕົວ​ໃຫ້​ສູງ ແລ້ວ​ຈຶ່ງ​ຄ່ອຍ​ເຊື່ອ​ວ່າ​ອັນ​ນັ້ນ​ຈິງ ຫຼື ບໍ່? ໂດຍ​ສະ­ເພາະ ໃນ​ຍາມ​ທີ່​ໂລກ​ພວມ​ສັບ­ສົນ​ນຳ​ການ​ແຜ່​ລະ­ບາດ​ຂອງ​ພະ­ຍາດ ໄວ​ຣັສ ໂຄ​ໂຣ​ນາ ສາຍ​ພັນ​ໃໝ່.

   ເລື່ອງ​ພະ­ຍາດ​ນີ້​ຢາກ​ໃຫ້​ຕິດ­ຕາມ​ແຫຼ່ງ​ຂ່າວ​ທາງ​ການ ຕິດ­ຕາມ​ຄຳ​ໃຫ້​ສຳ­ພາດ​ຂອງ​ວິ­ຊາ​ການ​ດ້ານ​ການ​ແພດ​ຂອງ​ເພິ່ນ​ດີ​ທີ່​ສຸດ ບໍ່​ຄວນ​ເຊື່ອ​ຢ່າງ​ຕາຍ­ໃຈ ຂໍ້​ມູນ​ທີ່​ເຜີຍ­ແຜ່​ຜ່ານ​ສື່​ອອນ​ລາຍ.

   ໄປ​ພ້ອມ​ກັນ​ນັ້ນ ກໍ​ຕ້ອງ​ມີ​ສະ­ຕິ ບໍ່​ກົດ Share ຕໍ່​ໄປ... ຄວນ Block ຖິ້ມ​ທັນ­ທີ ຫາກ​ເຫັນ​ວ່າ​ມັນ​ຈະ​ມີ​ຜົນ​ເສຍ​ຫາກ​ຜູ້​ອື່ນ​ເຫັນ​ຂ່າວ​ດັ່ງ­ກ່າວ... ເບື້ອງ​ການ­ຈັດ­ຕັ້ງ​ກໍ​ຄວນ​ກວດ­ກາ​ເບິ່ງ​ວ່າ ໜ້າ​ເຟ​ສ​ໃດ​ມັກ​ອອກ​ຂ່າວ​ເລື່ອງ​ພະ­ຍາດ​ໂຄ​ໂຣ​ນາ ແລ້ວ​ເອີ້ນ​ເຂົ້າ​ມາ​ຕັກ­ເຕືອນ ເພາະ​ຫາກ​ປະ­ປ່ອຍ​ໃຫ້​ອອກ​ຕາມ­ໃຈ​ເຕັມ​ໜ້າ Face Book ແນວ​ນີ້​ມັນ​ອັນ­ຕະ­ລາຍ​ແທ້ໆ.

   ຂໍ​ໂທດ​ເນີ​ພວກ​ມັກ​ຍ້ອງ​ທັງ­ຫຼາຍ ເວ­ລາ​ເຫັນ​ຂໍ້​ມູນ​ເລື່ອງ​ພະ­ຍາດ​ນີ້​ແມ່ນ​ຢາກ​ນຳ​ມາ​ໂພ​ສ​ອອກ​ໂລດ ອັນ​ນີ້​ກໍ​ຕ້ອງ​ໄດ້​ລະ­ວັງ​ເນີ ! ຂໍ້​ມູນ​ນັ້ນ​ມາ​ຈາກ​ໃສ ? ມີ​ແຫຼ່ງ​ຂ່າວ​ໃດ​ຢັ້ງ­ຢືນ ຫາກ​ບໍ່​ແມ່ນ​ໄວ​ມື​ໂພ​ສ​ອອກ​ໂລດ ບາງ­ເທື່ອ​ກໍ​ເຂົ້າ​ຂ້າງ​ວ່າ​ເຈົ້າ​ຂອງ​ຫວັງ​ດີ... ແຕ່​ໃນ​ຄວາມ​ເປັນ​ຈິງ​ມັນ​ພາ­ໃຫ້​ສັງ­ຄົມ​ປັ່ນ​ປ່ວນ ແນວ​ຄວນ​ອອກ​ນັ້ນ​ແມ່ນ​ມາດ​ຕະ­ການ​ທາງ​ການ ທີ່​ເພິ່ນ​ອອກ​ຕາມ​ແຫຼ່ງ​ຂ່າວ ເຊັ່ນ​ວ່າ: ຄະ­ນະ​ກຳ­ມະ­ການ​ປ້ອງ​ກັນ-ຕອບ​ຕ້ານ​ພະ­ຍາດ ເພິ່ນ​ມີ​ແນວ­ທາງ​ຫຍັງ​ແດ່ ? ຄຳ​ຖະ­ແຫຼງ​ຈາກ​ກົມ​ກອງ​ກ່ຽວ­ຂ້ອງ ກະ­ຊວງ​ສາ­ທາ­ລະ­ນະ​ສຸກ ຄຳ​ຖະ­ແຫຼງ​ຈາກ​ແພດ​ໝໍ​ຕາມ​ໂຮງ­ໝໍ​ຕ່າງໆ.

   ຫາກ​ເວົ້າ​ໃນ​ແງ່​ກົດ­ໝາຍ​ແລ້ວ​ມັນ​ກໍ​ມີ​ເນີ ! ເຊັ່ນ​ວ່າ: ໃນ​ກົດ­ໝາຍ​ວ່າ​ດ້ວຍ​ການ​ຕ້ານ ແລະ ສະ­ກັດ​ກັ້ນ​ອາ​ຊະ​ຍາ​ກຳ​ທາງ​ລະ­ບົບ​ຄອມ​ພິວ​ເຕີ ສະ­ບັບ​ເລກ​ທີ 61/ສພຊ ລົງ​ວັນ​ທີ 15 ກໍ­ລະ­ກົດ 2016 ໃນ​ມາດ­ຕາ 62 ມາດ​ຕະ­ການ​ທາງ​ອາ­ຍາ ໂດຍ​ສະ­ເພາະ ໃນ​ຂໍ້ 5 ລະ­ບຸ​ວ່າ: ການ​ສ້າງ​ຄວາມ​ເສຍ​ຫາຍ​ຜ່ານ​ສື່​ສັງ­ຄົມ​ອອນ​ລາຍ ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ​ແຕ່​ສາມ​ເດືອນ​ຫາ​ສາມ​ປີ ແລະ ຈະ​ຖືກ​ປັບ​ໃໝ​ແຕ່ 4 ລ້ານ​ກີບ ຫາ 20 ລ້ານ​ກີບ...

   ການ​ປາບ​ຂ່າວ​ປອມ​ດີ​ທີ່​ສຸດ​ເຫັນ​ແລ້ວ Block ຖິ້ມ​ໂລດ.

ໂດຍ: ແນວ​ລາວ

ຂ່າວທີ່ກ່ຽວຂ້ອງ