ໄຊຍະບູລີ ຈະສົ່ງ 14 ປະເພດກີລາ ຮ່ວມຊຽງຂວາງ ເກມ

346 10 ກ.ພ. 2020 ວົງຈອນກີລາ
ໄຊຍະບູລີ ຈະສົ່ງ 14 ປະເພດກີລາ ຮ່ວມຊຽງຂວາງ ເກມ

   ແຂວງ​ໄຊ​ຍະ​ບູ​ລີ ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກະ­ກຽມ​ຄວາມ​ພ້ອມ​ສົ່ງ​ທັບ​ນັກ­ກີ­ລາ ເຂົ້າ​ຮ່ວມ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI (ຊຽງ​ຂວາງ ເກມ) ຂຶ້ນ​ວັນ​ທີ 5 ກຸມ­ພາ 2020 ຢູ່​ພະ​ແນກ​ສຶກ​ສາ​ທິ​ການ ແລະ ກີ­ລາ (ສສກ) ແຂວງ​ດັ່ງ­ກ່າວ ໂດຍ​ມີ​ທ່ານ​ນາງ ບຸນ​ພັກ ອິນ​ທະ​ປັນ­ຍາ ຮອງ​ເຈົ້າ­ແຂວງ​ໄຊ​ຍະ​ບູ​ລີ ຜູ້​ຊີ້​ນຳ​ວຽກ​ງານ​ວັດ­ທະ­ນາ​ທຳ -ສັງ­ຄົມ ມີ​ຫົວ­ໜ້າ-ຮອງ​ຫົວ­ໜ້າ​ພະ­ແນກ­ການ ຜູ້­ຕາງ­ໜ້າ​ສະ­ຫະ­ພັນ​ກີ­ລາ 14 ປະ­ເພດ ຄູ​ເຝິກ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ທ່ານ ພັນ ດວງ​ຕາ ຮອງ​ຫົວ­ໜ້າ​ພະ​ແນກ ສສກ ແຂວງ​ໄຊ​ຍະ​ບູ​ລີ ກ່າວ​ວ່າ: ປັດ­ຈຸ­ບັນ​ວຽກ​ງານ​ຂອງ​ກຳ­ມະ­ການ​ເຕັກ­ນິກ​ຈັດ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ແຕ່​ວັນ​ທີ 22 ມີ­ນາ-1 ເມ­ສາ 2020 ມີ​ຄວາມ​ກຽມ­ພ້ອມ​ໂດຍ​ພື້ນ­ຖານ​ແລ້ວ​ໃນ​ທຸກ​ສະ­ໜາມ​ແຂ່ງ­ຂັນ ເພື່ອ​ຮອງ​ຮັບ​ພິ­ທີ​ເປີດ-ປິດ​ງານ​ດັ່ງ­ກ່າວ ເຊິ່ງ​ເຈົ້າ­ພາບ​ໄດ້​ກຳ­ນົດ 28 ປະ­ເພດ​ກີ­ລາ ສະ­ເພາະ​ແຂວງ​ໄຊ​ຍະ​ບູ​ລີ ຈະ​ສົ່ງ 14 ປະ­ເພດ ເຂົ້າ​ຮ່ວມ ຄື: ບານ­ເຕະ ບານ­ສົ່ງ​ໃນ​ຮົ່ມ-ບານ­ສົ່ງ​ຫາດ​ຊາຍ ກະ­ຕໍ້ ແລ່ນ-ລານ ເປ​ຕັງ ຊ່ວງ​ເຮືອ ໝາກ​ແລ້ ໜ້າ​ເກັກ ໝາກ​ຂ່າງ ລົດ­ຖີບ ສະ­ນຸກ​ເກີ ມວຍ ກ໊ອຟ ແລະ ດອກ​ປີກ​ໄກ່.

   ໂອ­ກາດ​ນີ້ ຍັງ​ໄດ້​ຮັບ​ຟັງ​ການ​ລາຍ​ງານ​ຄວາມ​ພ້ອມ​ຂອງ​ການ​ອອກ​ສະ­ຫຼາກ​ຊີງ​ໂຊກ ເພື່ອ​ລະ­ດົມ​ທຶນ​ຊ່ວຍ​ນັກ­ກີ­ລາ ເຂົ້າ​ຮ່ວມ​ງານ​ດັ່ງ­ກ່າວ ເຊິ່ງ​ຈະ​ໄດ້​ອອກ​ສະ­ຫຼາກ​ຊີງ​ໂຊກ ວັນ​ທີ 19 ກຸມ­ພາ 2020 ນອກ​ນີ້ ແຕ່​ລະ​ສະ­ຫະ­ພັນ​ກີ­ລາ​ຍັງ​ໄດ້​ປະ­ກອບ​ຄຳ​ຄິດ​ເຫັນ ເພື່ອ​ໃຫ້­ການ​ກະ­ກຽມ​ຄວາມ​ພ້ອມ​ເຂົ້າ​ສູນ​ເຝິກ­ຊ້ອມ​ນັກ­ກີ­ລາ​ແຕ່​ລະ​ປະ­ເພດ ຕື່ມ​ອີກ.

ຂ່າວທີ່ກ່ຽວຂ້ອງ