ເບີ່ງບ້ານເຂົາເອົາບົດຮຽນ 11-02-2020

925 11 ກ.ພ. 2020 ຫົວຂໍ້ຂ່າວອື່ນໆ

    ຄໍ​ລຳ​ປະຈຳ​ວັນ​ນີ້ ມີ​ເລື່ອງ​ກ່ຽວ​ກັບ​ແຜນ​ສ້າງ​ເຮືອນ​ພັກ​ສຳລັບ​ຜູ້​ເຖົ້າ​ໃນ​ຈີນ ເລື່ອງ​ທີ່​ກຳປູເຈຍ​ກັບ​ການ​ສະຫງວນ​ອາຊີບ ແລະ ມາດ​ຕະການ​ລົງໂທດ​ຜູ້​ເຜີຍແຜ່​ຂ່າວ​ຮຸນ​ແຮງ​ຢູ່​ໃນ ອົດ​ສະ​ຕຣາ​ລີ.

     ທີ່ ​ສປ ຈີນ : ແຫຼ່ງ​ຂ່າວ​ຈາກ​ສຳນັກ​ຂ່າວ​ກຽວ​ໂຕ (Kyoao) ໄດ້​ໃຫ້​ຮູ້​ໃນ​ທ້າຍ​ປີ 2019 ວ່າ ບໍລິສັດ ປາ​ນາ​ໂຊ​ນິກ ຂອງ​ຍີ່ປຸ່ນ ມີ​ແຜນການ​ສ້າງ​ທີ່​ພັກ​ສຳລັບ​ຜູ້​ເຖົ້າ​ຢູ່​ເມືອງ ຢີ​ຊິງ (Yixing) ແຂວງ​ຈຽງ​ຊູ ​ສປ ຈີນ ໂດຍ​ຈະ​ໃສ່​ຊື່ວ່າ “ເມືອງ ປາ​ນາ​ໂຊ​ນິກ” ທີ່​ຈະ​ມີ​ເຮືອນ​ພັກ​ສຳລັບ​ຜູ້​ເຖົ້າ ຈຳນວນ 800 ຫຼັງ ແຕ່​ລະ​ຫຼັງ​ຈະ​ປະກອບ​ດ້ວຍ​ເຄື່ອງ​ອຳນວຍ​ຄວາມ​ສະດວກ​ຄົບ​ຊຸດ​ທີ່​ນຳ​ໃຊ້​ລະບົບ​ປັນຍາ​ປະດິດ (AI) ຫ້ອງ​ນອນ​ແຕ່​ລະ​ຫ້ອງ​ຈະ​ປະກອບ​ດ້ວຍ​ເງື່ອນໄຂ​ສິ່ງແວດລ້ອມ​ກ່ອມ​ໃຫ້​ນອນ​ຫຼັບ​ດີ​ສ່ວນ​ຫ້ອງ​ຖ່າຍ​ນັ້ນ ກໍ​ຈະ​ມີ​ເຄື່ອງ​ວັດແທກ​ຄວາມດັນເລືອດ​ປະກອບ​ໃສ່​ໂຄງການ​ສ້າງ“ເມືອງ ປາ​ນາ​ໂຊ​ນິກ” ເພື່ອ​ສະໜອງ​ທີ່​ພັກ​ໃຫ້​ປະຊາກອນ​ຈີນ​ທີ່​ມີ​ອາຍຸ​ສູງ​ນີ້ ຈະ​ເລີ່ມ​ຕົ້ນ​ໃນ​ເດືອນ​ມີນາ ປີ 2020 ແລະ ຈະ​ສຳເລັດ​ທັນ​ໄດ້​ຂາຍ​ໃຫ້​ຜູ້​ຕ້ອງການ​ພາຍ​ໃນ​ທ້າຍ​ເດືອນ​ມີນາ ປີ 2021 ຢູ່ ​ສປ ຈີນ ໃນ​ປັດຈຸບັນ​ຈຳນວນ​ປະຊາກອນ​ທີ່​ມີ​ອາຍຸ 60 ປີ ແລະ ສູງ​ກວ່າ​ນັ້ນ ທັງ​ໝົດ ປະມານ 250 ລ້ານ​ຄົນ ແລະ ຈະ​ເພີ່ມ​ຂຶ້ນ​ສູ່​ຕົວ​ເລກ 500 ລ້ານ​ຄົນ ພາຍ​ໃນ​ປີ 2050.

    ທີ່ ກຳປູເຈຍ: ເພື່ອ​ສະຫງວນ​ອາຊີບ​ຕົ້ນຕໍ​ຈຳນວນ​ໜຶ່ງ​ໄວ້​ໃຫ້​ຄົນ​ກຳປູເຈຍ​ເອງ​ເຮັດ ຫວ່າງ​ບໍ່​ດົນ​ມາ​ນີ້ ທ່ານ​ລັດຖະມົນຕີ​ວ່າການ​ກະຊວງ​ແຮງ​ງານ ແລະ ເຝິກ​ອາຊີບ​ຂອງ​ກຳປູເຈຍ ໄດ້​ອອກ​ຄຳ​ສັ່ງ​ຫ້າມ​ຊາວ​ຕ່າງປະເທດ​ປະກອບ​ບັນດາ​ອາຊີບ​ດັ່ງ​ຕໍ່​ໄປ​ນີ້​ຄື: ອາຊີບ​ຂັບ​ລົດ​ແທັກ​ຊີ້ ລົດ​ຕຸກໆ ແລະ ລົດ​ສາມ​ລໍ້ ການ​ບໍລິການ​ເສີມ​ສວຍ  ການ​ຂາຍ​ສິນຄ້າ​ຢູ່​ຕາມ​ແຄມ​ຖະໜົນ ການ​ນວດ​ບຳບັດ ຕາມ​ສະຖານທີ່​ສາທາລະນະ ຫຍິບ​ເກີບ ຕັດ​ເຄື່ອງ ສ້ອມແປງ​ລົດ ການ​ຜະລິດ​ເຄື່ອງ​ທີ່​ລະນຶກ​ເອກະລັກ​ຂອງ​ກຳປູເຈຍ ການ​ພະ​ລິດ​ພະ​ພຸດ​ທະ​ຮູບ ການ​ຜະລິດ​ເຄື່ອງ​ດົນຕີ​ກຳປູເຈຍ ວຽກ​ຊ່າງ​ຄຳ ແລະ ຊ່າງ​ເຈຍ​ລະ​ໄນ​ອັນຍະ​ມະນີ ສຳລັບ​ຜູ້​ລະເມີດ​ຄຳ​ສັ່ງ​ນີ້​ຈະ​ຖືກ​ປັບ​ໃໝ ແລະ ລົງໂທດ​ຕາມ​ກົດໝາຍ​ແຮງ​ງານ​ຂອງ​ກຳປູເຈຍ ຂ່າວ​ໃຫ້​ຮູ້​ຕື່ມ​ວ່າ: ທາງ​ກະຊວງ​ແຮງ​ງານ ແລະ ເຝິກ​ອາຊີບ​ຈະ​ບໍ່​ອະນຸຍາດ ບໍ່​ຕໍ່​ອາຍຸ​ຂອງ​ບັດ ຫຼື ໜັງສື​ຈ້າງ​ງານ ສຳລັບ​ຊາວ​ຕ່າງປະເທດ​ທີ່​ກຳລັງ​ປະກອບ​ອາຊີບ ທີ່​ກ່າວ​ມາ​ຂ້າງ​ເທີງ​ນັ້ນ ໃນ​ປັດຈຸບັນ ມີ​ຊາວ​ຕ່າງປະເທດ​ຈາກ 93 ປະເທດ ຈຳນວນ​ຫຼາຍ​ກວ່າ 160.000 ຄົນ ພວມ​ອາໄສ ແລະ ເຮັດ​ວຽກ​ຢູ່ ກຳປູເຈຍ.

     ທີ່ ອົດ​ສະ​ຕຣາ​ລີ : ມີ​ຂ່າວ​ຍ່ອຍ​ຈາກ​ນະຄອນຫຼວງ ແຄມ​ເບີ​ຣາ ປະເທດ​ອົດ​ສະ​ຕຣາ​ລີ ທີ່​ໃຫ້​ຊາບ​ວ່າ​ຜູ້​ເຜີຍແຜ່​ເນື້ອ​ໃນ​ພຶດຕິ​ກຳ​ທີ່​ໃຊ້​ຄວາມ​ຮຸນ​ແຮງ​ທາງ​ອິນ​ເຕີ​ເນັດ​ນັ້ນ ຈະ​ໄດ້​ຖືກ​ລົງໂທດ​ທາງ​ແພ່ງ ແລະ ທາງ​ອາຍາ​ຢ່າງ​ໜັກ (ໜັງສືພິມ​ປະເທດ​ລາວ ວັນ​ທີ 5 ເມສາ 2019) ຕາມ​ກົດໝາຍ​ຫ້າມ​ເຜີຍແຜ່​ຂ່າວ​ຄວາມ​ຮຸນ​ແຮງ​ທາງ​ອິນ​ເຕີ​ເນັດ ທີ່​ລັດ​ຖະ​ສະພາ​ຂອງ​ປະເທດ​ນີ້​ໄດ້​ຮັບຮອງ​ເອົາ​ໃນ​ຕົ້ນ​ປີ 2019 ກົດໝາຍ​ໄດ້​ກຳນົດ​ໂທດ​ສຳລັບ​ບໍລິສັດ​ສື່​ສັງຄົມ​ອອນ​ລາຍ ທີ່​ລະເມີດ​ກົດໝາຍ​ສະບັບ​ນີ້ ດ້ານ​ການ​ປັບ​ໃໝ​ສູງ​ສຸດ 10% ຂອງ​ລາຍ​ໄດ້​ທັງ​ໝົດ​ຂອງ​ບໍລິສັດ ແລະ ຕັດ​ອິດສະຫຼະພາບ​ຜູ້​ບໍລິຫານ​ຂັ້ນ​ນຳ(ປະທານ ຫຼື ອຳນວຍ​ການ​ບໍລິສັດ) ສູງ​ສຸດ​ເປັນ​ເວລາ 3 ປີ ຫາກ​ບໍ່​ຮີບ​ຮ້ອນ​ລຶບ​ເນື້ອ​ໃນ​ທີ່​ສະແດງ​ເຖິງ​ການ​ໃຊ້​ຄວາມ​ຮຸນ​ແຮງ ກົດໝາຍ​ສະບັບ​ນີ້​ສ້າງ​ຂຶ້ນ​ພາຍຫຼັງ​ມີ​ເຫດ​ຍິງ​ກັນ​ໃນ​ສະຖານທີ່​ປະຕິບັດ​ສາສະໜາ (ມັດ​ສະ​ຍິດ) 2 ແຫ່ງ ຢູ່​ປະເທດ ນິວ​ຊີ​ແລນ ໃນ​ວັນ​ທີ 15 ມີນາ ປີ 2019.

ຂ່າວທີ່ກ່ຽວຂ້ອງ