ລາວໂຕໂຢຕ້າ ພົບ ຮົ່ວກັງ ຈາກສິງກະໂປ ແລງມື້ນີ້

253 11 ກ.ພ. 2020 ວົງຈອນກີລາ
ລາວໂຕໂຢຕ້າ ພົບ ຮົ່ວກັງ ຈາກສິງກະໂປ ແລງມື້ນີ້

   ການ​ແຂ່ງ­ຂັນ​ກີ­ລາ​ເຕະ­ບານ AFC CUP 2020 Group Stage ສະ­ໂມ­ສອນ ລາວ​ໂຕ​ໂຢ​ຕ້າ ເອັຟ​ຊີ ທີມ​ແຊັມ​ການ​ແຂ່ງ­ຂັນ ເປັບ​ຊີ້ ລາວ​ພຣີ​ເມຍ ລີກ ຕົວ​ແທນ​ຈາກ ສປປ ລາວ ຈະ​ເປີດ​ບ້ານ​ຕ້ອນ­ຮັບ​ການ​ມາ​ຢາມ​ຂອງ ສະ­ໂມ­ສອນ HOUGANG UNITED FC (ຮົ່ວ​ກັງ ຢູ​ໄນ​ເຕັດ) ຈາກ​ປະ­ເທດ​ສິງ­ກະ­ໂປ ໃນ​ຕອນ​ແລງ​ວັນ​ທີ 11 ກຸມ­ພາ 2020 ນີ້ ຢູ່​ສະ­ໜາມ​ກີ­ລາ​ແຫ່ງ​ຊາດ ຫຼັກ 16 ນະ­ຄອນ­ຫຼວງ​ວຽງ​ຈັນ ເລີ່ມ​ເວ­ລາ 18:30 ໂມງ.

   ພິ­ທີ​ຖະ­ແຫຼງ​ຂ່າວ​ການ​ແຂ່ງ­ຂັນ​ດັ່ງ­ກ່າວ ຈັດ​ຂຶ້ນ​ວັນ​ທີ 10 ກຸມ­ພາ 2020 ຢູ່​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ໂດຍ​ມີ​ທ່ານ Jun Fukuda ຫົວ­ໜ້າ​ຄູ​ເຝິກ​ສະ­ໂມ­ສອນ ລາວ​ໂຕ​ໂຢ​ຕ້າ ເອັຟ​ຊີ ທ່ານ Clement Teo ຫົວ­ໜ້າ​ຄູ​ເຝິກ​ສະ­ໂມ­ສອນ ຮົ່ວ​ກັງ ຢູ​ໄນ​ເຕັດ ພ້ອມ​ດ້ວຍ​ນັກ­ກີ­ລາ ແລະ ສື່​ມວນ​ຊົນ​ເຂົ້າ​ຮ່ວມ.

   ທ່ານ Jun Fukuda ກ່າວ​ວ່າ: ການ​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້ ພວກ​ເຮົາ​ໄດ້​ກຽມ​ທີມ​ມາ​ຕັ້ງ­ແຕ່​ເດືອນ​ທັນ­ວາ 2019 ເຊິ່ງ​ໄລ­ຍະ​ຜ່ານ​ມາ​ພວກ​ເຮົາ​ກໍ​ໄດ້​ມີ​ການ­ເຄື່ອນ­ໄຫວ​ອຸ່ນ​ເຄື່ອງ​ກັບ​ຫຼາຍ​ສະ­ໂມ­ສອນ​ຊື່​ດັ່ງ​ຈາກ​ປະ­ເທດ​ໄທ ຫຼັງ​ຈາກ​ອຸ່ນ​ເຄື່ອງ​ພວກ​ເຮົາ​ໄດ້​ມີ​ການ​ປັບ­ປຸງ​ລະ­ບົບ​ການ​ຫຼິ້ນ​ຫຼາຍ​ຂຶ້ນ ແລະ ຫວັງ​ວ່າ​ເກມ​ນັດ​ນີ້ ພວກ​ເຮົາ​ຈະ​ສາ­ມາດ​ເກັບ​ໄຊ­ຊະ­ນະ​ໃຫ້​ໄດ້ ພ້ອມ​ທັງ​ຂໍ​ຮຽກ­ຮ້ອງ​ມາ​ຍັງ​ກອງ​ເຊຍ​ບານ ມີ​ໂອ­ກາດ​ກໍ​ເຂົ້າ​ມາ​ເຊຍ ແລະ ເປັນ​ກຳ­ລັງ​ໃຈ​ໃຫ້​ກັບ​ທີມ​ພວກ​ເຮົາ​ດ້ວຍ.

   ຂະ­ນະ​ທີ່ ທ່ານ Clement Teo ກ່າວ​ຮູ້­ສຶກ​ດີ­ໃຈ​ທີ່​ໄດ້​ເຂົ້າ​ຮ່ວມ​ລາຍ­ການ​ນີ້​ເປັນ​ຄັ້ງ​ທຳ​ອິດ ໃນ​ລະ­ດັບ​ນາໆຊາດ ພ້ອມ​ທັງ​ຫວັງ​ວ່າ​ນັກ­ກີ­ລາ​ຈະ​ສາ­ມາດ​ເກັບ​ກ່ຽວ​ປະ­ສົບ​ການ​ໃຫ້​ຫຼາຍ​ທີ່​ສຸດ ແນ່­ນອນ​ວ່າ​ຈະ​ເປັນ​ເກມ​ທີ່​ດີ ແລະ ເປັນ​ໜ້າ​ປະ­ຫວັດ­ສາດ​ຂອງ​ສະ­ໂມ­ສອນ ແລະ ຫວັງ​ເກັບ​ຄະ­ແນນ​ກັບ​ບ້ານ​ໃນ​ນັດ​ນີ້​ໃຫ້​ໄດ້.

   ສຳ­ລັບ​ສະ­ໂມ­ສອນ ລາວ​ໂຕ​ໂຢ​ຕ້າ ຢູ່​ຮ່ວມ​ກຸ່ມ​ກັບ ສະ­ໂມ­ສອນ HOCHIMINH CITY FC ຈາກ ສສ ຫວຽດ­ນາມ ສະ­ໂມ­ສອນ HOUGANG UNITED FC ຈາກ​ປະ­ເທດ​ສິງ­ກະ­ໂປ ແລະ ສະ­ໂມ­ສອນ Yangon United ຈາກ​ປະ­ເທດ​ມຽນ​ມາ.

ຂ່າວທີ່ກ່ຽວຂ້ອງ