ໂບລິ້ງ ນວ ຕັ້ງເປົ້າ 2 ຫຼຽນຄຳ ຊຽງຂວາງ ເກມ

359 11 ກ.ພ. 2020 ວົງຈອນກີລາ
ໂບລິ້ງ ນວ ຕັ້ງເປົ້າ 2 ຫຼຽນຄຳ ຊຽງຂວາງ ເກມ

   ທ່ານ ເພັດ​ສະ­ໝອນ ເພັງ​ເມືອງ​ຄູນ ປະ­ທານ​ສະ­ຫະ­ພັນ​ກີ­ລາ​ໂບ​ລິ້ງ ນະ­ຄອນ­ຫຼວງ​ວຽງ​ຈັນ (ນວ) ໃຫ້​ສຳ­ພາດ​ວ່າ: ປັດ­ຈຸ­ບັນ​ພວກ​ເຮົາ​ມີ​ຄວາມ​ພ້ອມ​ຢ່າງ​ເຕັມ­ທີ່ ພາຍ­ຫຼັງ​ໄດ້​ເຝິກ­ຊ້ອມ​ແຕ່​ກາງ​ປີ 2019 ໂດຍ​ເປົ້າ​ໝາຍ​ໃນ​ການ​ເຂົ້າ​ຮ່ວມ​ແຂ່ງ­ຂັນ ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ຫຼື ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ໄດ້​ຕັ້ງ​ໄວ້ 2 ຫຼຽນ​ຄຳ ເນື່ອງ​ຈາ​ກວ່າ​ມີ​ຄວາມ​ໝັ້ນ​ໃຈ​ນັກ­ກີ­ລາ​ທີ່​ມີ​ປະ­ສົບ​ການ ອີກ​ຢ່າງ​ໃນ​ໄລ­ຍະ​ການ​ເຝິກ­ຊ້ອມ ພວກ​ເຮົາ​ໄດ້​ສົ່ງ​ນັກ­ກີ­ລາ​ເຂົ້າ​ຮ່ວມ​ການ​ແຂ່ງ­ຂັນ​ທີ່​ປະ­ເທດ​ໄທ ຜ່ານ​ການ​ແຂ່ງ­ຂັນ​ນັກ­ກີ­ລາ​ຂອງ​ພວກ​ເຮົາ​ສາ­ມາດ​ສ້າງ​ຜົນ­ງານ​ໄດ້​ຢ່າງ​ໂດດ​ເດັ່ນ ຫຼັງ​ຈາກ​ນັ້ນ ມາ​ຮອດ​ທ້າຍ​ປີ 2019 ທາງ​ຄະ­ນະ​ບໍ­ລິ­ຫານ​ສະ­ຫະ­ພັນ​ຂອງ​ພວກ​ເຮົາ ຈຶ່ງ​ໄດ້​ຄັດ​ເລືອກ​ນັກ­ກີ­ລາ​ໃຫ້​ໄດ້​ຕາມ​ເປົ້າ​ໝາຍ​ທີ່​ກຳ­ນົດ​ເອົາ​ໄວ້ ໂດຍ​ເບື້ອງ​ຕົ້ນ​ມີ​ນັກ­ກີ­ລາ​ທີ່​ເຂົ້າ​ສູນ​ເຝິກ­ຊ້ອມ ຈຳ­ນວນ 20 ກວ່າ​ຄົນ ແຕ່​ມາ​ເຖິງ​ປັດ­ຈຸ­ບັນ​ພວກ​ເຮົາ​ສາ­ມາດ​ຄັດ​ເລືອກ​ໄດ້ 7 ຄົນ ທີ່​ເປັນ​ຕົວ​ແທນ​ໃຫ້​ແກ່​ນັກ­ກີ­ລາ​ໂບ​ລິ້ງ ນວ ເຂົ້າ​ຮ່ວມ​ການ​ແຂ່ງ­ຂັນ ຊຽງ​ຂວາງ ເກມ 2020.

   ສຳ­ລັບ​ການ​ແຂ່ງ­ຂັນ​ກີ­ລາ​ໂບ​ລິ້ງ ໃນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ​ຄັ້ງ​ນີ້ ທາງ​ຄະ­ນະ​ຈັດ­ການ​ແຂ່ງ ຂັນ​ກຳ­ນົດ 5 ລາຍ­ການ​ແຂ່ງ­ຂັນ​ຄື: ດ່ຽວ​ຊາຍ ຄູ່​ຊາຍ ທີມ 3 ຄົນ​ຊາຍ ທີມ 6 ຄົນ​ຊາຍ ແລະ ອໍ​ລີ​ເວັນ ຂະ­ນະ​ທີ່​ທັບ​ນັກ­ກີ­ລາ​ໂບ​ລິ້ງ ນວ ຈະ​ເຂົ້າ​ຮ່ວມ​ທຸກ​ລາຍ­ການ ສຳ­ລັບ​ຜົນ­ງານ​ຂອງ​ນັກ­ກີ­ລາ​ໂບ​ລິ້ງ ນວ ກີ­ລາ​ແຫ່ງ​ຊາດ ຄັ້ງ​ທີ IX ສາ­ມາດ​ຍາດ​ໄດ້ 1 ຫຼຽນ​ຄຳ 1 ຫຼຽນ​ເງິນ ປີ 2012 ທີ່​ແຂວງ​ຫຼວງ​ພະ​ບາງ.

ຂ່າວທີ່ກ່ຽວຂ້ອງ