ມອບອຸປະກອນການແພດ ກຽມພ້ອມໂຕ້ຕອບການລະບາດ ຂອງໄວຣັສໂຄໂຣນາ

548 11 ກ.ພ. 2020 ຂ່າວໜ້າ​ໜຶ່ງ
ມອບອຸປະກອນການແພດ ກຽມພ້ອມໂຕ້ຕອບການລະບາດ ຂອງໄວຣັສໂຄໂຣນາ

   ພິ­ທີ​ມອບ-ຮັບ​ອຸ­ປະ­ກອນ​ການ​ແພດ ໄດ້​ຈັດ​ຂຶ້ນ​ວັນ​ທີ 10 ກຸມ­ພາ 2020 ທີ່​ກະ­ຊວງ​ການ​ເງິນ ຕາງ­ໜ້າ​ມອບ ໂດຍ​ທ່ານ ປີ​ຊາ​ໄຊ ແກ້ວ​ໄຊ​ຍະ​ຈັກ ປະ­ທານ ບໍ­ລິ­ສັດ ທີ່​ປຶກ­ສາ​ດ້ານ​ການ​ລົງ­ທຶນ ແລະ ກໍ່­ສ້າງ​ເຂື່ອນ​ໄຟ­ຟ້າ ຈຳ­ກັດ​ຜູ້​ດຽວ ຕາງ­ໜ້າ​ຮັບ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທັງ​ເປັນ​ຫົວ­ໜ້າ​ຄະ­ນະ​ກຳ­ມະ­ການ​ສະ­ເພາະ​ກິດ​ເພື່ອ​ປ້ອງ​ກັນ​ຄວບ​ຄຸມ ແລະ ແກ້​ໄຂ​ພະ­ຍາດ​ອັກ­ເສບ​ປອດ​ທີ່​ເກີດ​ຈາກ​ເຊື້ອ​ຈຸ​ລະ​ໂລກ​ສາຍ​ພັນ​ໃໝ່ ມີ​ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ພ້ອມ​ດ້ວຍ​ຄະ­ນະ​ທັງ​ສອງ​ຝ່າຍ​ເຂົ້າ​ຮ່ວມ.

   ທ່ານ ປີ​ຊາ​ໄຊ ແກ້ວ​ໄຊ​ຍະ​ຈັກ ກ່າວ​ວ່າ: ບໍ­ລິ­ສັດ​ຂອງ​ພວກ​ເຮົາ​ໄດ້​ເຫັນ​ຄວາມ​ສຳ­ຄັນ​ໃນ​ການ​ໂຕ້​ຕອບ​ປ້ອງ​ກັນ ແລະ ຄວບ​ຄຸມ­ພະ​ຍາດ​ດັ່ງ­ກ່າວ ເພາະ​ເຫັນ​ວ່າ ສປປ ລາວ ເປັນ​ປະ­ເທດ​ໜຶ່ງ​ທີ່​ມີ​ຊາຍ​ແດນ​ຕິດ​ຈອດ​ກັບ ສປ ຈີນ ຍາວ​ສົມ­ຄວນ ເຊິ່ງ​ກໍ່­ໃຫ້­ເກີດ​ມີ​ຄວາມ​ສ່ຽງ​ໃນ​ການ​ຕິດ­ເຊື້ອ​ພະ­ຍາດ​ອັກ­ເສບ​ປອດ​ຈາກ​ເຊື້ອ​ຈຸ​ລະ​ໂລກ​ສາຍ​ພັນ​ໃໝ່ ເພື່ອ​ເປັນ​ການ​ກະ­ກຽມ​ຄວາມ​ພ້ອມ ແລະ ໂຕ້​ຕອບ​ຕໍ່​ພະ­ຍາດ​ດັ່ງ­ກ່າວ​ນີ້ ດັ່ງ­ນັ້ນ ທາງ​ບໍ­ລິ­ສັດ​ຂອງ​ພວກ​ເຮົາ​ຈຶ່ງ​ໄດ້​ນຳ​ເອົາ​ອຸ­ປະ­ກອນ​ການ​ແພດ​ທີ່​ສາ­ມາດ​ໂຕ້​ຕອບ ປ້ອງ​ກັນ ແລະ ຕ້ານ​ກັບ​ພະ­ຍາດ​ໄວ​ຣັສ​ໂຄ​ໂຣ​ນາ ປະ­ກອບ​ມີ: ເຄື່ອງ​ກວດ​ວິ­ເຄາະ​ຫາ​ເຊື້ອ​ພະ­ຍາດ ໂຄ​ໂຣ​ນາ ຈຳ­ນວນ 2 ເຄື່ອງ ນ້ຳ​ຢາ​ກວດ​ຫາ​ເຊື້ອ​ພະ­ຍາດ ຈຳ­ນວນ 2.500 ຫຼອດ ຖົງ­ມື​ຈຳ­ນວນ 100.000 ຄູ່ ຊຸດ​ປ້ອງ​ກັນ​ພະ­ຍາດ ຈຳ­ນວນ 1.200 ຊຸດ ລວມ​ມູນ​ຄ່າ​ທັງ​ໝົດ 205.000 ໂດ​ລາ​ສະ­ຫະ­ລັດ ຫຼື ປະ­ມານ 1,8 ຕື້​ກວ່າ​ກີບ.

   ໂອ­ກາດ​ນີ້ ທ່ານ ສົມ​ດີ ດວງ​ດີ ໄດ້​ກ່າວ​ສະ­ແດງ​ຄວາມ​ຂອບ­ໃຈ​ຕໍ່ ບໍ­ລິ­ສັດ​ທີ່​ປຶກ­ສາ​ດ້ານ​ການ​ລົງ­ທຶນ ແລະ ກໍ່­ສ້າງ​ເຂື່ອນ​ໄຟ­ຟ້າ ຈຳ­ກັດ​ຜູ້​ດຽວ ທີ່​ໄດ້​ນຳ​ເອົາ​ອຸ­ປະ­ກອນ​ການ​ແພດ ມາ​ມອບ​ໃຫ້​ກັບ ສປປ ລາວ ເປັນ​ການ​ປະ­ກອບ­ສ່ວນ​ອັນ​ສຳ­ຄັນ​ໃນ​ການ​ກຽມ­ພ້ອມ​ຕອບ​ໂຕ້ ແລະ ປ້ອງ​ກັນ​ພະ­ຍາດ​ດັ່ງ­ກ່າວ ເຊິ່ງ​ອຸ­ປະ­ກອນ​ການ​ແພດ​ດັ່ງ­ກ່າວ​ແມ່ນ​ຈະ​ມອບ​ໃຫ້​ກະ­ຊວງ​ສາ­ທາ­ລະ­ນະ​ສຸກ ໄປ​ມອບ​ຕໍ່­ໃຫ້​ໂຮງ­ໝໍ​ຕ່າງໆ​ທີ່​ມີ​ຄວາມ​ຕ້ອງ­ການ ໂດຍ​ສະ­ເພາະ ແຂວງ​ທີ່​ມີ​ຊາຍ​ແດນ​ເຊື່ອມ​ຈອດ​ກັບ ສປ ຈີນ ເພື່ອ​ເປັນ​ການ​ກຽມ​ຄວາມ ພ້ອມ​ຮັບ​ມື​ປ້ອງ​ກັນ​ພະ­ຍາດ​ອັກ­ເສບ​ປອດ​ຈາກ​ເຊື້ອ​ຈຸ​ລະ​ໂລກ​ສາຍ​ພັນ​ໃໝ່​ໄດ້​ຢ່າງ​ທັນ​ການ.

ຂ່າວທີ່ກ່ຽວຂ້ອງ