ສປປ ລາວ ໃຫ້ຄວາມສຳຄັນວຽກງານສິດທິມະນຸດ

679 11 ກ.ພ. 2020 ຂ່າວໜ້າ​ໜຶ່ງ

   ວັນ​ທີ 10 ກຸມ­ພາ 2020 ທີ່​ສູນ​ການ​ຮ່ວມ​ມື​ສາ­ກົນ ແລະ ການ​ເຝິກ­ອົບ­ຮົມ ກະ­ຊວງ​ການ​ຕ່າງ­ປະ­ເທດ ໄດ້​ຈັດ​ກອງ​ປະ­ຊຸມ​ເຜີຍ­ແຜ່​ຜົນ­ສຳ­ເລັດ​ຂອງ​ຄະ­ນະ​ຜູ້​ແທນ​ລາວ ໃນ​ການ​ເຂົ້າ​ຮ່ວມ​ການ​ທົບ​ທວນ​ບົດ​ລາຍ​ງານ​ແຫ່ງ​ຊາດ​ດ້ານ​ສິດ­ທິ​ມະ­ນຸດ ຂອງ ສປປ ລາວ ພາຍ​ໃຕ້​ກົນ​ໄກ​ການ​ທົບ​ທວນ​ປະ­ຈຳ​ໄລ­ຍະ ຫຼື Universal Periodic Review (UPR) ຮອບ​ວຽນ​ທີ 3 ຂອງ​ສະ­ພາ​ສິດ­ທິ​ມະ­ນຸດ ເຊິ່ງ​ຈັດ​ຂຶ້ນ​ວັນ​ທີ 21-24 ມັງ­ກອນ 2020 ທີ່​ສຳ­ນັກ­ງານ​ອົງ­ການ​ສະ­ຫະ​ປະ­ຊາ​ຊາດ (ສປຊ) ທີ່​ເຊີ​ແນວ ປະ­ເທດ​ສະ​ວິດ.

   ກອງ​ປະ­ຊຸມ​ຄັ້ງ​ນີ້ ເປັນ​ປະ­ທານ​ໂດຍ​ທ່ານ ບຸນ​ເກີດ ສັງ​ສົມ​ສັກ ລັດ­ຖະ­ມົນ­ຕີ​ປະ­ຈຳ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ແຫ່ງ​ຊາດ ວ່າ​ດ້ວຍ​ສິດ­ທິ​ມະ­ນຸດ ມີ​ຕາງ­ໜ້າ​ຈາກ​ບັນ­ດາ​ກະ­ຊວງ ຂະ­ແໜງ­ການ​ຕ່າງໆ​ຂອງ​ລັດ ຄະ­ນະ​ທູ­ຕາ­ນຸ­ທູດ ຕາງ­ໜ້າ​ຈາກ​ສະ­ຖານ­ທູດ​ຕ່າງ­ປະ­ເທດ​ປະ­ຈຳ​ລາວ ອົງ­ການ​ເຄືອ​ຄ່າຍ ສປຊ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ​ຮັບ​ຟັງ.

   ທ່ານ ບຸນ​ເກີດ ສັງ​ສົມ​ສັກ ລັດ­ຖະ­ມົນ­ຕີ​ປະ­ຈຳ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ແຫ່ງ​ຊາດ ວ່າ​ດ້ວຍ​ສິດ­ທິ​ມະ­ນຸດ ໃນ​ນາມ​ທີ່​ເປັນ​ຫົວ­ໜ້າ​ຄະ­ນະ​ຜູ້​ແທນ​ລາວ​ເຂົ້າ​ຮ່ວມ​ການ​ທົບ​ທວນ​ໃນ​ຄັ້ງ​ນີ້ ໄດ້​ຍົກ​ໃຫ້​ເຫັນ​ວ່າ: ລັດ­ຖະ­ບານ ແຫ່ງ ສປປ ລາວ ໃຫ້​ຄວາມ​ສຳ­ຄັນ ແລະ ໃຫ້­ການ​ຮ່ວມ​ມື​ຢ່າງ​ຕັ້ງ­ໜ້າ​ຕໍ່​ກັບ​ກົນ​ໄກ​ທົບ​ທວນ​ປະ­ຈຳ​ໄລ­ຍະ​ຂອງ​ອົງ­ການ ສປຊ ເຊິ່ງ​ເປັນ​ກົນ​ໄກ​ໜຶ່ງ​ທີ່​ໄດ້​ຮັບ​ການ​ສ້າງ­ຕັ້ງ​ຂຶ້ນ​ໂດຍ​ສະ­ພາ​ສິດ­ທິ​ມະ­ນຸດ ພາຍ​ໃຕ້​ກົດ​ບັດ ສປຊ ເພື່ອ​ດຳ­ເນີນ​ການ​ທົບ​ທວນ​ການ­ຈັດ­ຕັ້ງ​ປະ­ຕິ ບັດ​ສິດ­ທິ​ມະ­ນຸດ​ຂອງ​ທຸກ​ປະ­ເທດ​ສະ­ມາ­ຊິກ ສປຊ ດ້ວຍ​ກັນ ແລະ ກັນ ໃນ​ທຸກໆ 4 ປີ​ເຄິ່ງ ບົນ​ພື້ນ­ຖານ​ຄວາມ​ສະ­ເໝີ­ພາບ ແລະ ເຄົາ­ລົບ​ເຊິ່ງ​ກັນ ແລະ ກັນ ໂດຍ​ບໍ່​ຈຳ­ແນກ​ລະ­ບົບ​ການ­ເມືອງ ຄວາມ​ແຕກ​ຕ່າງ​ທາງ​ດ້ານ​ລະ­ດັບ​ການ​ພັດ­ທະ­ນາ​ເສດ­ຖະ­ກິດ?ສັງ ຄົມ ແລະ ວັດ­ທະ­ນະ­ທຳ ບໍ່​ຈຳ­ແນກ​ວ່າ​ເປັນ​ປະ­ເທດ​ໃຫຍ່ ຫຼື ປະ­ເທດ​ນ້ອຍ ພວກ​ເຮົາ​ຖື​ວ່າ​ກົນ​ໄກ​ດັ່ງ­ກ່າວ​ເປັນ​ເວ­ທີ​ໜຶ່ງ​ທີ່​ສຳ­ຄັນ​ໃນ​ການ​ຕອບ​ໂຕ້​ການ​ກ່າວ​ຫາ​ທີ່​ບໍ່​ສ້າງ­ສັນ​ຕໍ່ ສປປ ລາວ ເປັນ​ໂອ­ກາດ​ທີ່​ດີ​ເພື່ອ​ໂຄ­ສະ­ນາ ຊີ້​ແຈງ ແລະ ອະ­ທິ­ບາຍ​ກ່ຽວ​ກັບ​ນະ​ໂຍ ບາຍ​ທີ່​ຖືກ­ຕ້ອງ ແລະ ເປັນ​ທຳ​ຂອງ​ລັດ­ຖະ­ບານ​ໃນ​ວຽກ​ງານ​ສິດ­ທິ​ມະ­ນຸດ ລວມ​ທັງ​ຄວາມ​ພະ­ຍາ­ຍາມ ຜົນ­ສຳ­ເລັດ​ຂໍ້​ຫຍຸ້ງ­ຍາກ ແລະ ສິ່ງ​ທ້າ​ທາຍ ໃນ​ວຽກ​ງານ​ດັ່ງ­ກ່າວ​ໃຫ້​ສາ­ກົນ​ຮັບ​ຊາບ ແລະ ເຂົ້າ­ໃຈ.

   ພ້ອມ​ດຽວ​ກັນ​ນີ້ ທ່ານ​ຍັງ​ໄດ້​ຍົກ​ໃຫ້​ເຫັນ​ຜົນ­ສຳ­ເລັດ ໃນ​ການ​ເຂົ້າ​ຮ່ວມ​ຂະ​ບວນ​ການ​ທົບ​ທວນ UPR ຮອບ​ວຽນ​ທີ 3 ຂອງ ສປປ ລາວ ໃນ​ຄັ້ງ​ນີ້ ໂດຍ​ເລີ່ມ​ຈາກ​ຂັ້ນ​ຕອນ​ຂະ​ບວນ​ການ​ສ້າງ​ບົດ​ລາຍ​ງານ ແລະ ໄດ້​ນຳ​ສົ່ງ​ບົດ​ລາຍ​ງານ​ແຫ່ງ​ຊາດ ກ່ຽວ​ກັບ​ຄວາມ​ຄືບ​ໜ້າ​ໃນ​ການ­ຈັດ­ຕັ້ງ​ປະ­ຕິ­ບັດ​ຂໍ້​ສະ­ເໜີ​ແນະ​ພາຍ​ໃຕ້ UPR ຮອບ​ວຽນ​ທີ 2 ທີ່ ສປປ ລາວ ໃຫ້­ການ​ຮັບ­ຮອງ​ເອົາ​ໃນ​ປີ 2015 ໄປ​ຍັງ​ສະ­ພາ​ສິດ­ທິ​ມະ­ນຸດ ຈົນ​ເຖິງ​ການ​ເຂົ້າ​ຮ່ວມ​ການ​ທົບ​ທວນ​ຮອບ​ວຽນ​ທີ 3 ໃນ​ນັ້ນ ທ່ານ​ລັດ­ຖະ­ມົນ­ຕີ​ໄດ້​ຍົກ​ໃຫ້​ເຫັນ​ເຖິງ​ບັນ­ຍາ­ກາດ​ຂອງ​ການ​ທົບ​ທວນ​ບົດ​ລາຍ​ງານ​ຂອງ ສປປ ລາວ ໂດຍ 89 ປະ­ເທດ ສະ­ມາ­ຊິກ ສປຊ ຢ່າງ​ຕັ້ງ­ໜ້າ ແລະ ສ້າງ ສັນ ຫຼາຍ​ປະ­ເທດ​ໄດ້​ຮັບ​ຮູ້ ແລະ ຍ້ອງ­ຍໍ​ຕໍ່​ຜົນ­ງານ ແລະ ຄວາມ​ຄືບ​ໜ້າ​ໃນ​ການ​ປະ­ຕິ­ບັດ​ໜ້າ­ທີ່​ວຽກ​ງານ​ປົກ​ປ້ອງ ແລະ ສົ່ງ­ເສີມ​ສິດ­ທິ​ມະ­ນຸດ​ຂອງ ສປປ ລາວ ໃນ​ຊຸມ​ປີ­ຜ່ານ­ມາ ໄດ້​ມີ​ການ​ແລກ­ປ່ຽນ ແລະ ປະ­ກອບ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ ພ້ອມ​ທັງ​ມີ​ຂໍ້​ສະ­ເໜີ​ແນະ ທັງ​ໝົດ 226 ຂໍ້ ເພື່ອ​ສະ­ເໜີ​ໃຫ້ ສປປ ລາວ ນຳ­ໄປ​ພິ­ຈາ­ລະ­ນາ​ຮັບ­ຮອງ​ເອົາ​ໄປ​ຈັດ​ຕັ້ງ​ປະ­ຕິ­ບັດ​ໃນ 4 ປີ​ຂ້າງ​ໜ້າ ເຊິ່ງ​ຄະ­ນະ​ຜູ້​ແທນ​ພວກ​ເຮົາ​ໄດ້​ຕົກ­ລົງ​ນຳ​ເອົາ​ຂໍ້​ສະ­ເໜີ​ແນະ​ທັງ​ໝົດ​ນັ້ນ​ມາ​ຄົ້ນ­ຄວ້າ ແລະ ປຶກ­ສາ​ຫາ­ລື​ຮ່ວມ​ກັນ​ກັບ​ພາກ­ສ່ວນ​ຕ່າງໆ​ທີ່​ກ່ຽວ­ຂ້ອງ​ເພື່ອ​ພິ­ຈາ­ລະ­ນາ ແລະ ຈະ​ຕ້ອງ​ໄດ້​ໄປ​ລາຍ​ງານ​ຄືນ​ໃນ​ກອງ​ປະ­ຊຸມ​ສະ­ພາ​ສິດ­ທິ​ມະ­ນຸດ ຄັ້ງ​ທີ 44 ໃນ​ເດືອນ​ມິ­ຖຸ­ນາ 2020 ທີ່​ຈະ​ມາ​ເຖິງ​ນີ້.

ຂ່າວທີ່ກ່ຽວຂ້ອງ