...ກິນຜິດກາລະເທສະ...

1.109 12 ກ.ພ. 2020 ນານາສາລະ

   ກິນ​ຜິດ​ກາ­ລະ​ເທ­ສະ​ນີ້​ຄື: ການ​ກິນ​ບໍ່​ຖືກ​ຍາມ ເຊັ່ນ: ເອົາ​ເວ­ລາ​ເຮັດ​ວຽກ​ບ່າຍ​ວັນ​ສຸກ​ຕີ​ບູນ​ກິນ​ເບຍ ຫຼື ສ້າງ​ກິດ­ຈະ­ກຳ​ເຕະ­ບານ​ກິນ​ເບຍ ເຊິ່ງ​ກາຍ­ເປັນ​ຂໍ້​ອ້າງ​ທີ່​ຟັງ​ຂຶ້ນ ເພາະ­ວ່າ ແຕ່­ລະ­ຄົນ​ມັກ​ມ່ວນ ເຊິ່ງ​ມີ​ຄວາມ​ເມົາ​ເຂົ້າ​ມາ​ປົນ ບາງ​ຄົນ​ຈາກ​ເລີຍ ຄວາມ​ພໍ­ດີ ມ່ວນ​ເມົາ​ແລ້ວ​ບໍ່​ກັບ​ບ້ານ​ເຮືອນ​ກໍ​ມີ ແບບ​ນີ້​ບໍ່​ແນ່​ໃຈ​ວ່າ​ຜູ້­ກ່ຽວ​ຕິດ​ເມົາ​ມ່ວນ ຫຼື ຫາ​ທາງ​ໄປ... ກິນ​ຜິດ​ກາ­ລະ​ເທ­ສະ ອາດ​ເຮັດ​ໃຫ້​ເສຍ ວຽກ​ລັດ​ຖະ​ການ.

   ຄົນ​ລາວ​ບູ­ຮານ​ສອນ​ວ່າ: ກິນ​ບໍ່​ເປັນ ເຮັດ​ໃຫ້​ເປັນ ໜີ້ ເຊັ່ນ ການ​ຈັດ​ສະ­ຫຼອງ​ໃນ​ງານ​ຕ່າງໆ ເພື່ອ​ໃຫ້ ຄື​ໜ້າ​ຕາ​ກຽດ​ສັກ​ສີ ບາງ​ຄົນ​ຍອມ​ຢືມ​ເງິນ​ໝູ່​ເພື່ອນ ເພື່ອ​ຈັດ​ງານ​ລ້ຽງ​ສະ­ຫຼອງ ເບິ່ງ​ຄື​ວ່າ​ມັນ​ເປັນ​ຄ່າ​ນິ ຍົມ ຖ້າ​ບໍ່​ເຮັດ ກໍ​ຄື ນ້ອຍ​ໜ້າ ຫຼື ວ່າ​ເຫັນ​ຄົນ​ອື່ນ ເຂົາ​ມີ ຖ້າ​ເຮົາ​ບໍ່​ມີ​ຮູ້­ສຶກ​ຕ່ຳ​ຕ້ອຍ ເຊິ່ງ​ກາຍ­ເປັນ​ການ ແຂ່ງ­ຂັນ​ທາງ​ວັດ­ຖຸ​ຈົນ​ບໍ່​ຮູ້­ສຶກ​ໂຕ ເອົາ​ຄວາມ­ສຸກ ຂອງ​ຕົນ​ເອງ​ໄປ​ຜູກ​ກັບ​ວັດ­ຖຸ​ລາ­ຄາ​ແພງ ເຊິ່ງ​ເຮົາ​ບໍ່ ຄວນ​ລືມ​ວ່າ ຄ່າ​ນິ­ຍົມ​ບາງ​ປະ­ການ​ກໍ​ແຜ່​ລາມ​ໄວ ເກີດ​ຈາກ​ກຸ່ມ​ຄົນ​ໜຶ່ງ​ຕໍ່​ໃສ່​ກຸ່ມ​ຄົນ​ອື່ນ ການ​ຫຼິ້ນ​ກິນ ມ່ວນ­ຊື່ນ​ບາງ​ຄົນ​ຕິດ​ແບບ​ບໍ່​ຮູ້​ໂຕ ຍົກ​ຕົວ­ຢ່າງ: ບາງ​ຄົນ​ຊັກ​ຊວນ​ພັກ​ພວກ​ໄປ​ສະ­ຫຼອງ ມ່ວນ­ຊື່ນ ຕາມ​ຮ້ານ​ອາ­ຫານ​ຕ່າງໆ ຖ້າ­ວ່າ​ມີ​ຄວາມ​ພໍ­ດີ ເໝາະ​ສົມ​ກໍ​ບໍ່​ມີ​ຫຍັງ​ເກີດ​ຂຶ້ນ ? ແຕ່​ບາງ​ຄົນ​ຜັດ​ມີ​ເລື່ອງ​ມ່ວນ­ຊື່ນ​ຊູ້​ສາວ​ເຂົ້າ​ມາ​ພົວ­ພັນ...

   ຜູ້​ຂຽນ​ເຄີຍ​ນັ່ງ​ຟັງ​ພະ­ນັກ­ງານ​ຂັ້ນ​ເທິງ​ໃຫ້​ທັດ­ສະ­ນະ​ເລື່ອງ​ການ​ໄປ​ວຽກ​ໄປ​ການ ເພິ່ນ​ຍົກ​ຕົວ­ຢ່າງ​ວ່າ: ໄປ​ວຽກ​ແບບ 9/3 ໝາຍ​ຄວາມ​ວ່າ ບາງ​ຄົນ​ໄປ​ການ 9 ໂມງ ເລີກ 3 ໂມງ ເຊິ່ງ​ເປັນ​ພຶດ­ຕິ​ກຳ​ຄວນ​ຫຼີກ­ເວັ້ນ ສຳ­ລັບ​ພະ­ນັກ­ງານ​ລັດ ປາ­ກົດ­ການ​ໜຶ່ງ​ທີ່​ຕາມ​ມາ ກໍ​ຄື ກິດ­ຈະ­ກຳ​ທີ່​ເປັນ​ຂໍ້​ອ້າງ​ວ່າ ສ້າງ​ຄວາມ​ມ່ວນ ຊື່ນ​ສາ­ມັກ­ຄີ ແຕ່​ຜັດ​ເອົາ​ເວ­ລາ​ເຮັດ​ວຽກ​ໄປ​ຈັດ ຫຼາຍ​ຄັ້ງ ເຊິ່ງ​ບາງ​ກໍ­ລະ­ນີ​ກໍ​ສາ­ມາດ​ເປັນ​ແບບ­ຢ່າງ​ບໍ່​ເໝາະ​ສົມ​ແກ່​ພະ­ນັກ­ງານ​ສືບ​ທອດ.

   ຜູ້​ຂຽນ​ຈຶ່ງ​ຢາກ​ຂໍ​ສັງ​ລວມ​ສັ້ນໆ​ວ່າ: ການ​ສ້າງ ກິດ­ຈະ­ກຳ​ໃດ​ໜຶ່ງ​ຢູ່​ແຕ່​ລະ​ໜ່ວຍ​ງານ​ລັດ ກໍ​ຄວນ​ມີ​ສະ­ຕິ​ຕື່ນ​ຕົວ ເອົາ­ໃຈ­ໃສ່​ລະ­ບຽບ ປະ­ຕິ­ບັດ​ໃຫ້​ບັນ­ລຸ​ຂໍ້ ບຸກ​ທະ­ລຸ​ດ້ານ​ລະ­ບຽບ​ການ​ບໍ­ລິ­ຫານ ບໍ່​ຄວນ​ຫຼົງ ໄຫຼ​ນຳ​ຄວາມ​ມ່ວນ­ຊື່ນ ຈົນ​ພາ­ກັນ​ສ້າງ​ຂໍ້​ອ້າງ​ວ່າ ເປັນ​ກິດ­ຈະ­ກຳ​ເພື່ອ​ຄວາມ​ສາ­ມັກ­ຄີ ເຊິ່ງ​ຄວາມ​ສາ­ມັກ­ຄີ​ແທ້​ນັ້ນ​ຖ້າ​ມັນ​ເປັນ​ປະ­ໂຫຍດ​ແກ່​ສ່ວນ​ລວມ ແທ້​ຈິງ​ແລ້ວ​ມັນ​ກໍ​ດີ ແຕ່​ບໍ່​ແມ່ນ​ເພື່ອ​ຂໍ້​ອ້າງ​ແອບ​ແຝງ.

ໂດຍ: ດັ້ນກີບເມກ

ຂ່າວທີ່ກ່ຽວຂ້ອງ