ສປ ນວ ຄົ້ນຄວ້າພິຈາລະນາຫຼາຍບັນຫາສຳຄັນ ປະຈຳເດືອນກຸມພາ

745 12 ກ.ພ. 2020 ຂ່າວໜ້າ​ໜຶ່ງ

   ກອງ​ປະ­ຊຸມ​ຄະ­ນະ​ປະ­ຈຳ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສປ ນວ) ປະ­ຈຳ​ເດືອນ​ກຸມ­ພາ 2020 ຈັດ​ຂຶ້ນ​ວັນ​ທີ 10 ກຸມ­ພາ 2020 ຢູ່ ນວ ໂດຍ​ເປັນ​ປະ­ທານ​ຂອງ​ທ່ານ ອາ­ນຸ­ພາບ ຕຸ​ນາ​ລົມ ປະ­ທານ​ສະ­ພາ​ປະ­ຊາ­ຊົນ ນວ ມີ​ຮອງ​ປະ­ທານ ກຳ­ມະ­ການ ແລະ ຄະ­ນະ​ເລ­ຂາ­ທິ­ການ​ເຂົ້າ​ຮ່ວມ.

   ກອງ​ປະ­ຊຸມ​ໄດ້​ຮັບ​ຟັງ​ລາຍ​ງານ​ຈາກ​ຄະ­ນະ​ເລ­ຂາ­ທິ­ການ ສປ ນວ ກ່ຽວ​ກັບ​ການ​ສະ­ຫຼຸບ​ຕີ​ລາ­ຄາ​ການ​ກະ­ກຽມ ແລະ ດຳ­ເນີນ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 8 ຂອງ ສປ ນວ ຊຸດ​ທີ I ຍົກ​ໃຫ້​ເຫັນ​ເຖິງ​ດ້ານ​ດີ ຂໍ້­ຄົງ­ຄ້າງ ແລະ ບົດ­ຮຽນ​ທີ່​ຖອດ​ຖອນ​ໄດ້​ໃນ​ການ​ດຳ­ເນີນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 8 ຂອງ ສປ ນວ ຊຸດ​ທີ I ຈາກ​ນັ້ນ ໄດ້​ປະ­ກອບ​ຄຳ​ເຫັນ​ຕໍ່​ບົດ​ສະ­ຫຼຸບ​ດັ່ງ­ກ່າວ ໂດຍ​ສະ­ເພາະ ບັນ­ຫາ​ທີ່​ເປັນ​ຂໍ້­ຄົງ­ຄ້າງ​ໃນ​ການ​ດຳ­ເນີນ​ກອງ​ປະ­ຊຸມ ເຮັດ​ໃຫ້​ບົດ​ສະ­ຫຼຸບ​ດັ່ງ­ກ່າວ​ມີ​ເນື້ອ​ໃນ​ຄົບ​ຖ້ວນ​ສົມ­ບູນ​ຂຶ້ນ​ຕື່ມ ເພື່ອ​ເປັນ​ບົດ­ຮຽນ​ໃຫ້­ການ​ດຳ­ເນີນ​ກອງ​ປະ­ຊຸມ​ສະ­ໄໝ​ສາ­ມັນ​ຂອງ ສປ ນວ ຄັ້ງ​ຕໍ່​ໄປ ພ້ອມ​ນີ້ ຍັງ​ໄດ້​ປືກ​ສາ​ຫາ­ລື​ແຜນ­ການ​ກະ­ກຽມ ແລະ ດຳ­ເນີນ​ກອງ​ປະ­ຊຸມ ປະ­ຈຳ​ປີ 2019 ຂອງ​ຄະ­ນະ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ປະ­ຈຳ​ເຂດ​ເລືອກ​ຕັ້ງ​ທີ 1 ນວ ເພື່ອ​ພິ­ຈາ­ລະ­ນາ ແລະ ຮັບ­ຮອງ​ເອົາ​ບົດ​ສະ­ຫຼຸບ​ການ­ເຄື່ອນ­ໄຫວ​ວຽກ​ງານ ປະ­ຈຳ​ປີ 2019 ແລະ ທິດ​ທາງ​ປະ­ຈຳ​ປີ 2020 ຂອງ​ຄະ­ນະ ສສຊ  ປະ­ຈຳ​ເຂດ​ເລືອກ​ຕັ້ງ​ທີ 1 ນວ ເຊິ່ງ​ຄາດ​ວ່າ​ຈະ​ດຳ­ເນີນ​ຂຶ້ນ​ໃນ​ເດືອນ​ກຸມ­ພາ 2020.

   ນອກ​ນີ້ ກອງ​ປະ­ຊຸມ​ຍັງ​ໄດ້​ຮັບ​ຟັງ​ລາຍ​ງານ​ແຜນ­ການ­ເຄື່ອນ­ໄຫວ ພົບ​ປະ ປະ­ຊາ­ຊົນ ແລະ ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 8 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ແລະ ສປ ນວ ຊຸດ​ທີ I ເຊິ່ງ​ຈະ​ລົງ​ເຄື່ອນ​ໄຫວ​ແຕ່​ກາງ​ເດືອນ ຫາ ທ້າຍ​ເດືອນ​ກຸມ­ພາ 2020 ຄາດ​ຄະ­ເນ​ເປົ້າ​ໝາຍ​ລົງ​ພົບ​ປະ­ມານ 147 ຈຸດ ນອກ​ນີ້ ກອງ​ປະ­ຊຸມ​ຍັງ​ໄດ້​ຮັບ​ຟັງ​ລາຍ​ງານ​ຈາກ​ຄະ­ນະ​ຮັບ­ຜິດ­ຊອບ​ວຽກ​ງານ​ປະ​ເມີນ​ຜົນ ກ່ຽວ​ກັບ​ຜົນ​ການ​ປະ​ເມີນ​ບຸ​ຄະ­ລາ​ກອນ​ທີ່ ສປ ນວ ເລືອກ​ຕັ້ງ ແລະ ຮັບ­ຮອງ​ເອົາ​ການ​ເລືອກ​ຕັ້ງ ແລະ ປຶກ­ສາ​ຫາ­ລື​ບັນ­ຫາ​ສຳ­ຄັນ​ຕ່າງໆ​ຂອງ ສປ ນວ ອີກ​ຈຳ­ນວນ​ໜຶ່ງ.

ຂ່າວທີ່ກ່ຽວຂ້ອງ