ສະມາຄົມລວມຈີນດຽວດ້ວຍສັນຕິ ລະດົມທຶນປະກອບສ່ວນປ້ອງກັນພະຍາດ ໂຄໂຣນາ

659 12 ກ.ພ. 2020 ຂ່າວໜ້າ​ໜຶ່ງ
ສະມາຄົມລວມຈີນດຽວດ້ວຍສັນຕິ ລະດົມທຶນປະກອບສ່ວນປ້ອງກັນພະຍາດ ໂຄໂຣນາ

   ສະ­ມາ­ຄົມ​ລວມ​ຈີນ​ດຽວ​ດ້ວຍ​ສັນ­ຕິ ຈັດ​ພິ­ທີ​ລະ­ດົມ​ທຶນ​ເພື່ອ​ປະ­ກອບ­ສ່ວນ​ປ້ອງ​ກັນ​ການ​ລະ­ບາດ​ຂອງ​ພະ­ຍາດ​ອັກ­ເສບ​ປອດ​ຮຸນ​ແຮງ ທີ່​ເກີດ​ຈາກ​ເຊື້ອ​ຈຸ​ລະ​ໂລກ (NCOV) ຢູ່ ສປ ຈີນ ຂຶ້ນ​ວັນ​ທີ 11 ກຸມ­ພາ 2020 ຢູ່​ສະ­ມາ­ຄົມ​ດັ່ງ­ກ່າວ ໂດຍ​ມີ​ທ່ານ ເລັ່ງ ສະ­ຫວັນ​ວາ­ລີ ປະ­ທານ​ສະ­ມາ­ຄົມ​ລວມ​ຈີນ​ດຽວ​ດ້ວຍ​ສັນ­ຕິ ທ່ານ ກຽງ​ສັກ ສະ­ຫວັນ​ວາ­ລີ ປະ­ທານ​ກິດ​ຕິ​ມະ​ສັກ​ສະ​ມາ ຄົມ​ລວມ​ຈີນ​ດຽວ​ດ້ວຍ​ສັນ­ຕິ ທ່ານ ສົມ​ປະ­ສົງ ຈັນ­ທະ​ວົງ ປະ­ທານ​ຜູ້​ປະ­ຈຳ­ການ​ສະ­ມາ­ຄົມ​ລວມ​ຈີນ​ດຽວ​ດ້ວຍ​ສັນ­ຕິ ທ່ານ ບຸນ​ສົງ ສະ­ຫວັນ​ວາ­ລີ ຮອງ​ປະ­ທານ​ສະ­ມາ­ຄົມ​ລວມ​ຈີນ​ດຽວ​ດ້ວຍ​ສັນ­ຕິ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ເລັ່ງ ສະ­ຫວັນ​ວາ­ລີ ກ່າວ​ວ່າ: ເມື່ອ​ບໍ່​ດົນ​ມາ​ນີ້ ສປ ຈີນ ໄດ້​ປະ­ສົບ​ກັບ​ການ​ລະ­ບາດ​ຂອງ​ພະ­ຍາດ​ອັກ­ເສບ​ປອດ​ຮຸນ​ແຮງ ທີ່​ເກີດ​ຈາກ​ເຊື້ອ​ຈຸ​ລະ​ໂລກ (NCOV) ຢ່າງ​ຮ້າຍ​ແຮງ ເຮັດ​ໃຫ້​ຊາວ​ຈີນ​ເສຍ​ຊີ­ວິດ​ຢ່າງ​ຫຼວງ­ຫຼາຍ ເຊິ່ງ​ຊາວ​ຈີນ​ພົ້ນ​ທະ­ເລ ຍາມ​ໃດ ກໍ​ໄດ້​ຢຶດ​ໝັ້ນ​ຄຳ​ສັ່ງ­ສອນ​ຂອງ​ຜູ້​ອາ­ວຸ­ໂສ​ຮຸ່ນ​ກ່ອນ​ທີ່​ວ່າ: ພວກ​ເຮົາ​ຕ້ອງ​ຮັກ​ປະ­ເທດ​ຊາດ ຮັກ​ບ້ານ​ເກີດ​ເມືອງ​ນອນ​ຂອງ​ຕົນ ແລະ ຖື​ເອົາ​ຊີ­ວິດ​ການ​ເປັນ​ຢູ່​ຂອງ​ຊາວ​ຈີນ​ເປັນ​ສຳ­ຄັນ ເມື່ອ​ພະ­ຍາດ​ເກີດ​ຂຶ້ນ​ແລ້ວ ແລະ ພະ­ຍາດ​ບໍ່​ມີ​ນ້ຳ­ໃຈ​ເມດ​ຕາ​ຄົນ ແຕ່​ວ່າ​ຄົນ​ກັບ​ຄົນ​ຕ້ອງ​ມີ​ຄວາມ​ເມດ​ຕາ​ເຊິ່ງ​ກັນ ແລະ ກັນ ສະ­ມາ­ຄົມ​ລວມ​ຈີນ​ດຽວ​ດ້ວຍ​ສັນ­ຕິ ຈຶ່ງ​ໄດ້​ເຕົ້າ­ໂຮມ​ສະ­ມາ­ຊິກ ເພື່ອ​ລະ­ດົມ​ທຶນ​ປະ­ກອບ­ສ່ວນ​ຊື້​ວັດ­ຖຸ-ອຸ­ປະ­ກອນ​ຕ່າງໆ ນຳ­ໄປ​ຊ່ວຍ­ເຫຼືອ ສປ ຈີນ ໃນ​ການ​ປ້ອງ​ກັນ​ພະ­ຍາດ​ດັ່ງ­ກ່າວ ປັດ­ຈຸ­ບັນ​ສາ­ມາດ​ລະ­ດົມ​ທຶນ​ໄດ້ 150 ລ້ານ​ກີບ ເຊິ່ງ​ເງິນ​ຈຳ­ນວນ​ນີ້​ຈະ​ນຳ­ໄປ​ມອບ​ໃຫ້​ໜ່ວຍ​ງານ​ສະ­ເພາະ​ຂອງ​ລັດ­ຖະ­ບານ ສປປ ລາວ ເພື່ອ​ນຳ­ໄປ​ມອບ​ຕໍ່­ໃຫ້​ລັດ­ຖະ­ບານ ສປ ຈີນ ແລະ ກ່ອນ​ໜ້າ​ນີ້ ​ພວກ​ເຮົາ​ກໍ​ໄດ້​ລະ­ດົມ​ທຶນ​ກັນ​ຊື້​ຜ້າ​ອັດ​ປາກ-ດັງ 30.000 ຖົງ ສົ່ງ​ໃຫ້ ສປ ຈີນ ແລ້ວ ຄັ້ງ​ນີ້​ເປັນ​ຄັ້ງ​ທີ 2 ໃນ​ການ​ປະ­ກອບ­ສ່ວນ​ປ້ອງ​ກັນ​ການ​ລະ­ບາດ​ຂອງ​ພະ­ຍາດ​ດັ່ງ­ກ່າວ ຂອງ​ສະ­ມາ­ຄົມ​ລວມ​ຈີນ​ດຽວ​ດ້ວຍ​ສັນ­ຕິ.

ຂ່າວທີ່ກ່ຽວຂ້ອງ