ອາເມຣິກາ ມອບເຄື່ອງປ້ອງກັນການລະບາດຂອງໄວຣັສໂຄໂຣນາ

688 12 ກ.ພ. 2020 ຂ່າວໜ້າ​ໜຶ່ງ
ອາເມຣິກາ ມອບເຄື່ອງປ້ອງກັນການລະບາດຂອງໄວຣັສໂຄໂຣນາ

   ເພື່ອ​ໂຕ້​ຕອບ​ການ​ລະ­ບາດ​ຂອງ​ພະ­ຍາດ​ອັກ­ເສບ​ປອດ ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ (ໄວ​ຣັສ​ໂຄ​ໂຣ​ນາ) ລັດ­ຖະ­ບານ​ສະ­ຫະ­ລັດ​ອາ​ເມ​ຣິ​ກາ ແລະ ອົງ­ການ​ອະ­ນາ­ໄມ​ໂລກ ໄດ້​ນຳ​ເອົາ​ເຄື່ອງ​ອຸ­ປະ­ກອນ​ການ​ແພດ​ມາ​ມອບ​ໃຫ້​ກະ­ຊວງ​ສາ­ທາ­ລະ­ນະ​ສຸກ ເພື່ອ​ຊ່ວຍ​ໃຫ້​ລັດ­ຖະ­ບານ​ລາວ​ໃນ​ການ​ກະ­ກຽມ​ຄວາມ​ພ້ອມ​ເພື່ອ​ຮັບ​ມື​ກັບ​ເຊື້ອ​ຈຸ​ລະ​ໂຣກ​ໂຄ​ໂຣ​ນາ​ສາຍ​ພັນ​ໃໝ່ ທີ່​ອາດ​ຈະ​ມີ​ການ​ລະ­ບາດ​ໃນ​ລາວ.

   ພິ­ທີ​ມອບ-ຮັບ​ເຄື່ອງ​ຊ່ວຍ­ເຫຼືອ​ຈັດ​ຂຶ້ນ​ວັນ​ທີ 10 ກຸມ­ພາ 2020 ທີ່​ກະ­ຊວງ​ສາ­ທາ­ລະ­ນະ​ສຸກ ກ່າວ​ມອບ​ໂດຍ​ທ່ານ ປີ​ເຕີ​ເຮ​ມອນ ເອກ​ອັກ​ຄະ​ລັດ​ຖະ​ທູດ​ສະ­ຫະ­ລັດ​ອາ​ເມ​ຣິ​ກາ ປະ­ຈຳ​ລາວ ທ່ານ ມາກ​ຈາ​ຄອບ ຜູ້­ຕາງ­ໜ້າ​ອົງ­ການ​ອະ­ນາ­ໄມ​ໂລກ ປະ­ຈຳ​ລາວ ແລະ ກ່າວ​ຮັບ​ໂດຍ​ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ມີ​ພະ­ນັກ­ງານ​ທີ່​ກ່ຽວ­ຂ້ອງ​ສອງ​ຝ່າຍ​ເຂົ້າ​ຮ່ວມ.

   ສຳ­ລັບ​ເຄື່ອງ​ທີ່​ລັດ­ຖະ­ບານ​ອາ​ເມ​ຣິ​ກາ​ຊ່ວຍ­ເຫຼືອ​ລ້າ​ຄັ້ງ​ນີ້ ປະ­ກອບ​ມີ: ແວ່ນ­ຕາ​ປ້ອງ​ກັນ​ພະ­ຍາດ 440 ອັນ ເສື້ອ​ຄຸມ 1.500 ໂຕ ແຜ່ນ​ປ້ອງ​ກັນ​ໃບ​ໜ້າ 220 ອັນ ລວມ​ທັງ​ຖົງ​ສຳ­ລັບ​ຂີ້​ເຫຍື້ອ​ອັນ­ຕະ­ລາຍ​ທາງ​ດ້ານ​ຊີ­ວະ​ພາບ 3 ກັບ ຜ້າ​ກັນ​ເປື້ອນ 22 ກັບ ຜ້າ​ອັດ​ປາກ-ດັງ N95 ຈຳ­ນວນ 7 ກັບ ກ່ອງ​ຖິ້ມ​ເຂັມ​ແບບ​ປອດ​ໄພ 9 ກັບ ແລະ ຖົງ­ມື 132 ກັບ.

   ສ່ວນ​ອົງ­ການ​ອະ­ນາ­ໄມ​ໂລກ ໄດ້​ມອບ​ເຄື່ອງ​ປ້ອງ​ກັນ​ຕາ 200 ອັນ ຖົງ­ມື 70 ກ່ອງ ຜ້າ​ອັດ​ປາກ-ດັງ​ລຸ້ນ N95 ຈຳ­ນວນ 11 ກ່ອງ ຜ້າ​ອັດ​ປາກ-ດັງ​ແບບ​ມັດ 34 ກ່ອງ ຜ້າ​ອັດ​ປາກ-ດັງ​ແບບ​ທຳ​ມະ​ດາ 220 ກ່ອງ ຊຸດ​ປ້ອງ​ກັນ 200 ຜືນ.

   ການ​ມອບ-ຮັບ​ເຄື່ອງ​ອຸ­ປະ­ກອນ​ການ​ແພດ​ຄັ້ງ​ນີ້ ແມ່ນ​ການ​ຮ່ວມ​ມື​ກັນ ລະ­ຫວ່າງ​ລັດ­ຖະ­ບານ​ສະ­ຫະ­ລັດ​ອາ​ເມ​ຣິ​ກາ​ອົງ­ການ​ອະ­ນາ­ໄມ​ໂລກ ແລະ ລັດ­ຖະ­ບານ​ລາວ ໃນ​ການ​ໂຕ້​ຕອບ​ຕໍ່​ການ​ລະ­ບາດ​ຂອງ​ເຊື້ອ​ໄວ​ຣັສ​ໂຄ​ໂຣ​ນາ ທີ່​ກຳ­ລັງ​ເກີດ​ການ​ລະ­ບາດ​ໃນ​ພາກ​ພື້ນ ແລະ ເພື່ອ​ເປັນ​ການ​ຊ່ວຍ­ເຫຼືອ​ລາວ ໃນ​ການ​ກະ­ກຽມ​ຄວາມ​ພ້ອມ​ເພື່ອ​ໂຕ້​ຕອບ​ຕໍ່​ພະ­ຍາດ​ທາງ​ລະ­ບົບ​ຫາຍ­ໃຈ​ນຳ​ອີກ​ດ້ວຍ ເຊິ່ງ​ອຸ­ປະ­ກອນ​ການ​ແພດ​ຈະ​ຖືກ​ແຈກ​ຢາຍ​ໃຫ້​ບັນ­ດາ​ໂຮງ­ໝໍ​ສູນ​ກາງ ໂຮງ­ໝໍ​ແຂວງ ແລະ ບັນ­ດາ​ດ່ານ​ສາ­ກົນ ດ່ານ​ທ້ອງ­ຖິ່ນ​ຕ່າງໆ ໂດຍ​ອຸ­ປະ­ກອນ ແລະ ເຄື່ອງ­ມື​ດັ່ງ­ກ່າວ​ຈະ​ໃຊ້​ໃນ​ການ​ປ້ອງ​ກັນ​ບັນ­ດາ​ແພດ​ໝໍ ແລະ ເຈົ້າ​ໜ້າ­ທີ່​ຈາກ​ການ​ຕິດ­ເຊື້ອ​ພະ­ຍາດ ແລະ ເປັນ​ການ​ປ້ອງ​ກັນ​ການ​ແຜ່​ລະ­ບາດ​ທັງ​ເຊື້ອ​ໂຄ​ໂຣ​ນາ ແລະ ພະ­ຍາດ​ຊຶມ​ເຊື້ອ​ອື່ນໆ.

   ອີງ​ຕາມ​ການ​ປະ​ເມີນ​ຄວາມ​ສ່ຽງ​ທີ່​ດຳ­ເນີນ ໂດຍ​ກະ­ຊວງ​ສາ­ທາ­ລະ­ນະ​ສຸກ​ຂອງ​ລາວ ເປັນ​ປະ­ເທດ​ທີ່​ມີ​ຄວາມ​ສ່ຽງ​ສູງ​ຕໍ່​ການ​ລະ­ບາດ​ຂອງ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ ເພື່ອ​ເປັນ​ການ​ກຽມ­ພ້ອມ ແລະ ໂຕ້​ຕອບ​ຕໍ່​ໄພ​ຂົ່ມ­ຂູ່​ນີ້ ກະ­ຊວງ​ສາ­ທາ­ລະ­ນະ​ສຸກ ແລະ ບັນ­ດາ​ກະ­ຊວງ​ທີ່​ກ່ຽວ­ຂ້ອງ ພາຍ​ໃຕ້​ການ​ຊີ້​ນຳ​ຂອງ​ລັດ­ຖະ­ບານ ໄດ້​ເຮັດ​ວຽກ​ຮ່ວມ​ກັນ​ຢ່າງ​ຕັ້ງ­ໜ້າ​ໃນ​ຫຼາຍ​ຂົງ­ເຂດ​ວຽກ​ງານ ເພື່ອ​ເສີມ​ສ້າງ​ຄວາມ​ເຂັ້ມ­ແຂງ​ໃນ​ການ​ຄົ້ນ​ຫາ​ກໍ­ລະ­ນີ​ໃຫ້​ໄວ ການ​ລົງ​ສອບ​ສວນ​ກໍ­ລະ­ນີ ແລະ ການ​ເກັບ​ຕົວ­ຢ່າງ​ບົ່ງ­ມະ­ຕິ​ກໍ­ລະ­ນີ​ສົງ­ໄສ ແລະ ປະ­ຕິ­ບັດ​ມາດ​ຕະ­ການ​ເຝົ້າ​ລະ­ວັງ​ຜູ້​ສຳ­ຜັດ​ໃກ້­ຊິດ​ກັບ​ກໍ­ລະ­ນີ​ເພື່ອ​ປ້ອງ​ກັນ​ການ​ແຜ່​ເຊື້ອ​ໃນ​ຊຸມ​ຊົນ.

ຂ່າວທີ່ກ່ຽວຂ້ອງ