ປະທານສູນກາງແນວລາວສ້າງຊາດ ຢ້ຽມຢາມສູນພັດທະນາຫ້ວຍຊອນ-ຫ້ວຍຊົ້ວ

683 12 ກ.ພ. 2020 ຂ່າວໜ້າ​ໜຶ່ງ
ປະທານສູນກາງແນວລາວສ້າງຊາດ ຢ້ຽມຢາມສູນພັດທະນາຫ້ວຍຊອນ-ຫ້ວຍຊົ້ວ

   ທ່ານ ໄຊ​ສົມ​ພອນ ພົມ­ວິ­ຫານ ປະ­ທານ​ສູນ​ກາງ​ແນວ​ລາວ​ສ້າງ​ຊາດ ພ້ອມ​ດ້ວຍ​ຄະ­ນະ ໄດ້​ເຄື່ອນ​ໄຫວ​ຢ້ຽມ­ຢາມ​ສູນ​ພັດ­ທະ­ນາ ແລະ ບໍ­ລິ­ການ​ດ້ານ​ການ​ກະ­ເສດ ຫ້ວຍ​ຊອນ-ຫ້ວຍ​ຊົ້ວ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ໃນ​ວັນ​ທີ 7 ກຸມ­ພາ 2020 ມີ​ທ່ານ ບຸນ​ຈັນ ກົມ​ບຸນ​ຍະ​ສິດ ຫົວ­ໜ້າ​ສູນ​ພັດ­ທະ­ນາ ແລະ ບໍ­ລິ­ການ​ດ້ານ​ການ​ກະ­ເສດ ຫ້ວຍ​ຊອນ-ຫ້ວຍ​ຊົ້ວ ພ້ອມ​ຄະ­ນະ​ໃຫ້­ການ​ຕ້ອນ­ຮັບ.

   ທ່ານ ບຸນ​ຈັນ ກົມ​ບຸນ​ຍະ​ສິດ ໄດ້​ລາຍ​ງານ​ໃຫ້​ຮູ້​ວ່າ: ສູນ​ພັດ­ທະ­ນາ ແລະ ບໍ­ລິ­ການ​ດ້ານ​ການ​ກະ­ເສດ ຫ້ວຍ​ຊອນ-ຫ້ວຍ​ຊົ້ວ ເປັນ​ໂຄງ­ການ​ຮ່ວມ​ມື​ຂອງ​ສອງ​ປະ­ມຸກ​ລັດ ລາວ ແລະ ໄທ ດຳ­ເນີນ​ງານ​ຢູ່​ພາຍ​ໃຕ້​ຄວາມ​ຮັບ­ຜິດ­ຊອບ​ຂອງ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກັບ​ຄະ­ນະ​ປະ­ສານ​ງານ​ໂຄງ­ການ ອັນ​ເນື່ອງ​ມາ​ຈາກ​ພະ​ລາ​ຊ​ດຳ​ຣິ ເຊິ່ງ​ປະ­ກອບ​ມີ ຄະ­ນະ​ຮ່ວມ​ມື​ທາງ​ດ້ານ​ວິ­ຊາ​ການ​ຈາກ​ບັນ­ດາ​ກົມ​ຕ່າງໆ​ຂອງ​ກະ­ຊວງ​ກະ­ເສດ ແລະ ສະ­ຫະ­ກອນ​ແຫ່ງ​ລາ­ຊະ​ອາ­ນາ­ຈັກ​ໄທ ນັບ​ແຕ່​ມື້​ເປີດ​ສູນ​ວັນ​ທີ 8 ເມ­ສາ 1994 ມາ​ຮອດ​ປັດ­ຈຸ­ບັນ ຄົບ­ຮອບ 25 ປີ ໂຄງ­ການ​ມີ​ຈຸດ­ປະ­ສົງ​ເພື່ອ​ເສີມ​ສ້າງ​ສາຍ​ພົວ­ພັນ​ອັນ​ດີ­ງາມ ລະ­ຫວ່າງ​ປະ­ຊາ­ຊົນ​ສອງ​ຊາດ ລາວ-ໄທ ໃຫ້​ມີ​ຄວາມ​ໝັ້ນ­ຄົງ ແລະ ຍາວ​ນານ ເພື່ອ​ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ໃຫ້​ມີ​ຄວາມ​ຢູ່​ດີ​ມີ​ສຸກ ພັດ ທະ​ນາ​ຄວາມ​ຮູ້ ແລະ ນຳ​ເອົາ​ເຕັກ­ນິກ​ວິ­ຊາ​ການ​ດ້ານ​ການ​ປູກ-ການ​ລ້ຽງ ມາ​ເຝິກ­ອົບ­ຮົມ​ໃຫ້​ຊາວ​ກະ­ສິ­ກອນ​ໄດ້​ຮຽນ​ຮູ້​ແລ້ວ​ນຳ­ໄປ​ປະ­ຕິ­ບັດ​ຕົວ​ຈິງ ເພື່ອ​ຜະ­ລິດ​ເປັນ​ອາ­ຫານ​ລ້ຽງ​ຕົນ​ເອງ ຄອບ­ຄົວ ແລະ ສ້າງ​ລາຍ​ຮັບ​ທີ່​ໝັ້ນ­ຄົງ​ກ້າວ​ໄປ​ເຖິງ​ການ​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ໄດ້.

   ສູນ​ແຫ່ງ​ນີ້ ມີ​ເນື້ອ­ທີ່​ທັງ​ໝົດ 52 ເຮັກ­ຕາ ແລະ ອ່າງ­ເກັບ­ນ້ຳ​ຫ້ວຍ​ຊອນ ມີ​ເນື້ອ­ທີ່ 42,6 ເຮັກ­ຕາ ເກັບ​ນ້ຳ​ໄດ້ 1.800.000 ແມັດ​ກ້ອນ ເຊິ່ງ​ມີ​ລະ­ບົບ​ຄອງ​ສົ່ງ​ນ້ຳ 5.570 ແມັດ ສາ­ມາດ​ຕອບ​ສະ­ໜອງ​ນ້ຳ​ໃຫ້​ແກ່​ການ​ຜະ­ລິດ​ລະ­ດູ­ແລ້ງ​ໄດ້ ປະ­ມານ 180 ເຮັກ­ຕາ ແລະ ລະ­ດູ­ຝົນ​ໄດ້ 200-300 ເຮັກ­ຕາ ໂຄງ­ການ ຫ້ວຍ​ຊອນ-ຫ້ວຍ​ຊົ້ວ ປະ­ກອບ​ມີ 7 ຂະ­ແໜງ­ການ ຄື: ຂະ­ແໜງ​ບໍ­ລິ­ຫານ​ແຜນ­ການ ແລະ ລົງ­ທຶນ​ຊົນ­ລະ­ປະ­ທານ ພັດ­ທະ­ນາ​ທີ່​ດິນ​ກະ­ສິ­ກຳ​ປູກ­ຝັງ-ລ້ຽງ­ສັດ ແລະ ສັດ­ຕະ­ວະ­ແພດ ຂະ­ແໜງ​ປະ­ມົງ ແລະ ຂະ­ແໜງ​ສົ່ງ­ເສີມ​ເຝິກ­ອົບ­ຮົມ ແລະ ການ​ສາ­ທິດ.

   ໂອ­ກາດ​ນີ້ ທ່ານ​ປະ­ທານ​ສູນ​ກາງ​ແນວ​ລາວ​ສ້າງ​ຊາດ ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ຜົນ­ສຳ­ເລັດ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂອງ​ສູນ​ໃນ​ຜ່ານ​ມາ ພ້ອມ​ທັງ​ເນັ້ນ​ໃຫ້​ຄະ­ນະ​ພັກ-ຄະ­ນະ​ນຳ​ຂອງ​ສູນ ຈົ່ງ​ພ້ອມ​ກັນ​ເອົາ­ໃຈ­ໃສ່​ປັບ­ປຸງ​ສ້າງ​ພະ­ນັກ­ງານ​ໃຫ້​ເຂັ້ມ­ແຂງ ກ່ຽວ​ກັບ​ວິ­ຊາ​ການ​ສະ­ເພາະ​ດ້ານ​ເຮັດ​ໃຫ້​ສູນ ກາຍ­ເປັນ​ສະ­ຖານ­ທີ່​ຮຽນ​ຮູ້​ຖ່າຍ​ທອດ​ເຕັກ­ນິກ​ວິ­ຊາ​ການ ໃຫ້​ນັກ­ຮຽນ-ນັກ​ສຶກ​ສາ ແລະ ຊາວ​ກະ­ສິ­ກອນ ພັດ­ທະ­ນາ​ສູນ​ໃຫ້​ກາຍ­ເປັນ​ສູນ​ລວມ​ດ້ານ​ແນວ​ພັນ​ຜັກ​ໄມ້​ໃຫ້​ໝາກ ໄມ້​ປະ­ດັບ ປັບ­ປຸງ​ຮັກ­ສາ​ພັນ​ສັດ​ນ້ຳ​ຕາມ​ພາ­ລະ​ບົດ­ບາດ​ຂອງ​ຕົນ​ທີ່​ໄດ້​ກຳ­ນົດ​ໄວ້ ເອົາ­ໃຈ­ໃສ່​ພັດ­ທະ­ນາ​ສູນ​ໃຫ້​ກາຍ­ເປັນ​ສູນ​ລວມ​ທາງ​ດ້ານ​ການ​ກະ­ເສດ​ການ​ກະ­ສິ­ກຳ​ທີ່​ທັນ​ສະ​ໄໜ ຕອບ​ສະ­ໜອງ​ຕາມ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ສັງ­ຄົມ​ໃນ​ໄລ­ຍະ​ໃໝ່ ເພື່ອ​ເຮັດ​ໃຫ້​ເປັນ​ສູນ​ຮຽນ​ຮູ້​ໃຫ້​ຄຳ​ປຶກ­ສາ ກ່ຽວ​ກັບ​ວຽກ​ງານ​ກະ­ສິ­ກຳ-ການ​ກະ­ເສດ​ໃຫ້​ຊາວ​ກະ­ສິ­ກອນ ກໍ​ຄື ປະ­ຊາ­ຊົນ​ບັນ­ດາ­ເຜົ່າ ເພື່ອ​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ​ທີ່​ປະ­ກອບ​ອາ­ຊີບ​ເຂົ້າ​ໃນ​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ.

ຂ່າວທີ່ກ່ຽວຂ້ອງ