ສັງຄົມຈົ່ງເຊື່ອໝັ້ນ ລາວເຮົາມີຫ້ອງວິເຄາະທີ່ໄດ້ມາດຕະຖານສາກົນ

783 12 ກ.ພ. 2020 ຂ່າວໜ້າ​ໜຶ່ງ

   ໃນ​ໄລ­ຍະ​ຜ່ານ​ມາ​ໄດ້​ມີ​ຫຼາຍ​ຫາງ​ສຽງ​ຈາກ​ສັງ­ຄົມ ເກີດ​ຄວາມ​ບໍ່​ເຊື່ອ​ໝັ້ນ​ໃນ​ການ​ກວດ​ຂອງ​ຫ້ອງ​ວິ­ເຄາະ ແລະ ການ​ເຮັດ​ວຽກ​ຂອງ​ກະ­ຊວງ​ສາ­ທາ­ລະ­ນະ​ສຸ​ກວ່າ ເປັນ​ຫຍັງ​ປະ­ເທດ​ອ້ອມ​ຂ້າງ​ຈຶ່ງ​ພົບ​ກໍ­ລະ­ນີ​ຜູ້​ຕິດ­ເຊື້ອ​ໄວ​ຣັສ​ໂຄ​ໂຣ​ນາ​ສາຍ​ພັນ​ໃໝ່ ສ່ວນ​ລາວ​ເຮົາ​ຍັງ​ບໍ່​ພົບ​ກໍ­ລະ­ນີ​ນັ້ນ ໃນ​ວັນ​ທີ 10 ກຸມ­ພາ 2020 ທີ່​ກະ­ຊວງ​ສາ­ທາ­ລະ­ນະ​ສຸກ ທ່ານ​ນາງ ພອນ​ປະ­ເສີດ ໄຊ​ຍະ​ມຸງ­ຄຸນ ຮອງ​ຫົວ­ໜ້າ​ກົມ​ຄວບ​ຄຸມ­ພະ​ຍາດ​ຕິດ­ຕໍ່ ໄດ້​ຊີ້​ແຈງ​ຕໍ່​ບັນ­ຫາ​ນີ້​ວ່າ: ດັ່ງ​ທີ່​ໄດ້​ແຈ້ງ​ໃຫ້​ສັງ­ຄົມ​ຮັບ​ຮູ້​ໃນ​ໄລ­ຍະ​ຜ່ານ​ມາ​ວ່າ ລາວ​ເຮົາ​ມີ​ຫ້ອງ​ວິ­ເຄາະ​ທີ່​ໄດ້​ມາດ­ຕະ­ຖານ​ສາ­ກົນ​ທີ່​ສູນ​ວິ­ເຄາະ ແລະ ລະ­ບາດ​ວິ­ທະ­ຍາ ພ້ອມ​ທັງ​ສະ​ຖາ​ບັນ​ປັດ​ສະ​ເຕີ ໂຮງ­ໝໍ​ມະ­ໂຫ­ສົດ ມີ​ຄວາມ​ພ້ອມ​ໃນ​ການ​ກວດ​ວິ­ເຄາະ ນອກ​ນັ້ນ ຍັງ​ມີ​ເຄື່ອງ​ກວດ​ວິ­ເຄາະ​ແບບ​ເຄື່ອນ​ທີ່ ຢູ່​ແຂວງ​ພາກ​ເໜືອ ຄື: ຫຼວງ​ນ້ຳ​ທາ ແລະ ແຂວງ​ຫຼວງ​ພະ​ບາງ ເພື່ອ​ຄວາມ​ສະ­ດວກ​ວ່ອງ­ໄວ​ໃນ​ການ​ຊອກ​ຫາ​ເຊື້ອ​ພະ­ຍາດ ສະ­ນັ້ນ ຈຶ່ງ​ຮຽກ­ຮ້ອງ​ໃຫ້​ສັງ­ຄົມ​ໝັ້ນ​ໃຈ​ໃນ​ມາດ­ຕະ­ຖານ​ການ​ວິ­ເຄາະ​ຫາ​ເຊື້ອ​ຂອງ​ລາວ​ເຮົາ.

   ຕໍ່​ກັບ​ບັນ­ຫາ​ທີ່​ວ່າ ເປັນ​ຫຍັງ​ປະ­ເທດ​ອື່ນ​ຈຶ່ງ​ພົບ​ກໍ­ລະ­ນີ ແຕ່​ປະ­ເທດ​ລາວ​ເຮົາ​ຍັງ​ບໍ່​ມີ​ກໍ​ລະ​ນີ້​ນັ້ນ ອາດ​ຍ້ອນ​ຫຼາຍ​ປັດ​ໄຈ ເຊິ່ງ​ກະ­ຊວງ​ສາ­ທາ­ລະ­ນະ​ສຸກ ໂດຍ​ໄດ້​ຮັບ​ການ​ຊີ້​ນຳ​ຈາກ​ລັດ­ຖະ­ບານ​ໃຫ້​ເຝົ້າ​ລະ­ວັງ​ຢ່າງ​ໃກ້­ຊິດ​ປ້ອງ​ກັນ ແລະ ຄວບ​ຄຸມ­ພະ​ຍາດ​ນີ້ ດັ່ງ­ນັ້ນ ກະ­ຊວງ​ສາ­ທາ­ລະ­ນະ​ສຸກ​ຈຶ່ງ​ຖື​ເອົາ​ການ​ເຝົ້າ​ລະ­ວັງ​ປ້ອງ​ກັນ​ພະ­ຍາດ​ນີ້​ເປັນ​ສຳ­ຄັນ ຈຶ່ງ​ໄດ້​ຈັດ​ສົ່ງ​ທີມ​ງານ​ຄັດ​ກອງ​ລົງ​ປະ­ຈຳ​ຢູ່​ດ່ານ​ສາ­ກົນ  ແລະ ດ່ານ​ຊາຍ​ແດນ ເຂົ້າ-ອອກ ຕ່າງໆ​ຕະ­ຫຼອດ 24 ຊົ່ວ­ໂມງ ເພື່ອ​ກວດ​ຫາ​ກໍ­ລະ­ນີ​ສົງ​ໃສ ແລະ ມີ​ການ​ຕິດ­ຕາມ​ເຝົ້າ​ລະ­ວັງ​ບຸກ­ຄົນ​ທີ່​ໄດ້​ສຳ­ຜັດ​ກັບ​ກໍ­ລະ­ນີ​ທີ່​ຕິດ­ເຊື້ອ​ຢ່າງ​ໃກ້­ຊິດ ແລະ ນັກ​ທ່ອງ​ທ່ຽວ ຈາກ​ປະ­ເທດ​ທີ່​ມີ​ການ​ລະ­ບາດ​ເຂົ້າ​ມາ​ປະ­ເທດ​ເຮົາ​ແມ່ນ​ມີ​ບໍ່​ຫຼາຍ ຖ້າ​ທຽບ­ໃສ່​ປະ­ເທດ​ໃກ້​ຄຽງ ອາ­ກາດ​ບ້ານ​ເຮົາ​ກໍ​ຂ້ອນ​ຂ້າງ​ຮ້ອນ ເຊິ່ງ​ບໍ່​ອຳ­ນວຍ​ຕໍ່​ການ​ຂະ­ຫຍາຍ­ຕົວ​ຂອງ​ເຊື້ອ​ຈຸ​ລະ​ໂຣກ​ຊະ­ນິດ​ນີ້ ຄວາມ​ໜາ​ແໜ້ນ​ຂອງ​ພົນ­ລະ­ເມືອງ ແລະ ທີ່­ຢູ່​ອາ­ໄສ​ຂອງ​ບ້ານ​ເຮົາ​ກໍ​ບໍ່​ໜາ​ແໜ້ນ​ຫຼາຍ ຢູ່​ແບບ​ເຮືອນ​ດ່ຽວ​ເປັນ​ສ່ວນ​ໃຫຍ່ ແລະ ວັດ­ທະ­ນະ­ທຳ​ການ​ສະ­ບາຍ­ດີ​ຂອງ​ບ້ານ​ເຮົາ​ແມ່ນ​ຍົກ​ມື​ສະ­ບາຍ­ດີ ທັງ​ໝົດ​ທີ່​ເວົ້າ​ມາ​ກໍ​ຍັງ​ບໍ່​ທັນ​ໄດ້​ມີ​ການ​ຢັ້ງ­ຢືນ​ທີ່​ຊັດ​ເຈນ ປັດ­ຈຸ­ບັນ ລາວ​ເຮົາ​ຍັງ​ບໍ່​ທັນ​ມີ​ກໍ­ລະ­ນີ​ທີ່​ຕິດ­ເຊື້ອ​ໄວ​ຣັສ​ໂຄ​ໂຣ​ນາ ແລະ ຈົ່ງ​ໜັ້ນ​ໃຈ​ໃນ​ຄຸນ​ນະ​ພາບ​ການ​ວິ­ເຄາະ​ຂອງ​ພວກ​ເຮົາ ແມ່ນ​ໄດ້​ມາດ­ຕະ­ຖານ​ເທົ່າ​ກັບ​ສາ­ກົນ.

   ລັດ­ຖະ­ບານ​ໄດ້​ໃຫ້​ຄວາມ​ເອົາ­ໃຈ­ໃສ່​ຕໍ່​ບັນ­ຫາ​ນີ້ ແລະ ຖ້າ​ພົບ​ມີ​ການ​ຕິດ­ພະ­ຍາດ​ອັກ­ເສບ​ປອດ 2019-NCOV ພວກ​ເຮົາ​ມີ​ໂຮງ­ໝໍ​ສະ­ເພາະ​ທີ່​ຈະ​ປິ່ນ­ປົວ ແລະ ຄ່າ​ໃຊ້​ຈ່າຍ​ໃນ​ການ​ປິ່ນ­ປົວ ທັງ​ໝົດ​ລັດ­ຖະ­ບານ​ຈະ​ຮັບ­ຜິດ­ຊອບ ໝາຍ​ຄວາມ​ວ່າ ປິ່ນ­ປົວ​ບໍ່​ເສຍ​ຄ່າ ຕາມ​ການ​ລາຍ​ງານ​ມາ​ຮອດ​ວັນ​ທີ 10 ກຸມ­ພາ 2020 ພະ­ຍາດ​ອັກ­ເສບ​ປອດ​ທີ່​ເກີດ​ຈາກ​ຈຸ​ລະ​ໂຣກ​ສາຍ​ພັນ​ໃໝ່​ໃນ​ທົ່ວ​ໂລກ ມີ​ທັງ​ໝົດ 40.550 ກໍ­ລະ­ນີ ເສຍ​ຊີ­ວິດ 910 ກໍ­ລະ­ນີ ແລະ ຄົນ​ເຈັບ​ໜັກ 6.484 ກໍ­ລະ­ນີ ສຳ­ລັບ ສປ ຈີນ ມີ​ລາຍ​ງານ​ທັງ​ໝົດ 40.171 ກໍ­ລະ­ນີ ເສຍ​ຊີ­ວິດ 908 ກໍ­ລະ­ນີ ກໍ­ລະ­ນີ​ສົງ​ໃສ​ທີ່​ຍັງ​ຕິດ­ຕາມ 23.589 ກໍ­ລະ­ນີ ມີ​ລາຍ​ງານ​ຈາກ 31 ແຂວງ ໃນ ສປ ຈີນ ສຳ­ລັບ​ລາວ​ເຮົາ​ມີ​ກໍ­ລະ­ນີ​ສົງ​ໃສ 20 ກໍ­ລະ­ນີ ແລະ ຜ່ານ​ການ​ກວດ​ວິ­ເຄາະ​ຍັງ​ບໍ່​ພົບ​ຜູ້​ຕິດ­ເຊື້ອ​ພະ­ຍາດ​ນີ້​ເທື່ອ.

ຂ່າວທີ່ກ່ຽວຂ້ອງ