ສີໂຄດຕະບອງ ຈັດສັນຄວາມເປັນລະບຽບຮຽບຮ້ອຍ

565 13 ກ.ພ. 2020 ຂ່າວໜ້າ​ໜຶ່ງ
ສີໂຄດຕະບອງ ຈັດສັນຄວາມເປັນລະບຽບຮຽບຮ້ອຍ

   ທ່ານ ຄຳ​ຫຼ້າ ອ່າງ​ມັດ­ສາ ຫົວ­ໜ້າ​ຫ້ອງ­ການ​ໂຍ­ທາ​ທິ​ການ ແລະ ຂົນ­ສົ່ງ (ຍທຂ) ເມືອງ​ສີ​ໂຄດ​ຕະ­ບອງ ໃຫ້​ສຳ­ພາດ​ເມື່ອ​ບໍ່​ດົນ​ຜ່ານ​ມາ​ນີ້​ວ່າ: ສະ­ເພາະ​ວຽກ​ຈັດ​ສັນ​ຄວາມ​ເປັນ​ລະ­ບຽບ​ຮຽບ​ຮ້ອຍ​ປີ 2019 ໄດ້​ເອົາ­ໃຈ­ໃສ່​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ສຳ­ເລັດ​ໂດຍ​ພື້ນ­ຖານ 2 ເສັ້ນ­ທາງ ຄື: ເສັ້ນ­ທາງ 13 ເໜືອ​ນັບ​ແຕ່​ສາມ​ແຍກ​ສີ​ໄຄ​ຮອດ​ຊາຍ​ແດນ​ເມືອງ​ນາ​ຊາຍ​ທອງ ມີ​ສິ່ງ​ປຸກ​ສ້າງ​ເທີບ ເງີບ​ຮົ້ວ​ປ້າຍ​ໂຄ­ສະ­ນາ ທີ່​ບໍ່​ໄດ້​ຮັບ​ອະ­ນຸ­ຍາດ​ປຸກ​ສ້າງ­ຕັ້ງ​ກວມ​ເອົາ​ຫົນ­ທາງ​ທີ່​ບໍ່​ສອດ­ຄ່ອງ​ກັບ​ຜັງ­ເມືອງ ແລະ ຜິດ​ລະ­ບຽບ​ທີ່​ຕ້ອງ​ໄດ້​ຍົກ­ຍ້າຍ​ຮື້​ມ້າງ​ອອກ​ມີ 463 ກໍ­ລະ­ນີ ໃນ​ນີ້ ລວມ​ທັງ​ຕະ­ຫຼາດ​ສີ​ໄຄ​ທີ່​ຈັດ​ຕັ້ງ​ປະ­ຕິ­ບັດ​ສຳ­ເລັດ ໃນ​ການ​ຍົກ­ຍ້າຍ​ຮື້​ສູນ​ບໍ­ລິ­ການ​ລາວ​ໂທລະ​ຄົມ ສູນ​ບໍ­ລິ­ການ​ທະ­ນາ­ຄານ ເອັສ​ທີ​ແບັງ ສູນ​ບໍ­ລິ­ການ​ທະ­ນາ­ຄານ​ລາວ​ຝຣັ່ງ ສູນ​ບໍ­ລິ­ການ​ທະ­ນາ­ຄານ​ລາວ​ຫວຽດ ແລະ ຫ້ອງ­ການ​ຈັດ​ສັນ​ຕະ­ຫຼາດ ພ້ອມ​ເທີບ ເງີບ​ຢູ່​ຕາມ​ແຄມ​ທາງ​ຕໍ່­ໜ້າ​ຕະ­ຫຼາດ​ສີ​ໄຄ​ອອກ​ໝົດ ໂດຍ​ສົມ­ທົບ​ກັບ​ຜູ້​ສຳ​ປະ­ທານ​ຕະ­ຫຼາດ​ສີ​ໄຄ ເຮັດ​ເປັນ​ບ່ອນ​ຈອດ​ລົດ​ບໍ່​ອະ­ນຸ­ຍາດ​ໃຫ້​ລົດ ຈອດ​ຢູ່​ຕາມ​ແຄມ​ທາງ​ໃຫ້​ໄປ​ຈອດ​ຢູ່​ໃນ​ຕະ­ຫຼາດ ແລະ ຟາກ​ເບື້ອງ​ຂ້າງ​ທາງ​ກົງ­ກັນ­ຂ້າມ​ກັບ​ຕະ­ຫຼາດ ກໍ​ໄດ້​ມ້າງ​ເທີບ​ເງີບ​ອອກ ຜ່ານ​ການ­ຈັດ­ຕັ້ງ​ປະ­ຕິ­ບັດ​ເຫັນ​ວ່າ​ໄດ້​ຮັບ​ການ​ຍ້ອງ​ຍ້ອງ​ຈາກ​ສັງ­ຄົມ​ດີ ຈາກ​ເມື່ອ​ກ່ອນ​ຈະ​ມີ​ລົດ​ແອ​ອັດ​ຢູ່​ເຂດ​ນີ້​ແຕ່​ປັດ­ຈຸ­ບັນ​ສາ­ມາດ​ແກ້​ໄຂ​ໄດ້ ແລະ ຖະ­ໜົນ​ອາ​ຊຽນ​ໄດ້​ມີ​ການ​ຮື້​ມ້າງ 119 ກໍ­ລະ­ນີ ໃນ 110 ກໍ­ລະ­ນີ ຍັງ​ເຫຼືອ 9 ກໍ­ລະ­ນີ ສ່ວນ​ການ­ຈັດ­ຕັ້ງ​ປະ­ຕິ­ບັດ​ໄດ້​ລົງ​ໂຄ­ສະ­ນາ​ເຜີຍ​ຂໍ້​ຕົກ­ລົງ​ຂອງ​ທ່ານ​ເຈົ້າ​ຄອງ ນວ ວ່າ​ດ້ວຍ​ການ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ຕາມ​ຕົວ​ເມືອງ ແລະ ແຈ້ງ​ການ​ຂອງ​ທ່ານ​ເຈົ້າ­ເມືອງ ຖ້າ​ຍັງ​ບໍ່​ປະ­ຕິ­ບັດ​ໄດ້​ເຊີນ​ມາ​ຟັງ​ການ​ໂອ້​ລົມ​ຂອງ​ທ່ານ​ເຈົ້າ­ເມືອງ ແລະ ທ່ານ​ຫົວ­ໜ້າ​ພະ​ແນກ ຍທຂ ນວ ຢູ່​ປົກ­ຄອງ​ເມືອງ ແຕ່​ຖ້າ​ຍັງ​ບໍ່​ປະ­ຕິ­ບັດ​ທາງ​ຄະ­ນະ​ກຳ­ມະ­ການ​ຂັ້ນ​ເມືອງ ສະ­ເໜີ​ຂໍ​ອະ­ນຸ­ມັດ​ຈາກ​ຂັ້ນ​ເທິງ ຈັດ​ຕັ້ງ​ປະ­ຕິ­ບັດ​ເອງ​ໂດຍ​ສົມ­ທົບ​ກັບ​ຄະ­ນະ​ກຳ­ມະ­ການ​ຂັ້ນ​ພະ​ແນກ ຍທຂ ນວ ຖື​ວ່າ­ການ​ປະ­ຕິ­ບັດ​ເອງ​ຂອງ​ຄະ­ນະ​ກຳ­ມະ­ການ​ມີ​ປະ­ມານ 60% ຫຼາຍ​ກວ່າ​ໝູ່​ແມ່ນ​ຢູ່​ເສັ້ນ­ທາງ​ອາ​ຊຽນ.

   ສຳ­ລັບ​ແຜນ­ການ​ປີ 2020 ສືບ­ຕໍ່​ຈັດ​ຕັ້ງ​ປະ­ຕິ­ບັດ​ຢູ່ 8 ເສັ້ນ­ທາງ ຄື: ສືບ­ຕໍ່​ເສັ້ນ­ທາງ​ທີ່​ສຳ­ເລັດ​ໂດຍ​ພື້ນ­ຖານ​ທີ່​ປະ­ຕິ­ບັດ​ຜ່ານ​ມາ ຄື: ຖະ­ໜົນ­ຫຼວງ​ພະ​ບາງ ແລະ ຖະ­ໜົນ​ສຸ​ພາ­ນຸ​ວົງ ແຕ່​ສາມ​ແຍກ​ສີ​ໄຄ​ຫາ​ສວນ​ເຈົ້າ­ຟ້າ​ງຸ່ມ ຖະ­ໜົນ 13 ເໜືອ ແລະ ຖະ­ໜົນ​ອາ​ຊຽນ ເສັ້ນ­ທາງ​ລຽບ​ສະ­ໜາມ​ບິນ​ສາ­ກົນ​ວັດ​ໄຕ ແຕ່​ໄຟ​ອຳ­ນາດ​ສະ­ໜາມ​ບິນ​ຫາ​ຕະ­ຫຼາດ​ສີ​ໄຄ​ໄດ້​ລົງ​ເຮັດ​ບົດ​ບັນ­ທຶກ​ສຳ­ເລັດ​ມີ 95 ກໍ­ລະ­ນີ ແລະ ມີ 122 ສິ່ງ​ປຸກ​ສ້າງ​ທີ່​ຈະ​ຕ້ອງ​ໄດ້​ມ້າງ​ອອກ ຄາດ​ວ່າ​ເດືອນ​ມີ­ນາ 2020 ຈະ​ໃຫ້​ສຳ­ເລັດ​ໃນ​ການ­ຈັດ­ຕັ້ງ​ປະ­ຕິ­ບັດ​ຮື້​ມ້າງ​ອອກ ຖະ­ໜົນ​ສີ​ທອງ ແຕ່​ໄຟ​ອຳ­ນາດ​ບ້ານ​ໜອງ​ແຕ່ງ​ຫາ​ດົງ​ນາ​ທອງ-ໜອງ​ດ້ວງ-ພະ​ແນກ​ສຶກ​ສາ​ທິ​ການ ແລະ ຂົນ­ສົ່ງ ນວ ປັດ­ຈຸ­ບັນ ລົງ​ລຸ​ລ່ວງ​ເຮັດ​ບົດ​ບັນ­ທຶກ​ພ້ອມ 3 ບ້ານ ແລະ ຍັງ​ອີກ 6 ບ້ານ​ກຳ­ລັງ​ສືບ­ຕໍ່​ປະ­ຕິ­ບັດ ເສັ້ນ­ທາງ​ໜອງ​ແຕ່ງ ແຕ່​ໄຟ​ອຳ­ນາດ​ໜອງ​ແຕ່ງ​ໄປ​ຫາ​ຕາດ​ມູນ ເສັ້ນ­ທາງ​ທົ່ງ​ປົ່ງ ແຕ່​ໂຮງ­ໝໍ​ປົວ​ຕາ​ທົ່ງ​ປົ່ງ​ໄປ​ຫາ​ກອງ​ຄຸ້ມ​ຄອງ​ພາ­ຫະ­ນະ ແລະ ການ​ຂັບ​ຂີ່-ບ້ານ​ດ່ານ​ຄຳ ແລະ ເສັ້ນ­ທາງ​ເກົ້າ​ລ້ຽວ ແຕ່​ໄຟ​ອຳ­ນາດ​ສີ​ໄຄ​ໄປ​ຫາ​ເກົ້າ​ລ້ຽວ-ຕາດ​ມູນ-ໜອງ​ດາ ຄາດ​ວ່າ​ທ້າຍ​ປີ 2020 ຈະ​ໃຫ້​ສຳ­ເລັດ​ໂດຍ​ພື້ນ­ຖານ.

ຂ່າວທີ່ກ່ຽວຂ້ອງ