ກຸ່ມກະສິກຳອິນຊີ ສະເໜີໃຫ້ພາກລັດ ຊ່ວຍຂະຫຍາຍຕະຫຼາດເພີ່ມ

747 13 ກ.ພ. 2020 ຂ່າວໜ້າ​ໜຶ່ງ
ກຸ່ມກະສິກຳອິນຊີ ສະເໜີໃຫ້ພາກລັດ ຊ່ວຍຂະຫຍາຍຕະຫຼາດເພີ່ມ

   ປັດ­ຈຸ­ບັນ ຊາວ​ກະ­ສິ­ກອນ​ສ່ວນ​ຫຼາຍ​ໄດ້​ຫັນ​ມາ​ໃສ່​ການ​ປູກ​ພືດ​ຜັກ​ປອດ​ສານ­ພິດ​ຂາຍ ເພື່ອ​ໃຫ້​ຕະ­ຫຼາດ ກໍ​ຄື ຜູ້​ບໍ­ລິ­ໂພກ ແລະ ຜູ້​ປູກ ໄດ້​ມີ​ສຸ­ຂະ­ພາບ​ທີ່​ດີ ແຕ່​ສິ່ງ​ເຫຼົ່າ­ນັ້ນ​ຍັງ​ມີ​ຂໍ້​ຫຍຸ້ງ­ຍາກ ເປັນ­ຕົ້ນ ດ້ານ​ວິ­ຊາ​ການ​ນ້ຳ​ສະ­ໜອງ​ໃຫ້​ແກ່​ການ​ຜະ­ລິດ ແລະ ຕະ­ຫຼາດ​ຍັງ​ບໍ່​ມີ​ສະ­ຖານ­ທີ່​ຂາຍ​ແບບ​ຖາ­ວອນ.

   ທ່ານ ຫວາດ ສຸ­ວັນ­ນະ​ກຸ​ມານ ຫົວ­ໜ້າ​ກຸ່ມ​ກະ­ສິ­ກຳ​ອິນ​ຊີ ບ້ານ​ທ່າ​ຊ້າງ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ໃຫ້​ສຳ­ພາດ​ເມື່ອ​ບໍ່​ດົນ​ຜ່ານ​ມາ​ວ່າ: ກຸ່ມ​ກະ­ສິ­ກຳ​ອິນ​ຊີ​ບ້ານ​ທ່າ​ຊ້າງ ໄດ້​ສ້າງ​ຂຶ້ນ​ປີ 2010 ເບື້ອງ​ຕົ້ນ​ມີ 8 ຄອບ­ຄົວ ມີ​ເນື້ອ­ທີ່​ທຳ​ການ​ຜະ­ລິດ 8 ໄລ່ ແລະ ໄດ້​ມີ​ການ​ຂະ­ຫຍາຍ​ສະ­ມາ­ຊິກ​ເພີ່ມ​ຂຶ້ນ​ເລື້ອຍໆ ປັດ­ຈຸ­ບັນ ມີ 111 ຄອບ­ຄົວ ເນື້ອ­ທີ່​ທຳ​ການ​ຜະ­ລິດ 137 ເຮັກ­ຕາ ມີ​ເຮືອນ​ຮົ່ມ​ປູກ​ຜັກ​ຂະ­ໜາດ​ກວ້າງ 6 ແມັດ ແລະ ຍາວ 20 ແມັດ ມີ 324 ຫຼັງ​ເຊິ່ງ​ຜັກ​ທີ່​ປູກ​ປະ­ກອບ​ມີ: ຜັກ​ສະ­ຫຼັດ ຜັກ​ບົ່່ວ ຫອມ­ປ້ອມ ຜັກ​ກາດ​ແຄ​ລັອດ ໝາກ­ເຜັດ ໝາກ­ເຂືອ ແລະ ຜັກ​ອື່ນໆ ລວມ​ຫຼາຍ​ກວ່າ 30 ຊະ­ນິດ ສາ­ມາດ​ສະ­ໜອງ​ໃຫ້​ຕະ­ຫຼາດ ກໍ​ຄື ຜູ້​ບໍ­ລິ­ໂພກ​ນະ­ຄອນ­ຫຼວງ​ວຽງ​ຈັນ ໄດ້​ປະ­ມານ 7-8 ໂຕນ​ຕໍ່​ອາ­ທິດ ມີ​ລາ­ຄາ​ຂາຍ 5.000-15.000 ກີບ​ຕໍ່​ກິ​ໂລ ສະ­ເລ່ຍ​ລາຍ​ຮັບ​ໝູ­ນວຽນ​ປະ­ມານ 100 ລ້ານ​ກີບ​ຕໍ່​ອາ­ທິດ ໂດຍ​ມີ​ຕະ­ຫຼາດ​ຈຳ­ໜ່າຍ​ຢູ່​ຫຼັກ 5 ຖະ­ໜົນ ໄກ­ສອນ ພົມ­ວິ­ຫານ ເດີ່ນ​ກາງ­ແຈ້ງ​ສູນ​ການ​ຄ້າ ລາວ-ໄອ​ເຕັກ ແລະ ເຂດ​ດົງ​ໂດກ.

   ສຳ­ລັບ​ເນື້ອ­ທີ່​ການ​ປູກ​ຜັກ​ຂອງ ທ່ານ ຫວາດ ສຸ­ວັນ­ນະ​ກຸ​ມານ ປັດ­ຈຸ­ບັນ ມີ​ເນື້ອ­ທີ່​ທັງ​ໝົດ 8 ໄລ່ ໃນ​ນີ້ ໄດ້​ປູກ​ຜັກ​ເນື້ອ­ທີ່ 2 ໄລ່ ສ່ວນ​ທີ່​ເຫຼືອ​ແມ່ນ​ປູກ​ໄມ້​ໃຫ້​ໝາກ ສະ­ເລ່ຍ​ອາ­ທິດ​ໜຶ່ງ​ສາ­ມາດ​ສ້າງ​ລາຍ​ຮັບ​ໃຫ້​ຄອບ­ຄົວ​ອາ­ທິດ​ລະ 1-2 ລ້ານ​ກີບ.

   ທ່ານ ຫວາດ ສຸ­ວັນ­ນະ​ກຸ​ມານ ໃຫ້​ຮູ້​ຕື່ມ​ອີ​ກວ່າ: ຕະ­ຫຼອດ​ໄລ­ຍະ​ການ​ສ້າງ­ຕັ້ງ​ກຸ່ມ​ປູກ ແລະ ຈຳ­ໜ່າຍ​ຜັກ​ກະ­ສິ­ກຳ​ອິນ​ຊີ ມີ​ຂໍ້​ສະ­ດວກ​ໃນ​ການ​ເຂົ້າ​ຫາ​ຕະ­ຫຼາດ ແລະ ເຂົ້າ​ຫາ​ແຫຼ່ງ​ທຶນ​ໄດ້​ງ່າຍ​ແຕ່​ຄຽງ​ຄູ່​ກັນ​ນັ້ນ ກໍ​ຍັງ​ມີ​ຂໍ້​ຫຍຸ້ງ­ຍາກ ແລະ ສິ່ງ​ທ້າ​ທາຍ​ຢາກ​ໃຫ້​ພາກ​ລັດ ກໍ​ຄື ຂະ­ແໜງ­ການ​ກ່ຽວ­ຂ້ອງ​ໃຫ້­ການ​ຊຸກ­ຍູ້​ສົ່ງ­ເສີມ​ຕື່ມ ເຊັ່ນ: ຜົນ​ຜະ­ລິດ​ຜັກ​ປອດ​ສານ­ພິດ ປັດ­ຈຸ­ບັນ​ມີ​ຈຳ­ນວນ​ເພີ່ມ​ຂຶ້ນ ໂດຍ​ສະ­ເພາະ ໃນ​ລະ­ດູ­ແລ້ງ​ຜັກ​ລົ້ນ​ຕະ­ຫຼາດ ຢາກ​ໃຫ້​ຂະ­ຫຍາຍ​ຕະ­ຫຼາດ​ເພີ່ມ​ຂຶ້ນ ແລະ ໃຫ້​ມີ​ຕະ­ຫຼາດ​ຈຳ­ໜ່າຍ​ທີ່​ໝັ້ນ­ຄົງ​ຖາ­ວອນ ໃຫ້​ຊ່ວຍ­ເຫຼືອ​ດ້ານ​ວິ­ຊາ​ການ​ໃນ​ການ​ເຝິກ­ອົບ­ຮົມ​ກ່ຽວ​ກັບ​ການ​ປູກ​ພືດ​ນອກ​ລະ­ດູ​ການ ແລະ ໃຫ້​ຊ່ວຍ​ດ້ານ​ການ​ເຂົ້າ​ຫາ​ແຫຼ່ງ​ທຶນ​ທີ່​ມີ​ໄລ­ຍະ​ເວ­ລາ​ການ​ກູ້​ຢືມ​ແບບ​ຍາວ​ນານ ແຕ່​ມີ​ດອກ​ເບ້ຍ​ຕ່ຳ ແລະ ໃຫ້​ເບິ່ງ​ກ່ຽວ​ກັບ​ລະ­ບົບ​ນ້ຳ ເນື່ອງ​ຈາ​ກວ່າ ປັດ­ຈຸ­ບັນ ນ້ຳ​ທີ່​ສະ­ໜອງ​ໃຫ້​ແກ່​ການ​ຜະ­ລິດ​ຍັງ​ບໍ່​ທັນ​ພຽງ­ພໍ​ເທື່ອ ເນື່ອງ​ຈາກ​ປັດ­ຈຸ­ບັນ​ຊາວ​ສວນ​ແມ່ນ​ມີ​ຄວາມ​ຫ້າວ­ຫັນ ແລະ ມີ​ຄວາມ​ພໍ­ໃຈ​ຕໍ່​ການ​ຜະ­ລິດ​ຜັກ​ປອດ​ສານ­ພິດ​ທີ່​ມີ​ຜົນ​ດີ​ຕໍ່​ສຸ​ຂະ ພາບ​ຂອງ​ຜູ້​ປູກ ແລະ ຜູ້​ບໍ­ລິ­ໂພກ​ເປັນ​ຢ່າງ​ດີ ໂດຍ​ລວມ​ແລ້ວ ແມ່ນ​ມີ​ທ່າ­ແຮງ​ພ້ອມ​ທີ່​ຈະ​ຜະ­ລິດ​ພືດ​ຜັກ​ປອດ​ສານ­ພິດ ເປັນ​ຈຳ­ນວນ​ຫຼວງ­ຫຼາຍ ຖ້າ​ມີ​ທຶນ​ໝູ­ນວຽນ ນ້ຳ​ສະ­ໜອງ​ໃຫ້​ພຽງ­ພໍ ແລະ ມີ​ຕະ­ຫຼາດ​ຈຳ­ໜ່າຍ​ທຸກ​ວັນ.

ຂ່າວທີ່ກ່ຽວຂ້ອງ