ພະແນກ ຖວທ ນວ ຫວນຄືນມູນເຊື້ອວັນກຳມະບານລາວ

773 13 ກ.ພ. 2020 ຂ່າວໜ້າ​ໜຶ່ງ
ພະແນກ ຖວທ ນວ ຫວນຄືນມູນເຊື້ອວັນກຳມະບານລາວ

   ສະ­ຫະ­ພັນ​ຮາກ​ຖານ​ກຳ­ມະ­ບານ ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ ໄດ້​ຈັດ​ປາ­ຖະ­ກະ­ຖາ​ຫວນ​ຄືນ​ມູນ­ເຊື້ອ ວັນ​ສ້າງ­ຕັ້ງ​ສະ­ຫະ­ພັນ​ກຳ­ມະ­ບານ​ລາວ ຄົບ­ຮອບ 64 ປີ (1/2/1956-1/2/2020) ຂຶ້ນ​ທີ່​ພະ​ແນກ ຖວ​ທ ນວ ໃນ​ວັນ​ທີ 12 ກຸມ­ພາ 2020 ປາ­ຖະ­ກະ­ຖາ​ໂດຍ​ທ່ານ ແກ່ນ​ຄຳ ຫົດ​ທິ​ລາດ ປະ­ທານ​ສະ­ຫະ­ພັນ​ກຳ­ມະ­ບານ ນວ ມີ​ທ່ານ ຄຳ​ຄູນ ໃບ​ລາ­ຕີ ຮອງ​ຫົວ­ໜ້າ​ພະ​ແນກ ຖວ​ທ ນວ ບັນ­ດາ​ຫົວ­ໜ້າ ຮອງ​ຫົວ­ໜ້າ​ຂະ­ແໜງ ກອງ​ວິ­ຊາ​ການ ແລະ ສະ­ມາ­ຊິກ​ກຳ­ມະ­ບານ​ເຂົ້າ​ຮ່ວມ.

   ການ​ປາ­ຖະ­ກະ­ຖາ​ຄັ້ງ​ນີ້ ປະ­ທານ​ສະ­ຫະ­ພັນ​ກຳ­ມະ­ບານ ນວ ໄດ້​ຍົກ​ໃຫ້​ເຫັນ​ການ​ກຳ­ເນີດ​ເຕີບ​ໃຫຍ່​ຂອງ​ອົງ­ການ​ກຳ­ມະ­ບານ​ລາວ​ໃນ​ເມື່ອ​ກ່ອນ ກໍ​ຄື ສະ­ຫະ­ພັນ​ກຳ­ມະ­ບານ​ລາວ​ໃນ​ປັດ­ຈຸ­ບັນ ທີ່​ມີ​ຄວາມ​ລະ​ອິດ​ລະ​ອ້ຽວ​ຈາກ​ຂະ​ບວນ​ການ​ຕໍ່­ສູ້​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ຕ້ານ​ການ​ຮຸກ​ຮານ​ຂອງ​ຈັກ­ກະ­ພັດ​ຕ່າງ​ດ້າວ ທີ່​ມາ​ປົກ­ຄອງ​ແບ່ງ​ແຍກ​ດິນ​ປະ­ເທດ​ລາວ​ເຮົາ​ເປັນ​ເວ­ລາ​ຫຼາຍ​ຮ້ອຍ​ປີ​ໃນ​ເວ­ລາ​ນັ້ນ ຄົນ​ລາວ​ບໍ່​ມີ​ສິດ​ຫຍັງ​ມີ​ແຕ່​ເປັນ​ຂ້ອຍ​ຂ້າ​ມ້າ​ໃຊ້​ໃຫ້​ພວກ​ເຂົາ ຍ້ອນ​ຄວາມ​ຄຽດ​ແຄ້ນ​ຕໍ່​ການ​ກົດ​ຂີ່​ຂູດ​ຮີດ​ຂອງ​ພວກ​ເຮົາ ມາ​ຮອດ​ປີ 1933 ກຳ­ມະ­ກອນ​ທີ່​ເຮັດ​ວຽກ​ຢູ່​ໂຮງ­ງານ​ບໍ່​ກົ່ວ​ໂພນ​ຕີ້ວ ແຂວງ​ຄຳ​ມ່ວນ ກໍ​ໄດ້​ມີ​ການ­ຈັດ­ຕັ້ງ​ໃຫ້​ມີ​ອົງ­ການ​ກຳ­ມະ­ບານ​ເພື່ອ​ຕໍ່­ສູ້​ກັບ​ພວກ​ເຂົາ ແຕ່​ພາຍ­ຫຼັງ​ທີ່​ໂຄງ­ການ​ຂຸດ​ຄົ້ນ​ບໍ່​ກົ່ວ​ສິ້ນ​ສຸດ ອົງ­ການ​ກຳ­ມະ­ບານ​ກໍ​ສິ້ນ​ສຸດ​ໄປ​ນຳ ຍ້ອນ​ບໍ່​ທັນ​ມີ​ການ​ນຳ­ພາ​ທີ່​ໜັກ​ແໜ້ນ ແຕ່​ພາຍ­ຫຼັງ​ກອງ­ທັບ​ປະ­ຊາ­ຊົນ​ລາວ​ໄດ້​ຮັບ​ການ​ສ້າງ­ຕັ້ງ​ວັນ​ທີ 20 ມັງ­ກອນ 1949 ແລະ ພັກ​ປະ­ຊາ­ຊົນ ປະ­ຕິ­ວັດ​ລາວ ກໍ​ໄດ້​ຮັບ​ການ​ສ້າງ­ຕັ້ງ ວັນ​ທີ 22 ມີ­ນາ 1955 ຈາກ​ນັ້ນ ມາ​ຮອດ​ວັນ​ທີ 1 ກຸມ­ພາ 1956 ອົງ­ການ​ກຳ­ມະ­ບານ​ລາວ ກໍ​ໄດ້​ຮັບ​ການ​ສ້າງ­ຕັ້ງ​ຂຶ້ນ​ຢູ່​ເຂດ​ທີ່​ໝັ້ນ​ເມືອງ​ວຽງ​ຈັນ ໃນ​ເວ­ລາ​ນັ້ນ ຍັງ​ເປັນ​ກຳ­ມະ­ບານ​ພາ­ລາ​ກອນ​ທີ່​ກິນ​ຢູ່​ຮ່ວມ​ກັບ​ປະ­ຊາ­ຊົນ ຮັບ​ໃຊ້​ປະ­ຊາ­ຊົນ ຮັບ​ໃຊ້​ປະ­ເທດ​ຊາດ ຕີ​ສັດ­ຕູ​ເພື່ອ​ປົດ​ປ່ອຍ­ປະ​ເທດ​ຊາດ ພາຍ­ຫຼັງ​ປະ­ເທດ​ຊາດ​ໄດ້​ຮັບ​ການ​ປົດ​ປ່ອຍ​ປີ 1975 ກຳ­ມະ­ບານ​ລາວ​ມີ​ການ​ປັບ­ປຸງ​ປ່ຽນ­ແປງ​ຫຼາຍ​ຢ່າງ ຈົນ​ມາ​ຮອດ​ປີ 1983 ໄດ້​ເປີດ​ກອງ​ປະ­ຊຸມ​ໃຫຍ່​ຄັ້ງ​ທຳ​ອິດ​ຂຶ້ນ ມີ​ການ​ປ່ອນ​ບັດ​ເລືອກ​ຕັ້ງ​ເອົາ​ຄະ­ນະ​ບໍ­ລິ­ຫານ​ງານ ມີ​ກົດ​ລະ­ບຽບ ແລະ ກ້າວ​ສູ່​ຫັນ​ຈາກ​ລະ­ບຽບ​ມາ​ມີ​ກົດ­ໝາຍ​ກຳ­ມະ­ບານ ໃນ​ປີ 2003 ນັບ​ແຕ່​ນັ້ນ​ມາ 5 ປີ ມີ​ກອງ​ປະ­ຊຸມ​ໃຫຍ່​ເທື່ອ​ໜຶ່ງ ແລະ ມາ​ຮອດ​ປັດ­ຈຸ­ບັນ​ດຳ­ເນີນ​ກອງ​ປະ­ຊຸມ​ໃຫຍ່ 7 ຄັ້ງ.

   ໂດຍ​ລວມ​ແລ້ວ ຕະ­ຫຼອດ​ໄລ­ຍະ 64 ປີ ສະ­ຫະ­ພັນ​ກຳ­ມະ­ບານ​ລາວ ມີ​ການ​ເຕີບ​ໃຫຍ່​ຂະ­ຫຍາຍ­ຕົວ​ທັງ​ດ້ານ​ປະ­ລິ­ມານ ແລະ ຄຸນ​ນະ​ພາບ ເນື່ອງ​ຈາກ​ກອງ​ປະ­ຊຸມ​ໃຫຍ່​ແຕ່​ລະ​ຄັ້ງ ໄດ້​ມີ​ການ​ປັບ­ປຸງ​ບູ­ລະ­ນະ​ແນວ­ທາງ ແລະ ກົງ­ຈັກ​ການ­ຈັດ­ຕັ້ງ​ໄປ​ເລື້ອຍໆ ເຮັດ​ໃຫ້​ມີ​ຄວາມ​ເຂັ້ມ­ແຂງ​ຢ່າງ​ໜັກ​ແໜ້ນ​ທາງ​ດ້ານ​ການ­ຈັດ­ຕັ້ງ ນັບ​ແຕ່​ສູນ​ກາງ​ລົງ​ຮອດ​ທ້ອງ­ຖິ່ນ​ທຸກ​ຂັ້ນ ແລະ ຫົວ­ໜ່ວຍ​ທຸ­ລະ​ກິດ ໂຮງ​ຈັກ ໂຮງ­ງານ​ຕ່າງໆ ຈົນ​ກາຍ­ເປັນ​ກຳ­ມະ­ບານ​ລັດ­ຖະ­ກອນ ແລະ ກຳ­ມະ­ບານ​ກຳ­ມະ­ກອນ ເຊິ່ງ​ການ​ປາ­ຖະ­ກະ­ຖາ​ຄັ້ງ​ນີ້ ໄດ້​ເຮັດ​ໃຫ້​ສະ­ມາ­ຊິກ​ກຳ­ມະ­ບານ ກໍ​ຄື ພະ­ນັກ­ງານ-ລັດ­ຖະ­ກອນ​ພາຍ​ໃນ​ພະ​ແນກ ຖວ​ທ ນວ ມີ​ຄວາມ​ຮັບ​ຮູ້​ເຊື່ອມ​ຊຶມ ກຳ​ໄດ້​ເນື້ອ​ແທ້​ຂອງ​ກຳ­ມະ­ບານ​ລາວ​ຫຼາຍ​ຂຶ້ນ ເພື່ອ​ນຳ­ໄປ​ໝູນ​ໃຊ້​ເຂົ້າ​ໃນ​ວິ­ຖີ​ຊີ­ວິດ​ປະ­ຈຳ​ວັນ ແລະ ວຽກ​ງານ​ວິ­ຊາ​ສະ­ເພາະ ໃນ​ການ­ເຄື່ອນ­ໄຫວ​ວຽກ​ງານ​ກຳ­ມະ­ບານ​ໃຫ້​ມີ​ຄວາມ​ແຂງ­ແຮງ.

ຂ່າວທີ່ກ່ຽວຂ້ອງ