ປະເມີນ PEFA ມີຫຼາຍຂົງເຂດໄດ້ຮັບຄະແນນຕ່ຳ

787 13 ກ.ພ. 2020 ຂ່າວໜ້າ​ໜຶ່ງ

   ກະ­ຊວງ​ການ​ເງິນ​ຮ່ວມ​ກັບ​ທະ­ນາ­ຄານ​ໂລກ ສະ­ຫະ­ພາບ​ເອີ​ຣົບ ແລະ ບັນ­ດາ​ຄູ່​ຮ່ວມ​ພັດ­ທະ­ນາ​ອື່ນໆ​ ໄດ້​ເລີ່ມ​ດຳ­ເນີນ​ປະ​ເມີນ​ການ​ຄຸ້ມ​ຄອງ​ລາຍ​ຈ່າຍ​ພາກ​ລັດ ແລະ ຄວາມ​ຮັບ­ຜິດ­ຊອບ​ທາງ​ດ້ານ​ການ​ເງິນ (PEFA) ປະ­ຈຳ​ປີ 2018 ຂອງ​ລາວ ໄດ້​ເລີ່ມ​ປະ​ເມີນ​ທ້າຍ​ປີ 2017 ປັດ­ຈຸ­ບັນ​ໄດ້​ສຳ­ເລັດ ເຊິ່ງ​ຜ່ານ​ການ​ປະ​ເມີນ​ມີ​ຫຼາຍ​ຂົງ­ເຂດ​ໄດ້​ຄະ­ແນນ​ຕ່ຳ ເປັນ­ຕົ້ນ ນັບ​ແຕ່​ລະ­ບົບ​ການ​ວາງ​ແຜນ­ການ​ສ້າງ​ແຜນ​ການ­ຈັດ­ຕັ້ງ​ປະ­ຕິ­ບັດ​ການ​ຕິດ­ຕາມ​ກວດ­ກາ ແລະ ລະ­ບົບ​ການ​ລາຍ​ງານ​ຜົນ​ການ­ຈັດ­ຕັ້ງ​ປະ­ຕິ­ບັດ​ການ​ລາຍ​ງານ ເກືອບ​ທຸກ​ຂັ້ນ​ຕອນ ມີ​ຄວາມ​ຈຳ­ເປັນ​ຕ້ອງ​ໄດ້​ປັບ­ປຸງ​ເພື່ອ​ໃຫ້­ການ​ບໍ­ລິ­ຫານ​ການ​ເງິນ​ພາກ​ລັດ ກ້າວ​ເຂົ້າ​ສູ່​ມາດ­ຖານ​ຂອງ​ພາກ​ພື້ນ ແລະ ສາ­ກົນ ເພື່ອ​ຄວາມ​ໂປ່ງ​ໃສ​ເພື່ອ​ປະ­ໂຫຍດ​ການ​ນຳ​ໃຊ້​ງົບ­ປະ­ມານ​ໃຫ້​ເຂົ້າ​ສູ່​ການ​ພັດ­ທະ­ນາ.

   ວັນ​ທີ 12 ກຸມ­ພາ 2020 ທີ່​ໂຮງ­ແຮມ​ຄຣາວ​ພລາ​ຊາ ກະ­ຊວງ​ການ​ເງິນ​ໄດ້​ຈັດ​ຖະ­ແຫຼງ​ຂ່າວ​ຜົນ​ການ​ປະ​ເມີນ​ການ​ຄຸ້ມ​ຄອງ​ລາຍ​ຈ່າຍ​ພາກ​ລັດ ແລະ ຄວາມ​ຮັບ­ຜິດ­ຊອບ​ທາງ​ດ້ານ​ການ​ເງິນ​ຂອງ​ລາວ (PEFA) ສະ­ໜັບ­ສະ­ໜູນ​ໂດຍ​ແຜນ​ງານ​ການ​ປະ­ຕິ​ຮູບ​ການ​ເງິນ​ແຫ່ງ​ລັດ ເປັນ​ປະ­ທານ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ມີ​ທ່ານ ບຸນ​ເຫຼືອ ສິນ​ໄຊ​ວໍ​ຣະ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ ບັນ­ດາ​ຫົວ­ໜ້າ​ກົມ ຮອງ​ກົມ ກະ­ຊວງ​ກ່ຽວ­ຂ້ອງ ຜູ້­ຕາງ­ໜ້າ​ທະ­ນາ­ຄານ​ໂລກ​ປະ­ຈຳ​ລາວ ສະ­ຫະ­ພາບ​ເອີ​ຣົບ ແລະ ຄູ່​ຮ່ວມ​ພັດ­ທະ­ນາ​ເຂົ້າ​ຮ່ວມ.

   ທ່ານ ບຸນ​ເຫຼືອ ສິນ​ໄຊ​ວໍ​ຣະ​ວົງ ກ່າວ​ວ່າ: ການ​ປະ​ເມີນ​ຄັ້ງ​ນີ້​ເປັນ​ການ​ປະ​ເມີນ​ຜົນ​ການ­ຈັດ­ຕັ້ງ​ປະ­ຕິ­ບັດ​ງົບ­ປະ­ມານ​ແຫ່ງ​ລັດ ສົກ​ປີ 2014-2015 ສົກ​ປີ 2015-2016 ແລະ ປີ 2017 ຂອງ​ລາວ ການ​ປະ​ເມີນ​ໄດ້​ກຳ­ນົດ​ເປົ້າ​ໝາຍ​ບັນ­ດາ​ຫົວ­ໜ່ວຍ​ງົບ­ປະ­ມານ​ຂັ້ນ​ສູນ​ກາງ ນະ­ຄອນ­ຫຼວງ​ວຽງ​ຈັນ ແລະ ແຂວງ​ຫຼວງ​ພະ​ບາງ ການ​ປະ​ເມີນ​ມີ​ລັກ­ສະ­ນະ​ເລິກ­ເຊິ່ງ ໂດຍ​ໄດ້​ປະ​ເມີນ​ທຸກ​ລາຍ­ການ​ທີ່​ປະ­ກອບ​ໃນ​ໂຄງ​ສ້າງ​ການ​ຄຸ້ມ​ຄອງ​ການ​ເງິນ​ພາກ​ລັດ ການ​ບໍ­ລິ­ຫານ​ການ​ເງິນ​ທັງ​ໝົດ ໂດຍ​ສະ­ເພາະ ດ້ານ​ລາຍ​ຮັບ ແລະ ດ້ານ​ລາຍ​ຈ່າຍ​ຕາມ​ຮອບ​ວຽນ​ງົບ­ປະ­ມານ​ທຸກ​ຂັ້ນ​ຕອນ ນັບ​ແຕ່​ຂັ້ນ​ຕອນ​ການ​ສ້າງ​ງົບ­ປະ­ມານ​ການ­ຈັດ­ຕັ້ງ​ປະ­ຕິ­ບັດ ຕະ­ຫຼອດ​ເຖິງ​ການ​ລາຍ​ງານ ແລະ ກວດ​ສອບ ເຊິ່ງ​ໄດ້​ປະ​ເມີນ​ກວມ​ເອົາ 46 ຫົວ­ໜ່ວຍ​ງົບ­ປະ­ມານ​ຂັ້ນ​ກະ­ຊວງ ແລະ ທຽບ​ເທົ່າ ທີ່​ລະ­ບຸ​ໃນ​ບົດ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ.

   ປັດ­ຈຸ­ບັນ ການ​ປະ​ເມີນ​ໄດ້​ສຳ­ເລັດ ແລະ ໄດ້​ຖືກ​ຮັບ­ຮອງ​ຈາກ​ກອງ​ເລ­ຂາ PEFA ສາ­ກົນ ເຊິ່ງ​ກະ­ຊວງ​ການ​ເງິນ​ຈະ​ໄດ້​ສັງ​ລວມ​ລາຍ​ງານ​ຜົນ​ປະ​ເມີນ​ດັ່ງ­ກ່າວ​ຕໍ່​ລັດ­ຖະ­ບານ ເພື່ອ​ຮັບ­ຮອງ ແລະ ດຳ­ເນີນ​ການ​ເຜີຍ­ແຜ່​ຜົນ​ການ​ປະ​ເມີນ​ສຳ­ລັບ​ເປົ້າ​ໝາຍ​ການ​ປະ​ເມີນ ປະ­ກອບ​ມີ 7 ພາກ ຄື: ຄວາມ​ໜ້າ​ເຊື່ອ​ຖື​ຂອງ​ງົບ­ປະ­ມານ ຄວາມ​ໂປ່ງ​ໃສ​ຂອງ​ການ​ເງິນ​ແຫ່ງ​ລັດ ການ​ຄຸ້ມ​ຄອງ​ຊັບ​ສິນ ແລະ ໜີ້​ສິນ​ຂອງ​ລັດ ການ​ສ້າງ​ແຜນ​ງົບ­ປະ­ມານ ແລະ ຍຸດ​ທະ​ສາດ​ການ​ເງິນ ຕາມ​ນະ­ໂຍ­ບາຍ​ຄວາມ​ສາ­ມາດ​ຄາດ​ຄະ­ເນ ແລະ ການ​ຄວບ​ຄຸມ​ການ​ປະ­ຕິ­ບັດ​ງົບ­ປະ­ມານ​ການ​ລົງ​ບັນ­ຊີ ແລະ ການ​ລາຍ​ງານ​ການ​ກວດ­ກາ ແລະ ການ​ກວດ​ສອບ​ພາຍ​ນອກ ໂດຍ​ອີງ­ໃສ່​ຜົນ​ໄດ້​ຮັບ​ຈາກ​ການ​ປະ​ເມີນ 7 ພາກ​ນັ້ນ​ເຫັນ​ໄດ້​ວ່າ ຍັງ​ມີ​ຄະ­ແນນ​ໃນ​ລະ­ດັບ​ຕ່ຳ​ໃນ​ຫຼາຍ​ຂົງ­ເຂດ ເຊິ່ງ​ເປັນ​ຂົງ­ເຂດ​ທີ່​ອາດ​ຈະ​ໄດ້​ປັບ­ປຸງ ກະ­ຊວງ​ການ​ເງິນ​ຈະ​ສືບ­ຕໍ່​ນຳ​ເອົາ​ບັນ­ດາ​ຈຸດ​ອ່ອນ​ຂໍ້­ຄົງ­ຄ້າງ​ທີ່​ເຫັນ​ໄດ້​ຈາກ​ການ​ປະ​ເມີນ ເພື່ອ​ໝູນ​ໃຊ້​ກຳ­ນົດ​ເປັນ​ຄາດ­ໝາຍ​ໃນ​ການ​ປະ­ຕິ​ຮູບ​ຂະ­ແໜງ­ການ​ເງິນ ແລະ ນຳ​ໃຊ້​ຜົນ​ໄດ້​ຮັບ​ຂອງ​ແຕ່​ລະ​ຕົວ​ຊີ້​ວັດ​ມາ​ເຊື່ອມ​ກັບ 6 ແຜນ​ງານ ການ​ປະ­ຕິ​ຮູບ​ການ​ເງິນ​ແຫ່ງ​ລັດ​ໃນ​ໄລ­ຍະ​ທີ 1 ແຕ່​ປີ 2018-2020 ແລະ ແຜນ​ງານ​ປະ­ຕິ​ຮູບ​ການ​ເງິນ​ແຫ່ງ​ລັດ​ໄລ­ຍະ​ທີ 2 ປີ 2021-2025.

ຂ່າວທີ່ກ່ຽວຂ້ອງ