ຫຼາຍພາກສ່ວນຮ່ວມໃຈມອບເງິນ ຊ່ວຍເຫຼືອປະຊາຊົນຈີນຕ້ານໄວຣັສໂຄໂຣນາ

948 13 ກ.ພ. 2020 ຂ່າວໜ້າ​ໜຶ່ງ
ຫຼາຍພາກສ່ວນຮ່ວມໃຈມອບເງິນ ຊ່ວຍເຫຼືອປະຊາຊົນຈີນຕ້ານໄວຣັສໂຄໂຣນາ

   ນະ­ຄອນ­ຫຼວງ​ວຽງ​ຈັນ ຮ່ວມ​ກັບ​ສະ­ມາ­ຄົມ​ມິດ­ຕະ­ພາບ ລາວ-ຈີນ ຈັດ​ງານ​ລະ­ດົມ​ທຶນ​ເພື່ອ​ຊ່ວຍ­ເຫຼືອ​ຜູ້​ຖືກ ເຄາະ​ຮ້າຍ​ຈາກ​ພະ­ຍາດ​ອັກ­ເສບ​ປອດ ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ ຫຼື ໄວ​ຣັສ​ໂຄ​ໂຣ​ນາ ໃນ​ວັນ​ທີ 11 ກຸມ ພາ 2020 ທີ່​ໂຮງ­ແຮມ​ແລນ​ມາກ​ແມ່​ຂອງ​ລີ​ເວີ​ໄຊ ນະ­ຄອນ­ຫຼວງ​ວຽງ​ຈັນ ໂດຍ​ການ​ເຂົ້າ​ຮ່ວມ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ຫົວ­ໜ້າ​ຄະ­ນະ​ສະ­ເພາະ​ກິດ​ເພື່ອ​ປ້ອງ​ກັນ​ຄວບ​ຄຸມ ແລະ ແກ້​ໄຂ​ພະ­ຍາດ​ອັກ­ເສບ​ປອດ​ຈາກ​ເຊື້ອ​ຈຸ­ລາ​ໂຣກ​ສາຍ​ພັນ​ໃໝ່​ໂຄ​ໂຣ​ນາ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ ທ່ານ ຈຽງ​ຈ່າຍ​ຕົງ ເອກ​ອັກ​ຄະ​ລັດ​ຖະ​ທູດ ສປ ຈີນ ປະ­ຈຳ​ລາວ ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ-ບໍ່​ແຮ່ ປະ­ທານ​ສະ­ມາ­ຄົມ​ມິດ­ຕະ­ພາບ ລາວ-ຈີນ  ບັນ­ດາ​ການ​ນຳ ພັກ-ລັດ ການ​ນຳ​ນະ­ຄອນ­ຫຼວງ ຄະ­ນະ​ສະ­ມາ­ຄົມ​ຈີນ ແລະ ຜູ້​ປະ­ກອບ​ການ ນັກ­ທຸ­ລະ­ກິດ​ທັງ​ພາຍ​ໃນ ແລະ ຕ່າງ ປະ­ເທດ.

   ນັບ​ແຕ່​ທ້າຍ​ເດືອນ​ທັນ­ວາ 2019 ເປັນ­ຕົ້ນ​ມາ ໄດ້​ເກີດ​ການ­ລະ­ບາດ­ພະ­ຍາດ​ໄວ​ຣັສ​ໂຄ​ໂຣ​ນາ​ຢ່າງ​ກວ້າງ ຂວາງ ແລະ ວ່ອງ­ໄວ ໂດຍ​ເລີ່ມ​ຈາກ​ເມືອງ​ອູ​ຮັ່ນ ແຂວງ​ຫູ​ເປີຍ ສປ ຈີນ ມາ​ເຖິງ​ປັດ­ຈຸ­ບັນ​ໄດ້​ແຜ່​ລະ­ບາດ​ໄປ​ຫຼາຍ​ແຂວງ​ຂອງ​ຈີນ ແລະ ຫຼາຍ​ປະ­ເທດ ນັບ​ທັງ​ທະ­ວີບ­ອາ­ຊີ​ເອີ​ຣົບ​ອາ​ເມ​ຣິ​ກາ ຕາມ​ສະ­ຖິ­ຕິ​ສຸດ​ທ້າຍ (ວັນ​ທີ 11 ກຸມ­ພາ 2020 ເວ­ລາ 15:50 ໂມງ ມີ​ຜູ້​ຕິດ­ເຊື້ອ 43.112 ກໍ­ລະ­ນີ ມີ​ຜູ້​ເສຍ​ຊີ­ວິດ 1.018 ຄົນ ເຈັບ​ໜັກ 7.333 ກໍ­ລະ­ນີ ສ່ວນ​ໃຫຍ່​ຢູ່​ເມືອງ​ອູ​ຮັ່ນ ໃນ​ຈຳ­ນວນ​ຜູ້​ຕິດ­ເຊື້ອ​ປົວ​ດີ​ແລ້ວ 4.135 ກໍ­ລະ­ນີ) ສະ­ເພາະ​ຢູ່​ລາວ ເຮົາ​ຍັງ​ບໍ່​ທັນ​ມີ​ກໍ­ລະ­ນີ ແຕ່​ຄົນ​ຈີນ​ມາ​ທ່ອງ​ທ່ຽວ​ລາວ​ເວ­ລາ​ກັບ­ເຂົ້າ​ແຂວງ​ຊົງ​ຊີ້ນ ໄດ້​ກວດ​ພົບ​ໜຶ່ງ​ຄົນ ພວກ​ເຮົາ​ໄດ້​ສືບ​ຄົ້ນ​ຫາ​ແຕ່​ຍັງ​ບໍ່​ທັນ​ພົບ​ເທື່ອ ພັກ-ລັດ­ຖະ­ບານ​ຈີນ ໄດ້​ເພີ່ມ​ທະ­ວີ​ໃນ​ການ​ຄວບ​ຄຸມ​ປ້ອງ​ກັນ​ແກ້​ໄຂ ໂດຍ​ໃຊ້​ຫຼາຍ​ມາດ​ຕະ­ການ​ຫຼາຍ​ນະ­ໂຍ­ບາຍ ເພື່ອ​ຢັບ​ຢັ້ງ​ແກ້​ໄຂ​ພະ­ຍາດ​ນີ້​ໃຫ້​ໝົດ​ໄປ ແລະ ມີ​ຄວາມ​ຕ້ອງ­ການ​ເຄື່ອງ­ມື​ອຸ­ປະ­ກອນ​ຈຳ­ນວນ​ຫຼວງ­ຫຼາຍ ເປັນ­ຕົ້ນ ຜ້າ​ອັດ​ປາກ-ອັດ​ດັງ ແລະ ນ້ຳ​ຢາ​ລ້າງ​ມື ເຖິງ​ວ່າ​ຈະ​ມີ​ໂຮງ­ງານ​ຫຼວງ­ຫຼາຍ​ກໍ​ບໍ່​ອາດ​ຕອບ​ສະ­ໜອງ​ໄດ້​ຢ່າງ​ທ່ວງ​ທັນ.

   ດັ່ງ­ນັ້ນ ໃນ​ຍາມ​ທີ່​ເພື່ອນ​ພົບ​ຄວາມ​ຫຍຸ້ງ­ຍາກ ນະ­ຄອນ­ຫຼວງ​ຈຶ່ງ​ໄດ້​ຮ່ວມ​ມື​ກັບ​ສະ­ມາ­ຄົມ​ມິດ­ຕະ­ພາບ ລາວ-ຈີນ ໄດ້​ຈັດ​ງານ​ລະ­ດົມ​ທຶນ​ເພື່ອ​ຈັດ​ຊື້​ອຸ­ປະ­ກອນ​ທີ່​ຈຳ­ເປັນ​ໄປ​ຊ່ວຍ­ເຫຼືອ​ເພື່ອນ​ມິດ ເພື່ອ​ສະ­ແດງ​ເຖິງ​ນ້ຳ­ໃຈ ຄວາມ​ເປັນ​ຫ່ວງ​ເປັນ​ໄຍ ແລະ ຜ່ານ​ການ​ລະ­ດົມ​ທຶນ​ຄັ້ງ​ນີ້ ລວມ​ຍອດ​ບໍ­ລິ­ຈາກ​ໄດ້​ທັງ​ໝົດ 2.223.721.000 ກີບ 5.000 ບາດ 68.900 ໂດ​ລາ​ສະ­ຫະ­ລັດ ແລະ 3.400 ຢວນ ເຊິ່ງ​ເງິນ​ຈຳ­ນວນ​ນີ້​ຈະ​ໄດ້​ນຳ­ໄປ​ຊື້​ອຸ­ປະ­ກອນ​ທີ່​ຈຳ­ເປັນ​ນຳ​ໃຊ້​ເຂົ້າ​ໃນ​ເຫດ­ການ​ຄັ້ງ​ນີ້.

   ທ່ານ ຄຳ​ມະ­ນີ ອິນ​ທິ​ລາດ ໄດ້​ສະ­ແດງ​ຄວາມ​ເສົ້າ​ສະ­ຫຼົດ​ໃຈ ແລະ ແບ່ງ​ຄວາມ­ທຸກ​ໂສກ​ມາ​ຍັງ​ພັກ-ລັດ​ຖະ ບານ​ຈີນ ແລະ ຄອບ­ຄົວ​ຜູ້​ປະ­ສົບ​ເຄາະ​ຮ້າຍ​ຈາກ​ມະ​ຫັນ​ຕະ​ໄພ​ດັ່ງ­ກ່າວ ພ້ອມ​ນີ້ ທ່ານ​ຍັງ​ໃຫ້​ຮູ້​ອີ​ກວ່າ: ສະ​ມາ ຄົມ​ມິດ­ຕະ­ພາບ ລາວ-ຈີນ ຂັ້ນ​ສູນ​ກາງ ໄດ້​ລະ­ດົມ​ວັດ­ຖຸ​ສິ່ງ​ຂອງ​ທີ່​ຈຳ­ເປັນ​ຈາກ​ບັນ­ດາ​ບໍ­ລິ­ສັດ ແລະ ສະ­ພາ​ການ​ຄ້າ​ຈີນ ໃນ ສປປ ລາວ ໄດ້​ຈຳ­ນວນ​ໜຶ່ງ ແລະ ໄດ້​ຈັດ​ສົ່ງ​ໄປ​ຍັງ ສປ ຈີນ ເປັນ​ທີ່​ຮຽບ​ຮ້ອຍ​ແລ້ວ ເຊິ່ງ​ລວມ​ທັງ​ໝົດ​ມີ​ຜ້າ​ອັດ​ປາກ-ອັດ​ດັງ 762.000 ກວ່າ​ຜືນ ຖົງ­ມື​ສຳ­ລັບ​ການ​ແພດ 160.000 ຄູ່ ແວ່ນ­ຕາ​ສຳ­ລັບ​ການ​ແພດ 1.000 ອັນ ໝວກ​ສຳ­ລັບ​ແພດ 25.000 ໜ່ວຍ ເຖິງ​ແມ່ນ​ວ່າ​ຈະ​ເປັນ​ຈຳ­ນວນ​ບໍ່​ຫຼາຍ ແຕ່​ກໍ​ສະ­ແດງ​ໃຫ້​ເຫັນ​ເຖິງ​ຄວາມ​ຮັກ­ແພງ ຄວາມ​ຜູກ​ພັນ​ມິດ​ຈິດ​ມິດ​ໃຈ​ຂອງ​ປະ­ຊາ­ຊົນ​ລາວ​ທີ່​ມີ​ຕໍ່​ປະ­ຊາ­ຊົນ​ຈີນ ອ້າຍ​ນ້ອງ ໃນ​ຍາມ​ປະ­ສົບ​ຄວາມ​ຫຍຸ້ງ­ຍາກ.

   ໂອ­ກາດ​ນີ້ ທ່ານ ສົມ​ດີ ດວງ​ດີ ຕາງ­ໜ້າ​ໃຫ້​ພັກ-ລັດ­ຖະ­ບານ ກໍ​ຄື ປະ­ຊາ­ຊົນ​ລາວ​ບັນ­ດາ­ເຜົ່າ ສະ­ແດງ​ຄວາມ​ໂສກ­ເສົ້າ​ເສຍ​ໃຈ ແລະ ເປັນ​ຫ່ວງ​ເປັນ​ໄຍ​ຕໍ່​ລັດ­ຖະ­ບານ​ຈີນ ກໍ​ຄື ປະ­ຊາ­ຊົນ​ຈີນ​ທີ່​ໄດ້​ຮັບ​ຜົນ​ກະ­ທົບ​ຈາກ​ເຊື້ອ​ໄວ​ຣັສ​ໂຄ​ໂຣ​ນາ ພ້ອມ​ທັງ​ສະ­ແດງ​ຄວາມ​ຂອບ­ໃຈ​ຕໍ່​ບັນ­ດາ​ກະ­ຊວງ ຫົວ­ໜ່ວຍ​ທຸ­ລະ​ກິດ ຫ້າງ​ຮ້ານ ບໍ­ລິ­ສັດ​ຕ່າງໆ​ທີ່​ໄດ້​ນຳ​ເງິນ​ມາ​ບໍ­ລິ­ຈາກ​ຄັ້ງ​ນີ້ ພ້ອມ​ທັງ​ສະ­ແດງ​ຄວາມ​ຫວັງ​ວ່າ ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ຈີນ​ຈະ​ກັບ​ຄືນ​ສູ່​ສະ­ພາບ​ປົກ­ກະ­ຕິ​ໂດຍ​ໄວ້.

   ສຳ­ລັບ​ການ​ລະ­ດົມ​ທຶນ​ຍັງ​ຈະ​ສືບ­ຕໍ່​ດຳ­ເນີນ​ໄປ​ອີກ​ເປັນ​ເວ­ລາ 1 ອາ­ທິດ ເຊິ່ງ​ບຸກ­ຄົນ​ພາກ­ສ່ວນ​ໃດ​ຫາກ​ມີ​ຄວາມ​ຕ້ອງ­ການ​ຢາກ​ຈະ​ປະ­ກອບ­ສ່ວນ ໃນ​ການ​ບໍ­ລິ­ຈາກ​ຄັ້ງ​ນີ້ ສາ­ມາດ​ໄປ​ບໍ­ລິ­ຈາກ​ໄດ້ ທີ່​ກະ­ຊວງ​ພະ­ລັງ­ງານ ແລະ ບໍ່​ແຮ່ ແລະ ຫ້ອງ​ວ່າ­ການ​ປົກ­ຄອງ ນະ­ຄອນ­ຫຼວງ​ວຽງ​ຈັນ ສຳ­ລັບ​ຕ່າງ​ແຂວງ​ສາ­ມາດ​ບໍ­ລິ­ຈາກ​ໄດ້​ທີ່​ພະແນກ​ການ​ຕ່າງ­ປະ­ເທດ ແລະ ພະ​ແນກ​ພະ­ລັງ­ງານ ແລະ ບໍ່​ແຮ່ ປະ­ຈຳ​ແຂວງ​ໃນ​ຂອບ​ເຂດ​ທົ່ວ​ປະ­ເທດ.

ຂ່າວທີ່ກ່ຽວຂ້ອງ