ສະພາແຫ່ງຊາດ ຍ້ອງຍໍກົມກອງ ແລະ ບຸກຄົນທີ່ມີຜົນງານດີເດັ່ນ

770 13 ກ.ພ. 2020 ຂ່າວໜ້າ​ໜຶ່ງ

   ສະ­ພາ​ແຫ່ງ​ຊາດ​ຈັດ​ກອງ​ປະ­ຊຸມ​ສະ­ຫຼຸບ​ຕີ​ລາ­ຄາ​ການ​ເຄື່ອນໄຫວ​ວຽກ​ງານ​ພາຍ​ໃນ​ຂອງ​ສະ­ພາ​ແຫ່ງ​ຊາດ ແລະ ຂະ​ບວນ​ການ​ແຂ່ງ­ຂັນ​ຮັກ​ຊາດ ແລະ ພັດ­ທະ­ນາ ປະ­ຈຳ​ປີ 2019 ທິດ​ທາງ ແຜນ­ການ ປະ­ຈຳ​ປີ 2020 ຂຶ້ນ​ວັນ​ທີ 11 ກຸມ­ພາ 2020 ທີ່​ສະ­ພາ​ແຫ່ງ​ຊາດ ເປັນ​ປະ­ທານ​ຂອງ ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ມີ​ຮອງ​ປະ­ທານ​ສະ­ພາ ຄະ­ນະ​ປະ­ຈຳ ຄະ­ນະ​ເລ­ຂາ­ທິ­ການ​ສະ­ພາ​ແຫ່ງ​ຊາດ ພ້ອມ​ດ້ວຍ​ພະ­ນັກ­ງານ-ລັດ­ຖະ­ກອນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ​ນາງ ສວນ​ສະ­ຫວັນ ວິ​ຍະ​ເກດ ເລ­ຂາ­ທິ­ການ​ສະ­ພາ​ແຫ່ງ​ຊາດ ໄດ້​ຂຶ້ນ​ຜ່ານ​ບົດ​ສະ­ຫຼຸບ​ຕີ​ລາ­ຄາ​ການ­ເຄື່ອນ­ໄຫວ​ວຽກ​ງານ​ວ່າ: ໃນ 1 ປີ­ຜ່ານ­ມາ​ມີ​ຫຼາຍ​ດ້ານ​ສາ­ມາດ​ຍາດ​ໄດ້­ຜົນ​ງານ​ພົ້ນ​ເດັ່ນ ເປັນ­ຕົ້ນ ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ແລະ ເທື່ອ​ທີ 8 ຂອງ​ສະ­ພາ​ແຫ່ງ​ຊາດ ຊຸດ​ທີ 8 ໄດ້​ພິ­ຈາ­ລະ­ນາ​ຮັບ­ຮອງ​ເອົາ​ກົດ­ໝາຍ 18 ສະ­ບັບ ຮັບ­ຮອງ​ເອົາ​ມະ­ຕິ​ກອງ​ປະ­ຊຸມ​ສະ­ພາ​ແຫ່ງ​ຊາດ ກ່ຽວ​ກັບ​ບັນ­ຫາ​ສຳ­ຄັນ​ພື້ນ­ຖານ​ຂອງ​ປະ­ເທດ​ຊາດ ມີ​ທັງ​ໝົດ 33 ສະ­ບັບ ທັງ​ໄດ້​ດຳ­ເນີນ​ການ​ປະ​ເມີນ​ຜົນ​ດ້ວຍ​ການ​ໃຫ້​ຄະ­ແນນ​ຕໍ່​ການ​ປະ­ຕິ­ບັດ​ໜ້າ­ທີ່​ຂອງ​ບຸ​ຄະ­ລາ​ກອນ ທີ່​ສະ­ພາ​ແຫ່ງ​ຊາດ​ເລືອກ​ຕັ້ງ​ໄດ້​ຮັບ­ຮອງ​ເອົາ​ການ​ສະ­ເໜີ​ແຕ່ງ­ຕັ້ງ 69 ທ່ານ ຍິງ 14 ທ່ານ ແລະ ຄະ­ນະ​ປະ­ຈຳ​ສະ­ພາ​ແຫ່ງ​ຊາດ ໄດ້​ພິ­ຈາ­ລະ­ນາ​ບັນ­ຫາ​ສຳ­ຄັນ​ຕ່າງໆ 114 ເລື່ອງ ແລະ ຮັບ­ຮອງ​ເປັນ​ມະ­ຕິ​ຂອງ​ຄະ­ນະ​ປະ­ຈຳ​ສະ­ພາ​ແຫ່ງ​ຊາດ 50 ສະ­ບັບ ນອກ​ນີ້ ຍັງ​ໄດ້​ຕິດ­ຕາມ​ກວດ­ກາ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ ແລະ ນິ­ຕິ​ກຳ​ໃຕ້​ກົດ­ໝາຍ​ທີ່​ຕິດ​ພັນ​ກັບ​ການ​ເກັບ​ລາຍ​ຮັບ​ການ​ສ້າງ​ວິ­ຊາ​ຊີບ ການ​ພັດ­ທະ­ນາ​ສີ­ມື​ແຮງ​ງານ​ທີ່​ມີ​ຄຸນ​ນະ​ພາບ ການ​ສ້າງ​ວຽກ​ເຮັດ​ງານ​ທຳ​ຂອງ​ປະ­ຊາ­ຊົນ ການ​ຕິດ­ຕາມ​ກວດ­ກາ​ການ​ຕົກ­ລົງ​ຂອງ​ຄະ­ນະ​ປະ­ຈຳ​ສະ­ພາ​ແຫ່ງ​ຊາດ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ນິ­ຕິ​ກຳ​ທີ່​ພົວ­ພັນ​ກັບ​ການ​ເຊົ່າ​ສຳ​ປະ­ທານ​ທີ່​ດິນ ຜ່ານ​ການ​ຕິດ­ຕາມ​ກວດ­ກາ​ເຫັນ​ວ່າ​ລັດ­ຖະ­ບານ ກໍ​ຄື ຂະ­ແໜງ­ການ​ທີ່​ກ່ຽວ­ຂ້ອງ ເອົາ­ໃຈ­ໃສ່​ສ້າງ​ປັບ­ປຸງ ແລະ ຈັດ​ຕັ້ງ​ປະ­ຕິ­ບັດ​ກົດ­ໝາຍ​ນິ­ຕິ​ກຳ​ໃຕ້​ກົດ­ໝາຍ​ເຂົ້າ​ໃນ​ການ​ປະ­ຕິ­ບັດ​ໜ້າ­ທີ່​ວຽກ​ງານ​ດັ່ງ­ກ່າວ​ນັບ​ມື້​ນັບ​ດີ​ຂຶ້ນ ປະ­ກອບ­ສ່ວນ​ໃນ​ການ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ​ແຫ່ງ​ລັດ ລວມ​ທັງ​ການ​ພັດ­ທະ­ນາ​ສີ­ມື​ແຮງ​ງານ ການ​ສ້າງ​ອາ­ຊີບ​ທີ່​ສາ­ມາດ​ສ້າງ​ລາຍ​ຮັບ​ໃຫ້​ປະ­ຊາ­ຊົນ​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ.

   ສຳ­ລັບ​ຂະ​ບວນ​ການ​ແຂ່ງ­ຂັນ​ຮັກ​ຊາດ ແລະ ພັດ­ທະ­ນາ ຄະ­ນະ​ຮັບ­ຜິດ­ຊອບ​ຂະ​ບວນ​ແຂ່ງ­ຂັນ​ຮັກ​ຊາດ ແລະ ພັດ­ທະ­ນາ ໄດ້​ເປີດ​ຂະ​ບວນ​ການ​ແຂ່ງ­ຂັນ​ຮັກ​ຊາດ ແລະ ພັດ­ທະ­ນາ ເຊິ່ງ​ຜ່ານ​ການ­ຈັດ­ຕັ້ງ​ປະ­ຕິ­ບັດ​ສາ­ມາດ​ສະ­ຫຼຸບ​ສັງ​ລວມ​ໄດ້ ຄື: ພະ­ນັກ­ງານ-ລັດ­ຖະ­ກອນ​ຢູ່​ພາຍ​ໃນ​ສະ­ພາ​ແຫ່ງ​ຊາດ ມີ​ທັງ​ໝົດ 399 ຄົນ ຍິງ 167 ຄົນ ໃນ​ນັ້ນ ຜູ້​ມີ​ເງື່ອນ­ໄຂ​ເຂົ້າ​ຮ່ວມ​ປະ​ເມີນ​ຜົນ​ການ​ປະ­ຕິ­ບັດ​ວຽກ​ງານ​ປະ­ຈຳ​ປີ 2019 ມີ 340 ຄົນ ຍິງ 135 ຄົນ ສ່ວນ​ທີ່​ເຫຼືອ​ເປັນ​ພະ­ນັກ­ງານ-ລັດ­ຖະ­ກອນ​ເຂົ້າ​ໃໝ່ ແລະ ຜ່ານ​ການ​ປະ​ເມີນ​ຜົນ​ມີ​ພະ­ນັກ­ງານ-ລັດ­ຖະ­ກອນ​ປະ­ເພດ​ດີ​ຫຼາຍ 90 ຄົນ ປະ­ເພດ​ດີ 252 ຄົນ ແລະ ປະ­ເພດ​ກາງ 13 ຄົນ.

   ໂອ­ກາດ​ນີ້ ທ່ານ​ປະ­ທານ​ສະ­ພາ​ແຫ່ງ​ຊາດ ໄດ້​ໃຫ້​ກຽດ​ມອບ​ໃບ​ຍ້ອງ­ຍໍ​ໃຫ້​ກົມ​ກອງ ແລະ ບຸກ­ຄົນ ພ້ອມ​ທັງ​ໂອ້​ລົມ​ໂດຍ​ເນັ້ນ​ໃຫ້​ທຸກ​ພາກ­ສ່ວນ​ການ­ຈັດ­ຕັ້ງ​ພາຍ​ໃນ ສະ­ພາ​ແຫ່ງ​ຊາດ ຈົ່ງ​ອອກ­ແຮງ​ຕັ້ງ­ໜ້າ​ເປັນ​ເຈົ້າ​ການ​ຢູ່​ພາຍ​ໃນ​ສະ­ພາ​ແຫ່ງ​ຊາດ ໃຫ້​ເປັນ​ຂະ​ບວນ​ການ​ຟົດ­ຟື້ນ ແລະ ມີ​ປະ­ສິດ­ທິ­ພາບ​ປະ​ສິດ­ທິ​ຜົນ ແລະ ການ​ຍ້ອງ­ຍໍ​ກໍ​ຕ້ອງ​ຮັບ­ປະ­ກັນ​ຄວາມ​ຖືກ­ຕ້ອງ​ກັບ​ຜົນ­ງານ​ຕົວ​ຈິງ.

ຂ່າວທີ່ກ່ຽວຂ້ອງ