ເບີ່ງບ້ານເຂົາເອົາບົດຮຽນ 13-02-2020

848 13 ກ.ພ. 2020 ຫົວຂໍ້ຂ່າວອື່ນໆ

      ຄໍ​ລຳ​ປະຈຳ​ວັນ​ນີ້ ທ່ານ​ຜູ້​ອ່ານ​ຈະ​ຮູ້ຈັກ​ກັບ​ແຜນ​ປະຕິບັດ​ງານ​ຂອງ​ຫວຽດນາມ ເພື່ອ​ກຳຈັດ​ຂີ້​ເຫຍື້ອ​ຕາມ​ທ້ອງ​ທະເລ ກໍ​ຄື ແຜນ​ສົ່ງ​ອອກແຮງ​ງານ ສຸດ​ທ້າຍ​ແມ່ນ​ເລື່ອງ​ການ​ຮ້ອງ​ຟ້ອງ​ໃນ​ຄະດີ ​ສສຊ ປະ​ທະ​ກັນ​ຢູ່​ກອງ​ປະຊຸມ ສະພາ ສ ເກົາຫຼີ.

    ທີ່ ຫວຽດນາມ: ມີ​ສອງ​ເລື່ອງ​ທີ່​ໜ້າ​ສົນໃຈ​ຈາກ​ຫວຽດນາມ ຄືໜຶ່ງ ແມ່ນ​ແຜນ​ຜະເດັດ​ເສິກ​ກັບ​ຂີ້​ເຫຍື້ອ​ໃນ​ນ່ານ​ນ້ຳ​ທະເລ ໃຫ້​ຫຼຸດ​ລົງ​ໃນ​ລະດັບ 75 % ພາຍ​ໃນ​ປີ 2030 ແລະ ເລື່ອງ​ທີ​ສອງ​ນັ້ນ ກ່ຽວ​ກັບ​ແຜນ​ສົ່ງ​ອອກແຮງ​ງານ​ພາຍ​ໃນ​ປີ​ນີ້ ສຳລັບ​ເລື່ອງ​ທີ​ໜຶ່ງ​ນັ້ນ ບອກ​ວ່າ​ໃນ​ຕົ້ນ​ເດືອນ​ທັນວາ ປີ 2019 ຜ່ານ​ມາ ທ່ານ ຫວຽນ ຊວນ ຟຸກ ນາຍົກລັດຖະມົນຕີ ຫວຽດນາມ ໄດ້​ຕົກລົງ​ຮັບຮອງ​ເອົາ​ແຜນ​ປະຕິບັດ​ງານ​ແຫ່ງ​ຊາດ ເພື່ອ​ຄຸ້ມ​ຄອງ​ຂີ້​ເຫຍື້ອ​ໃນ​ນ່ານ​ນ້ຳ​ທະເລ​ມະຫາ​ສະໝຸດ ແຕ່​ນີ້​ຫາ​ປີ 2030 ໂດຍ​ໄດ້​ກຳນົດ​ຢ່າງ​ຈະ​ແຈ້ງວ່າ ຈະ​ຕ້ອງ​ຫຼຸດ​ຈຳນວນ​ການ​ປ່ອຍ​ຂີ້​ເຫຍື້ອ ກໍ​ຄື ສິ່ງ​ເສດ​ເຫຼືອ​ລົງ​ທະເລ ໃຫ້​ໄດ້ 75% ພາຍ​ໃນ​ປີ 2030 ນອກຈາກ​ນັ້ນ ຫວຽດນາມ ຍັງ​ຕ້ອງການ​ໃຫ້​ມີ​ການ​ຢຸດ​ໃຊ້​ຖົງ ກໍ​ຄື ເຄື່ອງໃຊ້​ອື່ນໆ​ທີ່​ເຮັດ​ດ້ວຍ​ຢາງ ທີ່​ຖີ້ມ​ຊະຊາຍ​ຢູ່​ສະຖານທີ່​ທ່ອງ​ທ່ຽວ​ຕາມ​ແຄມ​ຝັ່ງ​ຊາຍ​ຫາດ​ທັງ​ໝົດ ລວມ​ທັງ​ການ​ຢຸດ​ເຊົາ​ການ​ໃຊ້​ເຄື່ອງມື​ຫາ​ປາ​ປະເພດ​ທີ່​ປ່ອຍ​ຖີ້ມ​ເປັນ​ຂີ້​ເຫຍື້ອ ເປົ້າ​ໝາຍ​ລວມ​ຍອດ​ຂອງ​ແຜນ​ປະຕິບັດ​ງານ​ດັ່ງກ່າວ ແມ່ນ​ເພື່ອ​ປະຕິບັດ​ພັນທະ​ຂອງ​ຊາດ ບັນຫາ​ຂີ້​ເຫຍື້ອ​ຈາກ​ເຄື່ອງໃຊ້​ທີ່​ເຮັດ​ດ້ວຍ​ປາ​ລາ​ສະ​ຕິກ ໂດຍ​ສະເພາະ ແມ່ນ​ຂີ້​ເຫຍື້ອ​ໃນ​ທ້ອງ​ທະເລ ເລື່ອງ​ທີ​ສອງ ຈາກ​ຫວຽດນາມ ກໍ​ຄື ແຜນການ​ສົ່ງ​ແຮງ​ງານ​ຫວຽດນາມ ໄປ​ຕ່າງປະເທດ​ໃຫ້​ບັນລຸ​ຕົວ​ເລກ​ສູງ​ເຖິງ 130.000 ຄົນ ພາຍ​ໃນ​ປີ​ນີ້ ໂດຍ​ປະຕິບັດ​ກົດ​ເຫຼັກ​ທີ່​ວ່າ ຕ້ອງ​ຈຳກັດ​ໃຫ້​ໄດ້​ການ​ສົ່ງ​ອອກແຮງ​ງານ​ໄປ​ເຮັດ​ວຽກ​ໃນ​ພາກ​ພື້ນ​ທີ່​ບໍ່​ມີ​ລະບົບ​ການ​ອອກແຮງ​ງານ​ໃນ​ມາດຕະຖານ​ສາກົນ ທັງ​ນີ້​ກໍ່​ເພື່ອ​ປ້ອງ​ກັນ​ບໍ່​ໃຫ້​ແຮງ​ງານ​ຫວຽດນາມ ຖືກ​ຂູດ​ຮີດ ເອົາ​ລັດ​ເອົາ​ປຽບ ເຊິ່ງ​ເປັນ​ປາກົດການ​ທີ່​ມັກ​ຈະ​ເກີດ​ຂຶ້ນ​ຢ່າງ​ຊ້ຳ​ຊາກ​ກັບ​ແຮງ​ງານ​ຕ່າງປະເທດ ເພື່ອ​ຮອງ​ຮັບ​ໃຫ້​ແກ່​ການ​ສົ່ງ​ອອກແຮງ​ງານ​ໄປ​ຕ່າງປະເທດ​ນີ້ ທາງ​ການ​ຫວຽດນາມ ກໍ​ມີ​ແຜນ​ຈະ​ປັບປຸງ​ກົດໝາຍ ວ່າ​ດ້ວຍ​ການ​ສົ່ງ​ອອກແຮງ​ງານ​ໃຫ້​ມີ​ຄວາມ​ສົມບູນ​ຂຶ້ນ​ກວ່າ​ເກົ່າ ໄປ​ຄຽງ​ຄູ່​ກັບ​ການ​ຊຸກຍູ້​ໂຄສະນາ ເຜີຍແຜ່​ກົດໝາຍ​ແຮງ​ງານ ແລະ ບໍລິສັດ​ຈັດ​ຫາ​ວຽກ​ເຮັດ​ໃຫ້​ທົ່ວ​ສັງຄົມ​ຮັບ​ຮູ້ ແລະ ເຂົ້າໃຈ​ຢ່າງ​ລະອຽດ ຂ່າວ​ບອກ​ວ່າ​ເພື່ອ​ເຮັດ​ໃຫ້​ແຜນ​ປະຕິບັດ​ງານ​ປາກົດ​ຜົນ​ເປັນ​ຈິງ ທາງ​ກະຊວງ​ແຮງ​ງານ​ຄົນ​ພິການ ແລະ ສະຫວັດດີ​ການ​ສັງຄົມ ຂອງ​ຫວຽດນາມ ໄດ້​ສັ່ງ​ໃຫ້​ໜ່ວຍ​ງານ​ຕ່າງໆ​ທີ່​ກ່ຽວຂ້ອງ ເນັ້ນ​ພັດທະນາ​ການ​ເຝິກອົບຮົມ​ດ້ານ​ວິຊາ​ຊີບ​ໃຫ້​ພະນັກງານ​ໂດຍ​ໃຫ້​ຖື​ເອົາ​ການ​ແກ້​ໄຂ​ບັນຫາ​ວຽກ​ເຮັດ​ງານ​ທຳ​ພາຍ​ໃນ​ປະເທດ ຄຽງ​ຄູ່​ກັບ​ການ​ສົ່ງ​ອອກແຮງ​ງານ​ໄປ​ຕ່າງປະເທດ.

   ທີ່ ສ ເກົາຫຼີ:  ໜັງສືພິມ​ວຽງ​ຈັນ​ທາມ ສະບັບ​ວັນ​ທີ 3 ເດຶອນ​ມັງກອນ​ປີ​ນີ້ ໄດ້​ໃຫ້​ຮູ້​ວ່າ ອົງການ​ໄອ​ຍະ​ການ​ຂອງ​ປະເທດ​ນີ້ ໄດ້​ເຮັດ​ການ​ຟ້ອງ​ຮ້ອງ​ສະມາຊິກ​ລັດ​ຖະ​ສະພາ ເກົາຫຼີ ໃນ​ຄະດີ​ລະເມີດ​ກົດໝາຍ ວ່າ​ດ້ວຍ​ລັດ​ຖະ​ສະພາ ຍ້ອນ​ໄດ້​ກໍ່​ເຫດ​ປະ​ທະ​ກັນ ແລະ ກໍ່ກວນ​ຄວາມ​ສະຫງົບ​ພາຍ​ໃນ​ກອງ​ປະຊຸມ​ລັດ​ຖະ​ສະພາ ເຊິ່ງ​ເກີດ​ຂຶ້ນ​ໃນ​ເດືອນ​ເມສາ ປີ 2019 ສະມາຊິກ​ສະພາ ທີ່​ກໍ່​ເຫດ​ຄວາມ​ບໍ່​ສະຫງົບ​ນັ້ນ ລວມ​ມີ 28 ທ່ານ ຫົວໜ້າ​ທີ່​ພາ​ກໍ່​ເຫດ​ນັ້ນ ແມ່ນ ​ສສຊ ຮວງ​ກຽວ​ອານ Hwang Kyo-ahn ແລະ ພັກ​ພວກ​ອີກ 23 ຄົນ ຈາກ​ພັກ​ຝ່າຍ​ຄ້ານ ນອກຈາກ​ນັ້ນ ກໍ​ຍັງ​ມີ ​ສສຊ ຂອງ​ພັກ​ລັດຖະບານ ອີກ​ຈຳນວນ 5 ຄົນ ທີ່​ມີ​ສ່ວນ​ພົວພັນ​ກັບ​ການ​ກໍ່​ເຫດ​ຮ້າຍ​ຄັ້ງ​ນັ້ນ.

ຂ່າວທີ່ກ່ຽວຂ້ອງ