ປັນຈັກສີລັດ ນວ ຕັ້ງເປົ້າ 2 ຫຼຽນຄຳຊຽງຂວາງເກມ

716 14 ກ.ພ. 2020 ວົງຈອນກີລາ
ປັນຈັກສີລັດ ນວ ຕັ້ງເປົ້າ 2 ຫຼຽນຄຳຊຽງຂວາງເກມ

   ສະ­ຫະ­ພັນ​ກີ­ລາ​ປັນ​ຈັກ​ສີ​ລັດ​ນະ­ຄອນ­ຫຼວງ​ວຽງ​ຈັນ (ນວ) ກຽມ​ສົ່ງ​ນັກ­ກີ­ລາ​ປັນ​ຈັກ​ສີ​ລັດ 9 ຄົນ ພ້ອມ​ຕັ້ງ​ເປົ້າ​ຍາດ​ໃຫ້​ໄດ້ 2 ຫຼຽນ​ຄຳ ໃນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ​ຄັ້ງ​ທີ XI ຫຼື ຊຽງ​ຂວາງ​ເກມ ທີ່​ແຂວງ​ຊຽງ​ຊວາງ ເປັນ​ເຈົ້າ­ພາບ​ຈັດ​ຂຶ້ນ​ວັນ​ທີ 22 ມີ­ນາ ຫາ 1 ເມ­ສາ 2020.

   ທ່ານ ຈອນ​ນີ້ ວົງ​ພັກ­ດີ ຄູ​ເຝິກ​ກີ­ລາ​ປັນ​ຈັກ​ສີ​ລັດ ນວ ໃຫ້​ສຳ­ພາດ​ວ່າ: ສະ­ຫະ­ພັນ​ກີ­ລາ​ປັນ​ຈັກ​ສີ​ລັດ ນວ ໄດ້​ມີ​ການ​ຄັດ​ເລືອກ​ເຕົ້າ­ໂຮມ​ນັກ­ກີ­ລາ​ເກົ່າ ແລະ ນັກ­ກີ­ລາ​ຮຸ່ນ​ໃໝ່​ທີ່​ຄັດ​ເລືອກ​ໄດ້​ຈາກ​ບັນ­ດາ​ໂຮງ­ຮຽນ​ອ້ອມ​ຂ້າງ ນວ ແລະ ໂຮງ­ຮຽນ​ພອນ​ສະ­ຫວັນ​ກີ­ລາ​ໄດ້​ຕາມ​ກຳ­ນົດ 9 ຄົນ ແລະ ໄລ­ຍະ​ທຳ​ອິດ​ໄດ້​ເກັບ​ໂຕ​ເຝິກ­ຊ້ອມ​ມາ​ຕັ້ງ­ແຕ່​ຕົ້ນ​ເດືອນ​ມັງ­ກອນ 2020 ເປັນ­ຕົ້ນ​ມາ ເຊິ່ງ​ໃນ​ເດືອນ​ກຸມ­ພາ​ໄດ້​ເຂົ້າ​ສູນ​ເກັບ​ໂຕ​ເຝິກ­ຊ້ອມ​ເປັນ​ລະ­ບົບ ພວກ​ເຮົາ​ໄດ້​ເນັ້ນ​ໃຫ້​ນັກ­ກີ­ລາ​ຮຽກ​ຄວາມ​ຟິດ​ຂອງ​ຮ່າງ­ກາຍ​ທາງ​ດ້ານ​ພະ­ລະ​ກຳ­ລັງ ເຕັກ­ນິກ ແລະ ຍຸດ­ທະ­ວິ­ທີ​ຕ່າງໆ ປັດ­ຈຸ­ບັນ​ຄວາມ​ພ້ອມ​ຂອງ​ນັກ­ກີ­ລາ 80%.

   ແນວ­ໃດ​ກໍ​ຕາມ​ໃນ​ການ​ເຂົ້າ​ຮ່ວມ​ແຂ່ງ­ຂັນ​ຊຽງ​ຂວາງ​ເກມ ພວກ​ເຮົາ​ຈະ​ພະ­ຍາ­ຍາມ​ສູ້​ຊົນ​ຍາດ​ໃຫ້​ໄດ້ 2 ຫຼຽນ​ຄຳ ໃນ​ນັ້ນ ຈະ​ເນັ້ນ​ໃສ່​ປະ­ເພດ​ຕໍ່­ສູ້​ຮຸ່ນ​ນ້ຳ­ໜັກ 60 ກິ​ໂລ ແລະ ຮຸ່ນ​ນ້ຳ­ໜັກ 63 ກິ​ໂລ ສຳ­ລັບ​ການ​ແຂ່ງ­ຂັນ​ກີ­ລາ​ປັນ​ຈັກ​ສີ​ລັດ​ຈະ​ເລີ່ມ​ແຂ່ງ​ວັນ​ທີ 27-29 ມີ­ນາ 2020 ຊີງ 20 ຫຼຽນ​ຄຳ ຍິງ 10 ຊາຍ 10 ແຂ່ງ­ຂັນ​ທີ່​ສະ­ໂມ­ສອນ​ກີ­ລາ​ໃນ​ຮົ່ມ ວິ­ທະ­ຍາ­ໄລ​ຄູ​ຄັງ​ໄຂ A.

ຂ່າວທີ່ກ່ຽວຂ້ອງ