ຄຳເສັງ ຊຸກຍູ້ເຄື່ອງກີລາໃຫ້ເປຕັງ ນວ ຮ່ວມຊຽງຂວາງເກມ

723 14 ກ.ພ. 2020 ວົງຈອນກີລາ
ຄຳເສັງ ຊຸກຍູ້ເຄື່ອງກີລາໃຫ້ເປຕັງ ນວ ຮ່ວມຊຽງຂວາງເກມ

   ບໍ­ລິ­ສັດ ຄຳ​ເສັງ ຈຳ­ກັດ ໃຫ້­ການ​ຊຸກ­ຍູ້​ເຄື່ອງ­ນຸ່ງ​ກີ­ລາ​ເປ​ຕັງ 12 ຊຸດ ລວມ​ມູນ​ຄ່າ 1 ລ້ານ​ກີບ ໃຫ້​ນັກ­ກີ­ລາ​ເປ​ຕັງ​ນະ­ຄອນ­ຫຼວງ​ວຽງ​ຈັນ (ນວ) 10 ຄົນ ຍິງ 3 ຄົນ ພ້ອມ​ດ້ວຍ​ຄູ​ເຝິກ​ກຽມ​ຄວາມ​ພ້ອມ​ເຂົ້າ​ຮ່ວມ​ແຂ່ງ­ຂັນ​ເປ​ຕັງ 9 ເມືອງ ຈະ​ຈັດ​ຂຶ້ນ​ວັນ​ທີ 15 ກຸມ­ພາ 2020 ເພື່ອ​ເປັນ​ການ​ທົດ​ສອບ​ນັກ­ກີ­ລາ​ເປ​ຕັງ ນວ ກ່ອນ​ເຂົ້າ​ຮ່ວມ​ໃນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ Xl ຫຼື ຊຽງ​ຂວາງ​ເກມ ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າ­ພາບ​ຈັດ​ຂຶ້ນ​ວັນ​ທີ 22 ມີ­ນາ ຫາ 1 ເມ­ສາ 2020.

   ພິ­ທີ​ມອບ​ຮັບ​ເຄື່ອງ​ຈັດ​ຂຶ້ນ​ວັນ​ທີ 12 ກຸມ­ພາ 2020 ທີ່​ສະ­ໂມ­ສອນ​ກີ­ລາ​ເປ​ຕັງ ບຶງ​ຂະ​ຫຍອງ ເມືອງ​ສີ​ສັດ­ຕະ​ນາກ ຕາງ­ໜ້າ​ບໍ­ລິ­ສັດ ກ່າວ​ມອບ​ໂດຍ​ທ່ານ ພົມ­ມາ ສູນ​ດາ­ລາ ຫົວ­ໜ້າ​ຄູ​ເຝິກ​ມວຍ​ລາວ ສະ­ຫະ­ພັນ​ມວຍ​ລາວ ນວ ແລະ ກ່າວ​ຮັບ​ໂດຍ​ທ່ານ ຄຳ​ເກີດ ຟອງ​ຊາ­ນຸ​ວົງ ປະ­ທານ​ສະ­ຫະ­ພັນ​ເປ​ຕັງ ນວ ມີ​ບັນ­ດາ​ຄູ​ເຝິກ ແລະ ນັກ­ກີ­ລາ ຕະ­ຫຼອດ​ຮອດ​ພະ­ນັກ­ງານ​ທີ່​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ຄຳ​ເກີດ ຟອງ​ຊາ­ນຸ​ວົງ ໃຫ້​ສຳ­ພາດ​ວ່າ: ການ​ເຂົ້າ​ຮ່ວມ​ແຂ່ງ­ຂັນ​ກີ­ລາ​ເປ​ຕັງ​ຊຽງ​ຂວາງ ເກມ 2020 ສະ­ຫະ­ພັນ​ເປ​ຕັງ ນວ ຈະ​ສົ່ງ​ນັກ­ກີ­ລາ​ເປ​ຕັງ​ລູກ​ຫຼານ​ຊາວ ນວ ເຂົ້າ​ຮ່ວມ​ແຂ່ງ­ຂັນ ແລະ ໄດ້​ເຝິກ­ຊ້ອມ​ມື້­ໜຶ່ງ 6-7 ຊົ່ວ­ໂມງ  ປັດ­ຈຸ­ບັນ​ມີ​ຄວາມ​ພ້ອມ 90% ແລະ ການ​ແຂ່ງ­ຂັນ​ລາຍ­ການ​ນີ້​ຈະ​ມີ​ການ​ຊີງ 11 ລາຍ­ການ (11 ຫຼຽນ​ຄຳ) ແຕ່​ພວກ​ເຮົາ​ຈະ​ສົ່ງ​ເຂົ້າ​ຮ່ວມ​ພຽງ 8 ລາຍ­ການ ໃນ​ນັ້ນ ລາຍ­ການ​ທີ່​ເປັນ­ຄວາມ​ຫວັງ​ທີ່​ຈະ​ເຮັດ​ໃຫ້​ສາ­ມາດ​ສ້າງ​ຜົນ­ງານ​ໄດ້​ໂດດ​ເດັ່ນ​ນັ້ນ ແມ່ນ​ປະ­ເພດ​ຊຸດ​ຕິ້ງ​ດ່ຽວ​ຊາຍ ແລະ ທີມ​ຊຸດ​ຊາຍ.

   ການ​ແຂ່ງ­ຂັນ​ກີ­ລາ​ເປ​ຕັງ​ຊຽງ​ຂວາງ​ເກມ ຈະ​ດຳ­ເນີນ​ຂຶ້ນ​ວັນ​ທີ 23-31 ມີ­ນາ 2020 ຈະ​ມີ​ການ​ຊີງ 11 ຫຼຽນ​ຄຳ ປະ­ກອບ​ມີ​ປະ­ເພດ​ດ່ຽວ​ຍິງ-ຊາຍ​ທີມ​ຄູ່​ຍິງ-ຊາຍ ທີມ​ຊຸດ​ຍິງ-ຊາຍ​ທີມ​ຄູ່​ປະ­ສົມ​ຊຸດ​ຕີ້ງ​ຍິງ-ຊາຍ​ທີມ​ຊາຍ 2 ຍິງ 1 ແລະ ທີມ​ຍິງ 2 ຊາຍ 1 ສ່ວນ​ທີມ​ນັກ­ກີ­ລາ​ເປ​ຕັງ ນວ ຈະ​ສົ່ງ​ພຽງ 8 ລາຍ­ການ.

ຂ່າວທີ່ກ່ຽວຂ້ອງ