...ຄ່ານິຍົມປ່ຽນ...

1.137 14 ກ.ພ. 2020 ນານາສາລະ

   ການ​ຮຽນ​ເພື່ອ​ໃຫ້​ໄດ້​ຄວາມ​ຮູ້ ແລະ ຄຸນ​ນະ​ພາບ ຍັງ​ເປັນ​ສິ່ງ​ທ້າ​ທາຍ​ນັກ​ສຶກ​ສາ​ຫຼາຍ​ຄົນ ເພາະ​ຄ່າ​ນິ­ຍົມ​ໃນ​ການ​ຮຽນ​ຈຳ­ນວນ​ໜຶ່ງ​ກໍ​ມຸ່ງ​ເອົາ​ພຽງ​ຄະ­ແນນ ແລະ ໃບ​ປະ­ກາດ ເຮັດ​ໃຫ້​ຂາດ​ຄວາມ​ຮູ້ ຄວາມ​ເຂົ້າ­ໃຈ​ແທ້​ຈິງ​ໃນ​ສາ­ຂາ​ທີ່​ຕົນ​ຮຽນ​ຈົບ ສະ​ຖາ​ບັນ​ການ​ສຶກ​ສາ​ບາງ​ແຫ່ງ​ກໍ​ອາດ​ຂາດ​ວິ­ໄສ​ທັດ​ຊັດ​ເຈນ ໃນ​ການ​ຜະ­ລິດ​ບຸ​ຄະ­ລາ​ກອນ​ຮັບ​ໃຊ້​ສັງ­ຄົມ ເພາະ​ໄປ​ຫຼົງ​ນຳ​ການ​ແຂ່ງ­ຂັນ​ດີ­ເດັ່ນ​ດ້ານ​ອື່ນ...

   ຜູ້​ຂຽນ​ມີ​ໝູ່​ເພື່ອນ​ເລົ່າ​ສູ່​ຟັງ​ວ່າ: ມີ​ບັນ­ດາ​ນັກ­ຮຽນ​ທີ່​ຮຽນ​ຈົບ​ມາ​ຍັງ​ບໍ່​ມີ​ວຽກ​ເຮັດ ແຕ່​ຜັດ​ມີ­ຄ່າ​ນິ­ຍົມ​ຫຼິ້ນ​ກິນ​ຟຸມ​ເຟືອຍ ແລ່ນ­ນຳ​ວັດ­ຖຸ​ລາ­ຄາ​ແພງ ຜູ້­ກ່ຽວ​ເລົ່າ​ຕື່ມ​ວ່າ: ຫຼາຍ​ຄົນ​ຮຽນ​ຈົບ​ຂາດ​ວຽກ​ຮອງ​ຮັບ ຈຶ່ງ​ອາ­ໄສ​ເງິນ​ພໍ່​ແມ່​ໃຊ້ ຂະ­ນະ​ດຽວ​ກັນ ຄ່າ​ນິ­ຍົມ​ເຫີ່​ວັດ­ຖຸ​ກໍ​ມາ​ແຮງ ເຊັ່ນ: ເດັກ­ນ້ອຍ​ບາງ​ຄົນ​ຢາກ​ໄດ້​ໂທລະ­ສັບ​ລາ­ຄາ​ແພງ ຫຼື ໃຝ່­ຝັນ​ຢາກ​ມີ​ລົດ​ໃຫຍ່​ຂີ່​ແຂ່ງ ເພາະ​ເຫັນ​ໝູ່​ມີ ຍຸກ​ປີ 90 ຫຼື ກ່ອນ​ໜ້າ​ນັ້ນ ທ່ານ​ຜູ້​ອ່ານ​ກໍ​ຈະ​ວາດ​ພາບ​ອອກ​ວ່າ ນັກ­ຮຽນ​ສ່ວນ​ໃຫຍ່​ຕັ້ງ­ໃຈ​ຮຽນ ເພື່ອ​ໃຫ້​ໄດ້​ຄວາມ​ຮູ້ ເພື່ອ​ຢາກ​ປະ­ກອບ​ອາ­ຊີບ ແຕ່​ດຽວ­ນີ້ ນັກ­ຮຽນ​ມີ​ຈິດ­ໃຈ​ຄອນ​ແຄນ​ນຳ​ວັດ­ຖຸ​ເຄື່ອງ­ໃຊ້​ລາ­ຄາ​ແພງ ເພາະ​ເຫັນ​ໝູ່​ຄົນ​ອື່ນ​ມີ ເຮັດ​ໃຫ້​ເວ­ລາ​ຮຽນ​ບໍ່​ເອົາ­ໃຈ­ໃສ່ ຈົນ​ກາຍ­ເປັນ​ກະ­ແສ​ຕາມ​ກັນ​ໄປ.

   ພວກ​ເຮົາ​ອ່ານ​ຂ່າວ​ໜັງ­ສື­ພິມ​ປະ­ຊາ­ຊົນ ລົງ​ວັນ​ທີ 30/1/2020 ກໍ​ຈະ​ຮູ້​ວ່າ ທ່ານ​ນາ­ຍົກ​ເນັ້ນ​ໃຫ້​ການ­ຈັດ­ຕັ້ງ​ກ່ຽວ­ຂ້ອງ ເອົາ­ໃຈ­ໃສ່​ກວດ­ກາ​ຄືນ​ວຽກ​ພັດ­ທະ­ນາ​ຄູ ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ແລະ ບັນ­ດາ​ທຶນ​ໄປ​ຮຽນ​ຕ່າງ­ປະ­ເທດ ເພື່ອ​ໃຫ້​ທຶນ​ດັ່ງ­ກ່າວ​ຖືກ​ກັບ​ຄົນ​ທີ່​ຕັ້ງ­ໃຈ​ຮຽນ ໂດຍ​ບໍ່​ໃຫ້​ສູນ​ເສຍ​ແບບ​ຂາດ​ປະ­ໂຫຍດ​ຂອງ​ສ່ວນ​ລວມ ວຽກ​ສຶກ​ສາ​ເປັນ​ວຽກ​ໃຈ­ກາງ​ໃນ​ການ​ສ້າງ​ຄົນ ສ້າງ​ຄ່າ​ນິ­ຍົມ​ທີ່​ຖືກ­ຕ້ອງ​ໃຫ້​ສັງ­ຄົມ ສ້າງ​ຄວາມ​ເຂັ້ມ­ແຂງ​ທາງ​ດ້ານ​ວິ­ຊາ​ການ​ໃຫ້​ສະ​ຖາ​ບັນ​ຂອງ​ຕົນ ກໍ​ແມ່ນ​ໜ້າ­ທີ່​ຂອງ​ຂະ­ແໜງ­ການ​ດັ່ງ­ກ່າວ

   ຄ່າ​ນິ­ຍົມ​ປ່ຽນ­ແປງ​ໄວ­ວາ ບາງ​ອັນ​ເພາະ​ກະ­ແສ​ວັດ­ຖຸ​ນິ­ຍົມ​ມາ​ແຮງ ແລະ ບວກ​ກັບ​ການ​ໃຊ້​ວິ­ຖີ​ຊີ­ວິດ​ຂອງ​ຄົນ​ເມືອງ ຖືກ​ກະ​ຕຸ້ນ​ດ້ວຍ​ການ​ບໍ­ລິ­ໂພກ​ຈົນ​ບາງ​ຄົນ ບາງ​ກຸ່ມ ເຫັນ​ດີ­ງາມ​ກ້າ​ເອີ່ຍ​ປາ​ກວ່າ: ເກີດ​ມາ​ຊາດ​ດຽວ ຊາດ​ໜ້າ​ບໍ່​ມີ ຊາດ​ນີ້​ເມື່ອ​ມີ​ໂອ­ກາດ​ຈຶ່ງ​ຟ້າວ​ໄຂວ່​ຄວ້າ​ຫາ​ຄວາມ­ສຸກ​ຈົນ​ຂາດ​ສິນ​ທຳ​ປະ­ຈຳ​ໃຈ ຂໍ​ແຕ່​ໃຫ້​ຕົນ​ໄດ້​ເສບ​ສຸກ.

ໂດຍ: ດັ້ນກີບເມກ

ຂ່າວທີ່ກ່ຽວຂ້ອງ