ມອບ-ຮັບໜ້າທີ່ ເຈົ້າເມືອງສີໂຄດຕະບອງ

1.119 14 ກ.ພ. 2020 ຂ່າວໜ້າ​ໜຶ່ງ
ມອບ-ຮັບໜ້າທີ່ ເຈົ້າເມືອງສີໂຄດຕະບອງ

   ພິ­ທີ​ມອບ-ຮັບ​ໜ້າ­ທີ່​ເຈົ້າ­ເມືອງ ສີ​ໂຄດ​ຕະ­ບອງ ລະ­ຫວ່າງ ທ່ານ ນາງ ພູ​ວຽງ ແກ້ວ​ວົງ​ວິ­ຈິດ ເຈົ້າ­ເມືອງ​ສີ​ໂຄດ​ຕະ­ບອງ ຜູ້​ເກົ່າ ແລະ ທ່ານ ວິ­ລະ​ສັກ ນາມ​ມຸນ­ຕີ ເຈົ້າ­ເມືອງ​ນາ​ຊາຍ​ທອງ ເປັນ​ເຈົ້າ­ເມືອງ​ສີ​ໂຄດ​ຕະ­ບອງ​ຜູ້​ໃໝ່ ຈັດ​ຂຶ້ນ​ວັນ​ທີ 13 ກຸມ­ພາ 2020 ທີ່​ສະ­ໂມ­ສອນ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ມີ​ທ່ານ ບຸນ​ທອງ ພົມ­ມະ­ຈັນ ຫົວ­ໜ້າ​ຄະ­ນະ​ຈັດ​ຕັ້ງ​ນະ­ຄອນ­ຫຼວງ ພ້ອມ​ດ້ວຍ​ບັນ­ດາ​ຮອງ​ເຈົ້າ­ເມືອງ ຕາງ­ໜ້າ​ຈາກ​ພະ­ແນກ­ການ ຫ້ອງ­ການ​ອ້ອມ​ຂ້າງ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ອີງ​ຕາມ​ພາ­ລະ​ບົດ­ບາດ ສິດ ແລະ ໜ້າ­ທີ່ ຂອງ​ເຈົ້າ​ຄອງ ນະ­ຄອນ­ຫຼວງ​ວຽງ​ຈັນ ແລະ ມະ­ຕິ​ຕົກ­ລົງ​ຂອງ​ກອງ​ປະ­ຊຸມ​ຄະ­ນະ​ປະ­ຈຳ​ພັກ ນະ­ຄອນ­ຫຼວງ​ວຽງ​ຈັນ ຄັ້ງ​ທີ 84 ສະ­ໄໝ​ທີ VI ຕາມ​ໜັງ­ສື​ສະ­ເໜີ​ຂອງ​ຄະ­ນະ​ຈັດ​ຕັ້ງ ນວ ເຫັນ​ດີ​ໃຫ້​ສະ­ຫາຍ ນາງ ພູ​ວຽງ ແກ້ວ​ວົງ​ວິ­ຈິດ ຄະ­ນະ​ພັກ ນວ ເຈົ້າ­ເມືອງ​ສີ​ໂຄດ​ຕະ­ບອງ ພັກ­ຜ່ອນ​ລໍ­ຖ້າ​ຮັບ​ອຸດ​ໜູນ​ບຳ­ນານ ແລະ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ຕົກ­ລົງ​ແຕ່ງ­ຕັ້ງ​ສະ­ຫາຍ ວິ­ລະ​ສັກ ນາມ​ມຸນ­ຕີ ຄະ­ນະ​ພັກ ນວ ເປັນ​ຜູ້​ຮັກ­ສາ​ການ​ເລ­ຂາ​ຄະ­ນະ​ພັກ​ເມືອງ ເປັນ​ເຈົ້າ­ເມືອງ​ສີ​ໂຄດ​ຕະ­ບອງ.

   ໂອ­ກາດ​ນີ້ ທ່ານ ບຸນ​ທອງ ພົມ­ມະ­ຈັນ ໄດ້​ໃຫ້​ກຽດ​ໂອ້​ລົມ​ວ່າ: ການ​ປັບ­ປຸງ​ສັບ​ຊ້ອນ​ຄັ້ງ​ນີ້ ແນ­ໃສ່​ສືບ­ຕໍ່​ນຳ­ພາ​ສ້າງ​ນະ­ຄອນ­ຫຼວງ​ວຽງ​ຈັນ ໃຫ້​ໄດ້​ຮັບ​ການ​ພັດ­ທະ­ນາ​ຢ່າງ​ຕໍ່​ເນື່ອງ ພ້ອມ​ນັ້ນ ຍັງ​ໄດ້​ເນັ້ນ​ໃຫ້​ເຈົ້າ­ເມືອງ​ສີ​ໂຄດ​ຕະ­ບອງ ຜູ້​ໃໝ່ ເອົາ­ໃຈ­ໃສ່​ສືບ­ຕໍ່​ແກ້​ໄຂ​ຂໍ້­ຄົງ­ຄ້າງ ທີ່​ຍັງ​ບໍ່​ສາ­ມາດ​ຈັດ​ຕັ້ງ​ປະ­ຕິ­ບັດ​ໄດ້​ໄລ­ຍະ​ຜ່ານ​ມາ ໃຫ້​ໄດ້​ຮັບ​ການ​ແກ້​ໄຂ ແລະ ຕ້ອງ​ເຮັດ​ໃຫ້​ຜົນ­ງານ​ມີ​ຄວາມ​ໂດດ​ເດັ່ນ ໄປ​ຄຽງ​ຄູ່​ກັບ​ວຽກ​ງານ​ທີ່​ຂັ້ນ​ເທິງ​ມອບ​ໝາຍ ໃຫ້​ສຳ­ເລັດ​ຕາມ​ແຜນ­ການ​ວາງ​ໄວ້.

ຂ່າວທີ່ກ່ຽວຂ້ອງ