ເລີ່ມກໍ່ສ້າງພາກຂະຫຍາຍ ໂຮງງານຜະລິດນ້ຳປະປາດົງບັງ

1.024 14 ກ.ພ. 2020 ຂ່າວໜ້າ​ໜຶ່ງ
ເລີ່ມກໍ່ສ້າງພາກຂະຫຍາຍ ໂຮງງານຜະລິດນ້ຳປະປາດົງບັງ

   ພິ­ທີ​ວາງ​ສີ​ລາ​ລຶກ​ໂຄງ­ການ​ກໍ່­ສ້າງ​ພາກ​ຂະ­ຫຍາຍ ໂຮງ­ງານ​ຜະ­ລິດ​ນ້ຳ​ປະ­ປາ​ບ້ານ​ດົງ​ບັງ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 12 ກຸມ­ພາ 2020 ມີ​ທ່ານ ພູ​ຂົງ ບັນ­ນະ​ວົງ ຮອງ​ເຈົ້າ​ຄອງ ນວ ຫົວ­ໜ້າ​ພະ​ແນກ​ແຜນ­ການ ແລະ ການ​ລົງ­ທຶນ ນວ ທ່ານ ອິດສ໌​ວານ​ຈູ ຮອງ​ລັດ­ຖະ­ມົນ­ຕີ​ກະ ຊວງ​ຕ່າງ­ປະ­ເທດ ແລະ ການ​ຄ້າ ຮົງ​ກາ­ລີ ຕາງ­ໜ້າ​ກົມ ຫົວ­ໜ້າ​ພະ​ແນກ ເຈົ້າ­ເມືອງ ຮອງ​ເຈົ້າ­ເມືອງ ອຳ ນວຍ​ການ​ລັດ​ວິ​ສາ​ຫະ​ກິດ​ນ້ຳ​ປະ­ປາ ນວ ບໍ­ລິ­ສັດ​ຜູ້​ຮັບ​ເໝົາ​ກໍ່­ສ້າງ ແລະ ພະ­ນັກ­ງານ​ທີ່​ກ່ຽວ­ຂ້ອງ​ເຂົ້າ​ຮ່ວມ.

   ໂຄງ­ການ​ດັ່ງ­ກ່າວ​ມີ​ກຳ­ລັງ​ການ​ຜະ­ລິດ 24.000 ແມັດ​ກ້ອນ​ຕໍ່​ວັນ ໂດຍ​ນຳ​ໃຊ້​ເງິນ​ກູ້​ຢືມ​ບໍ່​ມີ​ດອກ​ເບ້ຍ​ຈາກ​ລັດ­ຖະ­ບານ​ຮົງ​ກາ­ລີ ເຊິ່ງ​ເປັນ​ໂຄງ­ການ​ໜຶ່ງ​ທີ່​ນອນ​ຢູ່​ໃນ​ບ້ວງ​ເງິນ​ກູ້​ຢືມ 100 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 888 ຕື້​ກີບ ຂອງ ນວ  ສຳ­ລັບ​ໂຄງ­ການ​ນີ້ ມີ​ມູນ​ຄ່າ​ການ​ກໍ່­ສ້າງ 12.740.576 ໂດ​ລາ ຫຼື ປະ ມານ 113 ຕື້​ກີບ ປະ­ກອບ​ມີ ໜ້າ​ວຽກ​ຂະ­ຫຍາຍ​ໂຮງ­ງານ​ຄົບ​ຊຸດ ດ້ວຍ​ເຕັກ​ໂນ​ໂລ​ຊີ​ໃໝ່  ມີ​ກຳ­ລັງ​ການ​ຜະ­ລິດ 24.000 ແມັດ​ກ້ອນ​ຕໍ່​ວັນ ກໍ່­ສ້າງ​ຕ້ານ​ຕາ­ຝັ່ງ​ເຈື່ອນ​ແຄມ​ນ້ຳ​ງື່ມ ຕິດ​ຕັ້ງ​ໂປ້ມ​ສູບ​ນ້ຳ​ດິບ​ເພີ່ມ ຕິດ​ຕັ້ງ​ໂປ້ມ​ສົ່ງ​ນ້ຳ​ເຂົ້າ​ເມືອງ ກໍ່­ສ້າງ​ອ່າງ­ເກັບ­ນ້ຳ​ສະ­ອາດ ລະ­ບົບ SACADA ແລະ​ອື່ນໆ ນອກ​ນັ້ນ ຍັງ​ໄດ້​ຊົດ​ເຊີຍ​ທີ່​ດິນ​ຂອງ​ປະ­ຊາ­ຊົນ ເພື່ອ​ໃຫ້​ໂຄງ­ການ​ມີ​ເນື້ອ­ທີ່​ພຽງ­ພໍ​ໃນ​ການ​ຂະ­ຫຍາຍ​ການ​ຜະ­ລິດ ແລະ ສະ­ໜອງ​ພາ­ຫະ­ນະ​ໃນ​ການ​ຄຸ້ມ​ຄອງ​ໂຄງ­ການ​ຈຳ­ນວນ​ໜຶ່ງ.

   ໂຄງ­ການ​ຈະ​ໃຊ້​ເວ­ລາ​ກໍ່­ສ້າງ 26 ເດືອນ​ໃຫ້​ສຳ­ເລັດ ນັບ​ແຕ່​ມື້​ເລີ່ມ​ວາງ​ສີ​ລາ​ລຶກ​ເປັນ­ຕົ້ນ​ໄປ ໂດຍ​ແມ່ນ​ກຸ່ມ​ບໍ­ລິ­ສັດ ມາ­ລີ​ນີ ກໍ່­ສ້າງ ທີ່​ເປັນ​ບໍ­ລິ­ສັດ​ພາຍ​ໃນ ແລະ ບໍ­ລິ­ສັດ​ຂອງ​ປະ­ເທດ​ຮົງ​ກາ­ລີ​ເປັນ​ຜູ້​ຮັບ​ເໝົາ​ກໍ່­ສ້າງ​ຮ່ວມ​ກັນ ໂດຍ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ​ໃນ​ການ​ອອກ​ແບບ ແລະ ກໍ່­ສ້າງ ຖ້າ​ຫາກ​ໂຄງ­ການ​ນີ້​ສ້າງ​ສຳ ເລັດ​ຈະ​ເຮັດ​ໃຫ້​ໂຄງ­ການ​ນ້ຳ​ປະ­ປາ​ດົງ​ບັງ​ເພີ່ມ​ການ​ຜະ­ລິດ ຈາກ 20.000 ແມັດ​ກ້ອນ​ຕໍ່​ວັນ ເປັນ 44.000 ແມັດ​ກ້ອນ​ຕໍ່​ວັນ ຈະ​ເຮັດ​ໃຫ້​ລັດ​ວິ​ສາ​ຫະ​ກິດ​ນ້ຳ​ປະ­ປາ ນວ ບັນ­ລຸ​ໄດ້​ຕາມ​ແຜນ­ການ​ຂະ­ຫຍາຍ​ກຳ­ລັງ​ການ​ຜະ­ລິດ ແລະ ປະ­ຊາ­ຊົນ​ຈະ​ໄດ້​ຊົມ­ໃຊ້​ນ້ຳ​ຫຼາຍ​ຂຶ້ນ​ກວ່າ​ເກົ່າ ເມື່ອ​ຮອດ​ປີ 2025 ຈະ​ສູ້​ຊົນ​ໃຫ້​ປະ­ຊາ­ຊົນ​ໃນ​ເຂດ​ພື້ນ​ທີ່​ບໍ­ລິ­ການ​ໃຫ້​ໄດ້​ຢ່າງ​ໜ້ອຍ 95-97% ແລະ ຈະ​ສາ­ມາດ​ສະ­ໜອງ​ນ້ຳ​ໃຫ້​ເຂດ​ນິ­ຄົມ​ອຸດ­ສາ­ຫະ­ກຳ​ຂອງ ນວ ໄດ້​ຕາມ​ຄວາມ​ຕ້ອງ­ການ ເພື່ອ​ອຳ­ນວຍ​ຄວາມ​ສະ­ດວກ​ໃຫ້­ການ​ດຶງ​ດູດ​ການ​ລົງ­ທຶນ​ຈາກ​ຕ່າງ ປະ­ເທດ​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ