ຍົກລະດັບການເຝົ້າລະວັງພະຍາດໄວຣັສໂຄໂຣນາ

981 14 ກ.ພ. 2020 ຂ່າວໜ້າ​ໜຶ່ງ
ຍົກລະດັບການເຝົ້າລະວັງພະຍາດໄວຣັສໂຄໂຣນາ

   ໃນ​ໄລ­ຍະ​ຜ່ານ​ມາ​ກະ­ຊວງ​ສາ­ທາ­ລະ­ນະ​ສຸກ​ໄດ້​ເຝົ້າ​ລະ­ວັງ​ພະ­ຍາດ​ອັກ­ເສບ​ປອດ ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່​ຢ່າງ​ໃກ້­ຊິດ ຢູ່​ຕາມ​ດ່ານ​ສາ­ກົນ ແລະ ດ່ານ​ຊາຍ​ແດນ​ຕ່າງໆ​ເພື່ອ​ເພີ່ມ​ທະ­ວີ​ຍົກ​ລະ­ດັບ​ຄວາມ​ເຂົ້າ­ໃຈ​ໃຫ້​ພະ­ນັກ­ງານ ສາ​ທາ ລະ­ນະ​ສຸກ ກໍ​ຄື ພະ­ນັກ­ງານ​ປະ­ຈຳ​ດ່ານ​ຕໍ່​ການ​ເຝົ້າ​ລະ­ວັງ​ເພື່ອ​ຕອບ​ໂຕ້​ການ​ລະ­ບາດ​ຂອງ​ພະ­ຍາດ​ດັ່ງ­ກ່າວ.

   ກະ­ຊວງ​ສາ­ທາ­ລະ­ນະ​ສຸກ​ຈຶ່ງ​ໄດ້​ຈັດ​ສຳ​ມະ​ນາ ກ່ຽວ​ກັບ​ການ​ຍົກ​ລະ­ດັບ​ຄວາມ​ພ້ອມ​ວຽກ​ງານ​ເຝົ້າ​ລະ­ວັງ ແລະ ຕອບ​ໂຕ້​ຕໍ່​ການ​ລະ­ບາດ​ຂອງ​ພະ­ຍາດ​ອັກ­ເສບ​ປອດ​ສາຍ​ພັນ​ໃໝ່ (Covid-19) ໃຫ້​ທີມ​ງານ​ຕອບ​ໂຕ້​ໄວ​ຂັ້ນ​ແຂວງ ສະ­ໜັບ­ສະ­ໜູນ​ໂດຍ​ອົງ­ການ DTRT USCDD ແລະ ອົງ­ການ​ອະ­ນາ­ໄມ​ໂລກ ຈັດ​ຂຶ້ນ​ວັນ​ທີ 13-14 ກຸມ­ພາ 2020 ທີ່​ໂຮງ­ແຮມ​ຄຣາວ​ພາ​ຊາ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ ພອນ​ປະ­ດິດ ສັງ​ໄຊ​ຍະ​ລາດ ຫົວ­ໜ້າ​ສູນ​ວິ­ເຄາະ ແລະ ລະ­ບາດ​ວິ­ທະ­ຍາ ກະ­ຊວງ​ສາ­ທາ­ລະ­ນະ​ສຸກ ມີ​ທ່ານ Joshua mott ຫົວ­ໜ້າ​ແຜນ​ງານ​ກັນ ແລະ ຄວບ​ຄຸມ­ພະ​ຍາດ​ໄຂ້​ຫວັດ​ສູນ​ຄວບ​ຄຸມ ແລະ ປ້ອງ​ກັນ​ພະ­ຍາດ​ສະ­ຫະ­ລັດ​ອາ​ເມ​ຣິ​ກາ ກະ­ຊວງ​ສາ­ທາ­ລະ­ນະ​ສຸກ​ປະ­ຈຳ​ພາກ​ພື້ນ​ອາ­ຊີ​ຕາ­ເວັນ​ອອກ­ສຽງ​ໃຕ້ ບາງ ກອກ​ປະ­ເທດ​ໄທ ແລະ ອົງ­ການ​ອະ­ນາ­ໄມ​ໂລກ​ປະ­ຈຳ​ລາວ​ອົງ­ການ DTRT ສູນ​ວິ­ເຄາະ ແລະ ລະ­ບາດ​ວິ­ທະ­ຍາ ພ້ອມ​ດ້ວຍ​ສຳ​ມະ​ນາ​ກອນ​ຈາກ​ພະ​ແນກ​ສາ­ທາ­ລະ­ນະ​ສຸກ​ແຂວງ ໂຮງ­ໝໍ​ແຂວງ ສູນ​ກາງ ກະ­ຊວງ​ປ້ອງ​ກັນ​ປະ­ເທດ ແລະ ກະ ຊວງ​ປ້ອງ​ກັນ​ຄວາມ​ສະ­ຫງົບ​ເຂົ້າ​ຮ່ວມ.

   ທ່ານ ພອນ​ປະ­ດິດ ສັງ​ໄຊ​ຍະ​ລາດ ໄດ້​ກ່າວ​ວ່າ: ການ​ຈັດ​ກອງ​ປະ­ຊຸມ​ຄັ້ງ​ນີ້ ເພື່ອ​ພັດ­ທະ­ນາ​ລະ­ບົບ​ການ​ເຝົ້າ​ລະ­ວັງ​ແລະ ເພື່ອ​ກຽມ​ຄວາມ​ພ້ອມ​ຕອບ​ໂຕ້​ຕໍ່​ກໍ­ລະ­ນີ​ທີ່​ອາດ​ຈະ​ມີ​ການ​ລະ­ບາດ​ເກີດ​ຂຶ້ນ ແນ­ໃສ່​ໃຫ້​ພະ­ນັກ­ງານ​ທີ່​ກ່ຽວ­ຂ້ອງ​ເຂົ້າ­ໃຈ​ເຖິງ​ສະ­ຖາ­ນະ​ການ​ໃນ​ໂລກ ແລະ ຍຸດ​ທະ​ສາດ​ການ​ຕອບ​ໂຕ້​ກັບ​ເຊື້ອ​ໄວ​ຣັສ​ໂຄ​ໂຣ​ນາ 2019 ໃນ​ລາວ ທັງ​ໃຫ້​ເຂົ້າ­ໃຈ​ຂຶ້ນ​ຕື່ມ​ກ່ຽວ​ກັບ​ກົນ​ໄກ​ການ​ປະ­ສານ​ງານ​ທີ່​ມີ​ຢູ່​ແລ້ວ ໂດຍ​ສະ­ເພາະ ສູນ​ປະ­ຕິ­ບັດ​ງານ​ສຸກ​ເສີນ ແລະ ຂະ​ບວນ​ການ​ຄັດ​ກອງ​ທີ່​ດ່ານ​ສາ­ກົນ​ເຂົ້າ-ອອກ​ຕ່າງໆ ເພີ່ມ​ທະ­ວີ​ໃນ​ການ​ທົບ​ທວນ­ຄືນ​ບັນ­ດາ​ຄຳ​ແນະ­ນຳ​ຕ່າງໆ ກ່ຽວ​ກັບ​ການ​ນຳ​ໃຊ້​ນິ​ຍາມ​ກໍ­ລະ­ນີ​ເພື່ອ​ຄັດ​ກອງ​ການ​ສອບ​ສວນ ແລະ ການ​ຕິດ­ຕາມ​ກໍ­ລະ­ນີ​ສົງ​ໃສ​ໃຫ້​ແກ່​ທີມ​ງານ​ຕອບ​ໂຕ້​ໄວ​ຂັ້ນ​ແຂວງ ແລະ ໃຫ້​ເຂົ້າ­ໃຈ​ຂຶ້ນ​ຕື່ມ ກ່ຽວ​ກັບ​ບັນ­ດາ​ຂໍ້​ແນະ­ນຳ​ໃນ​ການ​ປະ­ຕິ­ບັດ​ຕົວ​ຈິງ ໃນ​ການ​ເກັບ​ຕົວ­ຢ່າງ​ເພື່ອ​ສົ່ງ​ວິ­ເຄາະ​ໃນ​ປັດ­ຈຸ­ບັນ​ສຳ­ລັບ​ເຊື້ອ​ພະ­ຍາດ​ນີ້ ທັງ​ເພື່ອ​ຍົກ​ສູງ​ສະ­ຕິ​ຕື່ນ​ຕົວ​ກ່ຽວ​ກັບ​ການ​ຄຸ້ມ​ຄອງ​ກໍ­ລະ­ນີ​ການ​ປ້ອງ​ກັນ ແລະ ຄວບ​ຄຸມ​ການ​ຕິດ­ເຊື້ອ ແລະ​ປະ­ຕິ­ບັດ​ການ​ນຸ່ງ​ເຄື່ອງ​ປ້ອງ​ກັນ​ຕົວ​ເອງ​ຢ່າງ​ເໝາະ​ສົມ ສຳ­ລັບ​ການ​ຄັດ​ກອງ​ກໍ­ລະ­ນີ​ການ​ສອບ​ສວນ ແລະ ໃນ​ຫ້ອງ​ວິ­ເຄາະ.

   ປັດ­ຈຸ­ບັນ ສູນ​ວິ­ເຄາະ ແລະ ລະ­ບາດ​ວິ­ທະ­ຍາ​ໄດ້​ກວດ​ວິ­ເຄາະ​ຕົວ­ຢ່າງ​ກໍ­ລະ­ນີ​ສົງ​ໃສ​ທັງ​ໝົດ ນອກ­ຈາກ​ນັ້ນ ເພື່ອ​ສ້າງ​ຄວາມ​ເຂັ້ມ­ແຂງ​ໃນ​ການ​ວິ­ເຄາະ​ຈຶ່ງ​ໄດ້​ກະ­ກຽມ​ຫ້ອງ​ວິ­ເຄາະ​ປະ­ກອບ​ມີ: ສະ​ຖາ​ບັນ​ປັດ​ສະ​ເຕີ​ຫ້ອງ​ວິ­ເຄາະ​ເມີ​ລີ​ເອີ ແລະ​ຫ້ອງ​ວິ­ເຄາະ​ຈຸ​ລິນ​ຊີ​ໂຮງ­ໝໍ​ມະ­ໂຫ­ສົດ ເຊິ່ງ​ຕົວ­ຢ່າງ​ທີ່​ສົ່ງ​ມາ​ກວດ​ແມ່ນ​ໄດ້​ກວດ​ຜ່ານ​ສູນ​ວິ­ເຄາະ​ໃຫຍ່​ທັງ​ໝົດ ເພື່ອ​ຮັບ­ປະ­ກັນ​ຜົນ​ກວດ​ໃຫ້​ຊັດ​ເຈນ ແລະ ຮັບ­ປະ­ກັນ​ຄຸນ​ນະ​ພາບ ນອກ­ຈາກ​ນັ້ນ ຍັງ​ໄດ້​ສົ່ງ​ຕົວ­ຢ່າງ​ເລົ່າ​ນີ້​ໄປ​ກວດ​ເພື່ອ​ອ້າງ​ອີງ​ຕື່ມ ທີ່​ຫ້ອງ​ວິ­ເຄາະ​ອົງ­ການ​ອະ­ນາ­ໄມ​ໂລກ ຢູ່​ປະ­ເທດ​ອົດ​ສະ​ຕຣາ​ລີ ເພື່ອ​ຢັ້ງ­ຢືນ​ຜົນ​ກວດ​ໃຫ້​ມີ​ຄວາມ​ເຊື່ອ​ໝັ້ນ​ຊັດ​ເຈນ ເວົ້າ​ລວມ​ແລ້ວ ໃນ​ກໍ­ລະ­ນີ​ມີ​ການ​ລະ­ບາດ​ຫ້ອງ​ວິ­ເຄາະ​ຂອງ ສປປ ລາວ ແມ່ນ​ມີ​ຄວາມ​ພ້ອມ​ໃນ​ລະ­ດັບ​ດີ.

ຂ່າວທີ່ກ່ຽວຂ້ອງ