ລາວໂທລະຄົມ ຈະສູ້ຊົນສ້າງຖານລູກຄ້າໃໝ່ເພີ່ມເກືອບແສນເລກໝາຍ

1.006 14 ກ.ພ. 2020 ຂ່າວໜ້າ​ໜຶ່ງ
ລາວໂທລະຄົມ ຈະສູ້ຊົນສ້າງຖານລູກຄ້າໃໝ່ເພີ່ມເກືອບແສນເລກໝາຍ

   ບໍ­ລິ­ສັດ ລາວ​ໂທລະ​ຄົມ ມະ​ນາ​ຄົມ​ມະ­ຫາ­ຊົນ ຈັດ​ກອງ​ປະ­ຊຸມ​ສະ­ຫຼຸບ​ຜົນ­ງານ​ການ­ເຄື່ອນ­ໄຫວ​ວຽກ​ງານ ປະ­ຈຳ​ປີ 2019 ຂຶ້ນ​ວັນ​ທີ 11 ກຸມ­ພາ 2020 ທີ່​ສຳ­ນັກ­ງານ​ໃຫຍ່​ບໍ­ລິ­ສັດ ເປັນ​ປະ­ທານ​ຂອງ​ທ່ານ ສຸ​ພົນ ຈັນ­ທະ​ວີ​ໄຊ ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ລາວ​ໂທລະ​ຄົມ ມະ​ນາ​ຄົມ​ມະ­ຫາ­ຊົນ ມີ​ທ່ານ ທັນ​ສະ­ໄໝ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ໄປ­ສະ­ນີ ໂທລະ​ຄົມ​ມະ​ນາ ຄົມ ແລະ ການ​ສື່­ສານ  ຄະ­ນະ​ບໍ­ລິ­ຫານ ຫົວ­ໜ້າ​ສາ­ຂາ ພະ­ນັກ­ງານ ແລະ ແຂກ​ຖືກ​ເຊີນ​ເຂົ້າ​ຮ່ວມ.

   ທ່ານ ສຸ​ພົນ ຈັນ­ທະ​ວີ​ໄຊ ໄດ້​ຂຶ້ນ​ຜ່ານ​ບົດ​ສະ­ຫຼຸບ​ການ­ເຄື່ອນ­ໄຫວ​ວຽກ​ງານ​ດຳ­ເນີນ​ທຸ­ລະ​ກິດ ປີ 2019 ແລະ ທິດ​ທາງ​ແຜນ­ການ​ປີ 2020 ໂດຍ​ຍົກ​ໃຫ້​ເຫັນ​ຜົນ­ງານ​ພົ້ນ​ເດັ່ນ​ທີ່​ຍາດ​ມາ​ໄດ້ ເປັນ­ຕົ້ນ: ໄດ້​ລົງ­ທຶນ​ຂະ­ຫຍາຍ​ຕາ​ໜ່າງ​ລະ­ບົບ​ໂທລະ​ຄົມ­ມະ­ນາ­ຄົມ ມູນ​ຄ່າ​ທັງ​ໝົດ 25,93 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 230,25 ຕື້​ກີບ ປັດ­ຈຸ­ບັນ ລາວ​ໂທລະ​ຄົມ​ມີ​ສະ­ຖາ­ນີ​ມື​ຖື 2G 3G 4G ແລະ 4,5G ມີ​ສະ­ຖາ­ນີ​ມື​ຖື​ທັງ​ໝົດ 7.436 ສະ­ຖາ­ນີ ໃນ​ນີ້ GSM 2G ຈຳ­ນວນ 1.928 ສະ­ຖາ­ນີ 3G ຈຳ­ນວນ 2.843 ສະ­ຖາ­ນີ ແລະ 4G ຈຳ­ນວນ 2.045 ສະ­ຖາ­ນີ 4,5G ຈຳ­ນວນ 620 ສະ­ຖາ­ນີ IP Core/ID RAN 1.343 ແລະ FTTH ຈຳ­ນວນ 66.294 Ports ກວມ 47% ຂອງ​ຫຼັງ­ຄາ​ເຮືອນ​ໃນ​ເຂດ​ເທ­ສະ​ບານ ມີ​ສັນ­ຍານ​ໂທລະ­ສັບ​ມື​ຖື​ຄວບ​ຄຸມ​ໄດ້​ທົ່ວ​ປະ­ເທດ ກວມ​ປະ­ຊາ­ກອນ 80% ໃນ​ນັ້ນ 4G ກວມ 58% ມີ​ລູກ​ຄ້າ​ໃຊ້​ໂທລະ­ສັບ​ມື​ຖື​ໃນ​ລະ­ບົບ 1,4 ລ້ານ​ເລກ​ໝາຍ ໂທລະ­ສັບ​ຕັ້ງ​ໂຕະ 33.000 ເລກ​ໝາຍ ໂທລະ­ສັບ​ວິນ​ໂຟນ 304.000 ເລກ​ໝາຍ ແລະ ອິນ​ເຕີ​ເນັດ 1,3 ລ້ານ​ລູກ​ຄ້າ ສາ­ມາດ​ສ້າງ​ລາຍ​ຮັບ​ໄດ້​ທັງ​ໝົດ 1.702,5 ຕື້​ກີບ (ລວມ​ອາ­ກອນ) ໃນ​ນັ້ນ ມີ​ກຳ­ໄລ​ສຸດ­ທິ 177,5 ຕື້​ກີບ ສາ­ມາດ​ປະ­ຕິ­ບັດ​ພັນ­ທະ​ໃຫ້​ລັດ­ຖະ­ບານ  471,1 ຕື້​ກີບ ເຊິ່ງ​ກວມ​ເອົາ​ອັດ­ຕາ​ສ່ວນ 27,6% ຂອງ​ລາຍ​ຮັບ​ທີ່​ລາວ​ໂທລະ​ຄົມ​ປະ­ຕິ­ບັດ​ໄດ້​ປີ 2019 ນອກ​ນັ້ນ ຍັງ​ໄດ້​ປັບ­ປຸງ​ລະ­ບຽບ​ນະ­ໂຍ­ບາຍ​ສະ­ຫວັດ­ດີ​ການ​ສັງ­ຄົມ​ຕ່າງໆ ເພື່ອ​ຍົກ​ສູງ​ລະ­ດັບ​ຊີ­ວິດ​ການ​ເປັນ​ຢູ່​ໃຫ້​ພະ­ນັກ­ງານ​ດີ​ຂຶ້ນ​ເລື້ອຍໆ ຄຽງ​ຄູ່​ກັບ​ການ​ດຳ­ເນີນ​ທຸ­ລະ​ກິດ​ຍັງ​ໄດ້​ປະ­ກອບ­ສ່ວນ​ຊ່ວຍ­ເຫຼືອ ແລະ ໃຫ້­ການ​ອຸ­ປະ­ຖຳ​ຕໍ່​ອົງ​ການ­ຈັດ­ຕັ້ງ ພັກ-ລັດ ແລະ ສັງ­ຄົມ ເປັນ​ມູນ​ຄ່າ 2,1 ຕື້​ກີບ ໃນ​ນັ້ນ ອັນ​ພົ້ນ​ເດັ່ນ​ໄດ້​ຊຸກ­ຍູ້​ງານ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ກອງ­ທັບ ຄົບ­ຮອບ 70 ປີ ມູນ​ຄ່າ 700 ລ້ານ​ກີບ.

   ສຳ­ລັບ​ແຜນ­ການ​ປີ 2020 ລາວ​ໂທລະ​ຄົມ​ຈະ​ສູ້​ຊົນ​ສ້າງ​ຖານ​ລູກ​ຄ້າ​ໃໝ່​ໃຫ້​ເພີ່ມ 97.934 ເລກ​ໝາຍ ແລະ ສ້າງ​ລາຍ​ຮັບ​ໃຫ້​ໄດ້​ທັງ​ໝົດ 1.804,9 ຕື້​ກີບ (ລວມ​ອາ­ກອນ) ທຽບ­ໃສ່​ປີ 2019 ເພີ່ມ​ຂຶ້ນ 6,3% ຄາດ​ຄະ­ເນ​ກຳ­ໄລ​ສຸດ­ທິ​ໃຫ້​ໄດ້ 371,3 ຕື້​ກີບ ເພີ່ມ​ຂຶ້ນ 33,5% ແລະ ຄາດ​ຄະ­ເນ​ຈະ​ສາ­ມາດ​ປະ­ຕິ­ບັດ​ພັນ­ທະ ແລະ ເງິນ​ປັນ​ຜົນ​ໃຫ້​ລັດ­ຖະ­ບານ 507,4 ຕື້​ກີບ ນອກ​ນັ້ນ ຍັງ​ຈະ​ໄດ້​ລົງ­ທຶນ​ທັງ​ໝົດ 26,9 ລ້ານ​ໂດ​ລາ ຫຼື ປະ­ມານ 238,84 ຕື້​ກີບ ເພື່ອ​ສືບ­ຕໍ່​ປັບ­ປຸງ ແລະ ຂະ­ຫຍາຍ​ເຄືອ​ຄ່າຍ​ການ​ໃຫ້​ບໍ­ລິ­ການ​ດ້ານ​ໂທລະ​ຄົມ ໂດຍ​ສະ­ເພາະ Mobile Broadband and Fixed Broadband ໃຫ້​ຮັບ­ປະ­ກັນ​ທາງ​ດ້ານ​ປະ­ລິ­ມານ ແລະ ຄຸນ​ນະ​ພາບ​ຂໍ້​ມູນ​ມີ​ຄວາມ​ປອດ​ໄພ ແລະ ເປັນ​ລະ­ບົບ​ທັນ​ສະ­ໄໝ ເພື່ອ​ຮັບ­ປະ­ກັນ​ໃຫ້​ແກ່​ການ​ບໍ­ລິ­ການ​ສັງ­ຄົມ ທັງ​ໝົດ​ເຫຼົ່າ​ນີ້​ກໍ​ເພື່ອ​ໃຫ້​ບັນ­ລຸ​ຕາມ​ແຜນ​ຍຸດ​ທະ​ສາດ ແລະ ວິ­ໄສ​ທັດ​ກ້າວ​ໄປ​ສູ່​ຍຸກ Lao Digital Life.

ຂ່າວທີ່ກ່ຽວຂ້ອງ