ສ້າງຄວາມເຂົ້າໃຈ ກ່ຽວກັບການປະຕິວັດອຸດສາຫະກຳ 4.0

873 14 ກ.ພ. 2020 ຂ່າວໜ້າ​ໜຶ່ງ

   ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ (ກວ​ຕ) ຈັດ​ສຳ​ມະ​ນາ​ການ​ປະ­ຕິ­ວັດ​ອຸດ­ສາ­ຫະ­ກຳ ຄັ້ງ​ທີ 4 ແລະ ຂະ​ບວນ​ການ​ນັກ­ວິ­ທະ­ຍາ­ສາດ​ໜຸ່ມ​ຂຶ້ນ​ວັນ​ທີ 11 ກຸມ­ພາ 2020 ທີ່​ສະ​ຖາ​ບັນ​ຄຸ້ມ​ຄອງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ໂດຍ​ເປັນ​ປະ­ທານ​ຂອງ​ທ່ານ ບໍ່​ວຽງ​ຄຳ ວົງ​ດາ­ລາ ລັດ­ຖະ­ມົນ­ຕີ ກະ­ຊວງ ກວ​ຕ ມີ​ທ່ານ ອາ​ລຸນ​ໄຊ ສູນ​ນະ­ລາດ ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ​ຊາວ​ໜຸ່ມ ປະ­ຊາ­ຊົນ​ປະ­ຕິ­ວັດ​ລາວ (ສຊປລ) ພ້ອມ​ດ້ວຍ​ບັນ­ດາ​ຫົວ­ໜ້າ​ກົມ ສະ​ຖາ​ບັນ ແລະ ສະ­ມາ­ຊິກ​ຊາວ​ໜຸ່ມ​ອ້ອມ​ຂ້າງ​ເຂົ້າ​ຮ່ວມ.

   ເພື່ອ​ເສີມ​ຂະ­ຫຍາຍ​ບົດ­ບາດ​ຄວາມ​ສຳ­ຄັນ​ວຽກ​ງານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ໃນ​ຖັນ​ແຖວ​ຊາວ​ໜຸ່ມ-ໄວ​ໜຸ່ມ ໂດຍ​ສະ­ເພາະ ຄວາມ​ຮູ້ ແລະ ບົດ­ຮຽນ​ກ່ຽວ​ກັບ​ການ​ປະ­ຕິ­ວັດ​ອຸດ­ສາ­ຫະ­ກຳ ຄັ້ງ​ທີ 4 ຫຼື ຍຸກ​ອຸດ­ສາ­ຫະ­ກຳ 4.0 ທີ່​ມີ​ບົດ­ບາດ​ສຳ­ຄັນ​ຕໍ່​ກັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃນ​ຍຸກ​ປັດ­ຈຸ­ບັນ​ຂອງ​ແຕ່​ລະ​ຂົງ­ເຂດ​ວຽກ​ງານ.

   ທ່ານ ບໍ່​ວຽງ​ຄຳ ວົງ​ດາ­ລາ ກ່າວ​ວ່າ: ມາດ​ຕະ­ການ​ສຳ­ລັບ​ລາວ​ເຮົາ ເພື່ອ​ຮອງ​ຮັບ​ການ​ປະ­ຕິ­ວັດ​ອຸດ­ສາ­ຫະ­ກຳ ຄັ້ງ​ທີ 4 ທີ່​ກຳ­ນົດ​ໄວ​ໃນ 6 ແຜນ​ງານ ຄື: ຕ້ອງ​ໄດ້​ເອົາ­ໃຈ­ໃສ່​ໂຄ­ສະ­ນາ​ເຜີຍ­ແຜ່​ໃຫ້​ທົ່ວ​ສັງ­ຄົມ​ຮັບ​ຮູ້ ແລະ ເຂົ້າ­ໃຈ​ຢ່າງ​ເລິກ­ເຊິ່ງ​ເຖິງ​ທາດ​ແທ້​ຂອງ​ການ​ປະ­ຕິ­ວັດ​ອຸດ­ສາ­ຫະ­ກຳ 4.0 ຕ້ອງ​ສ້າງ ແລະ ປັບ­ປຸງ​ບັນ­ດາ​ກົດ­ໝາຍ ນິ­ຕິ​ກຳ​ລຸ່ມ​ກົດ­ໝາຍ ກົນ​ໄກ​ການ​ປະ­ສານ​ງານ ແລະ ການ​ຄຸ້ມ​ຄອງ​ລັດ​ຄຸ້ມ​ຄອງ​ເສດ­ຖະ­ກິດ-ສັງ­ຄົມ ຕາມ​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ ໃນ​ຍຸກ​ອຸດ­ສາ­ຫະ­ກຳ​ດັ່ງ​ກາວ ແລະ ບຸກ​ທະ­ລຸ​ໃນ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ໃນ​ການ​ຄົ້ນ­ຄວ້າ​ນຳ​ໃຊ້​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ​ໃໝ່​ທີ່​ທັນ​ສະ­ໄໝ ເອົາ­ໃຈ­ໃສ່​ເປີດ​ກວ້າງ​ການ​ບໍ­ລິ­ການ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ​ໃຫ້​ສັງ­ຄົມ ພ້ອມ​ທັງ​ເປີດ​ກວ້າງ​ການ​ຮ່ວມ​ມື​ກັບ​ຕ່າງ­ປະ­ເທດ ຕາມ​ແນວ­ທາງ​ນະ­ໂຍ­ບາຍ​ການ​ຕ່າງ­ປະ­ເທດ​ຂອງ​ພັກ ເພື່ອ​ແນ­ໃສ່​ເຮັດ​ໃຫ້­ການ​ປະ­ຕິ­ບັດ​ແຜນ​ງານ​ດັ່ງ­ກ່າວ​ມີ​ຜົນ­ສຳ­ເລັດ​ເທື່ອ​ລະ​ກ້າວ.

   ສຳ­ລັບ​ຂະ​ບວນ​ການ​ທີ່​ຕິດ​ພັນ​ກັບ 4 ບຸກ ຂອງ​ຊາວ​ໜຸ່ມ ແມ່ນ​ເລັ່ງ​ໃສ່​ການ​ສ້າງ​ຈິດ​ສຳ­ນຶກ​ດ້ານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ​ຂອງ​ຍຸກ​ອຸດ­ສາ­ຫະ­ກຳ​ໃຫ້​ຊາວ​ໜຸ່ມ​ລາວ ພ້ອມ​ທັງ​ສ້າງ​ເງື່ອນ­ໄຂ​ໃຫ້​ຊາວ​ໜຸ່ມ​ໄດ້​ຮ່ຳ­ຮຽນ​ພັດ­ທະ­ນາ​ຄວາມ​ຮູ້ ຄວາມ​ສາ­ມາດ​ໃນ​ຍຸກ​ອຸດ­ສາ­ຫະ­ກຳ 4.0 ສ້າງ­ຕັ້ງ​ບັນ­ດາ​ສະ​ຖາ​ບັນ ແລະ ສູນ​ຄົ້ນ­ຄວ້າ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ 4.0 ໃຫ້​ເຂັ້ມ­ແຂງ​ທາງ​ດ້ານ​ປະ­ລິ­ມານ ແລະ ຄຸນ​ນະ​ພາບ ໄປ​ຄຽງ​ຄູ່​ກັບ​ການ​ຊຸກ­ຍູ້​ສົ່ງ­ເສີມ​ການ​ສ້າງ​ທຸ­ລະ​ກິດ​ນະ​ວັດ­ຕະ​ກຳ Start-up ແລະ​ອື່ນໆ.

ຂ່າວທີ່ກ່ຽວຂ້ອງ