ທະນາຄານໂລກ ເພີ່ມທຶນເພື່ອການຄຸ້ມຄອງປ່າໄມ້ແບບຍືນຍົງຢູ່ລາວ

988 14 ກ.ພ. 2020 ຂ່າວໜ້າ​ໜຶ່ງ

   ວັນ​ທີ 11 ກຸມ­ພາ 2020 ທີ່​ນະ­ຄອນ​ວໍ​ຊິງ​ຕັນ ສະ­ຫະ­ລັດ​ອາ​ເມ​ຣິ​ກາ ສະ­ພາ​ບໍ­ລິ­ຫານ​ຂອງ​ທະ­ນາ­ຄານ​ໂລກ (WB) ໄດ້​ອະ­ນຸ­ມັດ​ທຶນ 5 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 42 ຕື້​ກີບ ໃຫ້​ລັດ­ຖະ­ບານ​ລາວ ເພື່ອ​ສືບ­ຕໍ່​ໂຄງ­ການ​ຄຸ້ມ​ຄອງ​ປ່າ­ໄມ້​ໃຫ້​ຍືນ​ຍົງ​ແບບ​ມີ​ສ່ວນ​ຮ່ວມ (Scaling-Up Participatory Sustainable Forest Management Project) ເປັນ​ການ​ປັບ­ປຸງ​ການ​ຄຸ້ມ​ຄອງ​ປ່າ­ໄມ້​ໃຫ້​ຍືນ​ຍົງ ປັບ­ປຸງ​ການ​ດຳ­ລົງ​ຊີ­ວິດ​ຂອງ​ຊຸມ​ຊົນ​ໃຫ້​ດີ​ຂຶ້ນ ແລະ ຫຼຸດ­ຜ່ອນ​ການ​ປ່ຽນ­ແປງ​ດິນ​ຟ້າ​ອາ­ກາດ.

   ທ່ານ ນິ​ໂຄ​ລາ ປອນ​ຕາ​ຣາ ຫົວ­ໜ້າ​ຫ້ອງ­ການ​ທະ­ນາ­ຄານ​ໂລກ​ປະ­ຈຳ​ລາວ ໄດ້​ກ່າວ​ວ່າ: ການ​ສະ­ໜອງ​ທຶນ​ເພີ່ມ ຈະ​ຊ່ວຍ​ໃຫ້​ລາວ​ຄຸ້ມ​ຄອງ​ປ່າ​ຜະ­ລິດ​ເຊິ່ງ​ສຳ­ຄັນ​ຕໍ່​ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ ໃຫ້​ເຕີບ​ໂຕ​ທາງ​ດ້ານ​ເສດ­ຖະ­ກິດ​ຕາມ​ທິດ​ສີ­ຂຽວ ມີ​ສົມ​ດູນ ແລະ ຍືນ​ນານ ແລະ ສອດ­ຄ່ອງ​ກັບ​ຄວາມ​ມຸ້ງ​ມາດ​ປາ­ຖະ­ໜາ​ຂອງ​ລັດ­ຖະ­ບານ​ລາວ ທີ່​ມີ​ບຸ­ລິ­ມະ­ສິດ​ພັດ­ທະ­ນາ​ປະ­ຊາ­ຊົນ​ໃຫ້​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ ນັບ​ແຕ່​ປີ 2013 ເປັນ­ຕົ້ນ​ມາ ໂຄງ­ການ​ຄຸ້ມ​ຄອງ​ປ່າ­ໄມ້​ໃຫ້​ຍືນ​ຍົງ​ແບບ​ມີ​ສ່ວນ​ຮ່ວມ ໄດ້​ບັນ­ລຸ​ໝາກ­ຜົນ​ທີ່​ສຳ­ຄັນ ເຊັ່ນ: ໄດ້​ຍົກ​ລະ­ດັບ​ສະ­ຖາ­ນະ​ການ​ດຳ­ລົງ​ຊີ­ວິດ ຂອງ​ປະ­ຊາ­ຊົນ​ບັນ­ດາ­ເຜົ່າ ທີ່​ຕິດ​ພັນ​ກັບ​ປ່າ­ໄມ້​ຫຼາຍ​ກວ່າ 650 ບ້ານ ພາຍ​ໃນ 13 ແຂວງ ໄດ້​ປັບ­ປຸງ​ການ​ວາງ​ແຜນ ແລະ ຄຸ້ມ​ຄອງ​ເຂດ​ປ່າ​ຜະ­ລິດ 41 ແຫ່ງ ຂອງ​ເຂດ​ປ່າ​ຜະ­ລິດ​ທັງ​ໝົດ 51 ແຫ່ງ​ທົ່ວ​ປະ­ເທດ ກວມ​ເອົາ​ເນື້ອ­ທີ່ 2,3 ລ້ານ​ເຮັກ­ຕາ ຜົນ​ໄດ້​ຮັບ​ນີ້​ມີ​ຄວາມ​ໝາຍ ແລະ ຄວາມ​ສຳ­ຄັນ​ຢ່າງ​ຍິ່ງ ຕໍ່​ການ​ຫຼຸດ­ຜ່ອນ​ການ​ທຳ­ລາຍ​ປ່າ­ໄມ້ ແລະ ການ​ປ່ອຍ​ອອກ​ອາຍ​ເຮືອນ​ແກ້ວ​ຈາກ​ການ​ທຳ­ລາຍ​ປ່າ­ໄມ້ ນັບ​ແຕ່​ເລີ່ມ​ຕົ້ນ​ໂຄງ­ການ​ໄດ້​ສ້າງ​ໂອ­ກາດ​ອັນ​ໃໝ່​ໃຫ້​ປະ­ຊາ­ຊົນ ແລະ ພາກ​ເອ­ກະ​ຊົນ​ເພື່ອ​ພັດ­ທະ­ນາ​ດ້ານ​ເສດ­ຖະ­ກິດ ທີ່​ຕິດ​ພັນ​ກັບ​ການ​ຄຸ້ມ​ຄອງ​ປ່າ­ໄມ້​ໃຫ້​ຍືນ​ຍົງ ເພື່ອ​ເຮັດ​ໃຫ້​ໂອ­ກາດ​ດັ່ງ​ທີ່​ກ່າວ​ມາ​ນີ້​ປາ­ກົດ​ເປັນ​ຈິງ ແມ່ນ​ຈຳ­ເປັນ​ຕ້ອງ​ມີ​ທຶນ ແລະ ມີ​ການ​ຊ່ວຍ­ເຫຼືອ​ທາງ​ດ້ານ​ວິ­ຊາ​ການ​ເພີ່ມ​ຕື່ມ​ໂດຍ​ສະ­ເພາະ ກ່ຽວ­ຂ້ອງ​ກັບ​ການ​ມີ​ສ່ວນ​ຮ່ວມ​ຂອງ​ຊຸມ​ຊົນ ແລະ ການ​ຄຸ້ມ​ຄອງ-ບໍ­ລິ­ຫານ.

   ທ່ານ ສະ­ຕີ​ເຟັນ ເດ​ນີ​ໂອ ຫົວ­ໜ້າ​ຊ່ຽວ­ຊານ​ສະ­ເພາະ​ດ້ານ​ສິ່ງ­ແວ­ດລ້ອມ​ຂອງ​ທະ­ນາ­ຄານ​ໂລກ​ປະ­ຈຳ​ລາວ ໄດ້​ກ່າວ​ວ່າ: ການ​ສະ­ໜອງ​ທຶນ​ເພີ່ມ​ໃຫ້​ໂຄງ­ການ​ຄຸ້ມ​ຄອງ​ປ່າ­ໄມ້​ໃຫ້​ຍືນ​ຍົງ​ແບບ​ມີ​ສ່ວນ​ຮ່ວມ ຈະ​ເພີ່ມ​ຄວາມ​ເຂັ້ມ­ແຂງ​ດ້ານ​ການ​ຄຸ້ມ​ຄອງ-ບໍ­ລິ­ຫານ​ຊັບ­ພະ­ຍາ­ກອນ​ທຳ​ມະ​ຊາດ​ໃຫ້​ດີ​ຂຶ້ນ ທັງ​ເປັນ​ການ​ສ້າງ​ໂອ­ກາດ​ດ້ານ​ການ​ລົງ­ທຶນ​ຂອງ​ພາກ​ເອ­ກະ​ຊົນ ຈຳ­ນວນ​ທຶນ​ເພີ່ມ​ນີ້ ໄດ້​ມາ​ຈາກ​ສະ­ມາ­ຄົມ​ເພື່ອ​ການ​ພັດ­ທະ­ນາ​ສາ­ກົນ (IDA) ຂອງ​ທະ­ນາ­ຄານ​ໂລກ ທີ່​ສ້າງ­ຕັ້ງ​ຂຶ້ນ​ປີ 1960 ເພື່ອ​ຊ່ວຍ­ເຫຼືອ​ບັນ­ດາ​ປະ ເທດ​ທຸກ​ຍາກ​ທີ່​ສຸດ​ໃນ​ໂລກ ດ້ວຍ​ການ​ສະ­ໜອງ​ທຶນ​ຊ່ວຍ­ເຫຼືອ​ລ້າ ທຶນ​ກູ້​ຢືມ​ໃນ​ອັດ­ຕາ​ດອກ​ເບ້ຍ​ຕ່ຳ ແລະ ບໍ່​ມີ​ດອກ​ເບ້ຍ​ໃຫ້​ບັນ ດາ​ໂຄງ­ການ ແລະ ແຜນ​ງານ​ທີ່​ສົ່ງ­ເສີມ​ການ​ເຕີບ​ໂຕ​ທາງ​ດ້ານ​ເສດ­ຖະ­ກິດ ຫຼຸດ­ຜ່ອນ​ຄວາມ­ທຸກ​ຍາກ ແລະ ປັບ­ປຸງ​ຊີ­ວິດ​ການ​ເປັນ​ຢູ່.

ຂ່າວທີ່ກ່ຽວຂ້ອງ